NÚMEROS 30
30
Imatalla Diosman carashapacha nishcacunata carachun mandashcami
1Moisesca, Israel aillucunata mandajcunamanmi, cashna nishpa villajurca: “Mandaj Diosca, cashnami mandarca: 2‘Maijan cashpapash Mandaj Diospajta rurangapaj nishpa, na cashpaca tucui almahuan imagutapash rurashapachami nishpa paipaj shimihuan juramentushcataca, na yangapi churangachu. Paipaj shimihuan tucui imatalla nishcashnallatami pactachinga.
3Ashtahuangarin maijan huarmi cashpapash, cuitsara cashpa paipaj taitapaj huasipi causajushpa, Mandaj Diospajta rurangapajmi, tucui munaihuan pactachingapaj ari nijunga. 4Chai cuitsa tucui almahuan Diospajta rurashapacha nijujta, paipaj taita uyashpapash, imatapash na nishpa saquijpica, pai imata rurashapacha nijushcataca chaitapachami pactachinga. Tucui almahuan Diospajta rurashapachami nijushcataca, chaitapachami pactachinga. 5Ashtahuangarin Diospajta rurashapachami nijujta cuitsapaj taita uyashca chai punllallata jarcajpica, chai cuitsa tucui almahuan Diospajta rurashapacha nijushcataca saquichunlla. Pai shina nijushcataca, paipaj taita jarcajpi na pactachishcamandami, Mandaj Diospash cunganga.
6Ashtahuangarin cazarashca huarmi cashpapash, tucui almahuan Diospajta rurangapajmi, paipaj shimihuambacha pactachishami nijujta, 7paipaj cusa uyashpapash na jarcajpica chai huarmica, paipaj tucui almahuan Diospajta rurashapachami nijushcataca, chaitapachami pactachinga. Tucui almahuan Diospajta rurashapachami nijushcataca, chaitapachami pactachinga. 8Ashtahuangarin chai huarmi, shina nijushcata paipaj cusa yachashpa jarcajpica, Diospajta rurashapacha nijushcapash, paipaj shimihuambacha, tucui almahuan Diospajta rurashapacha nijushcapash yangami canga. Pai shina nijushcataca, Mandaj Diospash cungangami.
9Ashtahuangarin sapalla huarmi cashpa, na cashpaca cusa jichushca cashpapash, paipaj tucui almahuan Diospajta rurashapacha nijushcataca, chaitapachami pactachinga.
10Cusayu huarmipash, cusapaj huasipi causajushpa, paipaj tucui almahuan Diospajta rurashapacha nishpami juramentunga. 11Chai huarmi shina nijujta paipaj cusa uyashpapash imatapash na nishpa saquijpica, Diospajta rurashapacha nijushcataca, chaitapachami pactachinga. Tucui almahuan Diospajta rurasha nijushcataca, chaitapachami pactachinga. 12Ashtahuangarin shina nijujta paipaj cusa uyashpa chai punllallata yangapi churajpica, paipaj shimihuan Diospajta rurashapacha nijushcapash yangami canga. Shina nijushcata paipaj cusa jarcashcamandami, pai shina nijushcataca Mandaj Diospash cunganga.
13Diospajta rurashapacha nijushcata, tucui almahuan llaquirishpa juramentushcataca, cusami rurachun saquinga, na cashpaca cusallatami yangapi churanga. 14Diospajta rurashapachami nijujta paipaj cusa uyashpapash, punllandi na imatapash nishpa saquishpaca, chai huarmi rurashapacha nijushcatapash, Diospajta ruranatapacha charishcatapash rurachunlla nishpami saquishca. Pai rurashapacha nijujta uyashca punllapash, cusa upalla saquishcamandami rurachunlla nishpa saquishca. 15Ashtahuangarin shina nijujta uyashpa saquishca jipara yangapi churajpica, huarmipaj juchaca cusapaj jahuami canga’ nishpami mandarca” nijurcami.
16Cusayu huarmi cajpi, Diospajta rurachun cusa saquijpi na saquijpi, cuitsara cashpa paipaj taitapaj huasipi causajujpi, Diospajta rurachun paipaj taita saquijpi na saquijpipash, imashnalla ruranamanda Mandaj Dios, Moisesta mandashcacunami.
Currently Selected:
NÚMEROS 30: QUII
Highlight
Copy
Compare
Share
Want to have your highlights saved across all your devices? Sign up or sign in
Quichua Imbabura Bible © United Bible Societies, 1994.
