MARCOS 16
16
Jesús causarishcatami villajun
(Mat. 28:1-10; Luc. 24:1-12; Juan 20:1-10)
1Samana punlla ña yalijpimi, mishquillagu ashnajuj jambicunata randingapaj, Magdala shuti pueblomanda Mariandi, Josepaj mama Mariandi, Salomé shuti huarmindi rinajurca. Paicunaca, Jesuspaj cuerpogupi talishpa javingapajmi randinajurca. 2Indi ña llujshishca domingo tutamandatami chai huarmicunaca, Jesusta pambashca utujuman chayanajurca. 3Paicunaca:
—Utuju punguta quilpashca rumitaca, ¿pita ladoman suchuchinga?— nishpandimi rinajurca.
4Ashtahuangarin paicuna chayashpa ricujpica, utuju punguta quilpashca rumitaca suchuchishcatami ricunajurca. Chai rumica, jatumbachami carca. 5Chai utuju ucuman yaicushpaca, ali ladoman shuj huambragu tiajujtami ricunajurca. Chai huambraguca jatun, yuraj churajunata churajushcami carca. Paita ricushpaca, ninandami manllarinajurca. 6Ashtahuangarin chai huambraguca, paicunataca cashnami nirca:
—Na manllarinachu canguichi. Cangunaca, chacatai tucushpa huañushca, Nazaret pueblomanda Jesustami mascaj shamushcanguichi. Paica causarircami. Paita maipi churashca pushtuta ricuichi, illanmi. 7Cunanga, paipaj yachajujcunamambash, Pedromambash ucha villagrichi. Pai villashcashnami, Galilea llactaman cangunata ñaupashpa rijun. Chaipimi ricunguichi— nircami.
8Shina nijpimi chai huarmicunaca, utujumandaca llujshishpa, manllaihuan chujchushpandi calpanajurca. Shina ninanda manllarishpami, pihuambash na rimashpa upalla rinajurca.
Magdala shuti pueblomanda Mariamanmi, Jesús ricurishca
(Juan 20:11-18)
9Domingo tutamandata nara ali punllayajpillata, causarishca jipami Jesusca, Magdala shuti pueblomanda Mariamanra punda ricurirca. Chai Mariamandami, canchis ayacunata Jesusca llujchishca carca. 10Chai huarmimi, Jesusta cumbashpa purishcacuna yachachun, paicunaman villagrirca. Paicunaca huacashpa, llaqui llaquimi tianajurca. 11Paicunaca, Jesús causarishcata chai huarmi ricushcata villajujtaca, na crinajurcachu.
Jesusca, paipaj ishcai yachajujcunamanmi ricurishca
(Luc. 24:13-35)
12Ashtahuangarin chai jipami, shuj tucushpa paipaj yachajuj, ishcai puramanlla ñanda pambaman rinajujpi Jesusca ricurirca. 13Shina ricurijpimi, caishujcunaman villangapaj tigranajurca. Paicuna villajpipash, na crinajurcachu.
Villagringuichi nishpami Jesusca, paipaj yachajujcunata mingashca
(Mat. 28:16-20; Luc. 24:36-49; Juan 20:19-23)
14Ña puchucaipica, mezapi micushpa tianajujpimi, chunga shuj yachajujcunaman Jesusca ricurirca. Shina ricurishpaca, causarishcata ricujcuna villajujpipash, na crishpa shinlli shungucuna tucushcamandami, shinllita rimajurca. 15Shinallata paicunataca, cashnatapashmi nijurca: “Richi, tucui cai pachapi causajcunaman cai ali villaita villagrichi. 16Canguna villajpi crishpa bautizai tucushpaca, quishpichi tucungami. Ashtahuangarin na crishpaca, ninanda llaquichi tucungapachami. 17Ñucata crijcunataca, imatapash juyaillata rurashpa ricuchishcacunaca, paicunahuanmi puringa: Ñuca shutipi rimashpami, ayacunataca gentecunamanda llujchinajunga. Shinallata mushuj rimaicunatami rimanajunga. 18Culebracunata maquihuan japishpapash, na imapash tucungachu. Venenota ufiashpapash, na imapash tucungachu. Huañujujcunapaj jahuapi maquita churajpipash, ali tucunajungami” nijurcami.
Jahua pachaman Jesús rishcatami villajun
(Luc. 24:50-53)
19Chashna villashca jipami, Apunchi Jesusca jahua pachaman apai tucurca. Chaipimi, Taita Diospaj ali ladopi tiarirca. 20Chai yachajujcuna llujshishpa rishpaca, tucui llactacunapimi villanajurca. Paicuna villanajuchunga, Apunchi Jesús shinllitapacha ayudajpimi, juyailla ricuchinacunata ruranajurca. Shina cachun.
Currently Selected:
MARCOS 16: QUII
Highlight
Share
Copy
Want to have your highlights saved across all your devices? Sign up or sign in
Quichua Imbabura Bible © United Bible Societies, 1994.