MATEO 5
QUII
5
Urcupi Jesús yachachishpaca:
Ninanda cushijushpa causajcunamandami villashca
(Luc. 6:20-23)
1Ashtaca ashtaca gentecunata ricushpami, Jesusca urcuman vichai rirca. Chaipi tiarijpimi, paipaj yachajujcunaca, paipaj ladoman shamunajurca. 2Chaipimi Jesusca, paicunaman yachachishpa cashna nijurca:
3“Diosmanda yachajungapaj, paicunapaj shungupi ninanda munajcunaca, ninandami cushijun. Jahua pachamanda shamuj mandanaca, paicunapajmi.
4Llaquihuan huacashpa causajcunaca, ninandami cushijun. Paicunami cushijuita japinga.
5Na ñapash fiñarijllacunaca, ninandami cushijun. Paicunami, cai pachata paicunapaj cachun japinga.
6Yarjachinshna, yacunayachinshna imatapash cashcatapacha ruranata munajcunaca, ninandami cushijun. Paicunami, imatapash cashcatapacha ruranataca, na munangacaman japinga.
7Shujcunata llaquishpa juyajcunaca, ninandami cushijun. Paicunami, Dios llaquinata japinajunga.
8Shungupi ima mapapash illajcunaca, ninandami cushijun. Paicunami, Taita Diostaca ricunga.
9Fiñanajushpa causajcunata alichijcunaca, ninandami cushijun. Paicunaca: ‘Taita Diospaj huahuacunami’ ni tucungami.
10Imatapash cashcatapacha rurashcamanda llaquichi tucushpa causajcunaca, ninandami cushijun. Jahua pachamanda shamuj mandanaca, paicunapajmi.
11Ñucata catinajujpi cangunata na ricunayachishpa catiriashpa llaquichijpi, imatapash llullashpa nalicachijpica, ninanda cushijunguichi. 12Ninandapacha cushijunguichilla. Canguna juyailla japinaca, jahua pachapimi. Profetacunatapash, chashnallatami catiriashpa llaquichinajurca. Paicunaca, cangunapaj pundami causanajurca.
Cai pachapi causajcunapaca, cachigushna canatami villajushca
(Mar. 9:50; Luc. 14:34-35)
13Cangunami, cai pachapi causajcunapaca cachigushna canguichi. Cachi huaglijpica, ¿imahuanshi mishquilla micunagu tucunga? Huaglishpaca, imapajpash nalichu. Ashtahuangarin ñambi shitajpi gentecuna sarungapajllami canga.
Cai pachapi causajcunapaca, michagushna causanatami villajun
14Cangunami, cai pachapi causajcunata punchayachijuj michagushna canguichi. Urcu jahuapi shayachishca puebloguca, na pacalla tiajunllu. 15Michata japichishpaca, cajón ucupica na churanllu. Ashtahuangarin candeleropimi churan. Shina churajpimi, huasi ucupi tiajcunataca tucuillata punchayachin. 16Cangunapash, gentecunapaj ñaupajpica, chashnallatami michagushna punchayachina canguichi. Canguna aliguta rurashpa causanajujta ricushpami, shuj gentecunapash jahua pachapi tiajuj cangunapaj Taitataca, ninanda alicachinajunga.
Mandashca shimicunatami, Jesús yachachishca
17Mandashca shimicunata, Profetacuna villashca shimicunata yangapi churashpa tucuchingapaj shamushcataca, na yarinachu cahuanguichi. Ashtahuangarin chaicunata pactachingapajmi shamurcani. 18Na llullashpami, cangunataca cashna nini: Jahua pacha, cai pacha tucuringacamambash, mandashca shimicunaca shuj puntollapash, shuj tildellapash na anchuringachu. Tucuilla pactangacaman tiajungallami. 19Mandashca shimicunapi shuj uchillagu tiajujta na cazushpa, shujcunatapash chashnallata rurachun yachachijushpaca, jahua pachapi Dios mandajuj llactapimi, paica uchillami ni tucujunga. Ashtahuangarin mandashca shimicunata cazushpa, shujcunamambash chashnallata cazuchun yachachijushpaca, jahua pachapi Dios mandajuj llactapimi, paica jatunmi ni tucujunga. 20Cangunamanmi cashna villajuni: Mandashca shimita yachachijcunatapash, fariseocunatapash yali imatapash cashcatapacha na rurashpa causashpaca, jahua pachapi Dios mandajuj llactaman yaicuitaca, napacha ushanachu canguichi.
Pitapash na fiñanatami, Jesús yachachishca
(Luc. 12:57-59)
21Cangunapaj ñaupa taitacunata, cashna nishcataca uyarcanguichimi: ‘Ama huañuchinguichu. Maijambash huañuchishpaca, juezpajman apai tucushpami, ninanda llaquichi tucunga’ nircami. 22Ashtahuangarin ñucami, cangunataca cashna nini: Maijambash paipaj huauquita fiñashpa rimashpaca, juezpaj ñaupajman apai tucushpa, llaquichi tucunatami charin. Maijambash paipaj cumbata: ‘Tundu’ nishpaca, mandaj puralla tandanajushcacunapaj ñaupajpimi, llaquichi tucunga. Maijambash paipaj huauquita: ‘Muspa runa’ nishpaca, ucu pachapi rupajuj ninaman shitai tucungapajmi purijun.
23Shinamandami, Taita Diosman imagutapash carangapaj, altarman apashpa ña chayajushpa, cambaj huauqui canda fiñashca purijushcata yaringui. 24Shina yarishpaca, carangapaj apamushcataca altar ñaupajpi saquishpa, cambaj cumbahuanra ali tucungapaj ringui. Chai jipaca, Diosman carangapaj apamushcataca caragringuilla ninimi.
25Canda fiñaj runa canda cayaj cachashpa juezpajman apajujpica, ñanda rijushpallata, ucha paihuan ali tucungui. Paihuan can na ali tucujpica, pactarallapash candaca juezpaj maquipi churanman. Juezca candaca, llaquichij runamanmi cunga. Chai runaca, prezuna huasipimi churanga. 26Na llullashpami, cashna nini: Prezuna huasipica, canmanda cuna culquita tucuilla cungacamanmi, na llujshi ushashpa tiajungui.
Cazarashca jahua ama shujhuan causachunmi, Jesusca yachachishca
27‘Cazarashca jahua ama shujhuan causanguichu’ nishcataca uyarcanguichimi. 28Ashtahuangarin ñucami, cangunataca cashna nini: Maijambash shujpaj huarmitara ñucapaj cashcanman yashpa ricujushpaca, ñami paipaj shungupi yarishpallata, chai huarmihuan huainayashca.
29Shina cashcamanda, cambaj ali lado ñavi imatapash ricushpa nalita rurachingapaj munajpica, surcushpa shitangui. Cambaj tucuilla cuerpohuan ucu pachaman shitai tucungapaj randica, cuerpomanda shuj parteguta shitanami ashtahuan ali. 30Shinallata cambaj ali lado maqui imatapash japishpa, nalita rurachingapaj munajpica, muchushpa shitangui. Cambaj tucuilla cuerpohuan ucu pachaman shitai tucungapaj randica, cuerpomanda shuj parteguta anchuchinami ashtahuan ali.
Cazarashpaca, napacha jichunachu nishpami Jesusca yachachishca
(Mat. 19:9; Mar. 10:11-12; Luc. 16:18)
31Cashnatapashmi nishca carca: ‘Maijambash paipaj huarmita jichungapaj munashpaca, jichushpa saquina cartata cushpa, jichushpa saquinallami’ nishcami carca. 32Ashtahuangarin ñucami, cangunataca cashna nini: Napash huainayajpita, paipaj huarmita shuj runa yangamanda jichushpaca, cusallatami cazarashca jahua shujhuan causachun saquijun. Shinallata cusa jichushca huarmihuan pipash cazarashpaca, cazarashca jahuami shujhuan causajun.
Na juramentunachu nishpami, Jesusca yachachishca
33Cangunapaj ñaupa taitacunaman, cashna nishpa villashcatapash uyarcanguichimi: ‘Na llullashpa juramentunachu cangui. Ashtahuangarin can juramentushcataca, Jatun Diospaj ñaupajpi pactachinami cangui’ nircami. 34Ashtahuangarin ñucami, cangunataca cashna nini: Imamandapash na yangataca juramentunachu canguichi. Jahua pacha nishpapash, na juramentunachu canguichi. Jahua pachaca, Taita Dios mandashpa tiajunami. 35‘Cai pacha’ nishpapash, na juramentunachu canguichi. Cai pachapica, Taita Diosmi sarujun. ‘Jerusalén’ nishpapash, na juramentunachu canguichi. Chai puebloca, jatun Mandajpaj pueblomi. 36‘Ñucamandallata’ nishpapash, na juramentunachu cangui. Cambaj ajchata yurajman, yanaman tigrachitaca, shujllatapash napacha ushanguichu. 37Ashtahuangarin imata rurangapajpash, usharina cajpillami: ‘Ari’ nina canguichi. Na usharina cajpica: ‘Na’ ninami canguichi. Imatapash ashtahuan mirachishpa nirijujpica, diablomi yarichijun.
Fiñajcunatapash juyanami nishcami
(Luc. 6:27-36)
38‘Pipash fiñashpa ñavita surcujpica, paitapash ñavita surcunami. Shinallata quiru llujshijta huactajpipash, paitapash quiru llujshijta huactanami’ nishcataca uyarcanguichimi. 39Ashtahuangarin ñucami, cangunataca cashna nini: Cangunata llaquichijpica, na tigrachishpa saquinguichilla. Pipash canda ali lado ñavipi huactajpica, shuj ladopipash huactachun ricuchinguilla. 40Túnica nishca cambaj churajunata pipash quichungapaj munashpa fiñashpa rimajpica, cambaj jahualla churajunatapash apachun saquinguilla. 41Pipash canda imatapash apachishpa, shuj kilómetro chaupitashna apajujpica, quimsa kilometroshna ringui. 42Pipash canda imagutapash mañajpica, caranguilla. Shinallata imagutapash mañachi ningapaj shamujpipash, ama mitsashpa mañachinguilla.
43‘Cambaj cumba runagutaca juyangui, ashtahuangarin canda na ricunayachij runataca fiñangui’ nishcataca uyarcanguichimi. 44Ashtahuangarin ñucami, cangunataca cashna nini: Cangunata fiñajcunatapash, juyanami canguichi. Imapash tucushpaca, alichari canman nijcunatapash bendicianami canguichi. Cangunata na ricunayachij gentecunamambash, aligutami rurana canguichi. Cangunata catiriashpa llaquichij gentecunamandapash, Diosta mañanami canguichi. 45Chashna causashpami, jahua pachapi tiajuj cangunapaj Taitapaj huahuacunapacha canguichi. Paillatami inditaca, nali causajcunamambash, ali causajcunamambash punllayachijun. Shinallata paillatami tamiatapash, imatapash cashcatapacha rurashpa causajcunaman, imatapash cashcatapacha na rurashpa causajcunamambash tamiachimujun. 46Cangunata juyajcunatalla juyashpa causashpaca, ¿ima alitashi japinguichi? ¿Nachu impuestota japijcunapash, paicunapura juyarishpa causan? 47Shinallata huauqui puralla alillachu capangui nirinajushpaca, ¿shujcunapaca ima alitata rurashpa causanguichi? ¿Nachu Diosta na cazujcunapash, paicuna puralla alillachu capangui ninajun? 48Jahua pachapi tiajuj cangunapaj Taitaca, ima pandatapash na rurajmi. Shinallata cangunapash, ima pandatapash na rurajcuna caichi.

Texto © SOCIEDADES BÍBLICAS UNIDAS 1994

Learn More About Diospaj Shimi