MATEO 27
27
Jesustaca, Pilatopaj ñaupajmanmi apanajushca
(Mar. 15:1; Luc. 23:1-2; Juan 18:28-32)
1Ña punllayajujpimi, curacunata mandajcunaca, israelcunata mandaj rucucunapash, Jesusta huañuchingapaj tucuilla parlarinajurca. 2Chai jipami Jesustaca huatashpa apashpa, mandaj Poncio Pilatopaj maquipi churanajurca.
Judas Iscariote huañushcatami villajun
3Jesustaca, ña huañuchi tucugrijujta ricushpami, paita japichij Judas runaca llaquirijurca. Shina llaquirishpami, chai quimsa chunga culquicunataca, curacunata mandaj curacunaman, mandaj rucucunamambash, tigrachingapaj rirca. 4Judas runaca, paicunata cashnami nirca:
—Ima nalitapash na ruraj runaguta huañuchinajuchun japichishpami, juchata rurashcani— nircami.
Ashtahuangarin shina nijpica:
—¿Ñucanchica imata ricunatata charichiyari? ¡Canllari imapash tucungui!— ninajurcami.
5Shina nijpimi Judas runaca, Diospaj huasi ucupi, chai culquita shitashpa llujshishpa rirca. Chaimanda rishpaca, paillata sipirishpami huañurca.
6Chai culquicunataca, curacunata mandajcuna tandachishpami, cashna ninajurca: “Cai culquica, runata yahuarta jichashpa huañuchinajuchun jatujpi cushca culquimi. Shinamandami mandashca shimipi nijunshna, Diospaj huasipi tiaj cajonbica, na churanalla” ninajurcami.
7Paicunapura parlarishpami, mangata ruraj runapaj alpata chai culquihuanga randirca. Chai alpataca, caru llactamanda shamujcuna huañujpi pambachunmi randirca. 8Shinamandami chai alpataca, cunangaman: Yahuar Pamba nishpa shutichishca. 9Chashna rurajpimi, Profeta Jeremías villashca pactarca. Paica, cashnami villajurca: “Quimsa chunga culquicunatami japinajurca. Chai culquicunaca, israelcuna valichishpa churashca juyashcami carca. 10Jatun Dios ñucaman villashcashnami, chai culquihuanga, mangata ruraj runapaj alpata randinajurca” nijurcami.
Jesusta, Pilato tapuchijushcatami villajun
(Mar. 15:2-5; Luc. 23:3-5; Juan 18:33-38)
11Mandaj Pilatoca, paipaj ñaupajpi Jesús shayajujpimi:
—¿Canllu, Judá llactapi causajcunata jatun Mandaj cangui?— nishpa tapurca.
Shina tapujpimi, Jesusca:
—Canllata ñamari chashna ningui— nirca.
12Jesusca, curacunata mandajcuna, mandaj rucucuna ninanda juchachinajujpipash, imatapash na tigrachircachu. 13Shinamandami Pilatoca:
—Canda cashna ninanda juchachishpa villanajujtaca, ¿nachu uyangui?— nishpami tapurca.
14Shina tapujpipash Jesusca, upalla uyashpa, shuj shimillatapash na tigrachircachu. Shina upalla uyajpimi, mandaj Pilatoca ninanda manllarirca.
Jesustaca, huañuchinapachami ninajushcami
(Mar. 15:6-20; Luc. 23:13-25; Juan 18:38—19:16)
15Pascua fiesta punllapica, maijanda cacharipai nishpa gentecuna mañajpipash, shuj prezu tiajuj runata cacharinatami, mandaj Pilatoca yachan carca. 16Chai punllacunapimi, Barrabás shuti runaca, prezu tiajurca. Paitaca, nali runa cajpimi, tucuicuna rijsishcapacha carca. 17Pilatoca, chai tandanajushca gentecunatami cashna nishpa tapurca:
—¿Maijandata cacharichun munanguichi, Barrabás shuti runata, na cashpaca Quishpichij Cristo nishca Jesustachu cacharichun munanguichi?— nircami.
18Jesustaca, paicuna ninanda na ricunayachishcamandalla, paipaj ñaupajman apamushcatami Pilatoca yacharca. 19Mandashpa tiarinapi Pilato tiajujpimi, paipaj huarmica cashna shimita cachamurca: “Imatapash cashcatapacha ruraj chai runagutaca, ama canga imatapash ninguichu. Cunan tutami, chai runaguta muscushpa, ninanda llaquirishpa na ushajurcani” nishpami, cachamushca carca.
20Ashtahuangarin: “Barrabás runataca cacharishpa, Jesustaca huañuchilla” ninajuchunmi, curacunata mandajcunaca, mandaj rucucunapash, gentecunata ninanda yachachinajurca. 21Mandaj Pilatoca cashna nishpami, paicunaman tigrachirca:
—Cai ishcaipura runacunamandaca, ¿maijandata cacharichun munanguichi?— nircami.
Shina nijpimi, gentecunaca:
—Barrabastami cacharichun munanchi— ninajurca.
22Shina ninajujpimi:
—Quishpichij Cristo nishca Jesustaca, ¿imatata rurasha?— nishpa, Pilatoca tapurca.
Shina tapujpica, tucuilla gentecunami:
—¡Chai runaca, chacatai tucuchun!— nishpa caparinajurca.
23Chashna caparinajujpimi:
—Cai runaca, ¿ima nalitata rurashcayari?— nishpa, Pilatoca tapurca.
Shina tapujpicarin:
—¡Chai runaca, cruzpi chacatai tucuchun!— nishpami, ashtahuan ninanda caparinajurca.
24Chashna ashtahuan ashtahuan caparinajujpimi, imata ruraitapash na ushashpa, yacuta apamuchun Pilatoca mandashpa, gentecunapaj ñaupajpi maquita maillashpa cashna nirca:
—Cangunapaj jahuami, imatapash cashcatapacha ruraj cai runagutaca huañuchigrinchi. Na ñucapaj jahuachu— nircami.
25Shina nijpica:
—Chai yahuarca, ñucanchipaj jahua, ñucanchi huahuacunapaj jahua cachun— nishpami, tucuilla gentecuna caparinajurca.
26Shina caparinajujpimi Pilatoca, Barrabás runatara cacharirca. Ashtahuangarin Jesustaca, ninanda astichishpami, cruzpi chacatanajuchun soldadocunaman curca.
27Shina cujpimi soldadocunaca, Pilato mandashpa tiajuj huasiman Jesusta aparca. Shina apashpami, Jesusta chaupipi churashpa shayarichun, tucui soldadocunata cayarca. 28Paicunaca, Jesús churajushcata surcuchishpami, morado fachata fachalichirca. 29Umapipash, ahuashca cashatami churachirca. Vara caspitapash, ali lado maquipi charichishpa, paipaj ñaupajpi cungurishpami:
—¡Judá llactapi causajcunata jatun Mandaj, canga juyaillamari ricujungui!— nishpa, na cazushpa asinajurca.
30Paicunaca, t'ucashpa churashpami, varata quichushpa Jesustaca, umapi huactanajurca. 31Chashna na cazushpa asishca jipami, chai fachataca surcuchishpa, paipaj churajunata churachirca. Chashnami Jesustaca, chacatangapaj apanajurca.
Jesustaca chacatashpami huañuchishca
(Mar. 15:21-41; Luc. 23:26-49; Juan 19:17-30)
32Jesusman cruzta apachishpa rinajushpaca, Cirene pueblomanda Simón shuti shuj runatami tuparirca. Chai runatami, cruzta apachun mandarca.
33Shinallata Gólgota shuti lomamanmi chayarca. Gólgota nishpaca, Uma Tullu nijunmi. 34Chaiman chayajpimi, jayajhuan chapushca vinota Jesusman ufiachingapaj munarca. Ashtahuangarin malishpa ricushpaca, na ufiarcachu.
35Jesusta chacatashpaca, paicunapura suerteta rurashpami, paipaj churajunata chaupirinajurca. Chashna chaupirijpimi, Profeta runagu villajushca pactarca. Chai villaj runaguca, cashnami nijurca: “Ñuca churajunataca, paicuna purami chaupirirca. Ñuca churajuna jahuapillatami, suerteta ruranajurca” nijurcami.
36Chai jipami soldadocunaca, Jesusta cuidashpa chaipillata tianajurca. 37Pai chacatariajuj cruz jahuapipash, imamanda huañuchijushcatami tablapi escribishpa churanajurca. Chai tablapica: “CAICA, JUDÁ LLACTAPI CAUSAJCUNATA JATUN MANDAJ JESUSMI” nijurcami.
38Chai jipami shuhua runacunataca, ishcai purata shujtaca, ali ladoman, shujtaca lluqui ladoman, Jesuspaj ladopi chacatarca. 39Chaita yalijcunaca, umata muyuchishpami, nalicachishpa cashna rimanajurca:
40—Canga: ‘Diospaj huasita urmachishpapash, quimsa punllapilla shayachishallami’ nircanguica. Can ama huañungapaca, canllata quishpiriyari. Taita Diospaj Churipacha cashpaca, cruz jahuamanda uriajuyari— ninajurcami.
41Shinallatami curacunata mandajcunapash, mandashca shimita yachachijcunapash, fariseocunapash, mandaj rucucunapash, Jesustaca na cazushpa asishpa, cashna nishpa rimanajurca:
42—Shujcunataca, quishpichircallami. Paillata quishpiritaca, na ushanllu. Israelcunata jatun Mandaj cashpaca, cunanllata cruz jahuamanda uriajujpimi crinchiman. 43‘Taita Diospaj Churimi cani’ nishpami, paica Taita Diosta yariashpa purijurca. Dios llaquishpaca, cunanllatamari paitaca quishpichinman— ninajurcami.
44Jesushuan chacatariaj shuhua runacunapash, chashnallatami paitaca nalicachishpa rimanajurca.
45Chaupi punllamanda chishi quimsa horascamanmi, tucui cai pachaca yana yana tucurca. 46Ña quimsa horas tucujujpimi: “Elí, Elí, ¿lama sabactani?” nishpa, Jesusca ninanda caparirca. Chai shimicunaca: “Ñuca Taita Dios, ñuca Taita Dios, ¿imashpata ñucatalla saquinguiyari?” nijunmi.
47Chashna caparijta uyashpami, chaipi shayanajuj puramanda huaquingunaca:
—Eliastamari cayajun— ninajurca.
48Chashna caparijhuanmi, chai puramanda shuj runaca, esponjata apangapaj calparca. Chaitaca, vinagrepi mutiyachishpami, sucus pundapi churashpa, Jesús ufiachun shimipi churarca. 49Ashtahuangarin caishujcunaca:
—Saquilla. Paita cacharingapaj Elías shamunllu, imami, ricushunchi— ninajurcami.
50Ashtahuangarin Jesusca, cutin ninandapacha caparishpami, paipaj espirituta Diosman mingashpa huañurca. 51Jesús huañujhuanga, Diospaj huasi ucupi huarcushpa quilpashca tiajuj jatun fachami, jahuamanda uraiman llujshijta chaupipi liquirirca. Alpa mamapash ninanda cuyupimi, rumicunapash chaupirirca. 52Huañushcacunata pambashca utujucunapash pascarijpimi, Diospajlla causashpa huañushcacunaca, ashtacacuna causarirca. 53Chaicunaca, Jesús causarishca jipami, utujucunamanda llujshishpa, Diospajlla tiajuj Jerusalén puebloman shamunajurca. Paicunaca, ashtaca gentecunamanmi ricurinajurca.
54Patsaj soldadota mandajmi, shuj soldadocunandi, Jesusta cuidashpa tiajurca. Paicunami, alpa mama cuyushpa ima tucujtapash ricushpa, ninanda manllarinajurca. Shina manllarishpami:
—Cai runaguca, Taita Diospaj Churipachami cashca— ninajurca.
55Chaipica, ashtaca huarmicunami Jesustaca, carumandalla ricushpa shayanajurca. Paicunaca, Jerusalenman Jesús shamujujpica, Galilea llactamandapacha catishpami servishpa shamushca carca. 56Paicuna purapica, Magdala shuti pueblomanda Mariapash, Jacobopaj, Josepaj mama Mariapash, Zebedeo shuti runapaj mamapashmi shayanajurca.
Jesusta pambashcatami villajun
(Mar. 15:42-47; Luc. 23:50-56; Juan 19:38-42)
57Ña tutayajpimi, Arimatea shuti pueblomanda shuj ninan charij José shuti runaca shamurca. Paipash, Jesusta catijllatami carca. 58Chai runagumi, Jesús huañushcata pambagringapaj, Pilatota mañangapaj rirca. Shina mañajpimi, Jesús huañushcata cugrichun, shujcunata mandashpa Pilatoca cacharca. 59Jesús huañushcata japishpaca, shuj mushuj yura fachahuanmi, Joseca pilluchirca. 60Shina pilluchishpami, jacapi pai pambaringapaj utujuchishca mushuj utujupi Jesús huañushcataca churarca. Shuj jatun rumita suchuchishpa, chai utuju punguta quilpashpaca, rircallami. 61Chai utuju pungu ñaupajpica, Magdala shuti pueblomanda Mariandi, shuj Mariandimi tiarishpa quedarca.
Pambashca utujupica, cuidaj soldadocunatami churashca
62Cayandi punlla alichishca jipaca, curacunata mandajcunapash, fariseocunapash, Pilatopaj ñaupajman tandanajurca. 63Paicunaca, cashnami ninajurca:
—Mandaj taitalla, chai llulla runaca, causajushpallata imata nirijushcatami yarinajunchi. Chai runaca: ‘Ñucata huañuchijpipash, quimsa punllahuanga causarishallami’ nirijurcami. 64Chai runa pambariajuj utujuta quimsa punllacaman cuidachun, soldadocunata cachapai. Na cuidajpica, paipaj yachajujcunara tuta shamushpa, chai huañushcataca shuhuashpa apanman. Chashna apashpaca: ‘Huañushcacunapaj chaupimanda causarircami’ nishpami, tucui gentecunaman llullashpa villanajunga. Shina villanajujpica, chai runa causajushpallata llullashpa purijushcatapash yalimari tucunga— ninajurcami.
65Shina ninajujpimi Pilatoca, cashna nirca:
—Cai soldadocunataca, pushashpa richilla. Paicunataca, canguna munashcashna chai utujuta ali cuidachun churagrichi— nircami.
66Shina nijpi rishpami, chai utujuta quilpashca rumipica, ali ali sellanajurca. Cuidaj soldadocunatapashmi churarca.
Currently Selected:
MATEO 27: QUII
Highlight
Share
Copy
Want to have your highlights saved across all your devices? Sign up or sign in
Quichua Imbabura Bible © United Bible Societies, 1994.