MATEO 24
24
Diospaj huasita tucuchinatami, Jesusca villashca
(Mar. 13:1-2; Luc. 21:5-6)
1Diospaj huasi ucumanda Jesús llujshishpa rijujpimi, paipaj yachajujcunaca, paipaj ladoman quimirishpa, chai huasi imashna cajta ricuchinajurca. 2Shina ricuchijpimi Jesusca, cashna nirca:
—¿Tucui chaicunatachu ricunajunguichi? Na llullashpami, cangunataca cashna nini: Caipica, shuj rumillapash na chai jahuan, chai jahuan quedangachu. Tucuillami urmachi tucunga— nircami.
Tucurimui punlla nara chayamujpillatami, ninan llaquicunaca tianga
(Mar. 13:3-23; Luc. 21:7-24; 17:22-24)
3Chai jipami, Olivos shuti lomaman paipaj yachajujcunandi rishpa, Jesusca tiarirca. Chaipi tiajujpimi paicunaca, paitalla cashna nishpa tapunajurca:
—¿Ima horata chashna ninan llaquicunaca tianga? ¿Ima llaquita ricushpata, can shamuna punlla chayamujujtapash, cai pacha tucurinatapash yachashun? Chaitaca ñucanchiman villayari— ninajurcami.
4Shina nijpimi Jesusca, paicunaman cashna nishpa tigrachirca:
—Pactarallapash pipash cangunatara umachinman. 5Ashtacacunami: ‘Ñucami, Quishpichij Cristo cani’ nij tucushpa, ñuca shutipi shamunajunga. Paicunaca, ashtaca gentecunatami umachinajunga. 6Jatun macanajuicunapash, ninan macanajuimi shamugrin ninajujtapashmi uyanguichi. Shina uyashpapash na musparishpami, aliguta catina canguichi. Chashna llaquicunaca tianapachami. Chashna cashpapash, tucurimui punllapachaca nara chayamungachu. 7Shuj llactapi mandajcunahuan, chaishuj llactapi mandajcunahuanmi macanajunga. Llactacunata jatun mandaj puracunapash macanajungami. Shinallata jatun ung:uicunapash, ninan yarjaipash, alpa mama cuyushpa tucuchijuipash, shuj shuj llactacunapimi tianga. 8Chai tucui llaquicunaca, callarillami canga. Ashtahuan jatun llaquicunami shamunga.
9Chai punllacunapimi, ninanda llaquichinajuchun, cangunataca japichinajunga, shinallata huañuchinajungami. Ñuca shutipi catinajujpimi, cangunataca tucui gentecuna na ricunayachinga. 10Chai punllacunapica, ashtacacunami nitijanshna pandanajunga. Paicunapura ninanda millanayachirishpami, huañuchinajuchun shujmanda shujmanda villashpa japichinajunga. 11Llullashpa villajcunapash, ashtacacunami shamunga. Chaicunaca, ashtaca gentecunatami umachinajunga. 12Chashna imapash nalilla ninanda mirajpimi, juyarishpa causanataca, ashtacacuna saquinajunga. 13Ashtahuangarin tucurimuicaman, llaquicunata apajcunallami quishpichi tucunga. 14Taita Dios mandajujmanda cai ali villaitaca, cai pachapi tiaj tucui llactacunapi causajcuna yachachunmi villanajunga. Chai jipami, tucurimuica chayamunga.
15Chaipimi cangunapash, Profeta Danielca escribishcapi nijuj pactajta ricunguichi. Pai escribishcapica, cashnami nijun: ‘Ninanda millanayachi tucushca tiajujmi. Diospajlla huasi ucutaca, llaquinayaita tucuchijunga’ nijunmi. (Cashna villashcata leyijca, aliguta yarichun ninimi). 16Chaita ricushpaca, Judea llactapi causajcunaca, urcucunapi pacajungapaj richun ninimi. 17Chai punlla chayamushca jipaca, huasi jahuapi tiajushpaca, huasi ucumanda ama imatapash apagrichun ninimi. 18Pambapi purijujpash, huasimanda paipaj jahualla churajunata apangapaj, ama tigrachun ninimi. 19Chai punllacunapica, vijsayu huarmicunapash, llullu huahuata viñachijuj huarmicunapash, ¡aij imachari tucunga! 20Canguna pacajushpa calpana punllacunaca, ama tamia punllacuna cachun, ama samana punlla cachunmi, Taita Diosta ninanda mañariana canguichi. 21Chai punllacunapica, ninan manllanayai llaquimi tianga. Cai pacha tiai callarishca punllamandapacha cunangaman, chashna jatun llaquica nara tiarcachu, jipamambash na tiangachu. 22Llaqui punllacuna ama unaicaman tiachun, Dios na ucha saquichijpica, shujllapash na quishpirinmanllu. Ashtahuangarin pai agllashcacunata ninanda juyashpallami, chai llaqui punllacuna na unaicaman tiachun, ucha saquichinga.
23Chai punllacunapica, huaquingunaca: ‘Quishpichij Cristomi caipi tiajun’ ninajungami. Na cashpaca: ‘Ricuichi, chaipimi tiajun’ ninajungami. Chashna nijpipash, napacha crinachu canguichi. 24Chai punllacunapica: ‘Cristomi cani’ nishpa llullajcunapash, Diosmanda llullashpa villajcunapashmi tianga. Chaicunaca, pipash na rurai ushanallacunata, jatun manllarinacunatami ricuchinajunga. Chashna rurashpami, paicuna ushashpaca, Dios agllashcacunatapash umachinajunga. 25Nara chashna tucujpillatami, cunambillata cangunaman villajuni. 26Cangunataca: ‘Jacu ricugrishunchi, paica jichushca pambapimi purijun’ ninajungami. Chashna nijpipash, napacha rinachu canguichi. Shinallata: ‘Shamuichi, cai tandanajuna huasi ucupimi, paica tiajun’ ninajungami. Chashna nijpipash, napacha crinachu canguichi. 27Runa Aichayu tucushca ñuca shamushpaca, indi llujshimuj ladomanda, indi huashajuj ladocaman punchapamba shitamunshnami shamusha. 28Maipi huañushca sirijpipash, chaipimi jatun angacunaca jundanga.
Runa Aichayu tucushca Jesús tigramunatami villashca
(Mar. 13:24-37; Luc. 21:25-36; 17:25-36; 12:41-48)
29Chashna ninan llaqui punllacuna yalijujhuanmi, indipash yana yana tucunga. Lunapash, cai pachataca na punchayachingachu. Luzerocunapash, jahuamanda urmamungami. Shinallata ninan ushaihuan jahua pachapi tianajujcunapash, ninandami cuyunga. 30Shina tucujpimi, Runa Aichayu tucushca ñuca shamunata ricuchinaca, jahua pachapi ricuringa. Runa Aichayu tucushca ñucami, fuyu jahuapi ninan ushaihuan, juyailla punchapamba shamusha. Shina shamujujta ricushpami, cai pachapi tiaj tucui aillucunaca ninanda huacanajunga. 31Ñuca angelcunatami, trompetata ninanda tocachun cachamusha. Paicunami, ñuca agllashcacunataca cai pacha tucuri chuscundi ladomanda tandachimunga.
32Jigos yurahuan chimbapurashpa parlashcatami, aliguta yachajuna canguichi: Chai yurapi malquicuna viñashpa, llullu fangacuna jundajta ricushpami, tamia pascarina punllacuna chayamujtaca yachanguichi. 33Chashnallatami chai tucuita ricushpaca, ñuca shamunaca ña pungupi cajta yachana canguichi. 34Na llullashpami, cangunataca cashna nini: Cunan viñaicuna nara huañujpillatami, ñuca villajushca shimicunaca pactanga. 35Jahua pachapash, cai pachapash tucuringami. Ashtahuangarin ñuca rimashca shimicunaca, napacha tucuringachu.
36Ashtahuangarin ima punlla, ima horas ñuca tigramunataca, pipash na yachanllu. Jahua pachapi tiaj angelcunapash na yachanllu. Ñuca tigramunataca, ñuca Taitallami yachan.
37Runa Aichayu tucushca ñuca shamui punllapica, Noé causajui punllacunapi tucushcashnami canga. 38Chai punllacunapica micushpa, ufiashpa, cazarashpa, cazarachishpami gentecunaca causanajurca. Yacuhuan Dios nara tucuchijpica, jatun huambuna huasiman Noé yaicungacamanmi, chashna causanajurca. 39Chashna causashpami, yacuhuan tucuilla tucuchina punlla chayamungacaman, gentecunaca imatapash na yarirca. Chashnallatami, Runa Aichayu tucushca ñuca shamuna punllapipash canga. 40Chai punllapica, ishcai runacunami pambapi purinajunga. Paicunataca, shujtallami apanga, shujtaca saquingami. 41Shinallata ishcai huarmicunami, cutana rumipi cutanajunga. Paicunatapash shujtallami apanga, shujtaca saquingami.
42Cangunata Mandaj ñuca ima horas tigramunataca na yachaimanda, rijcharianshnami chapariana canguichi. 43Ashtahuan cashnatapash, yachanami canguichi: Shuhua shamunata huasiyu amo yachashpaca, paipaj huasita utujushpa shuhuachunga, na saquishpami chaparianman. 44Shinallatami, Runa Aichayu tucushca ñucapash, cungashcapi ñapash shamusha. Cangunaca, alichirishcalla rinallami shuyana canguichi.
45Shuj amoca: ‘Ñuca huasiguta cuidapangui. Micuna horas chayajpica, servijcunaman micunaguta carapangui’ nishpami, mingashpa saquin. Chaita aliguta cazushpa, aliguta yarishpa servij runaguca, ¿maijanda canga? 46Chashna mingashcata pactachijujta amo japij shamujpica, chai runaguca ninandami cushijunga. 47Na llullashpami, cangunataca cashna nini: Chai runagumanmi amoca, pai imata charishcatapash, tucuillata minganga. 48Ashtahuangarin chai servij runaca, naliman tigrashpa: ‘Ñuca amoca, na ucha shamungachu’ yashpa, 49caishuj servijcunatapash macai callarishpa, machashpa purijcunahuambash, cumba tucushpa micushpa, ufiashpami purijunga. 50Chashna purijushpa ima punlla, ima hora shamunatapash na yachashca purijujpimi, amoca ñapash shamunga. 51Shina shamushpami, chai runataca mishqui shimi, jayaj shungu runacunahuan ninandapacha llaquichi tucuchun cachanga. Chaipimi huacashpa, quirutapash canirishpa causajunga.
Currently Selected:
MATEO 24: QUII
Highlight
Share
Copy
Want to have your highlights saved across all your devices? Sign up or sign in
Quichua Imbabura Bible © United Bible Societies, 1994.