MATEO 22
22
Cazarai bodahuanmi, chimbapurashpa parlashca
1Shina nishpallami Jesusca, cutin cashna chimbapurashpa parlashpa yachachijurca:
2“Jahua pachamanda Dios mandajujca, shuj jatun mandaj, paipaj churita cazarachishpa bodata ruranshnami. 3Chai mandajca, bodaman cayashcacunata pushamuchunmi, paita servijcunata cacharca. Ashtahuangarin paicunaca, na shamungapaj munarcachu. 4Jatun mandajca, shuj servijcunata cutin cachajushpami, cashna nirca: Bodaman cayashcacunataca, cashna nigripaichi: ‘Micunapash yanushcallami. Ali virayashca huagracunata, llamacunatapash huañuchinajuchun, ñami mandarcani. Ñami tucuita alichishcalla, shamupaichi’ nichunmi cacharca. 5Shina pushangapaj rijpipash, chai cayashcacunaca na uyashpami, huaquingunaca alpata trabajangapaj, huaquingunaca jatunahuan rinajurca. 6Ashtahuan shujcunaca, jatun mandaj cachashca runacunataca rimashpa pingaichishpami, macashpa huañuchinajurca. 7Chashna ruranajujta uyashpaca chai jatun mandajca, ninandami fiñarirca. Shina fiñarishpami, chai huañuchijcunataca huañuchishpa, paicunapaj pueblotapash rupachishpa tucuchigrichun, paipaj soldadocunata cacharca. 8Chai jipami, chai mandajca, paita servijcunata cashna nijurca: ‘Bodata rurangapaca, tucuita ñami alichishcalla tiajun. Ashtahuangarin bodaman cayashcacunaca, napacha caiman shamui ushanachu. 9Shina cashcamanda cunanga, jatun ñangunata rishpa, pipash tuparishcata cai bodaman pushamugrichi’ nishpa cacharca. 10Shina nijpi ñangunata rishpaca nalicunata, alicunatapash tucui tuparishcatami, chai servijcunaca tucuillata tandachimurca. Shina tandachijpimi, chai boda huasipica, cayashcacunaca jundarca.
11Shina jundajpica chai jatun mandajca, chai shamushca gentecunata ricungapajmi yaicujurca. Chaipimi, bodaman shamuna churajunata na churajushpa shamushca runata ricurca. 12Shina ricushpami: ‘Ñuca cumbagu canga, ¿imashpata bodaman shamuna churajunataca, na churajushpa shamurcangui?’ nishpa, chai mandajca tapurca. Shina tapujpipash, chai runaca upaman tigrashpa tiajurcallami. 13Shinamandami, chai jatun mandajca: ‘Cai runataca chaquindi, maquindi huatashpa, yana yana canllaman shitaichi’ nishpa, paita servijcunata mandarca. Shinallata chai jatun mandajca: ‘Chaipica huacashpa, quirutapash canirishpami tianajunga’ nijurcami. 14Cayai tucushca ashtacacunami, ashtahuangarin agllai tucushcacunaca huaquingunallami” nijurcami.
¿Impuestotaca cunapachachu? nishpami tapushca
(Mar. 12:13-17; Luc. 20:20-26)
15Chai jipami, imata tigrachijpipash Jesusta juchachingapaj munashpa, fariseocunaca, paicuna puralla parlaringapaj, llujshishpa rirca. 16Ña parlarishpaca, paicunapaj yachajujcunatami, mandaj Herodespaj puracunandi, Jesusta cashna nichun cacharca:
—Yachachij, can na llullashpa yachachijujtaca yachapanchimi. Taita Dios munashcashna causachunmi, pimambash na llullashpa yachachijungui. Canga, pi mandachumbash na minishtinguichu. Gentecuna imashna cajtapash, na ricujunguichu. 17Shina cajpimi candaca, cashna tapupanchi: Cesarman impuestota cunaca, ¿ñucanchita mandashca shimipi nijunshna alichu, nachu ali? ¿Ima ninguita?— nishpami tapunajurca.
18Ashtahuangarin nali shunguhuan tapunajujta yachashpami, Jesusca paicunata cashna nirca:
—Mishqui shimi, jayaj shungucunami canguichi. ¿Imashpata ñucataca, imata tigrachijta uyashpa juchachingapaj shamunguichi? 19Impuestota cuna shuj culquita apamuichi, ricusha— nijpimi paicunaca, shuj denario culquita curca.
20Chaita cujpi ricushpaca:
—¿Pipaj ñavita, pipaj shutita cai culquipica tiajun?— nishpami, Jesusca tapurca.
21Shina tapujpimi:
—Cesarpajmi— ninajurca.
Shina nijpimi Jesusca, cashna nirca:
—Cesarpaj cajpica, Cesarmanllatami cuna canguichi. Ashtahuangarin Taita Diospaj cajtaca, Taita Diosmanmi cuna canguichi— nircami.
22Shina nijpimi ninanda manllarishpa, Jesuspaj ladomandaca anchurishpa rinajurca.
¿Huañushcacunaca causaringachu? nishpami tapushca
(Mar. 12:18-27; Luc. 20:27-40)
23Chai punllallatami, Jesusta tapungapaj saduceocunaca, huaquingunalla shamurca. Paicunaca: “Huañushcacunaca na causaringachu” nishpa purijcunami. 24Paicunami Jesustaca, cashna nishpa tapurca:
—Yachachij. Ñucanchimanmi Moisesca, cashna nishpa saquishca: ‘Shuj runaca, huahuacunata nara charishpallatami, paipaj huarmitaca saquishpa huañunga. Chai huarmitaca, paipaj cati huauqui cazarashpami, punda huauquipaj randi huahuacunata charinga’ nishcami. 25Ñucanchi llactapimi, canchis huauquipura tiarca. Punda huauquica, cazarashpallami huañurca. Huahuacunata nara charishpallata huañushpaca, paipaj huarmitaca paipaj cati huauquimanmi saquirca. 26Chai cati huauquipash, cazarashpallami huañurca. Chaipaj cati huauquipash, chashnallatami huañurca. Chashnami, chai canchispura huauquicunaca huañurca. 27Paicuna tucuilla huañushca jipami, chai huarmipash huañurca. 28Huañushcacuna causarimui punllapica, chai canchis huauqui purapaca, ¿maijambajta huarmi canga? Chai huarmitaca, chai tucui canchis purami cazararca— ninajurcami.
29Shina nijpimi Jesusca, paicunaman cashna nishpa tigrachirca:
—Cangunaca, Dios escribichishca Shimitapash na yachashpa, pai ninan ushaita charijtapash, na yachashpami chashna pandashpa causanguichi. 30Huañushcacuna causarimui punllapica, pipash na cazarangachu. Cazaranapash na tiangachu. Ashtahuangarin jahua pachapi tiajuj Taita Diospaj angelcunashnami canga. 31Ashtahuangarin huañushcacuna causarinata Taita Dios cangunaman villashcataca, ¿nachu leyishcanguichi? Paica, cashnami nirca: 32‘Ñucami Abrahambaj, Isaacpaj, Jacobopaj Taita Dios cani’ nircami. Taita Diosca, huañushcacunapaj Taita Diosca na canllu. Ashtahuangarin causajcunapaj Taita Diosmi— nircami.
33Jesús chashna yachachishcataca, gentecunaca manllarishpami uyanajurca.
Ashtahuan yali ali mandashca shimitami villajun
(Mar. 12:28-34)
34Jesús yachachijushpa, saduceocunata upallayachishcata fariseocuna yachashpami, paicuna puralla parlaringapaj apash tandanajurca. 35Paicuna puramanda, mandashca shimita yachachij shuj runami, imata tigrachijpipash juchachingapaj Jesustaca, cashna nishpa tapurca:
36—Mandashca shimica, ¿maijanda ashtahuan yali ali capan, Yachachij?— nircami.
37Shina nijpimi Jesusca, cashna nijurca:
—Mandashcapica cashnami nijun: ‘Cambaj Taita Diostaca, tucui shunguhuan, tucui almahuan, tucui yuyaihuan juyangui’ nijunmi. 38Cai mandashca shimimi, tucuimanda punda ashtahuan yali ali. 39Chaipaj cati mandashca shimipash, chashnallatami nijun: ‘Cambaj cumba runagutaca, imashna can juyarinshnallata juyangui’ nijunmi. 40Cai ishcai mandashca shimicunami, Moisés mandashca shimicunatapash, Profetacuna villashca shimicunatapash, sapishna charijun— nijurcami.
Quishpichij Cristoca, ¿pipaj churita canga?
(Mar. 12:35-37; Luc. 20:41-44)
41Fariseocunataca, chaipillata tandanajushca tianajushpami Jesusca, cashna nishpa tapurca:
42—Quishpichij Cristotaca, ¿maijan yanguichita? ¿Pipaj churita canga?— nijpimi:
—Davidpaj churimi canga— ninajurca.
43Shina nijpimi Jesusca, cashna nirca:
—¿Imashpata Davidca, Diospaj Espíritu yarichijpi Cristotaca: ‘Jatun Diosmi’ nijushcanga? Davidllatami cashna nijurca:
44Jatun Diosca, ñucata Mandajtami cashna nijurca:
‘Canga, ñuca ali ladoman tiajuilla.
Canda na ricunayachijcunata can saruchun,
cambaj chaquipi ñuca churangacaman tiajuilla’ nijurcami.
45Paitaca Davidllata: ‘Jatun Diosmi cangui’ nijujpica, ¿imashpata Davidpaj churi cangayari?— nircami.
46Shina nijpica, pipash na ashtahuan imatapash ni usharcachu. Chai punllamandapachami Jesustaca, na ashtahuan pipash tapui usharca.
Currently Selected:
MATEO 22: QUII
Highlight
Share
Copy
Want to have your highlights saved across all your devices? Sign up or sign in
Quichua Imbabura Bible © United Bible Societies, 1994.