MATEO 20
20
Uvasta pallajcunahuan chimbapurashpami parlashca
1Jahua pachamanda Dios mandanaca, uvas chagrata charij runashnami. Chai runaca, uvasta pallachingapajmi runacunata mascangapaj, tutamandata jatarishpa rirca. 2‘Shuj punllaguta pallashpa chishajpica, shuj denario nishca culquigutami cupasha’ nishpami, chai runaca pallajcunahuan parlarca. Ña ari nijpimi, paipaj chagrapi uvasta pallachun cacharca. 3Chai runaguca, cutinmi iscun horas ña tucunallapica, plazaman tigrarca. Chaipica, yanga yanga tianajuj runacunatami ricurca. 4Chaicunata ricushpaca: ‘Ñuca chagragupi uvasta pallangapaj, ¿nacha cangunapash ripanguichiman? Cuna cashcagutapachami cupasha’ nircami. Shina nijpimi, paicunaca rirca. 5Chai runaguca, chaupi punllapipash, ña quimsa horas tucujujpipash, cutinmi chashnallata mascangapaj rirca. 6Shinallata ña picha horas chishi tucujujpipash, cutinmi plazaman rirca. Chaipica, yanga yanga tiashpa chishanajuj shuj runacunatami ricurca. Paicunatapash: ‘¿Imashpata chashna chishanajunguichi?’ nishpami tapurca. 7Shina tapujpica: ‘Imata ruranapash na taririjpimi, cashna chishanajunchi’ ninajurcami. Shina nijpimi: ‘Ñuca chagragupi uvasta pallangapaj, ¿nacha cangunapash ripanguichiman? Cuna cashcagutapachami cupasha’ nirca. 8Ña tutayajujpimi, chagrayu runaguca, mayordomota cashna nirca: ‘Pallajcunata cayashpa, jipa shamujmandara callarishpa, punda shamujcunamambash cungui’ nircami. 9Ña shamujushpaca, chishi chishipi yaicujcunara punda shamushpami, shuj denario nishca culquigutaca japinajurca. 10Pallangapaj punda yaicujcunapash shamushpaca: ‘Ñucanchicarin ashtahuanmi japishun’ yashpami shuyanajurcami. Ashtahuangarin paicunapash, shujlla denario culquigutami japinajurca. 11Chashna japishpami, chagrayu amotaca, fiñashpa rimashpa, 12cashna ninajurca: ‘Caicunaca, chairalla yaicumushpa, shuj horastallamari pallanajurca. Ñucanchicarin, ninanda shaijushpa rupaipipash llaquinayaitami pallashpa chisharcanchi. ¿Imashpata paicunamambash, ñucanchimambash chashnallatata cungui?’ ninajurcami. 13Chashna nijpimi, chagrayu amoca, paicuna puramanda shuj runataca, cashna nirca: ‘Ricui, amigo. Candaca, ima nalitapash na rurashcanichu. ¿Nachu shuj denario culquiguta cusha nijpi, canga ari nihuarcangui? 14Can japina cashca culquitaca japishpa rilla. Cambaj jipa shamujmambash, canmanshnallatami cungapaj munani. 15¿Nachu ñuca culquitaca, ñuca munashcashna cunalla cani? ¿Na cashpaca, ali shunguta ñuca charijpichu, paica ama chashnallata japishcanman yashpa fiñahuangui?’ nijurcami. 16Chashnami, pundapi churai tucushcacunaca, huashaman churai tucunajunga. Shinallatami huashaman churai tucujcunapash, pundapi churai tucunajunga. Ashtacacunami cayai tucunajun. Shina cashpapash, huaquingunallami agllai tucushca— nijurcami.
Jesusca, pai huañunatami cutin villashca
(Mar. 10:32-34; Luc. 18:31-34)
17Jesusca, Jerusalenman vichai rijushpami, paipaj chunga ishcai yachajujcunatalla, ashaguta ladoman pushashpa, ñambi cashna nijurca:
18—Ricuichi cunanga, Jerusalenmanmi vichai rinajunchi. Chaipimi, Runa Aichayu tucushca ñucataca, curacunata mandaj curacunapajman, mandashca shimita yachachijcunapajman japishpa apahuanga. Chaicunami ñucataca, huañunapachami cangui ninajuhuanga. 19Shinallata na israelcunamanmi japichihuanga. Paicunaca, ñucataca asishpa ricushpami, astitapash astihuanga. Chai jipami, cruzpi chacatashpa huañuchihuanga. Ashtahuangarin quimsa punllahuanga causarishallami— nijurcami.
Jacobopash, Juanbash mañashcatami villajun
(Mar. 10:35-45)
20Chai jipami, Zebedeo shuti runagupaj mamaca, ishcai churicunandi, Jesuspaj ladoman quimirishpa, paipaj ñaupajpi cungurishpaca:
—¿Nacha ñuca mañashcaguta uyahuanguiman?— nirca.
21Shina nijpimi:
—¿Imagutata munanguiyari?— nishpa, Jesusca tapurca.
Shina tapujpimi, chai huarmica cashna nirca:
—Can mandangapaj tiarishpaca, cai ñuca ishcai churigucunataca, shujtaca ali ladoman, shujtaca lluqui ladoman tiachipangui— nircami.
22Shina nijpimi Jesusca, cashna nishpa tigrachirca:
—Na yachaimandami, chashna mañahuanguichi. ¿Cangunaca, ñuca ufiana vasomanda ufiai ushanachu canguichi? ¿Ñuca bautizarinashna bautizari ushanachu canguichi?— nircami.
Shina tapujpimi paicunaca:
—Ari, ushapashunllami— ninajurca.
23Shina nijpimi Jesusca, cashna nirca:
—Ñuca vasomandaca ufianguichipachami. Ñuca bautizarinashna bautizaritapash ushanguichimi. Shina rurajpipash, ñuca ali ladopi, lluqui ladopi tiarichunga, na ñuca cunachu cani. Ashtahuangarin maijangunaman ñuca Taita alichishcamanmi cunga— nircami.
24Chai ishcai huauqui purahuanlla, Jesús chashna parlajujta uyashpami, caishuj chungapura yachajujcunaca ninanda fiñarirca. 25Shinamandami Jesusca, paicunata cayashpa cashna nijurca:
—Llactacunata jatun mandajcunami, shuj llactapi causajcunataca, ninanda mandashpa charin. Shinallata mandaj puracunapash, ashtahuan mandai ushajllami, caishujcunatapash mandanajun. Chaitaca, cangunallata yachanguichimi. 26Canguna purapica, na chashna tucungachu. Ashtahuangarin maijambash mandaj tucungapaj munashpaca, canguna purapi servishpa causachun ninimi. 27Canguna purapi maijambash punda cangapaj munashpaca, cangunata servishpa causachun ninimi. 28Shinallatami Runa Aichayu tucushca ñucapash, ñucata servihuaichi ningapaca, na shamurcani. Ashtahuangarin shujcunata servishpa, ashtacacunata ñuca huañushpa quishpichingapajmi shamurcani— nijurcami.
Ishcaipura ñausa runacunatami, Jesusca alichishca
(Mar. 10:46-52; Luc. 18:35-43)
29Jericó shuti pueblomanda paipaj yachajujcunandi, Jesús llujshishpa rijujpica, ashtaca ashtaca gentecunami catishpa rinajurca. 30Chai ñambica, ishcaipura ñausa runacunami tianajushca carca. Paicunaca: “Jesusmi shamujun” nijta uyashpami:
—¡Ñaupa taita Davidpaj Churi, Apunchi Jesús, ñucanchitaca llaquihuayari!— nishpa ninanda caparinajurca.
31Shina caparinajujpimi:
—¡Ama caparishpa, upalla caichi!— nishpa, gentecunaca jarcanajurca.
Shina jarcajpipash:
—¡Ñaupa taita Davidpaj Churi, Apunchi Jesús, ñucanchitaca llaquihuayari!— nishpami, ashtahuan caparinajurca.
32Shina caparinajujpimi, Jesusca shayarishpa, paicunata cayarca. Shina cayashpami:
—Cangunaca, ¿imagutata rurachun munanguichi?— nishpa tapurca.
33Shina tapujpimi paicunaca:
—Ñucanchi ñavigu ricuchun alichihuai, Apunchi Jesús— ninajurca.
34Shina ninajujpimi, Jesusca ninanda llaquishpa, paicunapaj ñavipi tacarirca. Shina tacarijpica, chai ñausa runacunaca ñapash ali tucushpami, Jesusta catishpa rinajurca.
Currently Selected:
MATEO 20: QUII
Highlight
Share
Copy
Want to have your highlights saved across all your devices? Sign up or sign in
Quichua Imbabura Bible © United Bible Societies, 1994.