MATEO 17
17
Jesusca, punchapamba tucushpami ricurishca
(Mar. 9:2-13; Luc. 9:28-36)
1Shina villajushpami, sucta punlla jipaca Pedrotapash, Jacobotapash, Jacobopaj huauqui Juandapash paicunatalla pushashpa, Jesusca urcuman rirca. 2Paicunapaj ñaupajpimi Jesusca, ñapash punchapamba tucushpa ricurirca. Ñavipash, indishna punchapambami ricurirca. Pai churajuriajpash, yuraj yuraj michagushnami ricurirca. 3Chaipimi Moisespash, Eliaspash, Jesushuan parlanajujta, paipaj yachajujcunaca ñapash ricurca. 4Shina ricushpami Pedroca, Jesusta cashna nirca:
—Ñucanchica, alipajmari shamupashcanchi, Apunchi Jesús. Can munajpica, quimsa chugllaguta rurapashun ninchimi. Shujtaca canman, shujtaca Moisesman, shujtaca Eliasman rurapashun— nircami.
5Chashna nijujpillatami, punchapamba fuyu pillushpa, paicunataca ñapash quilpamurca. Chai fuyu ucumandaca, cashna rimajmi uyarirca:
—Caimi, ñuca juyashca Churigu. Paimandami, ninanda cushijuni. Pai imata yachachishcataca, aliguta uyanguichi— nircami.
6Chashna rimamujta uyashpaca, paipaj yachajujcunaca ninanda manllarishpami, urai cumurirca. 7Shina urai cumurinajujpimi, Jesús shamushpaca:
—Jatarichilla, na manllarinachu canguichi— nishpa, paicunataca maquihuan tacarirca.
8Shina nijpi alsarishpa ricujpica, pipash illajpi Jesuslla shayajushcatami ricunajurca.
9Chai urcumanda urai shamunajushpami Jesusca, chai quimsa yachajujcunataca cashna nirca:
—Runa Aichayu tucushca ñucami, huañuchi tucushpapash, huañushcacunapaj chaupimanda causarina cani. Canguna ricushcataca, pimambash na villanachu canguichi— nircami.
10Shina nijpimi paipaj yachajujcunaca, Jesusta cashna nishpa tapunajurca:
—Mandashca shimita yachachijcunaca, ¿imashpata: ‘Eliasrami punda shamunapacha’ ninajun?— ninajurcami.
11Shina nijpimi Jesusca, paicunaman cashna nishpa tigrachirca:
—Eliasca, punda shamunapachami. Pai shamushpami, imagutapash tucuita alichijunga. 12Ashtahuangarin cangunaman, cashna nishpami villani: Eliasca, ñami shamurca. Paitaca, na chasquishpami, paicunapaj munaita rurashpa llaquichinajurca. Paicunallatami, Runa Aichayu tucushca ñucatapash llaquichihuanga— nircami.
13Jesús chashna villajpimi, Bautizaj Juanmanda villajushcata, paipaj yachajujcunaca yachanajurca.
Maipipash shitarishpa huañujlla huambratami, Jesusca alichishca
(Mar. 9:14-29; Luc. 9:37-43)
14Ashtaca gentecuna tandanajushcapajman Jesús chayajpimi, shuj runaca paipaj ñaupajman shamushpa, ñapash cungurishpa cashna nirca:
15—Ñuca churiguta llaquipairi, Apunchi Jesús. Paica, ñapash shitarishpa tucurishpami, ninan llaquita apajun. Paica, cutin cutinmi ninacunapi, yacucunapi urmapan. 16Cambaj yachajujcunamanmi apamurcani. Ashtahuangarin paicunaca, na alichi ushapanllu— nircami.
17Shina nijpimi Jesusca, cashna nirca:
—¡Ñucata napacha ali crij miraicuna, jatun nalicuna! ¿Ima horascamanda cangunahuanga, chashna cashayari? ¿Ima horascamanda cangunamandaca llaquirijushallayari? Chai huambragutaca, caiman apamugrichi— nircami.
18Chai huambrata apamujpimi Jesusca, chai ayata shinllita rimashpa llujchirca. Shina llujchijpica, ali tucurcallami.
19Chai jipallami:
—Ñucanchica, ¿imashpata chai ayataca na llujchi usharcanchi?— nishpa, Jesustalla paipaj yachajujcunaca tapunajurca.
20Shina tapujpimi Jesusca, cashna nijurca:
—Cangunaca, ñucata na tucui shunguhuan crishcamandami, na llujchi usharcanguichi. Na llullashpami, cangunataca cashna nini: Jamzi mostaza muyu valigutallapash crishpaca, cai urcuta: ‘Caimanda anchurishpa, shuj ladopi tiarigri’ nijpipash ringallami. Tucui shunguhuan ñucata crishpaca, imata ruraitapash ushanguichillami. 21Ashtahuangarin na micushpa Diosta mañashpallami, chashna nali ayataca llujchina— nijurcami.
Jesusca, cutinmi pai huañunata villajushca
(Mar. 9:30-32; Luc. 9:43-45)
22Galilea llactapi purijushpami, Jesusca paipaj yachajujcunata, cashna nirca:
—Runa Aichayu tucushca ñucataca, runacunaman japichihuangami. 23Paicuna ñucata huañuchijpipash, quimsa punllahuanga causarishallami— nircami.
Shina nijpimi paipaj yachajujcunaca, ninandapacha llaquirirca.
Diospaj huasimanda impuestota cushcatami villajun
24Capernaum puebloman paipaj yachajujcunandi Jesús chayajpimi, Diospaj huasimanda impuestota japijcunaca, Pedropajman shamurca. Shina shamushpami:
—Cangunata yachachijca, ¿ishcai dracma nishca culquita cunata yachanllu?— nishpa, Pedrotaca tapunajurca.
25Shina tapujpimi:
—Ari, cunata yachapanmi— nishpa Pedroca, huasi ucuman yaicurca.
Paitaca, Jesusrami ucha cashna nishpa tapurca:
—Cai pachapi jatun mandajcunaca, ¿picunatata tributo nishcata, na cashpaca impuestotaca cuchun mandan? ¿Chai llactapillata causajcunata, na cashpaca shuj llactamanda shamushca gentecunatachu impuestotaca cuchun mandan, imata Simón?— nishpami tapurca.
26Shina tapujpimi, Pedroca:
—Shuj llactamanda shamushca gentecunatami, impuestotaca cuchun mandan— nirca.
Shina nijpimi Jesusca, cashna nirca:
—Chai llactapillata causajcunaca, impuestotaca na cunachu. 27Ashtahuangarin impuestota japijcunata ama fiñachingapaj cunanga, cuchaman ri. Chaipica, pijita japij anzuelo nishcata shitashpa, punda amulij pijiguta llujchingui. Chai pijipaj shimipimi, shuj estatero nishca culquiguta taringui. Chaitaca ñucamandapash, canmandapash paicunaman cugringui— nircami.
Currently Selected:
MATEO 17: QUII
Highlight
Share
Copy
Want to have your highlights saved across all your devices? Sign up or sign in
Quichua Imbabura Bible © United Bible Societies, 1994.