MATEO 13
13
Tarpuj runahuan chimbapurashpami, Jesusca parlashca
(Mar. 4:1-9; Luc. 8:4-8)
1Chai punllallata huasimanda llujshishpa rishpami Jesusca, cucha manñapi yachachingapaj tiarirca. 2Ashtaca gentecuna paipajman shamujpimi, canoapi yaicushpa Jesusca tiarirca. Chai gentecunaca, tucuillami cucha manñapi tianajurca. 3Paicunamanmi, ashtaca parlocunahuan chimbapurashpa, Jesusca cashna nijurca: “Shuj tarpuj runaca, tarpungapajmi llujshirca. 4Chai runa muyuta shitajujpica, huaquingunaca ñanman yalijtami rirca. Ñambi sirinajuj muyucunataca, alasyu animalcuna shamushpami micurca. 5Shinallata huaquin muyucunaca, alpa ashalla tiaj rumilla pushtupimi urmarca. Chai muyucunaca, na jundu alpa cajpimi, ñapash viñarca. 6Ashtahuangarin uchilla sapita charishpami, ninanda indijpica, anguyashpa chaquirca. 7Shinallata huaquin muyucunaca, casha viñana chaupipimi urmarca. Cashacuna yalishpa viñashpami, llapishpa ismuchirca. 8Ashtahuangarin huaquin muyucunaca, ali alpapi urmashpami aliguta fucurca. Huaquingunaca shujmandallami patsajta, huaquingunaca sucta chungata, huaquingunaca quimsa chungata granurca. 9Uyangapaj rinrita charishpaca, aliguta uyaichi” nijurcami.
Imapaj chimbapurashpa parlashcatami villajun
(Mar. 4:10-12; Luc. 8:9-10)
10Chai jipami, paipaj yachajujcunaca, Jesuspaj ladoman quimirimushpa, cashna nishpa tapunajurca:
—¿Imashpata imahuambash chimbapurashpalla parlangui?— ninajurcami.
11Shina tapujpimi Jesusca, paicunaman cashna nishpa tigrachirca:
—Jahua pachapi Dios mandajujtaca, pipash na yachai ushashcatami cangunamanlla yachachishca. Ashtahuangarin caishuj gentecunamanga, na chai yachanata curcachu. 12Ashtacata charijca, Dios carajpimi ashtahuan charinga. Ashtahuangarin na charijtaca, ashagutalla charishcatapash quichungami. 13Shinamandami caishuj gentecuna yarichunga, imacunahuambash chimbapurashpa parlajuni. Paicunaca ricushpapash na ricunajunllu, uyashpapash na uyanajunllu, yaritapash na yarinajunllu. 14Paicuna chashna tucujpimi, Dios ima nishcata villaj Isaías villashcapash pactashca. Isaisca cashnami nijurca:
‘Rinrihuan uyashpapash, na yachai ushashpami causanguichi.
Ricuitaca ricushpapash, napacha ricushcashnami causanguichi.
15Cai gentecunapaj shunguca, ninanda shinlliyashcami.
Rinrihuan uyashpapash, nali uyanajunllu.
Ama ricungapaj, ñavitapash vichashcashnami causanajun.
Rinripash ama uyachun, shungupipash yuyaita ama japingapaj,
ñucapajmambash ama tigrangapaj, ñucapash ama paicunata
alichijuchunmi, chashna tucushca’ nijurcami.
16Ashtahuangarin cangunapaj ñavipash ricujushcamanda, cangunapaj rinripash uyajushcamandaca, ninanda cushijuichi. 17Na llullashpami, cangunataca cashna nini: Canguna cunambi ricunajunguichi, chaitaca Dios ima nishcata tauca villajcunapash, imatapash cashcatapacha rurashpa causajcunapash, ninandami ricunayachirca. Ashtahuangarin paicunaca, na ricunajurcachu. Shinallata canguna cunambi uyanajujtapash, ninandami uyanayachirca. Ashtahuangarin paicunaca, na uyanajurcachu.
Tarpuj runahuan chimbapurashpami, Jesusca yachachishca
(Mar. 4:13-20; Luc. 8:11-15)
18Tarpuj runahuan chimbapurashpa ñuca yachachijujtaca, aliguta uyahuaichi. 19Jahua pachapi Dios mandajujmanda villajuj shimita uyashpapash, huaquingunaca na yuyaita japinllu. Chaicunaca, ñambi urmashca muyushnallami tucunajun. Paicunapaj shungupi tarpushcashna uyashcatami, diablo shamushpa cungachin. 20Huaquingunaca, rumilla alpapi urmashca muyushnallami tucun. Paicunaca, Diospaj Shimita villajpipash, ashagucamanllami cushijushpa chasquin. 21Paicunaca, sapita na charij yurashna cashpami, ashacamanlla catin. Shina cashpami llaquicuna japijpi, na cashpaca Diospaj Shimita catijujpi catiriashpa llaquichijpica, nitijanshna pandanajun. 22Huaquingunaca, Diospaj Shimita villajpica, aligutami uyan. Paicunaca, casha viñana chaupipi urmashca muyushnallami tucun. Cai causaipilla ashtahuan ashtahuan ninanda charingapaj munashpami, pandachi tucunajun. Diospaj Shimitaca, chai tucui munaicunami cungachin. Shinamandami paicunaca, grano na fucunshna tucun. 23Ashtahuangarin shujcunaca, ali alpapi tarpushca muyushnallami causanajun. Paicunaca, Diospaj Shimita uyashpami, aliguta fucunshna mirachinajun. Huaquingunaca shujlla muyumanda patsajta fucunshna, shujcunaca sucta chungata fucunshna, shujcunaca quimsa chungata fucunshnami mirachin— nijurcami.
Trigo chagrahuan, balicu jihuacunahuan chimbapurashpami parlashca
24Paicuna yarichunmi Jesusca, cutinmi cashna chimbapurashpa parlajurca: “Jahua pachapi Dios mandajujca, shuj runa paipaj alpapi ali muyuguta tarpushcashnami. 25Ashtahuangarin tucuilla puñunajujpimi, chagrayu runata na ricunayachij runaca shamurca. Chai runaca, trigo chagrapimi, balicu muyuta shitashpa rirca. 26Trigo ña viñashpa grano llujshijpimi, balicupash chapurishca ricurirca. 27Chaita ricushpami, familiapaj huasipi servishpa causaj runacuna shamushpa, cashna tapurca: ‘Taitalla, canga ¿nachu ali trigoguta tarpuchircangui? ¿Imashpashi balicupash chapurian?’ nishpa tapugrirca. 28Shina tapujpimi dueñoca, cashna nirca: ‘Ñucata fiñaj runami, chashna rurashcanga’ nijurcami. Shina nijpimi, chai runacunaca: ‘¿Chai balicu jihuata sapimanda llujchishpa shitagrichun munanguichu?’ nishpami tapunajurca. 29Shina tapujpimi, dueñoca cashna nirca: ‘Balicu jihuata sapimanda llujchishpaca, trigondimi llujchinguichi, saquipaichilla. 30Tandachina punllacaman ishcandillata fucujuchun saquipaichilla. Chai punllapimi, tandachij runacunataca cashna nisha: Balicu jihuatara tandachishpa, rupachingapaj huangupaichi. Trigotaca, ñuca huasigupi alichipaichi nishami’ nircami” nishpami villajurca.
Mostaza muyuhuan chimbapurashpami parlashca
(Mar. 4:30-32; Luc. 13:18-19)
31Paicuna yarichunmi Jesusca, cashnatapash chimbapurashpa parlajurca: “Jahua pachapi Dios mandajujca, shuj runa paipaj alpapi mostaza nishca muyuguta tarpushcashnami. 32Chai muyuguca, tucui tiashca muyucunatapash yali jamzi jamzipachami. Ashtahuangarin chai muyugu viñashpaca, ima yuratapash yalishpa viñashpami, jatun quiru tucungacaman viñan. Chai yurapaj malquicunapimi, alasyu animalcunaca tazinda rurashpa causanajun” nijurcami.
Levadurahuan chimbapurashpami parlashca
(Luc. 13:20-21)
33Jesusca, cashnatapashmi chimbapurashpa parlajurca: “Shuj huarmica, quimsa batea junda jacupi levadurata chapushpami, tucuilla masa punguingacaman pacashpa saquin. Jahua pachapi Dios mandajujca, chashnapachami” nircami.
Chimbapurana parlocunahuanga, imashpa chashna yachachijushcatami villajun
(Mar. 4:33-34)
34Cai tucui chimbapurashpa parlanacunahuanmi Jesusca, gentecunaman yachachijurca. Imaguta yachachishpapash, chimbapurashpa parlashpallami yachachijurca. 35Profeta villashca pactachunmi, Jesusca chashna yachachijurca. Chai villajca, cashnami nijurca:
“Paicunataca, chimbapurashpa parlashcahuanmi yachachijusha.
Cai pachata Dios churashcamandapacha,
pipash na yachashcatami villasha” nijurcami.
Balicu jihuahuan chimbapurashpa yachachishcatami, Jesusca entendichishca
36Gentecunata cayacaman nishpami, Jesusca huasiman rirca. Chai huasipimi, paipaj yachajujcunaca, Jesuspaj ladoman quimirishpa, cashna ninajurca:
—Pambapi balicu jihuahuan chimbapurashpa parlajushcataca entendichihuai— ninajurcami.
37Shina ninajujpimi Jesusca, paicunaman cashna nishpa tigrachijurca:
—Ali muyuguta tarpuj runashnaca, Runa Aichayu tucushca ñucami cani. 38Cai pachapi causajcunaca, tarpuna pambashnami. Ali muyuguca, Dios mandajujpi causanajuj huahuacunami. Ashtahuangarin diablopaj huahuacunaca, balicu jihuashnami. 39Diablollatami, chagra dueñotaca ninanda fiñashpa, balicu muyuta tarpurca. Cai pacha tucurimui punllami, chagra fucushca cozechai punllashna canga. Cozechajcunaca, angelcunami canga. 40Imashnami balicu jihuata sapimanda llujchishpaca, ninapi rupachin, chashnallatami cai pacha tucurimui punllapipash canga. 41Runa Aichayu tucushca ñucami, ñuca angelcunata cachamusha. Paicunami, nitijachinshna juchata rurachijcunatapash, nalita rurajcunatapash, ñuca mandajujmandaca tucuilla tandachishpa anchuchinga. 42Shina tandachishpami chai gentecunataca, na huañushpa rupajuj jornopi shitanga. Chaipica huacashpa, quirutapash canirishpami causanajunga. 43Ashtahuangarin imatapash cashcatapacha rurashpa causajcunaca, paicunapaj Taita mandajuj llactagupimi, indigushna punchapamba causanajunga. Uyangapaj rinrita charishpaca, aliguta uyaichi.
Ninan valishcata pacashcami
44Jahua pachapi Dios mandajujca, alpa ucupi ninan valishcata pacashcashnami. Chai ninan valishcata shuj runa tarishpaca, chaipillatami pacashpa saquin. Chai runaguca, ninanda cushijushpa rishpami, pai imata charishcatapash tucuilla jatushpa, chai alpagutaca randin.
Ninan valishca perlasgumandami parlashca
45Jahua pachapi Dios mandajujca, juyailla perlascunata randishpa jatuj runashnami. 46Shuj juyailla perlasguta ricushpaca, pai imata charishcatapash tucuilla jatushpami, chai perlasgutaca randin.
Pijita japina linllimandami parlashca
47Shinallata jahua pachapi Dios mandajujca, tucui imashnalla tiaj pijicunata mama cuchapi japigrina linllishnami. 48Linllipi pijicuna jundajpica, manñamanmi llujchin. Pijita japijcunaca tiarishpami, alitaca agllashpa canastacunapi churan. Nalicunataca, shitashpami saquin. 49Chashnallatami, cai pacha tucurimui punllapipash canga. Angelcuna shamushpami, nali gentecunataca, imatapash cashcatapacha rurashpa causaj puracunamandaca anchuchinga. 50Chai nalicunataca, na huañushpa rupajuj nina jornopimi shitanga. Chaipica huacashpa, quirutapash canirishpami causanajunga— nijurcami.
Ninan valishcamandaca mushujtapash, maucatapashmi llujchin nishcami
51Jesusca, paipaj yachajujcunataca cashnami tapurca:
—Ñuca yachachijujtaca, ¿ñachu tucuita yachai ushanguichi?— nircami.
Shina nijpica:
—Ari, ñami yachai ushapanchi, Apunchi Jesús— ninajurcami.
52Shina nijpimi Jesusca, paicunata cashna nirca:
—Mandashca shimita yachachij runaca, jahua pachapi Dios mandajujmandami yachajun. Shina yachajushpaca, huasiyu taita ninan valishcata pai alichishpa charishcata, mushujta, maucata llujchinshnami yachajun— nircami.
Nazaret pueblomanmi, Jesusca rishca
(Mar. 6:1-6; Luc. 4:16-30)
53Cai parlanacunata chimbapurashpa parlashca jipami, Jesusca llujshishpa rirca. 54Paipaj llactaman chayamushpami, Jesusca tandanajuna huasipi yachachijurca. Shina yachachijujpimi, gentecunaca ninanda manllarishpa, cashna ninajurca:
—Cai runaca, ¿maipita cashna ali yachaita yachajushcanga? ¿Maipita pipash na rurai ushanallacunata yachajushcanga? 55¿Nachu cai runaca, carpinteropaj churi? ¿Nachu paipaj mamaca María? ¿Nachu paica Jacobopaj, Josepaj, Simonbaj, Judaspaj huauqui? 56¿Nachu paipaj panicunapash, cai ñucanchi llactapillata tucuilla causanajun? Paica, ¿maipita cashnapacha cai tucuitaca yachajushcanga?— ninajurcami.
57Chashna nishpami, Jesusta na crishpa pandarinajurca. Ashtahuangarin Jesusca, paicunataca cashnami nijurca:
—Profeta runataca, shuj llactapirami alicachishpa chasquin. Ashtahuangarin paipaj llactapi causajcuna, paipaj huasipi causajcunaca, ninandami na ricunayachin— nircami.
58Chai gentecunaca na crishcamandami, pipash na rurai ushanallacunataca chai llactapica na ashtacata Jesusca rurarca.
Currently Selected:
MATEO 13: QUII
Highlight
Share
Copy
Want to have your highlights saved across all your devices? Sign up or sign in
Quichua Imbabura Bible © United Bible Societies, 1994.