MATEO 11
11
Bautizaj Juanga, villajcunatami Jesuspajman cachashca
(Luc. 7:18-35)
1Jesusca, paipaj chunga ishcai yachajujcunaman aliguta yachachishca jipaca, chai llactapillata tiaj pueblocunapi yachachingapaj, villangapajmi rirca.
2Bautizaj Juanga, prezuna huasipi tiajushpami, Quishpichij Cristo imaguta rurashpa purijujtapash uyarca. Chashna uyashpami, paipaj yachajuj puramanda ishcai purata Jesuspajman cachamurca. 3Paicunataca:
—¿Canllu, ñucanchi shuyanajushca Quishpichij Cristo capangui? Na cashpaca, ¿shujtachu shuyapashun?— nishpa tapuchunmi cacharca.
4Shina nijpimi Jesusca, cashna nishpa tigrachirca:
—Cunanga, imata uyashcata, imata ricushcatapash, Juanman cashna nishpa villagrichi: 5‘Ñausacunapash ricunajunmi, jangacunapash alimi purinajun. Lepra ung:uihuan causajcunapash ali tucushcami. Rinrihuan na uyajcunapash uyanajunmi. Huañushcacunatapash causachijunmi. Imagutapash na charijcunamambash, ali villaitami villajun’ nigrichi. 6Ñucata crinata na saquishpa na pandajcunaca, ninandami cushijun— nijurcami.
7Paicuna rijhuanmi Jesusca, Juanmandaca gentecunaman villashpa cashna ni callarirca: “Jichushca pambapica, ¿imata ricungapajta llujshircanguichi? Ninanda huairashpa sucusta cuyuchijujta, ¿ricungapajchu rircanguichi? 8¿Imata ricungapajta llujshircanguichi? ¿Punchapamba churajushcacunatachu ricungapaj rircanguichi? Punchapamba churajushca runacunaca, jatun mandajcunapaj huasicunapimi tianajun. 9Ashtahuanga, ¿imatata ricungapaj rircanguichi? ¿Profeta runaguta ricungapajchu rircanguichi? Ari, cangunataca cashnami nini: Cangunaca, Profeta runatapash yalitami, ricungapaj rircanguichi. 10Juanmanda villashpami, cashna nishpa escribishca tiajun:
‘Ricui, ñucamanda villajtaca, canda ñaupashpa
rishpa, can purina ñanda punda alichijuchunmi cachamugrini’ nijunmi.
11Na llullashpami, cangunataca cashna nini: Huarmimanda huacharishca purapica, Bautizaj Juanda yali ali runaguca, shujllapash na tianllu. Ashtahuangarin Dios mandajuj llactagupica, tucuita yali uchillashna causaj runagumi, Juandaca ashtahuan yali.
12Bautizaj Juan villajui punllamandapacha cunangamanmi, Dios mandajuj jahua pacha llactaguca, ninanda llaquichi tucujun. Chashna ninanda llaquichijcunami, japishpa charinajun. 13Profetacunapash, mandashca shimicunapash, Juan shamungacamanmi villanajurca. 14Chasquingapaj munashpaca, paita chasquichi. Paimi, chai shamuna Elías runaguca. 15Uyangapaj rinrita charishpaca, aliguta uyaichi.
16Ashtahuangarin cunan viñaicunataca, ¿imahuanda chimbapurashayari? Cunan viñaicunaca, plazacunapi tiarishpa, paicunapaj cumbacunata caparinajuj huambracunashnami causanajun. 17Paicunaca, cashna nishpami caparinajun: ‘Canguna bailachun gaitata gaitajpipash, na bailashpami purircanguichi. Yarishpa yarishpa huacajpipash, na huacashpami purircanguichi’ ninajunmi. 18Bautizaj Juan shamushpaca, micuitapash na micushpa, vinotapash na ufiashpami purijun. Shina cajpimi, paitaca: ‘Aya jundashca runamari’ ninajun. 19Runa Aichayu tucushca ñuca shamushpami, micunatapash micushpa, vinotapash ufiashpa purijuni. Chaimandami cashna ninajuhuan: ‘Ricuichi, cai runaca yapata micuj runami, vinotapash ufiaj runami. Impuestota japishpa causanajuj runacunahuan, juchayu gentecunahuanmi, cumba tucushpa tandanajun’ ninajuhuanmi. Ashtahuangarin Diospaj ali yachaitaca, tucui paipaj huahuacunallami, imatapash cashcatapacha rurashpa ricuchinajun” nijurcami.
Na cazuj pueblocunaca, ¡aij imachari tucunga! nishcami
(Luc. 10:13-15)
20Tauca pueblocunapimi, pipash na rurai ushanallacunata ninanda rurashpa, Jesusca purijurca: Chaita ricushpapash, na llaquirishpa Diospajman tigrarinajurcachu. Chaimandami, Jesusca nalicachishpa shinllita cashna nishpa rimajurca: 21“Corazín shuti pueblopi causajcunalla, ¡aij imachari tucunguichi! Betsaida shuti pueblopi causajcunalla, ¡aij imachari tucunguichi! Cangunahuan cashpami, pipash na rurai ushanallacunata imatapash rurajurcani. Tiro shuti, Sidón shuti pueblocunapi cashna rurashca cajpica, uchami ninanda llaquirishpa Diospajman tigrarinman carca. Paicuna tigrarishcata ricuchingapaca, cañamuta churajushpami, uchufahuan shitarinman carca. 22Chaimandami cangunataca, cashna nini: Dios llaquichijui punllapica cangunataca, Tiro shuti, Sidón shuti pueblocunapi causanajuj gentecunatapash ashtahuan yalimi llaquichinga. 23Capernaum pueblopi causajcuna, cangunaca jahua pachaman apai tucushunllami yanguichimi. Ashtahuangarin ucu pachamanmi, shitai tucunguichi. Sodoma shuti pueblopi, pipash na rurai ushanallacunata imatapash juyailla rurashca cajpica, cunangamanmi chai puebloca tiajunman carca. 24Chaimandami cangunataca, cashna nini: Dios llaquichijui punllapica cangunataca, Sodoma shuti pueblopi causanajuj gentecunatapash ashtahuan yalimi llaquichinga” nijurcami.
Ñucapajman shamushpa samaichi nishcami
(Luc. 10:21-22)
25Chai punllacunapimi, Jesusca cashna nijurca: “Jahua pachatapash, cai pachatapash Mandajuj, ñuca Taitalla. Canga, alipacha yachajushca gentecunaman, alita yarishpa causanajuj gentecunamambash, cai yachajunataca na ricuchircanguichu. Ashtahuangarin huahuashna causajcunaman yachachishcamandami, candaca ninanda alicachini. 26Ari, ñuca Taitalla, canga chashnatami munarcangui.
27Ñuca Taitami, imagutapash tucuita ñucamanlla carahuashca. Pipaj Churi cajtapash, gentecunaca na yachahuanllu, ñuca Taitallami yachan. Ñuca Taitatapash, pipash na rijsinllu. Ñucallami, paipaj Churi cashpa rijsini. Shinallata paipaj Churi maijanmambash rijsichijpillami, ñuca Taitataca rijsinajun. 28Imatapash rurashpa shaijushcashna, aparishcashna causajcuna, ñucapajman tucuilla shamuichi. Ñucami cangunataca samachisha. 29Ñuca yachachishcataca, yugota aparinshna yachajuichi. Ñucallami, na ñapash fiñarij, jariyanata na yarij shunguta charini. Ñucamandami cangunapaj almaca, samanata taringa. 30Ñucapaj yugoca fangallagumi, aparijpipash na llashachingachu” nijurcami.
Currently Selected:
MATEO 11: QUII
Highlight
Share
Copy
Want to have your highlights saved across all your devices? Sign up or sign in
Quichua Imbabura Bible © United Bible Societies, 1994.