LUCAS 2
2
Jesús huacharishcatami villajun
(Mat. 1:18-25)
1Chai punllacunapimi, cashna tucurca: Augusto Cesar shuti jatun mandajca, tucui gentecuna paicunapaj shuticunata churachinajuchun nishpami, shuj mandashcata churashpa villachijurca. 2Siria llactata, Cirenio shuti runa mandajujpimi, mashna gentecuna tiajta yachangapaj cuentachishpa punda callarirca. 3Tucui gentecunami, shuticunata churachingapaca, paicunapaj llactacunaman rinajurca. 4Shinamandami Joseca, Galilea llactapi tiaj Nazaret pueblomanda llujshishpa, Judea llactapi tiaj Belén puebloman rijurca. Chai pueblopimi, jatun mandaj Davidca huacharishca carca. Davidpaj familiamanda mirai cashpami, Joseca chaiman rina tucurca. 5Chai pueblopi shutita churachingapajmi Joseca, paihuan cazarana Mariandi rinajurca. María huarmiguca, vijsayu ungunallami carca. 6Paicuna chaipi cajpimi, cashna tucurca: Chaipimi, unguna punlla pactarca. 7Paicuna mingarina huasipica junda junda cajpimi, animalcuna shayaj ucupi paipaj punda jari huahuagutaca ungurca. Chaipi ungushpami, animalcuna micuchun churana jahuapi, huahuaguta maitushpa sirichirca.
Michij runacunamanmi angelcuna villashca
8Chai muyundi llactapimi, llamacunata michij runacuna paicunapaj llamacunata cuidana horaspi cati cati cuidashpa pacarinajurca. 9Shina cuidanajujpimi, Jatun Diospaj shuj angelca, paicunaman ñapash ricurimurca. Jatun Diospaj punchapambagumi, paicunapaj muyundipi punchayachijurca. Chaita ricushpami michijcunaca, ninanda manllarinajurca. 10Shina manllarijpimi angelca, cashna nijurca: “Na manllarinachu canguichi. Ricuichi, tucui gentecuna ninanda cushijuna, shuj ali villaitami villaj shamuni. 11Jatun mandaj David huacharishca pueblopimi, cangunapaj ali cachun, shuj Quishpichij cunan huacharishca. Paica Mandaj CRISTOMI. 12Caimi, cangunaman ricuchina canga: Animalcuna micuchun churana jahuapi, maitushca sirijujtami, chai huahuagutaca tarigringuichi” nijurcami.
13Shina nijujpi, jahua pachamanda ashtaca angelcuna shamushpa, chai angelhuan ñapash ricurirca. Paicunami, Taita Diosta cashna nishpa alicachinajurca:
14“¡Jahua pachapi Taita Diosca,
punchapambagumi cangui ni tucushca cachun!
¡Alpapi causaj gentecunapash, casilla ali causaita,
Diospaj ali munaita charichun!” ninajurcami.
15Shina nishpa, chai angelcuna paicunapaj ñaupajmanda, jahua pachaman tigrajhuanmi, cashna tucurca: Chai michijcunaca, caishuj chaishujmi cashna ninajurca:
—Belén puebloman rishpa, cashna tucushcata Jatun Dios ñucanchiman villashcata jacuchi, ricushunchi— ninajurcami.
16Paicunaca, ucha rishpami Mariatapash, Josetapash tarigrirca. Huahuagutaca, animalcuna micuchun churana jahuapi sirijujtami tarigrirca. 17Huahuaguta ricushpami, chai huahuamanda paicunaman imatalla nishcata villanajurca. 18Michijcuna chashna villanajujpica, tucui uyajcunami manllarinajurca. 19Ashtahuangarin María huarmiguca, tucui chai villashcacunataca aligutapacha yarishpami, paipaj shungupilla alichijurca. 20Chai michijcunaca, paicunaman ángel villashcashna, tucuita uyashpa ricushpami, Taita Diostaca punchapambagumi cangui nishpa, alicachishpa tigranajurca.
Diospaj huasipimi, huahua Jesusta Diosman mingashca
21Pusaj punlla pactajpimi huahuagutaca, circuncisión nishcata rurarca. Nara vijsayu tucujpillata, Mariaman ángel nishcashnami, chai huahuagutaca, JESÚS shutita churanajurca.
22Moisés mandashca shimipi nishcashnami, Diospaj ñaupajpi paicuna alipi ricurina punlla chayamurca. Shinamandami huahuagutaca, Jatun Diosman mingangapaj, Josendi Mariandi, Jerusalenman apamunajurca. 23(“Punda jari huahuaguta ungujpica, Jatun Diospajlla causachun shicanyachinami canguichi” nishpami, Jatun Diosca mandashpa escribichirca). 24“Ishcai urpiguta cashpa, na cashpaca ishcai palomaguta cashpapash cuchun” nishpa, Diosca mandashca carca. Chai mandashcapi nijunshnallatami, Diosman cushpa huañuchinajuchun, apashpa rinajurca. 25Chai punllacunapica, Simeón shuti runagumi, Jerusalenbi causajurca. Paica, imatapash cashcatapacha ruraj runagu cashpami, Diosta yariashpa causajurca. Shinallata israelcuna cushichinajuchumbashmi shuyajurca. Diospaj jucha illaj Espirituca, Simeón runagupajmanmi shamushca carca. 26Diospaj jucha illaj Espiritumi, Simeonman cashna villashca carca: “Jatun Dios, aceiteta talishpa javishca Quishpichijta nara ricushpaca, na huañunguichu” nishcami carca. 27Diospaj Espíritu yarichijujpimi, Diospaj huasiman shamurca. Moisés mandashca shimipi nijujta pactachingapajmi, Diospaj huasiman huahua Jesusta apashpa taitandi, mamandi paipajman chayamunajurca. 28Simeonga, huahuaguta paipaj rigrapi marcashpami, Taita Diostaca aligumi cangui nishpa, cashna nijurca:
29“Jatun Dioslla, can nishcashnallata,
cunanga canda servij ñucataca,
cushijushpa huañuchun saquihuailla.
30Quishpichijuchun can cachamushcataca,
ñuca ñavihuambacha ricuparcanimi.
31Paitaca, tucui gentecuna ricuchunmi cachamupashcangui.
32Na israelcunamambash michagushna punchayachijuchun,
can agllashca israelcunapash juyaillagu ricurichumi cachamushcangui” nijurcami.
33Huahua Jesusmanda tucui imata Simeón nishcamandami Josendi, huahuagupaj mamandi manllarishpa uyarca. 34Simeonga, paicunata bendiciashpami, Jesuspaj mama Mariataca, cashna nijurca:
—Ricui, cai huahuagutaca ashtaca israelcuna chingagrichun, na cashpaca quishpirichunmi, Taita Diosca cachamushca. Paillatami, ashtaca gentecuna Diosta na ricunayachishpa causanataca ricuchijunga. 35Ashtacacuna paicunapaj shungupi imata yarinajujtami ricuchijunga. (Cambaj shungupica, espadahuan tujsijpishnami, ninanda llaquiringui)— nijurcami.
36Shinallata Dios ima nishcata villaj Ana shuti huarmigupashmi, chaipi carca. Paica, Aser shuti aillupura, Fanuel shuti runapaj ushimi carca. Paica, chaira viñai cuitsagu cazarashca cashpapash, canchis huatacamanllami cusayu causarca. 37Shina cashpapash paica, pusaj chunga chuscu huatatami sapalla causajurca. Paica, Diospaj huasi ucumandaca, llujshitapash na llujshishpami, chaipi servishpa tutandi punllandi na micushpa, Diosta mañashpa causajurca. 38Chai huahuagumanda Simeón villajujpillatami, Ana shuti mamaguca chayamushpa, Taita Diosta pashi nijurca. Chai huahua Jesusmandaca, Jerusalenbi causajcuna quishpichi tucunata shuyanajuj tucui gentecunamambashmi villajurca.
Nazaret pueblomanmi tigrashca
39Jatun Dios mandashcata tucuita pactachishpami, paicuna causanajushca Galilea llactapi tiaj Nazaret pueblomanllata tigranajurca. 40Chai huahuaguca, Taita Diospaj ninan juyai paihuan cajpimi, ashtahuan viñashpa, ashtahuan ña shinlli tucushpa, aligutapacha yachajushpa viñajurca.
Huahua Jesusca, Diospaj huasipimi cashca
41Jesuspaj taita, mamaca, Pascua fiesta chayajpica, cada huatami Jerusalenman rinata yacharca. 42Chai fiestaman rinata yachashpami Jesusca, ña chunga ishcai huatata charijpi, Jerusalenman vichai rinajurca. 43Chai fiesta punllacuna yalijpimi, huasiman tigranajurca. Ashtahuangarin paipaj mamapash, Josepash na yachajtami Jesusca, Jerusalenbi quedashca carca. 44“Gentecunapaj chaupipimi catimujunga” yashpami, shuj punlla chishangacaman rinajurca. Na ricurijpica, paicunapaj familiacunata, cumbacunata tapushpami mascanajurca. 45Ashtahuangarin na tarishpallatami, Jerusalenman mascashpandi tigranajurca. 46Quimsa punllata mascashca jipami, cashna tucurca: Diospaj huasi ucupimi, mandashca shimita yachachijcuna villajpi uyashpa, imagutapash tapushpa, paicunapaj chaupipi tiajujta tarigrirca. 47Paita tapujpica, aligutapacha yarishpa tigrachijpimi, tucuicuna manllarishpa uyanajurca. 48Chaipi tiajujta paipaj taitapash, mamapash ricushpaca, ninandami manllarirca. Shina ricushpami, paipaj mamaca cashna nirca:
—Ñuca huahua, ¿imashpata ñucanchitaca cashna ninanda llaquichingui? Taitandi ñucandimari, ninanda llaquirishpa mascashpa shamunchi— nircami.
49Shina nijpimi Jesusca, cashna nirca:
—Ñucataca, na mascanachu carcanguichi. Ñuca Taitapajta ruranapacha cajtaca, ¿nachu yacharcanguichi?— nircami.
50Ashtahuangarin imamanda chashna nijtaca taitapash, mamapash na atinarcachu. 51Paipaj taitahuan, mamahuan urai rishpa Nazaret puebloman tigrashpapash, aliguta cazushpami causajurca. Tucui ima tucushcatapash, paipaj mamaca na cungashpami, paipaj shungupilla yarijurca. 52Jesusca viñashpandi, aliguta yachajushpandimi catijurca. Shinallata Taita Diospash, gentecunapash ninanda juyajpimi causajurca.
Currently Selected:
LUCAS 2: QUII
Highlight
Share
Copy
Want to have your highlights saved across all your devices? Sign up or sign in
Quichua Imbabura Bible © United Bible Societies, 1994.