LEVÍTICO 2
2
Diosman granocunata caranatami villajun
1Mandaj Diosman granota cushpa rupachingapaj maijambash apamushpaca, ashtahuan ali jacutami apamunga. Chai jacupica, aceiteta talishpa, inciensota churashpami apamunga. 2Chaitaca, Aaronbaj churi curacunapajmanmi apamunga. Chai apamushcacunataca shuj curami, shuj maqui junda ashtahuan ali jacuta japinga. Shinallata aceitetapash, tucuilla inciensotapashmi japinga. Chaitaca yarichina cachunmi, altarpi churashpa rupachinga. Shina cushpa rupachijujpimi, Mandaj Diospaca mishquillagu ashnajunga. 3Diosman cushpa rupachishcamanda puchushcacunaca, Aaronbaj, paipaj churicunapajmi canga. Mandaj Diosman cushpa rupachishcacunaca, paipajlla shicanyachishcami.
4Jornopi cusashcata Diosman cungapaj apamushpaca, ashtahuan ali jacuta aceitehuan chapushpa, levadura illaj mishqui tandata rurashpa apamungui. Tortillacunatapash, levadura illajta rurashpa, aceiteta javishpa apamungui.
5Ashtahuangarin sartenbi cusashcata Diosman cungapaj apamushpaca, ashtahuan ali jacuta aceitehuan chapushpa, levadura illajta rurashcata apamungui. 6Chaitaca, asha asha chaupishpa, chai jahuapi aceiteta talingui. Chaica, Diosman carashcami canga.
7Uchilla pailapi yanushcata Diosman cungapaj apamushpaca, ashtahuan ali jacuta aceitehuan chapushpa apamungui. 8Chaicunata chashna aliguta alichishcata, Mandaj Diosman cungapaj apamushpaca, curaman cungui. Chaitaca, curami altarman apamunga. 9Chai carashcataca curami, yarichina cachun ashata japishpa, altarpi rupachijunga. Shina cushpa rupachijujpimi, Mandaj Diospaca mishquillagu ashnajunga. 10Diosman cushpa rupachishcamanda puchushcacunaca, Aaronbaj, paipaj churicunapajmi canga. Mandaj Diosman cushpa rupachishcacunaca, paipajlla shicanyachishcami.
11Imata cashpapash Mandaj Diosman cunaca, levadura illajmi canga. Levadurahuan chapushcata, balun mishquihuan chapushcata, Mandaj Diosman cushpa rupachijuchunga, napacha cunachu canguichi. 12Chaicunataca, chagrapi punda fucushca granocunatashnami, Mandaj Diosman cuna canguichi. Ashtahuangarin altarman vichai apashpa rupachijujpi mishquillagu ashnajuchunga, na cunachu canguichi.
13Tucui imata Diosman carashpapash, cachihuan javingui. Can imatalla caranapica, cambaj Taita Dioshuan ari ninajushcata ricuchij cachica, ima horallapash napacha illanachu. Tucui imatalla can caranapimi, cachitaca churana cangui.
14Chagrapi punda fucushca granocunata, Mandaj Diosman apamushpaca, verde espigataca camllashpa, granocunataca cutashpa paiman cungui. 15Chai jacupica, aceitetapash, inciensotapash churashpa cungui. Chaica, Diosman carashcami canga. 16Chai carashcataca curami, chai caraj runata Dios yarichun rupachinga. Grano cutashcamanda shuj ashatapash, aceitetapash, tucuilla inciensotapashmi rupachinga. Chaica, Mandaj Diosman cushpa rupachishcami canga.
Currently Selected:
LEVÍTICO 2: QUII
Highlight
Share
Copy
Want to have your highlights saved across all your devices? Sign up or sign in
Quichua Imbabura Bible © United Bible Societies, 1994.