JOB 41
41
1Canga, leviatán nishca animaltaca, ¿anzuelohuanlla llujchi ushanguimanllu? Na cashpaca, ¿paipaj jallupi huascahuan huatai ushanguimanllu? 2¿Paipaj singapipash, cabiata yalichi ushanguimanllu? ¿Garfio nishca jirruhuan, quijadasta utujushpa churachi ushanguimanllu? 3¿Paica, ama llaquichihuaichu nishpachu, candaca cutin cutin ninanda caparinman? ¿Candaca, uyanayaita llullashpachu rimanman? 4¿Paica, tucui causaipi canda servingapaj, canhuan ari nijungachu? 5¿Paihuanga, alasyu animalhuanshna pugllai ushanguimanllu? Na cashcapaca, ¿cambaj ushicuna pugllachun, huatashpa saquinguimanllu? 6¿Paitaca, cumba puracuna jatun micuita rurashpa micungachu? ¿Paitaca, jatushpa randijpura chaupiri ushangachu? 7¿Paipaj carataca, cuchillohuan cuchunguimanllau? ¿Na cashpaca, paipaj umataca, pijita tujsishpa japina jirruhuan tigranguimanllu? 8Paitaca, cambaj maquihuan huactagriyari. Canga, paihuan macanajushcata yarijushpallatami, cutinga na macanajungapaj munangui. 9Uyaichi, paita maijan japingapaj munashpapash, na cazujpillatami tigranga. Paitaca, ricushpallatami manllarishpa urmanga. 10Paita jariyashpa rijchachij runaca, pipash na tianllu. Ñuca ñaupajpicarin, ¿pita shayari ushangayari? 11¿Pita jipaman tigrachihuachun nishpa, imata cashpapash ñucaman punda cushcanga? Cai pachapi imalla tiajcunaca, ñucapajmi. 12Na upalla quedashpami, pai imashna cajtaca, paipaj ushaimandapash, na manllaj cajtapash villagrini. 13Paipaj vijsa carataca, ¿pita ricui ushanga? ¿Pita paitaca, ishcai frenota churangapaj quimiri ushanga? 14¿Pita paipaj shimitaca pascanga? Jilapi tiajuj paipaj quirucunaca, manllachinllami. 15Paipaj juyailla churajunapash, jarcarina shinlli escudoshnami. Paipura quichijita sirashcashnami. 16Chimbapura tandachishca cajpimi, chaitaca huairapash na yaicun. 17Shinllitapacha paipura llutashcashnami. Na pascai ushanallata, shinllita ali huatashcashnami. 18Paipaj singahuan fucujpica, punchapamba ninami llujshin. Paipaj ñavica, pacarijpi indi llujshijunshnami. 19Paipaj shimimandaca, rupajuj ninami llujshin. Ninami rupashpa zimbrajun. 20Paipaj singamandapash, timbujuj mangamandashna, na cashpaca caldermandashnami cushni llujshin. 21Paipaj samaimi, carbongunata japichin. Paipaj shimimandaca, rupajuj ninami llujshin. 22Paipaj ushaica, paipaj cunga tullupimi tian. Paipaj ñaupajpillatami, huañujunshna tucushpa caita chaita urman. 23Ashtahuan ñutu aichacunapash, ninanda shinlliyashcami. Paipica shinllipacha tiashpa, na cuyurinllu. 24Paipaj shungupash, shinlli rumishnami. Juchu quirushna shinllipachami. 25Ninan shinlli runacunapash, jatun ushaita charijpimi manllanajun. Ña huañungashna tucushpallami, shungupi nali yuyaicuna tiashcatapash anchuchinajun. 26Paita maijan japishpapash, espadahuan cashpa, lanzahuan cashpa, flechahuan cashpa, jirru churajunahuan cashpapash, napacha huañuchi ushangachu. 27Paipaca, jirrupash jupashnami, broncepash ismushca caspishnami. 28Flechapash, paitaca na calpachinllu. Huaracahuan rumicunata shitajpipash, jupashnami paipica chayan. 29Tucui imalla macanajunacunapash, paipaca jupashnami. Paica, lanzata tsilin nichijta uyashpapash, asinshnami uyan. 30Paipaj chaqui ucupash, filo filo jirrucunashnami. Chaihuanmi, alpapi utujurijta sarushpa purin. 31Ucu ucu mama cucha yacutapash, mangata timbuchinshnami timbuchin. Jambicunata tandachishpa, timbuchinshnami timbuchin. 32Paipaj huashamanmi, ñanda yurajlla punchayachin. Manllanayai ucu ucu yacutapash, yuralla putsujutami ruran. 33Cai pachapica paiman rijchajca, pipash na tianllu. Paitaca, imatapash na manllaj animal cachunmi rurarcani. 34Paica, paita yali ima jatun tiajpipash, yangapimi churan. Tucui jariyashpa jatun tucushcacunatapash, jatun mandajmi” nijurcami.
Currently Selected:
JOB 41: QUII
Highlight
Share
Copy
Want to have your highlights saved across all your devices? Sign up or sign in
Quichua Imbabura Bible © United Bible Societies, 1994.