ISAÍAS 17
17
Damasco pueblota llaquichinatami villashca
1Damasco pueblota llaquichinata Dios villashcatami, cashna villajurca: “Ricuichi, Damasco puebloca, ña na pueblo cangachu. Chai puebloca, rumi mundunllami tucunga. 2Aroer shuti pueblo ladollapi pueblocunaca, jichui tucushcami. Chaicunaca, animalcuna shayana pushtumi tucunga. Chaipi puñunajujpipash, pipash na manllachingachu. 3Efraín llactata, Damasco pueblota jatun mandajta ayudajcunaca tucuringami. Siria llactapi causajcuna huaquinlla puchushcacunaca, israelcunashna juyaillagumi canga” ninmi tucuita Mandaj Diosca.
Israelcunata llaquichinatami villajun
4Chai punllacunaca, Jacobopaj miraicuna juyailla cashpapash, asha ashami tucurishpa catinga. Paicunapaj cuerpo racuyashca cashpapash, jamziyangami. 5Grano fucushcata cozechaj runa tandachijpishnami tucunga. Trigota maquihuan cuchujpishnami tucunga. Refaim shuti pambapi granota tandachishca jipa, tucuilla pallajujpishnami tucunga. 6Chai llactapica, olivos yurapi fucushcata cuyuchishpa pallajpi, pallajuna puchushcashnami israelcunaca puchunga. Ishcai grano, na cashpaca quimsa granolla, malqui pundacunapi puchunshnami puchunga. Ashtahuan ali granushca malquicunapi chusculla, na cashpaca pichalla puchunshnami puchunga. Tucuita Mandaj Diosmi, chashna nin.
7Chai punllami runacunaca, paicunata Ruraj Diosta ricunajunga. Paicunapaj ñavihuanmi, israelcunapaj jucha illaj Diostaca ricunajunga. 8Paicunapaj maquihuan rurashca altarcunataca, na ricunajungachu. Asera shuti huarmiman rijchajta, paicunapaj maquihuan rurashca dioscunatapash, indiman rijchajta rurashca dioscunatapash, na ashtahuan ricunajungachu.
9Chai punllapica, jatun pircahuan jarcashca paicunapaj pueblocunapash, retoñashca quiru malquicunapi huaquinlla grano puchushcashnami canga. Paicunaca, israelcunapaj juchamandami, huaquinlla puchushca canga. Llaquinayaita tucuchi tucunallami tianga. 10Cangunata quishpichij Taita Diostami cungarcanguichi. Jatun rumishna pacaj Diostami, na yarircanguichi. Chaimandami cangunaca, juyailla yuracunata tarpunguichi. Shuj llactamanda retoño yuracunatami tarpunguichi. 11Tarpushca punllallata viñachishpami, chai pambapi tarpushcataca, cayandi punllallata jatunyachingui. Ashtahuangarin cozechana granocunaca, jatun llaqui punllapimi tucuringa. Imatapash na rurai ushanalla, ninan llaquimi tucuchinga.
12¡Aij, ashtaca tandanajushca gentecunalla, mama cucha yacu jatarishpa culunlla huacanshnami, ninandapacha caparinajunga! Ashtaca jatun yacucuna, ninanda huacashpa shamunshnami, shuj llactacunamanda runacunaca ninanda caparishpa shamunajunga. 13Chai gentecunaca, ashtaca jatun yacucuna huacanshnami ninanda caparinajunga. Shina cajpipash, Taita Dios rimashpa jarcajpimi, caruman pacajungapaj rinajunga. Urcupi viñashca ujsha jupata huaira apanshnami, maitapash cachanga. Ñutu alpata acapana jatarichijpishnami chinganga. 14Chishi horaspica, musparina llaquimi tianga. Ashtahuangarin nara pacarijpillatami, fiñajcunaca tucuringa. Ñucanchita llapinshna llaquichishpa imatapash quichushpa apajcunaca, chashnami tucunga.
Currently Selected:
ISAÍAS 17: QUII
Highlight
Copy
Compare
Share
Want to have your highlights saved across all your devices? Sign up or sign in
Quichua Imbabura Bible © United Bible Societies, 1994.
