EZEQUIEL 48
48
1Caipica, Israel aillucunapaj shuticunatami villajun: Jahua lado manñamandaca, Hetlón shuti puebloman rina ñanda catishpa, Hamat shuti, Hazar-enán shuti pueblocunaman yaicuna ñangamanmi canga. Chaica, Damasco pueblo, jahua lado manñamandaca, Hamat shuti pueblo ladocamanmi Dan shuti ailluca, chaipimi indi llujshimuj ladomanda, indi huashajuj ladocaman asha alpata japinga. 2Dan aillupaj alpa lindero ladopica, Aser shuti aillumi, indi llujshimuj ladomanda, mama cucha ladocaman asha alpata japinga. 3Aser shuti aillupaj alpa lindero ladopica, Neftalí aillumi, indi llujshimuj ladomanda, mama cucha yacucaman asha alpata japinga. 4Neftalí aillupaj alpa lindero ladopica, Manasés aillumi, indi llujshimuj ladomanda, mama cucha ladocaman asha alpata japinga. 5Manasés aillupaj alpa lindero ladopica, Efraín aillumi, indi llujshimuj ladomanda, mama cucha ladocaman asha alpata japinga. 6Efraín aillupaj alpa lindero ladopica, Rubén aillumi, indi llujshimuj ladomanda, mama cucha ladocaman asha alpata japinga. 7Rubén aillupaj alpa ladopica, Judá aillumi, indi llujshimuj ladomanda, mama cucha ladocaman asha alpata japinga.
8Judá aillupaj alpa lindero ladopica, indi llujshimuj ladomanda mama cucha ladocaman, asha alpata shicanyachinguichi. Chai alpaca, pusaj chunga kilómetro anchomi canga. Largopaca, caishujcuna japinajushcashnallatami canga. Chai alpa chaupipimi, Diospajlla huasica tiajunga.
9Mandaj Diospajlla shicanyachishca alpaca, pusaj chunga kilometromi canga. Anchoca, quimsa chunga ishcai kilometromi canga. 10Diospajlla alpamandallata asha alpata, curacunapajlla cachun shicanyachinguichi. Chai asha alpa jahua ladoca, pusaj chunga kilómetro largomi canga. Shinallata indi huashajuj ladopica, quimsa chunga ishcai kilómetro anchomi canga. Cutin caishuj asha alpaca, quimsa chunga ishcai kilómetro anchomi, indi llujshimuj ladoman canga. Ura ladoca, pusaj chunga kilómetro largomi canga. Chai alpacunapaj chaupipimi, Diospajlla huasica tiajunga. 11Sadoc shuti curapaj mirai curacunaca, ñucapajlla causanajushpami, ñuca mandashcacunata cazunajurca. Paicunaca, israelcuna nalita ruranajujpipash, ima nalitapash na ruranajurcachu. Paicunaca, levita curacunashnaca na pandata ruranajurcachu. 12Paicunaca, levita curacunapaj alpa ladopillatami, asha alpata japinga. Chai alpaca, Diospajlla shicanyachishcami canga. 13Levitacunapaj alpaca, Sadoc shuti runapaj mirai curacunapaj alpa ladopillatami canga. Chai alpapaj largopash, pusaj chunga kilometromi canga. Anchoca, quimsa chunga ishcai kilometromi canga. Largoca tucuillami, pusaj chunga kilometrota charinga. Anchopash tucuillami, quimsa chunga ishcai kilometrota charinga. 14Levitacunaca, chai alpataca, ashatallapash na pimambash jatui ushangachu. Chai alpapaj randi, shuj alpata japitapash na ushangachu. Chai alpapi punda fucushca granotaca, pimambash na cui ushangachu. Chaicunaca, Mandaj Dios ñucapajlla cashcamandami, chashna ruraitaca na ushanga.
15Chai pusaj chunga kilometrota charij alpamanda chunga sucta kilómetro puchushca asha alpaca, pueblota rurangapaj, gentecuna causangapaj, michina pambacunapajmi canga. Chai alpa chaupicunapimi, pueblo tucunga. 16Chai pueblota rurana alpaca, jahua ladomambash, ura ladomambash, chunga chuscu kilómetro, chuscu patsaj metromi canga. Shinallata indi llujshimuj ladomambash indi huashajuj ladomambash, chunga chuscu kilómetro, chuscu patsaj metromi canga. 17Chai pueblo jahua ladomambash, ura ladomambash, pusaj patsaj metro largoca, michina pambapajmi canga. Shinallata indi llujshimuj ladomambash, indi huashajuj ladomambash, pusaj patsaj metro largoca, michina pambapajllatami canga. 18Diospajlla alpa ladopica, pueblopi servijcuna micuchun tarpuna alpami canga. Chai alpaca, indi llujshimuj ladomambash, indi huashajuj ladomambash, quimsa chunga ishcai kilometrotami charinga. 19Pueblopi servijcunaca, Israel aillu puracunamandallami tucuilla canga. 20Largomambash, anchomambash, pusaj chunga kilometrota charij chai tucui alpataca, asha asha shicanyachinguichi. Chai alpacunapimi, Diospajlla huasipash, pueblopash shayaringa.
21Diospaj huasita rurangapaj, pueblota rurangapaj shicanyachishca alpa ladopica, tucui ladoman asha puchushca alpaca, mandaj runapajmi canga. Chaishuj asha alpaca, pusaj chunga kilometromandaca, indi llujshimuj ladomanmi puchunga. Caishuj asha alpaca, pusaj chunga kilometromandaca, indi huashajuj ladomanmi puchunga. Chai ishcai alpacunami, mandaj runapaj canga. Chai ishcai asha alpacunapaj chaupipimi, Diospajlla huasica shayaringa. 22Mandaj runa japina asha alpaca, chashnami levitacunapaj alpa linderomandaca, pueblota rurana alpa linderocaman canga. Chaicunaca, Judá aillupaj linderomandaca, Benjamín aillupaj linderocaman canga.
23Shinallata caishuj Israel aillucunapaj alpacunaca, indi llujshimuj ladomandaca, mama cucha ladocamanmi canga. Chaipimi Benjamín ailluca, asha alpata japinga. 24Benjamín aillupaj alpa lindero ura ladomambash, Simeón aillumi, indi llujshimuj ladomandaca, mama cucha ladocaman asha alpata japinga. 25Simeón aillupaj alpa lindero ura ladomambash, Isacar aillumi, indi llujshimuj ladomandaca, mama cucha ladocaman asha alpata japinga. 26Isacar aillupaj alpa lindero ura ladomambash, Zabulón aillumi, indi llujshimuj ladomandaca, mama cucha ladocaman asha alpata japinga. 27Zabulón aillupaj alpa lindero ura ladomambash, Gad shuti aillumi, indi llujshimuj ladomandaca, mama cucha ladocaman asha alpata japinga.
28Gad shuti aillupaj alpa lindero ura ladomambash, Tamar shuti pueblomandaca, fiñanajui yacucaman, shinallata Cades shuti pueblomandaca Egipto llactahuan tuparinapi tiaj jatun larca yacuta catishpa, Jatun Cuchacamanmi lindero canga. 29Israel aillucunaca, shinami cai alpataca, suerteta rurashpa chaupirina canguichi. Chaicunami, canguna japina alpacunaca canga. Mandaj Jatun Dios ñucami, chashna nini.
30Chai puebloca, jahua ladomambash, chunga chuscu kilómetro, chuscu patsaj metromi canga. Chai pueblopaj pungucunaca, cashnami canga: 31Chai pueblocunapaj pungucunaca, Israel aillucunapaj shuticunahuanmi canga. Jahua ladomanmi, quimsa pungu canga. Shuj punguca, Rubén shutihuan, caishuj punguca, Judá shutihuan, chaipaj jipa punguca, Leví shutihuanmi canga. 32Shinallata indi llujshimuj ladomambash, chunga chuscu kilómetro, chuscu patsaj metrotallami canga. Chaipipash, quimsa pungucunallatami tianga. Shuj punguca, José shutihuan, caishuj punguca, Benjamín shutihuan, chaipaj jipa punguca, Dan shutihuanmi canga. 33Ura ladomambash, chunga chuscu kilómetro, chuscu patsaj metrollatami canga. Chaipipash, quimsa pungucunami tianga. Shuj punguca, Simeón shutihuan, caishuj punguca, Isacar shutihuan, chaipaj jipa punguca, Zabulón shutihuanmi canga. 34Indi huashajuj ladomambash, chunga chuscu kilómetro, patsaj canchis chunga picha metrollatami canga. Chai ladomambash, quimsa pungucunami tianga. Shuj punguca, Gad shutihuan, caishuj punguca, Aser shutihuan, chaipaj jipa punguca, Neftalí shutihuanmi canga. 35Chai pueblo muyundita medijpica, picha chunga canchis kilómetro, sucta patsaj metromi carca. Chai punllamandapachami, chai puebloca: ‘Mandaj Diosmi chaipi’ nishca shutihuan canga” nijurcami.
Currently Selected:
EZEQUIEL 48: QUII
Highlight
Share
Copy
Want to have your highlights saved across all your devices? Sign up or sign in
Quichua Imbabura Bible © United Bible Societies, 1994.