ÉXODO 39
39
1Diospajlla huasi ucupi Diospajta rurangapaj churajunacunataca, azul, morado, yana puca puchacunahuanmi ruranajurca. Shinallata Mandaj Dios imashna Moisesta mandashcashnallatami Aaronmambash, Diospajtalla rurana churajunacunata ruranajurca.
2Efod nishcataca, orotami, azul, yana puca puchacunahuan, caupushca lino puchacunahuan rurarca. 3Orota tacashpami, shuj tablata ruranajurca. Chai jipaca azul, morado, yana puca puchacunahuan, lino puchahuan juyaillaguta ahuangapajmi, puchacunata rutunajurca. 4Ishcandi lado manñata tandachishpa sirangapajmi, hombreracunata ruranajurca. 5Efod jahuapi tiajuj cintatapashmi, chaipillata rurashpa chashnallata ruranajurca. Mandaj Dios imashna Moisesta mandashcashnallatami orohuan, azul, morado, yana puca puchacunahuan caupushca lino puchahuan ruranajurca.
6Ónice nishca rumicunapipash, orota muyushca jahuacunapimi, taita Israelpaj churicunapaj shuticunata sello nishcapi jirruhuan aspishpa escribinajurca. 7Chaicunataca, efodpaj hombreracunapimi, israelcunata yarichina rumicuna cachun, Mandaj Dios imashna Moisesta mandashcashnallata churanajurca.
8Shinallata pectoral nishcatapash, efodta rurashcashnallatami, juyaillagutapacha ruranajurca. Chaitaca orohuan, azul, morado, yana puca puchacunahuan caupushca lino puchahuanmi ruranajurca. 9Chaitaca, cuadrado racu pectoraltami ruranajurca. Chaita patarishca cashpaca, ishcai chunga ishcai centímetro largo, ishcai chunga ishcai centímetro anchomi carca. 10Chaipica, chuscu jila rumicunatami churanajurca. Punda jilapica, sardio, topacio, carbunclo nishca rumicunami carca. Chaimi, punda jila carca. 11Shujpaj cati jilapica, esmeralda, zafiro, diamante nishca rumicunami carca. 12Ishcaipaj cati jilapica, jacinto, ágata, amatista nishca rumicunami carca. 13Quimsapaj cati jilapica, berilo, ónice, jaspe nishca rumicunami carca. Tucuilla rumicunami, oro muyushcacunapi jahualla churashpa ali huashajuchishca carca. 14Chai rumicunaca, taita Israelpaj churicunapaj shuticuna imashna cajpipash, paicunapaj shuticuna imashna cashcashnallata, chunga ishcai rumicunami carca. Chai rumicunaca, jiruhuan aspishpa sellota churashcashnallatami, chunga ishcai aillucuna imashna cashcashnallata tucuicuna paicunapaj shuticunahuan carca.
15Pectoral nishca jahuapipash, ashtahuan ali oro pucha caupushcatami, shambashpa ruranajurca. 16Shinallata ishcai oro muyushcatapash, ishcai oro surtijastapash rurashpami, ishcai oro surtijastaca, pectoralpaj ishcandi manñapi churanajurca. 17Caupushca ishcai oro puchacunataca, pectoralpaj ishcandi lado manñapi churashca surtijascunapimi huatanajurca. 18Caupushca oro puchacunapaj ishcandi lado pundacunataca, efod churajunapi ñaupa lado hombreracunapi orota llutashca jahuapimi huatanajurca. 19Shinallata ishcai oro surtijastapash rurashpami, pectoralpaj ishcandi lado manña pundacunapi churanajurca. Chaitaca, efodpaj ñaupa lado ucu ladomanmi churanajurca. 20Shinallata ishcai oro surtijastapash rurashpami, efodpaj ñaupa lado ishcandi hombrerapaj ñaupa ladopi ucu ladoman churanajurca. Chaitaca, efodta churashca huatarina cinta jahuapi, sirashca ladopimi churanajurca. 21Pectoralpaj surtijascunataca, efodpaj surtijascunapi huatashca caupushca azul puchahuanmi huatanajurca. Efodta huatarina cinta jahuapi tiajushpa, efodmanda pectoral ama anchurichunmi, Mandaj Dios imashna Moisesta mandashcashnallata huatanajurca.
22Efod nishcahuan jahualla churajunatapash, ahuanata ali yachajcuna rurashcashnallatami, tucuillata azul telahuan rurarca. 23Chai churajunataca, vichaiman pascariajtami saquirca. Chai pascariaj muyundi manñapica, pechopi churajunatashna racuta ahuashpa, na liquirinallata rurashcami carca. 24Chai churajuna manñapica, azul, morado, yana puca puchacunata, caupushca lino puchatami, granadillacunata ruranajurca. 25Shinallata ashtahuan ali oro uchilla campanacunatapashmi ruranajurca. Chai campanacunataca, granadillacunapaj chaupicunapimi, jahualla churajunapaj muyundi manñapi churanajurca. Granadillacunapaj chaupipimi, chashna churanajurca. 26Shuj uchilla campanata, chai huashapi shuj granadillata, shuj uchilla campanata, chai huashapi shuj granadillatami, jahualla churajuna manñacunapica muyundipi churanajurca. Mandaj Dios imashna Moisesta mandashcashnallata, Diospajta rurangapajmi chashna churanajurca.
27Túnica nishca jahualla churajunacunatapash, chashnallatami ashtahuan ali lino puchahuan ahuashpa Aaronmambash, paipaj churicunamambash ruranajurca. Shinallata ahuanata ali yachajcuna ahuashcallatami ruranajurca. 28Shinallata umapi churajuna mitra nishcatapashmi, ashtahuan ali lino puchahuan ruranajurca. Umapi churajuna tiara nishcatapashmi, juyaillagu ricurijuchun ashtahuan ali lino puchahuan ruranajurca. Calzongunatapash, lino puchahuanmi ruranajurca. Caupushca lino puchahuanmi ruranajurca. 29Shinallata huatarina cintataca, caupushca lino puchahuan azul, morado, yana puca puchacunahuanmi juyaillaguta bordashpa, Mandaj Dios imashna Moisesta mandashcashnallata ruranajurca. 30Shinallata Diospajlla cachun ashtahuan ali oro tablatapashmi ruranajurca. Chai tablapica: MANDAJ DIOSPAJLLA SHICANYACHISHCAMI nishpa, jirruhuan aspishpa escribishpami, sellota churashcatashna ruranajurca. 31Chai rurashcapica, mitra nishca jahuapi churangapajmi, caupushca azul puchahuan churanajurca. Chaitaca, Mandaj Dios imashna Moisesta mandashcashnallatami churanajurca.
Jatun carpata rurashpa tucuchishcatami villajun
(Éx. 35:10-19)
32Chashnami, Diospaj jatun carpapaj tucuita ruranaca tucurirca. Dioshuan tuparina jatun carpataca, Mandaj Dios imashna Moisesta mandashcashnallatami, israelcunaca chashnatapacha ruranajurca. 33Chai jatun carpataca, Moisespajmanmi apamunajurca. Chai jatun carpatapash, chaipi tucui imalla charishcacunatapash, chai carpapaj surtijascunata, tablacunata, jatun caspicunata, pilarcunata, bazacunatapashmi apamunajurca. 34Jahualla quilpangapaj rurashca jari llamapaj caracunata pucata tenishcata, jahualla quilpangapaj tejón nishca animalpaj caracunata, carpa ñaupajman huarcuna telatapashmi apamunajurca. 35Imashna causanata yachachishca shimicunata alichishca arcata, chai arcata huanduna caspicunata, arcapaj tapatapashmi apamunajurca. 36mezata, mezapi tiaj tucuilla vasocunata, Diosman cuna tandacunata, 37ashtahuan ali orota rurashca candelerota, ña alichishcalla tianajuchun uchilla lamparacunata, chai lamparacunapi tucui ima tiashcacunatapash, michata sindina aceitetapashmi apamunajurca. 38Oro altarta, talishpa javina aceiteta, mishquillagu ashnajuj inciensota, jatun carpaman yaicuna pungupi huarcuna telatapashmi apamunajurca. 39Bronce altarta, chai altarpaj bronce rejillata, altarta huanduna caspicunata, chaipi tucui imalla tiashcacunatapash, jatun pailatapash, pailata churana bazatapashmi apamunajurca. 40Patio muyundipi huarcuna cortinacunata, patiopi shayachina pilarcunata, pilarcunata shayachina bazacunatapash, patioman yaicuna pungupi huarcuna telata, chai telata huatana cabiacunata, chaipillata huatana estacacunatapash, Dioshuan tuparina jatun carpapi servinacunata, tucui imalla tiashcacunatapashmi apamunajurca. 41Diospaj huasipi Diospajta rurashpa servingapaj churajunacunata, Aarón cura churajuna, Diospajlla churajunata, curacuna cashpa Diospajta rurangapaj, Aaronbaj churicuna churajunacunatapashmi apamunajurca.
42Tucui imacunatapash Mandaj Dios imashna Moisesta mandashcashnallatami, israelcunaca tucui ruranacunata chashnatapacha ruranajurca. 43Mandaj Dios imashna mandashcashnallata rurashcatami Moisesca, tucui rurashcata ricujurca. Chaita ricushpami, paicunataca bendiciarca.
Currently Selected:
ÉXODO 39: QUII
Highlight
Share
Copy
Want to have your highlights saved across all your devices? Sign up or sign in
Quichua Imbabura Bible © United Bible Societies, 1994.