ÉXODO 20
20
Chunga Mandashca Shimicunami
(Deut. 5:1-21)
1Taita Diosmi, cai tucui shimicunataca, cashna nishpa villajurca:
2“Ñucami, Egipto llactapi gañan causajushcamanda llujchimuj, canda Mandaj Taita Dios cani.
3Ñuca ñaupajpica, ama shuj dioscunata charinguichu.
4Imaman rijchajcunatapash ama ruranguichu. Jahua pachapi, cai pachapi, alpa ucupi, alpa ucu yacupi tiajcunaman rijchajtapash, ama ruranguichu. 5Chaicunataca ama cunguringuichu, alicachitallapash ama alicachinguichu. Ñucami, canda Mandaj Taita Dios cani. Ñucaca, ninan ushaita charij, ñucapajlla cachun munaj Diosmi cani. Ñucata millanayachij, nalita ruraj taitacunapaj huahuacunata ricungapaj shamushpa, quimsa miraicunacaman, chuscu miraicunacamambash llaquichij Diosmi cani. 6Ashtahuangarin ñucata juyashpa, ñuca mandashcacunata pactachijcunataca, huaranga huaranga miraicunacaman llaquishpa juyajmi cani.
7Canda Mandaj Taita Diospaj shutitaca, ama yanga rimanguichu. Mandaj Diosca, paipaj shutita yanga rimajtaca, ima nalitapash na rurajtashnaca, na yanga ricungachu.
8Samana punllataca, Diospajlla cachun shicanyachinata yaringui. 9Sucta punllata trabajangui. Chai punllacunami, cambaj tucui ima ruranacunataca rurana cangui. 10Ashtahuangarin canchis punllapica, canda Mandaj Taita Diospaj samana punllami. Chai punllapica, ima ruranatapash ama ruranguichu. Cambash, cambaj churipash, cambaj ushipash, canda servij jaripash, canda servij huarmipash, cambaj animalpash, shuj llactamanda shamushpa, pueblo ucupi canhuan causajujpash chai punllapica, ima ruranatapash na ruranachu. 11Mandaj Diosca, sucta punllacamanmi jahua pachatapash, cai pachatapash, mama cuchatapash, chaicunapi tucui ima tiajcunatapash rurarca. Canchis punllapica samarcami. Shinamandami Mandaj Diosca, samana punllataca bendiciashpa, paipajlla cachun rurarca.
12Canda Mandaj Taita Dios canman carashca llactapi, unai punllacunacaman causanata ashtahuan mirachijuchunga, cambaj taitata, cambaj mamata alicachingui.
13Ama huañuchinguichu.
14Cazarashca jahua ama shujhuan causanguichu.
15Ama shuhuanguichu.
16Cambaj cumba runagutaca, ama yangata chashnapachami nishpa juchachishpa villanguichu.
17Cambaj cumba runagupaj huasitapash, ama munanguichu. Cambaj cumba runagupaj huarmitapash, ama munanguichu. Paita servij jaritapash, huarmitapash, paipaj huagratapash, paipaj burrotapash, ashtahuan imatalla charishcacunatapash, chai cumba runagupajtaca ama munanguichu” nijurcami.
Israelcunaca ninandami manllarinajushca
18Tucuilla israelcunami, culun nijujta, punchapamba shitajujta, cachuta huacachijta uyanajurca. Shinallata urcu cushnijujtapashmi ricunajurca. Israelcunaca chaita ricushpa, manllarishpa chujchushpami, caruman shayarinajurca. 19Shinamandami Moisestaca, cashna ninajurca:
—Ñucanchihuanga can parlaillayari, ñucanchica uyashunllami. Ashtahuangarin ñucanchi ama huañungapaca, Taita Diosca ñucanchihuan na parlashpami ali canman— ninajurcami.
20Shina ninajujpimi Moisesca, israelcunaman cashna nishpa tigrachirca:
—Na manllanachu canguichi. Canguna cazujta, na cazujta yachangapajmi, Taita Diosca shamushca. Shinallata canguna juchata ama rurangapaj, punllandi paipaj ñaupajpi manllashpa causachunmi, chashna shamushca— nircami.
21Shina nijpica israelcunaca, carupimi shayanajurca. Moisesca, maipi Taita Dios rimajuj amsa pushtumanmi chayarca.
22Mandaj Diosca, Moisestaca cashnami nirca: “Israelcunataca, cashna ningui: ‘Cangunaca, ñucataca jahua pachamandapacha, cangunahuan rimajujtami ricushcanguichi. 23Ñucahuanga, culqui dioscunataca, na ruranachu canguichi. Oro dioscunatapash, na ruranachu canguichi. 24Alpa altartami, ñucaman rurana cangui. Chai altarpimi, ñucaman cushpa tucuillata rupachina animalcunatapash, ñucahuan ali cangapaj cuna animalcunatapash, cambaj llamacunatapash, huarmi huagracunatapash huañuchina cangui. Maipi cashpapash ñuca shutita yarina tiajuchun ñuca rurashca pushtumanmi, canda ricungapaj shamushpa, canda bendiciasha. 25Ñucaman rumicunahuan altarta rurashpapash, rumicunataca na labranachu cangui. Rumita jirruhuan tacashpaca, chai altartaca yangapi churashpami, chashna rurajungui. 26Altarman vitsiajujpi, cambaj lluchulla ama ricurichunga, gradastaca na vitsianachu cangui’ ningui” nircami.
Currently Selected:
ÉXODO 20: QUII
Highlight
Share
Copy
Want to have your highlights saved across all your devices? Sign up or sign in
Quichua Imbabura Bible © United Bible Societies, 1994.