DEUTERONOMIO 4
4
Diosta cazuchunmi, Moisesca aliguta yarichijushca
1Cunanga israelcuna, pactachinajuchun cushca shimicunata, imata rurachun mandashcacunata, ñuca yachachishcataca ali uyahuaichi. Chaicunata pactachishpa aliguta causangapaj, shinallata cangunapaj ñaupa taitacunata Mandaj Taita Dios carashca llactaman yaicushpa japingapaj, ali uyahuaichi. 2Ñuca mandashca shimicunataca, na mirachinachu canguichi. Chai shimicunamandaca anchuchitapash, na auchuchinachu canguichi. Cangunata Mandaj Taita Dios mandashcacunata pactachinajuchun, cunan ñuca yachachishcata aliguta pactachishpa causangapajmi, na chashna rurana canguichi. 3Baal-peor shuti diosta mañashcamanda, Mandaj Dios imatalla rurajtaca, cangunapaj ñavihuambachami ricurcanguichi. Baal-peor shuti diosta catij tucuilla gentecunatami, cangunata Mandaj Taita Diosca cangunapaj chaupipillata tucuchirca. 4Ashtahuangarin cangunata Mandaj Taita Diosta catijcunaca, cunangamanmi tucuilla causanajunguichi. 5Ricuichi, ñucata Mandaj Taita Dios mandashcashnallatami, pactachinajuchun cushca shimicunata, imata rurachun mandashcacunataca yachachijurcani. Cangunapaj cachun japingapaj yaicugrinajuj llactapi pactachishpa causanajuchunmi, chashna yachachijurcani. 6Chai mandashcacunataca, ali cazushpa pactachinguichi. Shina pactachishpami shuj gentecunapaj ricuipica, alipacha yachajushcacuna, ali yuyaita charijcuna ricuringuichi. Chai gentecunaca, pactachinajuchun cushca tucui cai shimicunata uyashpami, cashna ninajunga: ‘Cai gentecunaca, alipacha yachajushca, ali yuyaita charijcunapachami. Paicunaca jatun llactapachami’ ninajungami. 7¿Maijan jatun llactata paicunapaj dioscunataca, ñucanchita Mandaj Taita Diostashna paicunapaj ladollapi charin? Ñucanchi Diosca, ñucanchi tucui mañashcata uyangapaca, ñucanchi ladopimi. 8¿Maijan jatun llactata, pactachinajuchun cushca shimicunata, aliguta ricushpa imatapash cashcatapacha rurachun mandashcacunata charin? Tucui cai mandashca shimicunatami, cunanga cangunapaj ñaupajpi churani.
Israelcuna Horeb urcupi imatalla yachajushcatami villajun
9Shina cashcamanda, aliguta cuidaringui. Cambaj shungutapash, ninandapacha cuidaringui. Cambaj ñavihuambacha ricushcata ama cungangapaj, cambaj shungupipash, cambaj tucui causaipi ama saquingapajmi, chashna causana cangui. Ashtahuangarin cangunapaj huahuacunamambash, chai huahuacunapaj huahuacunamambash aligutapacha yachachingui. 10Horeb shuti urcupimi, canda Mandaj Taita Diospaj ñaupajpi shayanajurcanguichi. Chai punllallatami Mandaj Diosca, cashna nihuarca: ‘Ñuca rimashca shimicunata uyachun, tucui gentecunata tandachimui. Shina uyashpami, cai pachapi paicuna causanajui tucui punllacuna ñucata manllashpa causanata yachajunga. Shinallata paicunapaj huahuacunamambashmi yachachinajunga’ nihuarcami. 11Shina nijpimi cangunaca, urcu chaquiman quimirishpa shayarircanguichi. Chai urcuca, jahua pachacaman rupashpami, yana yana tucushpa, fuyu quilpashpa yanayarca. 12Mandaj Diosca, chai nina chaupimandami cangunataca rimamurca. Pai rimashca shimicunatami uyarcanguichi. Pai rimashca shimicunata uyashpapash, pai imashna cajtaca imatallapash na ricushpami shayanajurcanguichi. 13Diosca, paihuan ari ninajushcata villachishpami, chaitaca canguna pactachinajuchun mandarca. Chunga mandashcacunataca, ishcai tabla rumicunapimi escribirca. 14Mandaj Diosca chai huatacunallatami, pactachinajuchun cushca shimicunata, aliguta ricushpa mandana shimicunata yachachijuchun, ñucatapash mandahuarca. Cangunapaj cachun japingapaj rinajuj llactapi causanajushpaca, tucui chaicunata pactachinajuchun, cangunaman yachachijuchunmi mandahuarca.
Yanga dioscunata ama mañachunmi, cutin cutin yachachishca
15Shina cashcamanda cangunapaj shungutaca, aligutapacha cuidaringuichi. Mandaj Dios nina chaupimanda cangunahuan rimajui punllapica, pai imashna cajtaca, imatallapash na ricushpami shayanajurcanguichi. 16Canguna ama huaglichun, shinallata canguna charingapaj, labrashpa rurashca dioscunata, imamambash rijchaj dioscunata, jaritashnalla, na cashpaca huarmitashnalla rijchaj dioscunata ama rurachunmi na ricurirca. 17Shinallata cai pachapi tiaj, imapash animaltashnalla rurashcata, na cashpaca jahuata rij alasyu imapash animaltashnalla rurashcata, 18alpata llucashpa purij imapash animaltashnalla rurashcata, yacu ucupi tiaj pijitashnalla rurashcatapash na charinachu canguichi. 19Jahua pachata vichai ricushpaca indita, lunata, luzerocunata, jahua pachapi tucui imalla tiajcunata ricushpara, chaicunata cungurishpa mañashpa, chaicunata servingapaj munaita japinguiman. Canda Mandaj Taita Diosmi, chaicunataca tucui cai pachapi causaj gentecunaman rurarca. 20Ashtahuangarin cangunataca, jirruta yacuyachina jornomanda japishpa llujshinshnami, Egiptomandaca Mandaj Diosca llujchimurca. Cunan punllapishna paipajlla agllashca gentecuna cachunmi, chashna llujchimurca. 21Mandaj Diosca cangunamandami, ñucatapash fiñahuarca. Chaimandami ñucataca, Jordán yacutapash na chimbanguichu, canda Mandaj Taita Dios carashca ali juyailla llactamambash, na yaicunguichu nishpa juramenturca. 22Shinamandami, Jordán yacutaca na chimbashpallata, cai llactapillata huañugrini. Ashtahuangarin cangunaca, Jordán yacuta chimbashpa, chai juyailla llactata japinguichimi. 23Cangunata Mandaj Taita Diosca, cangunahuan ari nishpami callarichirca. Chaita ama cungangapajmi, cuidarina canguichi. Na ruranachu canguichi nishpa, cangunata Mandaj Taita Dios mandashcataca, labrashpa rurashca diostapash, na cashpaca imamambash rijchaj diostapash na ruranachu canguichi. 24Cangunata Mandaj Taita Diosca, rupachishpa tucuchij ninashnami. Paica, paipajlla cachun munaj Taita Diosmi.
25Cangunaca, huahuacunata charishpa, chai huahuacunapaj huahuacunata charishpami, chai llactapi rucuyanguichi. Chaipica huaglicuna tucushpami, cangunaca labrashpa rurashca diosta, na cashpaca imamambash rijchaj diosta imatapash ruranguichi. Cangunata Mandaj Taita Diospaj ñaupajpi chashna nalita rurashpami, paita ninanda fiñachinguichi. 26Shinamandami cunanga, chashnapachami carca nishpa villachun, jahua pachatapash, cai pachatapash churani. Jordán yacuta chimbashpa canguna japigrinajuj llactapica, cangunaca ucha tucuchi tucunata villachunmi, chashna churani. Chai llactapica, na unai punllacunata causashpallatami, tucuchi tucunguichi. 27Mandaj Diosllatami cangunataca, shuj gente puracunapica caita chaita cachanga. Chaimandami cangunaca, llacta puracunapica huaquinlla puchunguichi. Paicunatami, Mandaj Diosca apanga. 28Chai llactacunapimi, cangunaca caspita, rumita runacuna rurashca dioscunata servishpa causanguichi. Chai dioscunaca na ricunllu, na uyanllu, na micunllu, na ashnachinllu. 29Ashtahuangarin chai llactacunapi causajushpapash, canda Mandaj Taita Diosta tucui shunguhuan, tucui almahuan mascashpaca taringuimi. 30Jatun llaquicunahuan cashpa, tucui cai llaquicuna japijpi, cangunata Mandaj Diospajman jipa punllacunapi tigrarishpaca, pai rimashcata uyanguimi. 31Canda Mandaj Taita Diosca, ninanda llaquij Taita Diosmi. Paica, candaca na saquingachu, na tucuchingachu. Cambaj ñaupa taitacunaman, ari nishpa juramentushcatapash na cungangachu.
32Cangunapash nara tiajpillata yalishca huatacunapi, cai pachapi causachun Taita Dios runata rurashpa churashca punllamandapacha chashna tiashcata, na tiashcatapash tapuichi. Cai pacha tucuri manñamanda caishuj manñacaman, chashnacunata rurashca, tiashcata, na tiashcatapash tapuichi. Na cashpaca, chashnatallata rurashca maipillapash uyarishcachu, tapuichi. 33¿Maijan gentecunapash, nina rupajuj chaupimanda Taita Dios rimajujta, cangunashna na huañushpa uyashcachu? 34Na cashpaca Taita Diosca, ¿maijan llactatapash paipajlla cachun munashpa, llaquicunata cachamushpa, shuj ricuchinacunata rurashpa, pipash na rurai ushashcacunata rurashpa, jatun macanajuicunata rurashpa, ninan ushaita charij maquihuan, paipaj rigrata chutashpa shuj llactacunamanda llujchingapaj munashcachu? Cangunata Mandaj Taita Diosca, Egipto llactapimi canguna ricujta ninan manllarinacunata cangunamanda tucuita rurajurca. 35Mandaj Diosca, Taita Dios cajta canman ricuchingapaj, paimanda ashtahuan shuj diosca na tiajta can yachachunmi, chaitaca canman ricuchirca. 36Diosca, canman yachachingapajmi, jahua pachamanda rimamurca. Shinallata cai pachapica, paipaj jatun ninatami ricuchirca. Chai nina chaupimanda, pai rimashca shimicunatami uyarcangui. 37Paica, cambaj ñaupa taitacunata juyaimandami, paicunapaj jipa miraicunata agllarca. Egiptomandaca, pai ricurishpa paipaj jatun ushaihuanmi llujchimurca. 38Canda yali shinlli, jatun llactacunata cambaj ñaupajmanda llujchishpa cachangapaj, chai llactaman pushashpa chai llactata cambaj cachun cungapajmi, chashna rurarca. Cunambipash chashnallatami rurajun.
39Shinamanda cunanga, aliguta yachajungui. Mandaj Diostaca, jahua pachapipash, cai pachapipash pailla Taita Dios cajta ashtahuan shujca na tiajta, cambaj shungupipash aliguta yaringui. 40Pactachinajuchun pai cushca shimicunata, pai mandashcacunata, cunan cangunaman ñuca yachachishcacunataca pactachinami cangui. Cambajpash, cambaj jipa miraicunapajpash ali cachunmi, chashna pactachina cangui. Shina rurashpami, tucui causaipaj cambaj cachun, canda Mandaj Taita Dios caragrijuj llactapica unaita causangui” nishpami yachachijurca.
Jordán yacumanda, indi llujshimuj ladomanmi pacajuna pueblocunata shicanyachishca
41Chai jipami Moisesca, Jordán yacumanda indi llujshimuj ladoman tiaj llactapi, quimsa pueblocunata shicanyachirca. 42Napash yashcapi, ima horapash na fiñanajushca cashpata, paipaj cumba runaguta huañuchij runa chai pueblopi pacajugrichunmi, chashna shicanyachirca. Chai pueblocunamanda maijan pueblopipash pacajungapaj rishpa, paipaj causaita quishpichijuchunmi, shina shicanyachirca: 43Jichushca pugru pambapi tiaj Beser pueblotami shicanyachirca. Chai pueblotaca, Rubén aillumanmi curca. Galaad llactapi tiaj Ramot shuti pueblotaca, Gad aillumanmi curca. Basán llactapi tiaj Golán pueblotaca, Manasés aillumanmi curca.
Mandashcata yarinajuchunmi, Moisesca cutin villashca
44Cai mandashcatami Moisesca, israelcunapaj ñaupajpi yachachijurca. 45Israelcuna Egiptomanda llujshimujpi, imashna causanata yachachishcacunata, pactachinajuchun cushca shimicunata, imata rurachun mandashcata Moisés yachachishca shimicunami. 46Moisesca, Jordán yacumandaca, indi llujshimuj ladoman tiaj Bet-peor shuti pueblo ñaupaj lado pugru pambapi cashpami, caitaca yachachijurca. Chai puebloca, amorreocunata mandaj Sehón shuti jatun mandaj causajuj Hesbón shuti pueblomi. Chai mandajtami Moisesca, israelcunahuan Egiptomanda llujshimushpa macanajushpa misharca. 47Shinallata Og shuti jatun mandaj mandajuj Basán llactatapashmi japirca. Jordán yacumanda, indi llujshimuj ladoman tiaj amorreocunata ishcai jatun mandajcunapaj llactacunatami japinajurca. 48Paicunaca, Aroer shuti llactamanda callarishpa, Arnón shuti jatun larca yacucaman, Hermón nishca Sion urcucamanmi japinajurca. 49Shinallata Jordán yacumanda, indi llujshimuj ladoman tiaj Arabá shuti tucuilla llactatapash, Pisga shuti urcu chaquiman tiaj Arabá shuti cuchacamanmi carca.
Currently Selected:
DEUTERONOMIO 4: QUII
Highlight
Share
Copy
Want to have your highlights saved across all your devices? Sign up or sign in
Quichua Imbabura Bible © United Bible Societies, 1994.