DEUTERONOMIO 2
2
Jichushca pambapi causashca huatacunatami villajun
1Chai jipaca, Mandaj Dios imashna ñucata mandashcashnallatami, Puca Cuchaman rina ñandallata tigrashpa, jichushca pambaman llujshircanchi. Shina rishpami, Seir shuti urcuta muyushpa, unaita purircanchi. 2Shinamandami Mandaj Diosca, cashna nishpa villahuarca: 3‘Ñami cai urcutaca, ninanda muyushpa puringuichi. Cunanga, jahua ladoman tigraichilla. 4Israelcunataca, cashna nishpa mandai: Cangunapaj familia purallata, Esaú runapaj miraicuna causanajuj Seir shuti llactata yalinajujpica, cangunataca ninandami manllanga. Ashtahuangarin cangunaca, aliguta cuidarishpa ringuichi. 5Paicunahuanga, na macanajunachu canguichi. Paicunapaj llactamandaca, cangunapaj chaqui sarunatallapash na cushachu. Seir shuti urcutaca, ñucami Esaupaj cachun curcani. 6Paicunapajtaca, micunatapash culquipaj randishpa micunguichi, yacutapash randishpa ufianguichi nishpa mandai’ nihuarcami. 7Cangunata Mandaj Taita Diosca, canguna imata rurajpipash, ninandami bendiciamurca. Cai jichushca jatun pambapi canguna purinajujtapash, paillata yachanmi. Cangunata Mandaj Taita Diosca, cai chuscu chunga huatata cangunahuan cajpimi cangunaca, imapash na illajpi causarcanguichi.
8Ñucanchica, Esaupaj mirai ñucanchi familiacuna causanajuj llactamandaca caruyarcanchimi. Paicunaca, Elat shuti, Ezión-geber shuti pueblocunaman rina ñambi tiaj Seir shuti urcucunapimi causanajun. Chaimanda tigrashpami, Moab llacta jichushca pamba ñanda japishpa shamurcanchi. 9Chaita shamujujpimi Mandaj Diosca, cashna nihuarca: ‘Moab llactapi causajcunataca, na fiñachinachu canguichi. Paicunahuan macanajunatapash, na yarinachu canguichi. Paicunapaj llactataca, cangunapaj cachun na cushachu. Ashtahuangarin Ar shuti pueblotaca, Lotpaj miraicunamanmi paicunapaj cachun curcani’ nihuarcami. 10(Pundaca, emita nishca gentecunami chaipica causanajurca. Chai gentecunaca ninan jatun, ninan ashtaca, Anac shuti runapaj miraicunashnalla, manllanayai jatun gentecunami carca. 11Paicunataca, Anac shuti runapaj miraicunashnalla manllanayai, jatun runacunami ninajunmi carca. Moab llactapi causajcunapash paicunataca, emitacunami ninajunmi carca. 12Horeo nishca gentecunaca, Seir shuti llactapimi pundaca causanajurca. Paicunatami, Esaupaj miraicunaca paicunapaj ñaupajmanda llujchishpa cacharca. Shina cachashpami, paicunapaj randi chai llactapi causanajurca. Mandaj Dios carashca llactapi israelcuna imashna rurashcashnallatami ruranajurca). 13‘Cunanga ucha jatarishpa, Zered shuti jatun larca yacuta chimbashpa richilla’ nihuarcami. Shina nijpimi ñucanchica, Zered shuti yacuta chimbashpa rircanchi.
14Cades-barnea shuti pueblomanda llujshishpa, Zered shuti jatun larca yacuta chimbangacaman, ñucanchi purinajushca huatacunaca, quimsa chunga pusaj huatami carca. Macanajuj runacunapaj tucuilla mirashcacuna, carpa chaupicunamanda tucuringacamanmi, Mandaj Dios imashna juramentushcashnallata, chashna purircanchi. 15Carpa chaupicunamanda tucuchingapajmi, Mandaj Diospaj maquihuambash paicunataca ninanda llaquichijurca. Tucuillata tucuchingacamanmi, chashna llaquichijurca.
16Israel puracunapi, macanajunata ali yachaj tucuilla runacuna huañushca jipami, cashna tucurca: 17Mandaj Diosca, cashnami nihuarca: 18‘Cunanmi canga, Ar shuti pueblota yalishpa, Moab llactamanda llujshingui. 19Amonitacunapajman chayashpaca, ama llaquichinguichu. Paicunahuanga, ama fiñanajushpa rimaringuichu. Amón llactapi causajcunapaj llactataca, na canman cushachu. Chai llactataca, Lotpaj miraicunamanmi curcani’ nihuarcami. 20(Chai llactatapash, manllanayai jatun runacunapaj llactami ninajunmi carca. Ñaupa huatacunaca chai llactapica, manllanayai jatun runacunami causan carca. Paicunataca, Amón llactapi causajcunaca, zomzomeocuna ninajunmi carca. 21Chai gentecunaca, Anac shuti runapaj miraicunashnallata, ninan ashtaca, jatun runacunami carca. Paicunatami, Mandaj Diosca amonitacunapaj ñaupajpi, ninanda llaquichichishpa tucuchirca. Amonitacunaca, shinami paicunataca tucuchishpa, paicunapaj randi chaipi causai callarirca. 22Seir shuti llactapi causanajushca Esaupaj miraicunata, Mandaj Dios ayudashpa tucuchishcashnallatami tucuchirca. Paicunapaj ñaupajpimi, horeocunataca tucuchirca. Esaupaj miraicunaca paicunata tucuchijpimi, paicunapaj randi cunangaman chaipi causanajun. 23Shinallata Gaza shuti pueblocaman uchilla llactacunapi causanajuj aveo nishca gentecunatapash, caftoreo nishca gentecuna Caftor shuti llactamanda shamushpa tucuchishpami, chaipica paicuna causanajurca). 24‘Cunanga jatarishpa, Arnón shuti jatun larca yacuta chimbangapaj llujshichilla. Ricuichi, amorreocuna causanajuj Hesbón shuti pueblota jatun mandaj Sehón shuti runataca, paipaj llactandimi cambaj maquipi churarcani. Paipaj llactata japi callarishpa, paicunahuan macanajui callarilla. 25Cunanmi, tucui cai pachapi causanajuj gentecunapica, cangunata ninanda manllana yuyaita churai callagrigrini. Chaimandami paicunaca, cangunamanda parlajta uyashpallata, ninanda chujchushpa cangunapaj ñaupajpica, ninanda manllanajunga’ nihuarcami.
Israelcunami, jatun mandaj Sehonda mishashca
(Núm. 21:21-30)
26Ñucaca, Cademot shuti jichushca pambapi cashpallatami, Hesbón shuti llactata jatun mandaj Sehón shuti runahuan casilla ali causaimanda parlachun, villajcunata cashna nishpa cacharcani: 27‘Cambaj llacta ñandami, ñucanchica yalingapaj munapanchi. Chai ñanda yalinajushpaca, ali ladomambash lluqui ladomambash, na anchurishpami ripashun. 28Micunatapash, culquipaj can jatujpimi micupashun. Yacutapash, culquipaj can jatujpimi ufiapashun. Ashtahuangarin cambaj ñangutaca, chaquillami yalipashun. 29Seir shuti llactapi causanajuj Esaupaj miraicunapash, Ar shuti pueblopi causanajuj moabitacunapash ñanda mañachishcashnallata, ñanda mañachihuai. Ñucanchica, ñucanchita Mandaj Taita Dios caragrijuj llactamanmi, Jordán yacuta chimbashpa chayangapaj munapanchi. Chaiman chayangacamanlla, ñanguta mañachihuai’ nichunmi cacharca.
30Ashtahuangarin Hesbón pueblota jatun mandaj Sehón shuti runaca, paipaj llactata yalichunga na munarcachu. Cangunata Mandaj Taita Diosmi, chai llactata cangunapaj maquipi churangapaj paipaj shungutapash, yuyaitapash shinlliyachirca. Chaimandami, cunangaman chai llactapi causanajunguichi.
31Mandaj Diosca, cashnami nihuarca: ‘Ricui, jatun mandaj Sehón shuti runataca, paipaj llactandimi cangunapaj maquipi churai callarini. Cunanga, chai llactataca cangunapaj cachun japi callarichilla’ nihuarcami.
32Sehón shuti runaca paipash, paipaj tucuilla runacunapashmi, Jahaza shuti pueblopi macanajungapaj, ñucanchihuan tuparij shamurca. 33Ashtahuangarin ñucanchita Mandaj Taita Diosmi, paitaca ñucanchi ñaupajpi churarca. Shinamandami paitapash, paipaj churicunatapash, paipaj tucuilla runacunatapash misharcanchi. 34Shinallata paipaj tucuilla pueblocunata quichushpami, chai pueblocunatapash, jaricunata, huarmicunata, huahuacunatapash tucuchircanchi. Shujllatapash na saquishpami, tucuillata tucuchircanchi. 35Ashtahuangarin paicunapaj animalcunatapash, ñucanchi quichushca chai pueblocunapi imalla tiashcacunatapashmi, ñucanchipaj cachun japircanchi. 36Arnón shuti jatun larca yacu manñapi tiaj Aroer shuti pueblomanda, shinallata pugru pambapi tiaj pueblomanda callarishpaca, Galaad llactapi tiaj pueblocunacaman ñucanchi maquimandaca, shuj pueblollapash na quishpirircachu. Ñucanchita Mandaj Taita Diosmi, tucuillata ñucanchi maquipi churarca. 37Ñucanchica, amonitacunapaj llactamanllami na chayarcanchi. Jaboc shuti jatun larca yacu manñacunapi tiaj llactacunaman, urcupi tiaj pueblocunaman, ñucanchita Mandaj Taita Diosllata, na llaquichinachu canguichi nishpa mandashca llactacunamambash na chayashpami yalircanchi.
Currently Selected:
DEUTERONOMIO 2: QUII
Highlight
Share
Copy
Want to have your highlights saved across all your devices? Sign up or sign in
Quichua Imbabura Bible © United Bible Societies, 1994.