2 REYES 25
25
Jerusalén mishai tucushcatami villajun
(Jer. 39:1-7; 52:3-11)
1Sedequías shuti runaca, iscun huatata ña mandajujpimi, cashna tucurca: Chai huatapaj chunga quilla chunga punllapimi, Babilonia llactata jatun mandaj Nabucodonosor runaca, Jerusalenbi causajcunahuan macanajungapaj, tucuilla paipaj soldadocunandi shamushpa, chai pueblota chaupipi churarca. Chai pueblopi causajcunahuan macanajungapaca, torrecunatapashmi muyundipi shayachirca. 2Jerusalén puebloca, jatun mandaj Sedequías chunga shuj huatata ña mandajungacamanmi, chaupipi churai tucushca carca. 3Chai huatapaj chuscu quilla iscun punllapica, ashtahuanmi chai pueblopica, yarjai tiarca. Chai llactapi causaj gentecunapaj ima micunapash illangacamanmi, yarjai tiarca. 4Shinamandami, chai pueblopaj jatun pircata ña utujushpaca, macanajunata yachaj tucuilla runacuna tuta llujshishpa, pacajushpa rinajurca. Paicunaca, caldeocuna chai pueblo muyundipi cajpitami, jatun mandajpaj huerta ladopi shayajuj ishcai pircapaj punguta llujshishpa pacajushpa rinajurca. Jatun mandajca, Arabá shuti pambaman rina ñandami rijurca. 5Shinamandami caldeo soldadocunaca, jatun mandajta catishpa rishpa, Jericó pueblo lado pambapi japigrirca. Tucui paipaj soldadocunaca, caita chaitami rishca carca. 6Jatun mandaj Sedequías runata japishpaca, Babilonia llactata jatun mandajpajmanmi, Ribla shuti puebloman apamunajurca. Chaipimi, imashna llaquichinatapash mandarca. 7Sedequías runapaj churicunataca, paipaj ñaupajpillatami cungata muchushpa huañuchirca. Sedequías runataca, ñavita llujchishpami, cadenacunahuan huatashpa Babilonia llactaman aparca.
Judá llactapi causajcunatami prezu apashca
(2 Crón. 36:17-21; Jer. 39:8-10; 52:12-30)
8Babilonia llactata jatun mandaj Nabucodonosor runaca, ñami chunga iscun huatata mandajurca. Chai huatapaj picha quilla canchis punllapimi, cuidaj soldadocunata mandaj Nabuzaradán shuti runaca, Jerusalenman shamurca. Paica, Nabucodonosor runata servij runami carca. 9Pai shamushpami, Mandaj Diospaj huasitapash, mandana huasitapash rupachirca. Shinallata Jerusalenbi tucui huasicunatapash, mandajcunapaj tucui huasicunatapashmi rupachirca. 10Chai mandaj soldadohuan shamuj, tucui caldeo soldadocunaca, Jerusalén muyundi jatun pircatami urmachinajurca. 11Chai pueblopi huaquin puchushca gentecunatapash, Babilonia llactata jatun mandajpajman paicunallata rishca gentecunatapash, imagutapash na charij gentecunatapashmi, cuidaj soldadocunata mandaj Nabuzaradán shuti runaca prezu aparca. 12Chashna apashpapash, cuidaj soldadocunata mandaj Nabuzaradán shuti runaca, Judá llactapi causaj imagutapash na charij gentecunataca, uvas chagracunapipash, pambacunapipash trabajachunmi saquirca.
13Chai caldeocunaca, Mandaj Diospaj huasipi shayachishca, bronce pilarcunatapash, yacuta ashtana carretacunatapash, Mandaj Diospaj huasipi tiaj yacuta churashca jatun bronce pailatapashmi faquinajurca. Chai broncecunataca, Babilonia llactamanmi apanajurca. 14Shinallata caldero nishcacunatapash, paleta nishcacunatapash, pavizata anchuchinacunatapash, cucharongunatapash, Diosta servingapaj imatalla broncemanda rurashca tucui chaipi tiashcatami aparca. 15Inciensota cushnichinacunatapash, jatun tastacunatapashmi aparca. Orota rurashcataca oro purallata, culquita rurashcataca culqui puralla tandachishpami aparca. Cuidaj soldadocunata mandajca, tucuitami aparca. 16Ishcai jatun pilarcacunata, yacuta churana jatun pailata, yacuta ashtana carretataca, Mandaj Diospaj huasipi tiachunmi, Salomonga rurachishca carca. Tucui chaicunataca, na pezai ushanallachu carca. 17Chai jatun pilarca, pusaj metro yali jatunmi carca. Chai pilarpaj umapica, bronceta rurashca capitel nishcatami churashca carca. Chai capitelca, shuj metro quimsa chunga picha centímetro jatunmi carca. Chai capitelpaj jahuapica, linllicunatapash, granadilla nishcacunatapash, tucuillata bronceta rurashcatami muyuchishca carca. Chaishuj pilartapash, chashnallatami linllita muyuchishpa rurashca carca.
18Cuidaj soldadocunata mandajca, Seraías shuti mandaj curatapash, paipaj cati mandaj Sofonías shuti curatapash, Diospaj huasipi tiaj platocunata, cuidaj quimsa runacunatapashmi japirca. 19Shinallata Jerusalén pueblomandaca, macanajuj soldadocunata mandajtapash, jatun mandajman ali yuyaita cuj picha mandajcunatapashmi japirca. Soldadocunapaj shuticunata escribishpa charijuj mandajtapashmi japirca. Paimi, chai llactapi causajcunapaj shuticunataca, escribishpa charirca. Shinallata Judá llactamanda sucta chunga mandajcunatapashmi, Jerusalén pueblopi cajpi japirca. 20Tucui paicunata japishpami, cuidaj soldadocunata mandaj Nabuzaradán shuti runaca, Babilonia llactata jatun mandajpajman, Ribla shuti puebloman aparca. 21Babilonia llactata jatun mandajca, Hamat shuti llactapimi chugrichishpa huañuchijurca.
Chashnami, Judá llactapi causajcunaca, paicunapaj llactamanda prezu apai tucurca.
Huaquin puchushcacunami, pacajushpa Egiptoman rishca
(Jer. 40:7-10; 41:1-3,16-18)
22Babilonia llactata jatun mandaj Nabucodonosor runa, Judá llactapi saquishca gentecunata mandachunga, Ahicam shuti runapaj churi Gedalías shuti runatami churarca. Ahicam runaca, Safán shuti runapaj churimi carca. 23Babilonia llactata jatun mandajca, Gedalías runatami mandaj cachun churarca. Chaitami, soldadocunata tucui mandajcunaca yacharca. Chaita yachashpami, Netanías runapaj churi Ismael shuti runapash, Carea shuti runapaj churi Johanán runapash, Netofa shuti pueblopi causajuj Tanhumet shuti runapaj churi Seraías runapash, Maaca shuti pueblopi causajuj shuj runapaj churi Jaazanías runapash, paicunapaj soldadocunandi Mizpa shuti puebloman shamunajurca. Tucui paicunami, paicunapaj soldadocunandi shamunajurca. 24Gedalías runaca paicunamanmi, paicunapaj soldadocunamambash, cashna nishpa juramenturca: “Caldeocunata servishpa causanataca, na manllanachu canguichi. Babilonia llactata jatun mandajta servishpa, chai llactapi causashpaca, alimi causanguichi” nircami.
25Ashtahuangarin chai huatapaj canchis quillapimi, jatun mandajcunapaj miraipura Ismael shuti runaca, chungapura runacunandi Mizpa shuti puebloman shamurca. Paicuna chugrichijpimi, Gedalías runaca huañurca. Ismael shuti runaca, Netanías runapaj churimi carca. Netanías runaca, Elisama shuti runapaj churimi carca. Ismael runaca, Gedalías runahuan causanajuj, Judá llacta runacunatapash, caldeocunatapashmi huañuchirca. 26Shinamandami tucuilla gentecuna jatarishpa, uchillacunamanda callarishpa, jatungunacaman soldadocunata mandajcunahuan, Egiptoman pacajushpa rinajurca. Caldeocunata manllashpami, chashna rinajurca.
Joaquín runata prezumanda llujchishpami, Babilonia llactapi alicachinajushca
(Jer. 52:31-34)
27Judá llactata jatun mandajca, quimsa chunga canchis huatata prezu causajujpimi, cashna tucurca: Chai huatapimi, Evil-merodac shuti runaca, Babilonia llactata jatun mandaj tucurca. Pai mandai callarijuj huatapaj chunga ishcai quilla, ishcai chunga canchis punllapimi, Joaquín runataca prezumanda llujchirca. 28Paihuanga aliguta juyaihuan parlashpami, Babilonia llactata jatun mandajcuna tianajushcatapash ashtahuan yalipi churarca. 29Shinallata prezuna huasipi tiajushpa churajushcataca surcuchishpami, shuj churajunata churachirca. Joaquín runaca, paipaj tucui causaipimi, jatun mandajhuan micushpa causajurca. 30Babilonia llactata jatun mandajca, punllandimi paipaj micunatallata carajurca. Paica, tucui causaipimi chashna causajurca.
Currently Selected:
2 REYES 25: QUII
Highlight
Share
Copy
Want to have your highlights saved across all your devices? Sign up or sign in
Quichua Imbabura Bible © United Bible Societies, 1994.