1 TIMOTEO 2
2
Diosta imashna mañanatami yachachishca
1Tucuimanda yalica, caitami aliguta yarichini: Tucui gentecunamanda ninanda mañachun, Diosta mañachun, pashi nichun, ayudapai nishpa mañachunmi yarichini. 2Jatun mandajcunamanda, shuj mandajcunamandapash, tucuicunamanda Diosta mañachunmi yarichini. Shina mañashpami, casilla aliguta, chulunlla causashpa, Diosta yarishpa, tucuipi aliguta causai ushashunchi. 3Shina mañanaca alipachami. Shina mañachunmi, ñucanchita Quishpichij Taita Diospash munan. 4Paica, tucuicuna quishpirichunmi munan. Paimanda na llullashpa villajuj Shimitapash yachachunmi munan. 5Shujlla Taita Diosmi tian. Taita Diosmanda gentecunahuan, gentecunamanda Taita Dioshuan rimajpash, shujllami tian. Paica, aichayu tucushca Jesucristomi. 6Paica, tucuicunata quishpichingapajmi, paillata japi tucushpa huañurca. Chaitaca, ña ricuchina punllacunapimi ricuchimurca. 7Chaita tucuicunaman villaj cachun, yachachij cachunmi, Diosca ñucataca churahuarca. Shina cashpami, na llullashpa villajuj shimitaca, na israelcunapash crichun yachachijuni. (Cristota crij cashpami, na llullashpa shinapachami nishpa villajuni).
8Shinamandami tucui jaricunataca, maipi cashpapash, Diosta cashna mañachun nini: Maquita vichai churashpa, na fiñanajushpa, ama imatapash nirinajushpa, Diospajlla causashpa mañachun ninimi. 9Shinallata huarmicunapash, ama munanayaita, ama pinganayaita churajunataca churajuchun ninimi. Umatapash na yapata alichirinachu. Shinallata orota rurashca imatapash, perlascunatapash, ninan valishca churajunacunatapash, na churajunachu ninimi. 10Ashtahuangarin Diosta yarishpa causaj huarmicunashnallata causangapaca, imatapash aliguta rurashpa causachun ninimi. 11Huarmica, upalla yachajushpa, imapipash cazuchun ninimi. 12Huarmitaca, jarita yachachijuchumbash, mandajuchumbash na saquinichu. Ashtahuangarin upalla tiachun ninimi. 13Diosca, Adán runatami punda rurashca. Chai jipami, Evatapash rurashca. 14Adanga, na umai tucurcachu. Ashtahuangarin huarmimi umai tucushpa, Dios mandashcataca na cazurca. 15Shina cajpipash huarmica, huahuacunata charishpa, aliguta crishpa, juyaita charishpa, Diospajlla causashpa catijushpaca quishpiringami.
Currently Selected:
1 TIMOTEO 2: QUII
Highlight
Share
Copy
Want to have your highlights saved across all your devices? Sign up or sign in
Quichua Imbabura Bible © United Bible Societies, 1994.