Pampujiam 22
22
O Puang Allataala to kupenombai, akanna untampeannä'?
22:1-32
1Lu lako to untetem to menani. Situhu' ajanganna penaniam: Jonga wattu mebengngi'. Pampujiam napapia Daud.
2O Puang Allataala, Puang Allataala to kupenombai, akanna untampeannä'?
Mengkaalaä' matim, sapo' tontäKo mambela
anna tä' umpamoloiä'.
3O Puang Allataala to kupenombai, mengkaalaä' matim wattu iallo, sapo' tä'Ko deem mentimba'.
Ma'sambajannä' matim wattu bengi, sapo' tä' siam mala masannam penabangku.
4Sapo' moi anna susi, tontä liuKo Tomahaja Handam Maseho,
to napuji anna napa'kasallei to Israel.
5Iko nahannuangKo nene to kiponene;
nahannuangKo anna ullangnga'i.
6Mengkaalai matim, anna ullangnga'i;
sikamahannu matim, anna tä' kasihisam.
7Sapo' kao-kao indee, ula'-ula' pakuä', taia hupatau,
napa'pa'dei anna nakabassi tau buda.
8Ingganna to muitaä', natelleä',
sikamengngu'be, anna muilim-ilim.
9Sikama'kada naua: <<DEBATA nahannuam, pabäi toda' Ia ham ullangnga'i;
pabäi Ia ham ullappasanni!
Kusanga napohäe paha' DEBATA?>>
10Iko umpatibussannä' illaam mai tambu',
Iko umpomahannuä' matim sumusu dio abinganna indoku.
11Mengkalao dadingku, inna dibehomä' dokko lisu pala'Mu,
illaampä' tambu' anna Ikom Puang Allataala to muampuannä'.
12Daa ungkambelaä',
aka mahuku'um kamasussaam,
anna tä' deem la umpamoloiä'.
13Naleboä' balingku sihhapam sapim laki buda,
napali' tintinnä' susi banteng ma'palasa buttu dio mai Basan;
14Sangngim mengängngä natammuiä',
sihhapam singa meala, anna ma'ehhem.
15Pa'dem kamatohoangku sihhapam uwai titollo,
lussem asammi bukungku anggasanna silalla lesoanna,
mahehe pallam penabangku;
16mabangi bahokoku susi bibä dihehä,
tippodo'um lilaku tä' mala tika'bi'.
O DEBATA, umpopetindoä' dio sobä' ongeanna to mate.
17Natalimbum tamaä' kamesaanna to tameada';
sihhapam asu buda ulleboä',
nasibuno-bunoi bitti'ku anna limangku.
18Sikatekä' bukungku mala kuhekem,
nasipetua'-tua'iä', napengkitaiä' balingku.
19Nataba-taba pohebaku,
anna naundi jubaku.
20Sapo' Iko, o DEBATA, daa ungkambelaä',
Iko kamatohoangku, simpannii mai umpamoloiä'.
21Lappasannä' dio mai pala' limanna to untetännä' pa'dam,
langnga'iä' dio mai passakkana asu buda.
22Tässu'iä' illaam mai sädäna singa,
puhamä' ullangnga'i dio mai tandu' banteng.
23La kupa'paissangam sangamMu lako ingganna solasubungku;
la kupujiKo illaam alla'-alla'na umma'Mu.
24O inggammua' to mengkahea' längäm DEBATA, pujii sanganNa!
O inggammua' pessubunna Yakub, pomatandekoa' DEBATA!
O inggammua' peampoanna Israel, pengkahea'ikoa' DEBATA!
25Aka DEBATA, tä' umpa'bahinni'i kamasussaanna to didahha,
anna tä' napeela-elaam.
Tä' umpemboko'i tau ia too,
sapo' nahingngiam ke mengkaalai.
26KupujiKo illaam alla'-alla'na pa'hempungam kasallena umma'Mu, aka indo puha umpogau'.
La umponnoiä' pa'dandingku matim dio olona ingganna to umpengkahea'iKo.
27To masussa la mangngande sampe dea';
to umpameä DEBATA, la umpakende' pampujiam.
La mahendem dakoa' too sule lako salako-lakona!
28Ingganna hupatau sule lako lili'na lino la mengkilala,
anna ma'pasulei lako DEBATA,
mentu'na kahajaam la menomba dio oloNa.
29Aka DEBATA inna Tomahaja,
umpahenta ingganna kahajaam.
30Ingganna to makaka di lino la menomba dio oloNa DEBATA,
ingganna to la tinanda di assala'na la menomba längäm DEBATA,
inna tala mala ullombunni sungnga'na.
31Ingganna lapi' mane la kende' la menomba lako DEBATA,
anna la umpentulasam diona DEBATA
lako ingganna to mane la dadi.
32Lu lako ingganna hupatau to la kende' allo di dako'na la ditulasam diua:
DEBATA puha ullappasam umma'Na.
Currently Selected:
Pampujiam 22: BMB
Highlight
Copy
Compare
Share
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
