Kada to Keaka' 7
7
1O änä'ku, antii manda' tobei matoto' kadangku,
anna patitanam di tambu'i patialim di sumusui tula' kupaondom.
2Antii manda' tobei matoto' paondongku anna malako masakke mahendem;
kambi' manappai pepanännä'ku umba susi unjagaiko lise' matammu.
3Patisäke'i dio limammu susi ponto bännä,
anna patitananni illaam batu atemu.
4Ala änä'dahammui kakeakasam,
angga' solasubunni pikkiham,
5anna mala najagaiko dio mai baine passunda',
dio mai baine to kadake gau' mässi'-mässi' pa'tula'.
6Pissam wattu ma'pahandam-handam omä',
ma'pahandam-handannä' illaam mai suleba'ku,
7iya kuitam sanaka-naka to saidi'pi kapaissanganna;
kuita sanaka-naka änä' gassim, pissananna deem mesa änä' gassim takepikkiham ia,
8umpenandai kasengkängam lalam,
anna lu lakoi banuanna baine to kadake gau',
9wattu eta too mahammom, sulipo'-lipo'um,
la hapa' kalem bengi.
10Iya natammuim mesa baine,
baine ma'poheba passunda' ma'penaba mateko;
11baine lussu' anna pa'mämmängam,
angga kabemba'-bemba' tahapa' dio banuanna,
12naala lako lalam, naala lako ongeam mahoa',
anna kapuhaam lako ma'pohengana lalam ma'pemäjä'.
13Silambi'na indo änä' gassim, iya nahuntu' siaham anna naudunni,
napasindum ma'lindo batu ma'kada naua:
14<<Puhamä' umbaba tunuam kasikapiaam,#7:14 tunuam kasikapiaam: Deem to umpemandalam battakada DEBATA muuai: indo baine passunda' mane puha untunu tunuam kasikapiaam lako DEBATA dio banua DEBATA. Iya nababa piha lako banuanna balena indo olo'-olo' to natunu nanasu dio banuanna anna pahallu naande indo allo eta too.
anna allo temo puham kuponnoi pa'pa'naku.
15Iam too anna le'ba'mä' kutammuiko,
aka kupeä si'da-si'dako, iya silambi'ungki' temo.
16Puham kuampa'i sampim masuha' petindoangku,
sampim linen#7:16 sampim linen: Sahhupa sampim dipapia dio mai bätäna tanangam diuaam rami kiha-kiha 1-3 mete' malangka'na. masuha' buttu dio mai Mesir.
17Puham kupippi'i mur,
gaharu, anna kaju bubanau'.
18Maiko tapalosso' penabanta sule lako masiä,
anta pasule lako elo' bunga-bunganta.
19Sumala pa'dei inde muaneku,
mahassam illaam pa'laoam mambela.
20Salambusam doi' nababa lao,
iapi mane ma'pasulei ke pa'tängäannam inde bulam.>>
21Ungkäse-käse indo änä' gassim napakate'de',
napamammisam tula' anna mala ma'dim.
22Lambisam tappa mengngio indo änä' gassim,
sihhapam sapim tama'geu' dibaba lako petunuam,
anggasanna jonga umpengkahopäi poja,#7:22 poja: Mala duka' kalembasanna, susi to tana' tama dipungo la lao ditahungkum.
23katampasanna nalosa lappa' batu bälä'du' buana;
sihhapam dassi umpentia'i pa'pemälängam,
tala deem nalambi' pikkihanna naua: <<Illaammä' sädä hobaja.>>
24Iam too, o inggannakoa' änä'ku anna la umpehingngiimä',
anna la umpaillaam penaba kada penännä'ku.
25Daa umbeenni penaba baine susi ia too,
anna pissa'-pissa' ai la untuhu'i lalam penabanna.
26Aka budam tau natallangam,
anna mandasam mate natumä.
27Banuanna mebaba lako kaliane anitu,
mepatinanda lako kamateam.
Currently Selected:
Kada to Keaka' 7: BMB
Highlight
Copy
Compare
Share
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
