Ka Rome 4

Wəsə keyipə pa Abraham laka yɛ

1Wa ke gheɓəmə te ghena ta Abraham, shia ɓəmə wa? Wa yakemave ŋkɛ laka nza ta ŋkɛ kawəndə ŋelɛ wa? 2Ma nda wəshi ganji nyi menete ŋkɛ nde veyi Abraham kawəndə tiɗiɗi kwa kema ta Shala ne, wərə ŋkɛ kamene fege. Ama kashɛ ŋkɛ mene fege kwa kema ta Shala we. 3Kwa nza ŋkɛ ma ke Ghena ta Shala gezete: «Nahe Abraham keyɛte Shala, va nya yɛte ŋkɛ ŋkɛ nda veyi ŋkɛ Shala kawəndə nya tiɗiɗi.» 4Ma wəndə nya kemene slene ne, kaŋki nda wəsə mbeli. Gəmə ndeke nda cɛdɛ mbeli we, cɛdɛa ŋkɛ ne, se te slene ta ŋkɛ ŋkɛ. 5Ama wəndə nya kemenetema slene nda ndeke nda ghəa ŋkɛ ke Shala nya keve nde beze ghena tiɗiɗi ne, kave wəndəa shɛ Shala kawəndə nya tiɗiɗi laka yɛ ta ŋkɛ. 6Tsagha gezete David te ghena ta wəndə nya kezlama va nya ɓelate Shala kawəndə nya tiɗiɗi, kaɗema te slene nya menete ŋkɛ. 7Ma ke David:

Zlama ya va mbeli nyi kelemte geva fete ta nci te wənə

ba'a nyi dəpəmte geva jaɗafa ta nci.

8Zlama ya va wəndə nya ɓelama jaɗafa ta ŋkɛ Mahwətə.

9Nahe zlama shɛ kenza deke kaŋa mbeli nyi keslamte mɓɛta keɗema kaŋa mbeli nyi keɗema keslamte mɓɛta na? Nahe gheɓəmə kegezete tsetsenya tsema tsema veyi Abraham Shala kawəndə nya tiɗiɗi laka yɛ ta ŋkɛ. 10Hweŋkwa menete geva ŋkɛ wa? Tewə ŋkɛ keslamte mɓɛta na, na kwa sebe ta ŋkɛ? Kenza kwa sebe we, ama tewə ŋkɛ keslamte mɓɛta. 11Ma kwa sebe ta ŋkɛ ne, nahe Abraham kekemave sla ta mɓɛta kawəsə nya kencɛ wəsə nya kencɛ tsema tsema veyi ŋkɛ Shala tiɗiɗi laka yɛ ta ŋkɛ, tewə ŋkɛ keslamte mɓɛta. Nahe ŋkɛ kezhɛrenyɛ kayitenyɛa mbeli nyi keyɛte Shala tewə ŋkɛ keslamte mɓɛta. Nahe Shala keveyi hɛ kambeli nyi tiɗiɗi perə. 12Gheŋkɛ ya kashia mbeli nyi keslamte mɓɛta perə, geze ta ŋkɛ, mbeli nyi kezlamama yitea slamte mɓɛta nahe, ama nyi kezele sebe ta Abraham nya keyɛte Shala tewə ŋkɛ kenaka kaslamte mɓɛta.

Meɗe mɛa Shala nya kemave wəndə laka yɛ

13Nahe Shala kemeɗeyi nda ke Abraham ba'a ka shihɛnyɛ kezha kemave hɛɗi lema hɛ. Va nya fate nda ghena ŋkɛ ke wəsə mahalegə nda meɗeyi nda ghena shɛ Shala we, ama va nya veyi Abraham Shala kawəndə nya tiɗiɗi laka yɛ ta ŋkɛ. 14Ma kenza nde deke mbeli nyi kezele wəsə mahalegə ka zeme ghɛ yitea hɛɗi nya meɗeyi Shala ne, gəmə yɛ Shala mbeli ba'a gəmə ghena nya meɗeyi Shala perə. 15Kwa nza ŋkɛ hwepe wənə ta Shala yakele wəsə mahalegə kase. Ma te ŋkwa nya ɗema wəsə mahalegə ne, hawema va wəsə mahalegə shɛ we.

16Tsagha ne, laka yɛ nza wəndə kakemave wəshi nyi kemeɗeyi geva, nahe yɛ kenza kawəsə nya ve nda Shala gəmə ke mbeli. Tagha gɛ, nahe meɗe mɛa shɛ kenza kaŋa pɛtɛa hwelefefia Abraham, kaɗema deke kaŋa mbeli nyi kehawe va wəsə mahalegə, ama kaŋa mbeli nyi nza yɛ va hɛ kala Abraham. Nahe Abraham kenza kayiteyɛa pɛtɛa ɓəmə. 17Kaganda ne, ma ke Ghena ta Shala gezete: Nahe 'ya keveyi ŋa kayiteyɛa hwelefefi kwele kwele. Nahe Abraham kenza kayiteyɛa ɓəmə kwa kema ta Shala nya yɛte ŋkɛ, Shala nya keve nda mpi ke mbeli nyi kempə mpə ba'a nya keheka wəsə nya keɗema shɛ kezha nza. 18Nahe Abraham kevate ghə ba'a keyɛte ghena nya meɗeyi nda Shala, ya kwela nza ve ghəa shɛ kala wəsə gəmə. Tsagha gɛ, nahe ŋkɛ kezhɛrenyɛ kayiteyɛa hwelefefi kwele kwele, kwa nza ŋkɛ ma ke Shala shɛ: «Kwele kwele tenza hwelefefi nyi ketesawa mbe gha.» 19Nahe va ta ŋkɛ kenza gare gwəmsə, ama kedene yɛ ta ŋkɛ ya gheŋkɛ ɗepe kala wəsə kwa mte mte geva ta ŋkɛ ba'a nahe Sara kenza kajɛŋa we. 20Kwa kema ta meɗe mɛa Shala ne, kese ŋkɛ kagezleŋe ghə we, nahe yɛ ta ŋkɛ kendeke nda berete ba'a nahe ŋkɛ ketsahekɛ Shala. 21Ntɛaŋe ntɛaŋe keseve ghena nya meɗeyi nda Shala ŋkɛ, nahe ŋkɛ keɗepe berete ya va Shala gare menete wəsəa shɛ. 22Vatse nda se Shala kaveyi Abraham kawəndə nya tiɗiɗi. 23Ama kenza: «Nda veyi ŋkɛ Shala tiɗiɗi», kezha gheŋkɛ kwetɛŋe we. 24Kezha gheɓəmə rafete geva ŋkɛ perə, kateve ɓəmə Shala kambeli nyi tiɗiɗi, gheɓəmə nyi keyɛte Shala nya kekelakame Yɛsə, Nde sleke ɓəmə same kwa kwele. 25Nahe Yɛsə kemte te jaɗafa ta ɓəmə, ama nahe Shala kekelakame ŋkɛ same kwa kwele kezha zhɛre ɓəmə kambeli nyi tiɗiɗi kwa kema ta ŋkɛ.

Currently Selected:

Ka Rome 4: BEKDC12

Highlight

Copy