Matiye 24

Yɛsə kageze ŋzla ta ghɛa Shala

(MRK 13.1-2; LWK 21.7-19)

1Pa Yɛsə shave mbe ghɛa Shala ba'a dzeghwanyɛ. Tagha gɛ, pa ka təkwə təkwə ŋkɛ hendeke geva kezha ncɛ nda ganyɛa ghɛa Shala. 2Ma ke Yɛsə sha hɛ: «Nahe yɛ kenakɛ ndeɗea ghɛ nya tse na? Kaganda ne, ma 'ya sha gheyɛ: pɛtɛ teŋzla ŋkɛ, pelɛ shɛ katenza te kwete wəndəa ŋkɛ we, pɛtɛ teŋzla ŋkɛ.»

Yaka nyi tesa mbeli nda tekiɗi hɛɗi

(MRK 13.3-13; LWK 21.7-19)

3Mentishɛ Yɛsə pelɛ ghweme Bekele ne, pa mbeli nyi ketəkwə təkwə se shɛ kaghəa nci, ma ke hɛ shɛ: «Ncɛte n'yɛ wəsə nya ketencɛ və nya temene geva wəshi nyi te gi! Wa wəsə nya ketemene geva nda nza ghen'yɛ kaɗepe vəa se ta ŋa ba'a ŋa kiɗi ta hɛɗi wa?»

4Ma ke Yɛsə sha hɛ: «Ntsehwele mə yagha wəndə teghwete ŋayɛ. 5Kwa nza ŋkɛ kwele kwele mbeli nyi ketese te sləa ɗa, ma ke hɛ sha tegeze: 'Ya ya kaMɛsi. Kwele kwele mbeli nyi teghwete hɛ. 6Katefa gaka ta mpa nyi dekwe dekwe keɗema nyi cakeɗa cakeɗa. Ghazlənəma yɛ ma: nda wəshia shɛhɛ kamenete geva kaba, ama kenaka kiɗi ta hɛɗi we. 7Katempa kwete hwelefe le kwete, kateha nda mpa kwete hɛɗi meghe ke kwete, katemene geva ma ba'a kategaŋkəɗə hɛɗi te kweci ŋkwa. 8Kala kwa ghate ta heha ta male nda teya wəzege nde tenza wəshia shɛhɛ.

9Katekese ŋayɛ mbeli kezha mpə ŋayɛ, katezlɛ kweci hwelefefi va gheyɛ tewəmbəreke 'ya. 10Ma vəa ŋkwa shɛ ne, kwele kwele mbeli nyi ketesərə ghena ta ɗa, katepamte ghəa nci hɛ, katezlɛ hɛ va ghəa nci. 11Katese kweci ka mɛ ŋkwa nyi kesla tseŋwə kwele kwele, kwele kwele mbeli nyi teghwete hɛ. 12Kwele kwele tembake geva wəsə kwa ndiremi te hɛɗi, dewə tenza ɗe va mbeli. 13Ama wəndə nya ketehwepe ghə kezha zele ɗa hwa'a te kwa keɗaŋe ta hɛ ne, pələsə tenza ŋkɛ. 14Nda Ghena kwatenca nya ganyɛ ta Meghe nya pelɛ ghweme kazlapete geva te hɛɗi lema yitea fate pɛtɛa hwelefe nda tese kiɗi ta hɛɗi.

Wəsə nya ndiremi kashasha

(MRK 13.14-23; LWK 21.20-24)

15Katenakɛ wəsə nya ndiremi kashasha yɛ mentare mbe ŋkwa nya keveyi geva tekeleke, nya gezete nde mɛ ŋkwa Daniyɛl. Ma wəndə nya kejaŋga ne, fave ghena nya ŋkɛ ndeɗekə. 16Te vecia shɛ, ma mbeli nyi mbe Zhəwdɛ ne, hwɛ hɛ kadzeme hwa ghweme. 17Ma wəndə nya pelɛ dɛɓere nya kənəa cɛ ne, katesawa ŋkɛ kafə wəshia ŋkɛ mbe cɛ we. 18Ma wəndə nya kwamte ɓiyitsa ne, katezhɛre geva ŋkɛ kakele lekwesa ta ŋkɛ we. 19Te vecia shɛ ne, yaka nde tenza te mi nyi le hwə ba'a nyi nza ŋwale te ŋ'wa va hɛ. 20Səkwə mə Shala kezha ɗema yɛ kahwɛ hefeghwe hwa ntasle keɗema hwa veci kezhɛne mpi. 21Kwa nza ŋkɛ ma te vecia shɛ ne, za ma tenza yaka shɛ ke yaka nyi sahwe mbeli ghala ghate geva hɛɗi pa tsetsenya, katenza kwete shɛ kala gheŋkɛ we. 22Ma ya keɗema Shala kentamte hɛa shɛhɛ ne, nza wəndə shɛ kambele we. Ama nahe ŋkɛ kentamte hɛ kezha mbelia ŋkɛ nyi tsehave ŋkɛ.

23Ma kegeze ŋayɛ kwete wəndə: Wa nya Mɛsi nya teke, keɗema: Wa nya ŋkɛ pelɛke, a ke ne, yɛma yɛ ma. 24Kwa nza ŋkɛ katese ka tseŋwəa Mɛsi ba'a ka tseŋwəa ka mɛ ŋkwa, katemene wəshi kencɛ wəshi nyi jama jama ba'a wəshi meŋele hɛ kezha ghwete ŋkwa, ma ya kapesle hɛ yite ne, pa le mbeli nyi ntave Shala ɗe hɛ kazamte hɛ. 25Nahe yɛ kefa na? 'Ya ɗema kegezete ŋayɛ na?

26Ma kegeze ŋayɛ mbeli: Wa nya mə ŋkɛ kwa mte te ɓerama, a ke mbeli ne, ləma yɛ ma. Ma kegeze mbeli: Wa nya ŋkɛ teke tentikə, a ke mbeli ne, yɛma yɛ ma. 27Kala slesla ta va dzeyi te ghweme, se kwa ŋkwa kesame ta veci hwa'a kwa ŋkwa kepəkwə ta ŋkɛ ne, tsagha tenza se ta Wəzege ta za. 28Te ŋkwa nya nza wəsə kwa mte mte tsene geva yɛ zleŋa.

Se ta Wəzege ta za

(MRK 13.24-27; LWK 21.25-28)

29Ma kwetere wəmbəa yaka nyi geze ŋayɛ nyi 'ya ne, katezhɛne veci kaɓele we, katezhɛne tere kaɓele we, katebete yɛ saseregwa sawa pelɛ ghweme, kategaŋkəɗə berete nyi pelɛ ghweme. 30Ma tsagha, katencɛ geva wəsə kencɛ se ta Wəzege ta za dzeyi te ghweme. Kateŋgaɗe ghə ba'a katenehwene pɛtɛa mbeli nyi te hɛɗi, katenewe Wəzege ta za mbeli sawa te ləmbə le berete ba'a zləvə kwele kwele. 31Ma vəa ŋkwa shɛ ne, katevɛ geva veke, kateghwene ka ghwene ta ŋkɛ ŋkɛ kalə laka pɛtɛa bela ta hɛɗi wəfaɗe, katetsene mbelia ŋkɛ nyi tsehave ŋkɛ se te kwete mendɛkwe ta hɛɗi hwa'a te kwete.

Ghena te ghəa dasekwa

(MRK 13.28-31; LWK 21.29-33)

32Zəzəte mə və nya ncɛ ŋayɛ dasekwa. Ma kebetemte sleke ŋkɛ ba'a keɗa ŋkɛ ne, nahe yɛ keɗepe takwa takwa cimə. 33Ma vəa ŋkwa nya nakɛ wəshi nyi kala nyi yɛ kamene geva ne, ɗepete mə takwa takwa və nya tese ŋkɛ kwa. 34Kaganda ne, ma 'ya sha gheyɛ: katempə pɛtɛa mbeli nyi teghweme nyi teke tsetsenya nda tese ŋkɛ we. 35Kateza yɛ ghweme le hɛɗi, ama kateza ghena ta ɗa tɛape we.

Shala kwetɛŋe nde ɗepe vəa kiɗi ta hɛɗi

(MRK 13.32-37; LWK 17.26-30, 34-36)

36Ma gɛ, wəndə shɛ keɗepe se ta vecia shɛ keɗema vəa shɛ we: ya ka ghwene ta Shala nyi pelɛ ghweme, ya Wəzege, deke Yita nde ɗepe. 37Wəsə nya kemenete geva te vəa Nowɛ nde temene geva te vecia se Wəzege ta za. 38Ma tewə yɛmə nya wəba kenaka kase kaza ŋkwa ne, mbe mpeɗe wəshi kezeme ba'a mbe sa wəshi kesa mbeli, kaŋzle makwa mbeli, kave nda ŋwalea kwɛa nci kweci ke zhili, hwa'a te veci nya dzembe kwambelə Nowɛ, 39keɗepe hɛ nda senyɛ yɛmə nya wəba kazamte hɛ pɛtɛ we. Tsagha temene geva ŋkɛ vəa ŋkwa nya tese Wəzege ta za. 40Bake zhili kwa mte kawəza, laŋe ŋkɛ te kwete, sərə kwete. 41Bake mi kahə te vena nya kwetɛŋe, laŋe ŋkɛ kelehwe kwete, sərə kwete. 42Nza mə le ntsə gɛ, kwa nza ŋkɛ keɗepe vəa se Nde sleke ŋkwa yɛ we. 43Ɗepete mə megela: ma ya na wəndə ke ghɛ keɗepe və nya tese ghərə kwa ne, nza le ntsə nza ŋkɛ ba'a nza katesərə ghərə ŋkɛ kadzeki ghɛa ŋkɛ we. 44Vatse gɛ, nza mə deke ɗeke, kwa nza ŋkɛ vəa ŋkwa nya ɗema yɛ kezəzəte tese Wəzege ta za.

Mava nya dɛŋe dɛŋe te slene ta ŋkɛ

(LWK 12.41-48)

45Wa sləa mava nya dɛŋe dɛŋe te slene ta ŋkɛ, nya kentsehwele ntsehwele, nya veyi nde sleke ŋkɛ te ghəa kweci ka mavashi kezha ve nda wəshi kezeme ŋkɛ ke hɛ te və nya kehi wa? 46Zlama ya va mava shɛ kesləyi ŋkɛ nde sleke ŋkɛ mbe mpa le slene. 47Kaganda ne, ma 'ya sha gheyɛ: katedape pɛtɛa wəshia ŋkɛ nde sleke ŋkɛ te dzeve. 48Ya kwete ma ke mava shɛ zəzəte mbe ghəa ŋkɛ: Nahe nde sleke ɗa kedera kese, 49tagha gɛ, ntake ŋkɛ kampə kweci ka mavashi, kaŋwafe wəshi kezeme ba'a kasa wəshi kesa le ka ghwəyi ghwəyi. 50Vəkə tese nde sleke ŋkɛ veci nya neghema ŋkɛ ba'a te və nya ɗepema ŋkɛ. 51Kateŋkamte wəndə nyagha ŋkɛ, katenegha ŋkɛ ŋkɛ hwa ka mbəɗəkwəa kɛfi, te ŋkwa nya tenehwene ba'a nya tempeɗe slene ŋkɛ.

Currently Selected:

Matiye 24: BEKDC12

Highlight

Copy