Matiye 11

Mbeli nyi ghwenakɛ Zhaŋe Batiste

(LWK 7.18-35)

1Ma kwa gezemte nda ghena nyi Yɛsə ke mbeli nyi ketəkwə təkwə meŋe bakeghəmbe ne, ntəŋə ŋkɛ slə tagha kadzeyi mbe meleme nyi te hɛɗia shɛ kateke nda wəshi ke mbeli ba'a kazlape nda ghena ke hɛ.

2Ma kwa nza Zhaŋe Batiste kwa daŋgayɛ ne, pa fave zləvəa slene ta Kriste. Pa ŋkɛ ghwenakɛ nda kweci mbeli nyi ketəkwə təkwə ŋkɛ, 3ma ke hɛ 'yɛwete ve: «Gha wəndə nya neghe se ta ŋkɛ n'yɛ na, na, kwete wəndə yaneghe n'yɛ na? 4Ma ke Yɛsə sha hɛ: Kwiɗi mə gezete nda mə wəshi nyi fa yɛ ba'a nyi newe yɛ ke Zhaŋe: 5kanewe ŋkwa ka ghwələa kɛfi, kadzeghwa ka gwadare tiɗiɗi, kembe mbe ka derena, kafa ghena ka mədəŋəa kɛfi, kasame mbeli nyi kempə mpə kwa kwele, kazlape nda Ghena kwatenca nya ganyɛ mbeli ke ka titikwəa kɛfi. 6Zlama ya wəndə nya keɗema kateteɗe tewəmbəreke 'ya.»

7Ma kwa slənji mbeli nyi ketəkwə təkwə Zhaŋe ne, ntake Yɛsə kageze nda ghena te ghəa Zhaŋe ke mbeli nyi tagha. Ma ke sha hɛ: Wa yase yɛ kwamte te ɓerama kanewe wa? Bəremə nya kegaŋkəɗə va sefə na? 8Wa yase yɛ kanewe tsagha wa? Wəndə nya keseɗete lekwesa ganji na? Ama ma mbeli nyi keseɗe lekwesa ganji ne, kwa degha ta ka meghea kɛfi nza hɛ wəka? 9Nde mɛ ŋkwa yase yɛ kanewe na? Ma 'ya sha gheyɛ ne, kaganda shɛ ŋkɛ, ama za ma ŋkɛ ke nde mɛ ŋkwa. 10Kwa nza ŋkɛ ma ke Ghena ta Shala gezete te ghəa ŋkɛ: 'Ya kateghwene nde mɛ ŋkwa ta ɗa te kema ta ŋa. Katehi ŋa hweŋkwa ŋkwa. 11Fəyitekeghə ne, ma 'ya sha gheyɛ: wəndə shɛ keyake geva hwa male kwele ma ke Zhaŋe Batiste we. Ndagwara kwele ma wəndə nya ɓɛhwɛ mbe Meghe nya pelɛ ghweme ke Zhaŋe. 12Se te vəa Zhaŋe Batiste hwa'a tsetsenya ne, le berete dzembe Meghe nya pelɛ ghweme mbeli, ka mene berete ka zele kakele ŋkɛ. 13Nahe pɛtɛa ka mɛ ŋkwa ta Shala ba'a wəsə mahalegəa Shala kegezete ghena te Meghe nya pelɛ ghweme hwa'a te vəa Zhaŋe. 14Ma kenza nde kayɛ ghena ta ɗa yɛ ne, Zhaŋe ya kaƐli nya gezete geva se ta ŋkɛ. 15Fa ghena wəndə nya nza sleme ve.

16Le wa nza 'ya kayipəte mbeli nyi tsetse ŋkwa tse wa? Yipə yipə hɛ le ŋwale nyi ketsenete geva te ŋkwa shikwə, ma ke kweci sha zlape nda ghena ke kweci mbelia nci: 17Nahe ghen'yɛ kevɛte ŋayɛ shela, kese yɛ kawetse we. Nahe ghen'yɛ keghate ŋayɛ nehwene, kese yɛ kanehwene we. 18Kwa nza ŋkɛ ne, nahe Zhaŋe kese. Kazeme wəshi nyi zeɗe zeɗe ŋkɛ we, kasa tɛ ŋkɛ we, ama ma ke mbeli gezete: 'Yi'yɛghwə ya yitea ghə ve. 19Nahe Wəzege ta za kese, kazeme wəshi ŋkɛ, kasa wəshi ŋkɛ, ama ma ke mbeli gezete: Wa nya nde ɓerawe ba'a nde ghwəyi nya kamcɛnyɛa ka tsehe jaɓeregwale ba'a ka jaɗafa nya gɛ! Ama laka wəshi ganjia ŋkɛ nyi mene ŋkɛ ncɛte geva tiɗiɗia ntsehwelea Shala.

Meleme nyi keɗema kayɛ Yɛsə

(LWK 10.13-15)

20Ntake Yɛsə kaŋele meleme nyi se ŋkɛ kamene wəshi meŋele kwele kwele mbe, va nya ɗema mbeli nyi mbe melemea shɛhɛ kezhɛrete nza ta nci. Ma ke sha hɛ: 21Ndiremi ya te gha Korazɛn. Ndiremi ya te gha Bɛtesayida. Ma ya mbe Tir ba'a Sidon menete geva wəshi meŋele nyi kemenete geva mbe gheyɛ ne, nza ɓeshi hwepeyi zewe hɛ hwa hwə ba'a behwemte geva mbeli nyi mbe melemea shɛhɛ le pəsəɗə kezha mpi dzeve we. 22Vatse gɛ ne, ma 'ya sha gheyɛ: ma veci nya temeha ghwə Shala te mbeli, ɓɛhwɛ ma tesa yaka ka Tir le ka Sidon ke gheyɛ. 23Gha le ŋa ŋa gɛ Kapɛrnawəm, ma zəzə na ne, hwa'a pelɛ ghweme tedzeme na na? Ewə, hwa'a kwa ghɛa mbelia kwahɛɗi teteɗe na. Ma nda mbe Sodome menete geva wəshi meŋele nyi kemenete geva mbe gha, nza mba melemea shɛ pa ɓeshi. 24Vatse gɛ ne, ma 'ya sha gheyɛ: ma veci nya temeha ghwə Shala te mbeli, ɓɛhwɛ ma tesa yaka ka Sodome ke gha.

Nde mə sha 'ya kezha zhɛne mpi

(LWK 10.21-22)

25Ma ke Yɛsə vəa ŋkwa shɛ: «Yita yawe, Nde sleke ghweme ba'a hɛɗi, hana 'ya sha gha kwa ncɛte nda wəshi nyi wəfərəakɛ na va ka ntsehwele ntsehwele ba'a ka ɗepe wəshi na ke ka dewə ŋeli. 26Kaganda Yita, gha nde ɗete kanza ŋkɛ tsagha.

27Nahe Yiteyɛ ɗa kedapate ɗa pɛtɛa wəshi te dzeve. Wəndə shɛ keɗepe Wəzege keɗema Yita we, wəndə shɛ keɗepe Yita keɗema Wəzege we, nda wəndə nya ɗe Wəzege kancɛ nda ŋkɛ.

28Nde mə gheyɛ pɛtɛa mbeli nyi leɓakwe va wəsə nya ɗaŋeɗa, tagha gɛ, kateve ŋayɛ zhɛne mpi 'ya. 29Kele mə wəsə kwa ɗaŋeɗa ta ɗa, pele ɗa mə ghəa ŋayɛ kezha teke ŋayɛ wəshi 'ya, kwa nza ŋkɛ nahe 'ya kenza kande shifə ghə ba'a kande gwedəa mehele. Tagha gɛ, katekemave zhɛne mpi yɛ kaŋa ŋayɛ. 30Kaganda ne, nahe wəsə nya ɗaŋeɗa ta ɗa kenza dekwede kakele ba'a nahe wəsə nya ve 'ya kwa ghəa ŋayɛ kenza kefe kefe.»

Currently Selected:

Matiye 11: BEKDC12

Highlight

Copy