Ka Lɛvi 23

Vəa gəsəkə nyi mene ka Israyɛl: Veci kezhɛne mpi

1Ma ke Mahwətə sha Moyize: 2«Ma pa na sha ka Israyɛl: Ma vəa ŋkwa nyi mene ɗa gəsəkə nyi jama jama yɛ, 'ya Mahwətə ne, katemene tsene nyi keveyi geva tekeleke yɛ. Wa nyi gəsəkə nyi jama jama shɛhɛ nyi kezha 'ya:

3Kahɛ ŋkwaŋe ne, katemene slene mbeli. Ama te kwa mberefaŋe ta hɛ ne, katenza veci kezhɛne mpi nya keveyi geva tekeleke kezha ve zləvə te 'ya. Slene shɛ katemene yɛ we: gheŋkɛ ya kaveci kezhɛne mpia Mahwətə te yayata ŋkwa nya nza yɛ.

4Ma kweci gəsəkə nyi jama jama nyi tetsene geva yɛ yite kezha mene ɗa ne, te hɛ nyi kenteyi geva temene hɛ yɛ.

Yɛ Pake le gəsəkəa ɗafa nyi ɗema tenjɛne hwe

5Ma te kwa meŋe wəfaɗeghəmbe ta hɛ mbe kwa ghate ta tere mbe va, menema ta tɛhwɛɗi ne, katemene ɗa gəsəkəa Pake yɛ, 'ya Mahwətə.

6Ma te kwa meŋe mcɛfeghəmbe ta hɛ mbe terea shɛnyɛ ne, katemene nda gəsəkəa ɗafa nyi ɗema tenjɛne hwe yɛ ke Mahwətə. Kahɛ mberefaŋe ne, ɗafa nyi ɗema tenjɛne hwe yatezeme yɛ. 7Ma te kwa ghate ta hɛ ne, katemene tsene nya keveyi geva tekeleke yɛ. Slene nya dzawe shɛ katemene yɛ te vecia shɛ we. 8Ma te yayata hɛ mbe shikwəa shɛ ne, kadzeghe ɗa melɛ kwa tere tere yɛ. Ma te kwa mberefaŋe ta hɛ ne, katemene geva tsene nya keveyi geva tekeleke. Slene nya dzawe shɛ katemene yɛ te vecia shɛ we.»

Gəsəkəa kwa ghate ta ghwɛpɛa ha

9Ma ke Mahwətə sha Moyize: 10«Ma pa na sha ka Israyɛl: Ma vəa ŋkwa nya tentsehe yɛ te hɛɗi nya teve ŋayɛ 'ya ba'a nya temene wəshi yɛ se te wəve te ne, katefə nda kwa ghate ta ghwɛpɛa ha nya temene yɛ se te wəve yɛ kase ke nde dzeghe Shala. 11Kateve ghwɛpɛa ha shɛ nde dzeghe Shala kwa kema ta ɗa, 'ya Mahwətə te hendɛ ta veci kezhɛne mpi. Ma tsagha ne, kateyɛ 'ya. 12Ma te vecia shɛnyɛ ne, katedzeghe ɗa melɛ kwa tere tere yɛ 'ya Mahwətə le game nya kemenete va zake, nya ɗema beze te. 13Ma yite ne, katekele kiləwəa hə nya kehwaɗe hwaɗe le n'yi yɛ ŋkwaŋe kase kawəsə gəmə nya tere nda mbeli ke Mahwətə. Zeɗehwe ɗa tenza n'yia ŋkɛ nya kezəŋwə megela, ya Mahwətə. Katekele wəsə gəməa tɛ yɛ kase kalitrə ba'a kwete gasle yite. 14Katezeme ɗafa, ghəa ha kwa pesa pesa, ya mɛnɛfɛa ha shɛ yɛ nda tefəke nda kwa ghate ta ghwɛpɛ yɛ kase ke Shala ta ŋayɛ we. Kawəsə mahalegə nya kaghala ghala tenza ŋkɛ kaŋa ŋayɛ keshi keshi, te yayata ŋkwa nya tenza yɛ.»

Gəsəkəa mene wəshi se te wəve

15Kateɓela shikwə yɛ mberefaŋe kape kape se te hendɛ ta veci kezhɛne mpi nya keleke ɗa kwa ghate ta ghwɛpɛ yɛ le ɓela gəsəkəa ve ɗa wəsə. 16Tagha gɛ, kateɓela hɛ yɛ mcɛfemsə pa te hendɛ ta veci kezhɛne mpi kwa mberefaŋe. Ma te vecia shɛ ne, kateve ɗa wəsə gəməa wəshi mɛnɛfɛa ŋayɛ nyi kese te wəve yɛ, 'ya Mahwətə. 17Katefə 'yɛmbe dəghwəa ɗafa yɛ bake shave ki ghɛa ŋayɛ kezha bete ɗa hɛ te kema ta reghwetɛ le ɓela gəsəkəa ve wəsə. Kateta yayata 'yɛmbe dəghwəa ɗafa shɛ yɛ le kiləwəa hə mahekene ba'a tenjɛne. Ma wəsə gəməa shɛ ne, le ka ghate ta wəshi nyi kese te wəve temene ɗa geva nde, 'ya Mahwətə. 18Ma kadzeyitea ɗafa shɛ ne, katefə ɗa zhɛgwəa lɛməa timɛti mberefaŋe nyi gare va kwetɛŋe nyi ɗema beze te, mca ba'a gamea lɛməa bake yɛ kase kezha dzeghe nda melɛ kwa tere tere ke 'ya Mahwətə, jikə le wəshi gəməa hə ba'a tɛ nyi yitea hɛ. Ghenci ya kamelɛ kwa tere tere nyi nza zəŋwəa nci zeɗehwe ɗa, 'ya Mahwətə. 19Le zhɛfa ne, katedzeghe melɛ keyaɓe jaɗafa yɛ. Ma zhɛgwəa lɛməa timɛti nyi bake nyi gare va kwete kwete nyi ne, kezha melɛ kejikə ghə. 20Kateve hɛ nde dzeghe Shala te kema ta Mahwətə le ɓela gəsəkəa ve nda wəsə, yɛ zhɛgwəa lɛmə timɛti nyi bake nyi kanya kwetɛŋe le ɗafa ta ka ghate ta wəshi nyi kese te wəve. Ghenci ya kawəshi nyi keveyi geva tekeleke kezha Mahwətə, nyi ketenza kaŋa nde dzeghe Shala. 21Ma te vecia shɛ ne, katemene tsene nya keveyi geva tekeleke yɛ ba'a kateɗema yɛ kamene slene nya dzawe. Kawəsə mahalegə nya kaghala ghala tenza ŋkɛ sha gheyɛ keshi keshi, te yayata ŋkwa nya tenza yɛ.

22Ma vəa ŋkwa nya temene wəshi yɛ se te wəve ne, katetsa ha nyi dzeyi mɛa wəve yɛ we, katezhɛne geva yɛ dzeyi te sebe kezha vɛane zləvə we. Katesərə nda hɛ yɛ ke ka titikwəa kɛfi ba'a ke ka se se. 'Ya ya kaMahwətə Shala ta ŋayɛ.

Vecia zəzə

23Ma ke Mahwətə sha Moyize: 24«Ma pa na sha ka Israyɛl: Ma kwa ghate ta hɛ mbe tere kwa mberefaŋe ne, kaveci kezhɛne mpi, vecia zəzə ba'a vecia zlama nya temene tsene nya keveyi geva tekeleke ŋayɛ. 25Katemene slene nya dzawe yɛ we, ama katedzeghe ɗa melɛ kwa tere tere yɛ, 'ya Mahwətə.»

Veci nya wəba kezha kele jaɗafa te wənə

26Ma ke Mahwətə sha Moyize: 27«Ma kwa meŋe ta hɛ mbe tere kwa mberefaŋe ne, katenza ŋkɛ kaveci nya wəba kezha yaɓe jaɗafa. Katemene tsene nya keveyi geva tekeleke yɛ, katemene səwəmayɛ yɛ ba'a katedzeghe ɗa melɛ kwa tere tere yɛ, 'ya Mahwətə. 28Slene shɛ katemene yɛ te vecia shɛ we, kwa nza ŋkɛ ne, gheŋkɛ ya kaveci nya wəba kezha kelemte jaɗafa, nya ɓela geva gəsəkəa kelemte jaɗafa te kwa kema ta Shala Mahwətə ta ŋayɛ. 29Ma yayata wəndə nya ketemenema səwəmayɛ te vecia shɛ ne, kateŋkamte geva ŋkɛ shave hwa jikə ta ka Israyɛl. 30'Ya le ghəa ɗa nde teza sebe te wəndə nya ketemene slene te vecia shɛ shave hwa ka Israyɛl. 31Slene shɛ katemene yɛ we. Kawəsə mahalegə nya kaghala ghala tenza ŋkɛ kaŋa ŋayɛ keshi keshi, te yayata ŋkwa nya tenza yɛ. 32Kaveci kezhɛne mpi tenza ŋkɛ sha gheyɛ, veci kezhɛne mpi nya mene səwəmayɛ yɛ te. Ma se te kwa mesli ta hɛ mbe terea shɛ, hetɛhwɛɗi pa te hendɛ ta ŋkwa hetɛhwɛɗi ne, katehawe yɛ va veci kezhɛne mpia shɛ.»

Gəsəkəa yɛ ghwəli

33Ma ke Mahwətə sha Moyize: 34«Ma pa na sha ka Israyɛl: Ma te kwa meŋe mcɛfeghəmbe ta hɛ mbe tere kwa mberefaŋe shɛ ne, katemene geva gəsəkəa yɛ ghwəli kahɛ mberefaŋe kazləvəa Mahwətə. 35Ma te kwa ghate ta hɛ ne, katemene geva tsene nya keveyi geva tekeleke. Slene nya dzawe shɛ katemene yɛ we. 36Keveci keveci mbe shikwəa shɛ ne, katedzeghe ɗa melɛ kwa tere tere yɛ, 'ya Mahwətə. Ma te kwa deghese ta hɛ ne, katezhɛne yɛ kamene tsene nya keveyi geva tekeleke ba'a katedzeghe ɗa melɛ kwa tere tere yɛ, 'ya Mahwətə. Ma te vecia tsene kwa keɗaŋe ne, slene nya dzawe shɛ katemene yɛ we.

37Nyi ya kagəsəkə nyi jama jama kaŋa Mahwətə, nyi temene tsene nyi keveyi geva tekeleke yɛ hwə kezha dzeghe nda melɛ kwa tere tere keɗema kezha fə nda wəshi gəməa wəshi nyi kese te wəve, kezha dzeghe melɛ kejikə ghə keɗema kezha fə nda yɛ tɛ ke Mahwətə, kala gəsəkə nya ɓela mbeli te vecia shɛ. 38Ma melɛ nyi ne, kadzevare nyi kedzeghe ɗa yɛ te veci kezhɛne mpi, tsagha wəshi gəmə ba'a melɛ nyi dzeghe ɗa mbeli, 'ya Mahwətə kezha yipə meɗe mɛ keɗema le ɗe ta nci dzeve hɛ.

39Ma te kwa meŋe mcɛfeghəmbe ta hɛ mbe tere kwa mberefaŋe, kwa sebe ta dərəzlə ghwane ne, kategha yɛ kamene ɗa gəsəkə, 'ya Mahwətə kahɛ mberefaŋe. Ma kwa ghate ta hɛ ba'a kwa deghese ta hɛ ne, kaveci kezhɛne mpi tenza hɛ. 40Ma te kwa ghate ta hɛ ne, katefə yɛ ya ta wəfe nyi ganji ganji, yɛ slekea peha, yɛ dzeve ta wəfe nyi gwəzləmə gwəzləmə keɗema ŋa wəfe nyi dzeyi mɛa hələ yɛ. Katencɛ zlama ta ŋayɛ yɛ kwa kema ta Shala Mahwətə ta ŋayɛ kahɛ mberefaŋe. 41Keva keva temene nda gəsəkəa shɛ yɛ ke Mahwətə kahɛ mberefaŋe mbe tere kwa mberefaŋe. Kawəsə mahalegə nya kaghala ghala tenza ŋkɛ sha gheyɛ keshi keshi. 42Ma gheyɛ ka Israyɛl mbe shikwəa shɛ ne, katenza yɛ dzeyi mbe yɛ ghwəli. 43Ma tsagha gɛ, kateɗepe ŋwalea ŋayɛ keshi keshi nahe 'ya keveveyi ka Israyɛl dzeyi mbe yɛ ghwəli, vəa ŋkwa nya fəakame hɛ 'ya same kwa Ɛzhipte. 'Ya ya kaMahwətə Shala ta ŋayɛ.»

44Tsagha gɛ, pa Moyize gezete nda ke ka Israyɛl tsema tsema begeme hɛ le Mahwətə hwa gəsəkə nyi jama jama.

Currently Selected:

Ka Lɛvi 23: BEKDC12

Highlight

Copy