Ka Lɛvi 16

Veci nya wəba kezha yaɓe jaɗafa

1Ma kwa sebe ta mpə ta ŋwale tezhilia Aron nyi bake, vəa ŋkwa nya dzawa kema ta Mahwətə hɛ ne, 2ma ke Mahwətə sha Moyize: «Geze nda ke wəza meyɛ ŋa Aron kezha ɗema ŋkɛ kadzembe ŋkwa nya keveyi geva tekeleke, kwetere wəmbəa mayafe, te ŋkwa nya nza yɛ səndəkwə le wəsə keŋzle ta ŋkɛ nya keveyi geva tekeleke mbe yayata və. Ma tsagha ne, katemte ŋkɛ vəa ŋkwa nya tenca geva 'ya hwa ləmbə, kənəa wəsə keŋzle səndəkwə we.

3Ma kezha dzembe ŋkwa nya keveyi geva tekeleke ne, katekele mca Aron kezha dzeghe melɛ keyaɓe jaɗafa ba'a game kezha dzeghe melɛ kwa tere tere. 4Kateseɗe lekwesa pawa nya keveyi geva tekeleke ba'a kwampi pawa ŋkɛ. Katehwepe zlave pawa ŋkɛ hwa hwə ba'a katepeɗe ghəa ŋkɛ ŋkɛ le zlave pawa. Nyi ya kalekwesa nyi keveyi geva tekeleke nyi teseɗe ŋkɛ kwa sebe ta nya pɛkɛ pɛ ŋkɛ. 5Katekese nda zhɛfa lɛmə bake jikə ta ka Israyɛl kezha dzeghe melɛ kekelemte jaɗafa ba'a game kwetɛŋe kezha melɛ kwa tere tere.

6Katedzeghe melɛ Aron le mca kezha jaɗafa ta ŋkɛ ba'a kateɓela gəsəkəa yaɓe jaɗafa ŋkɛ kezha ghəa ŋkɛ ba'a kezha mbeli nyi ki ghɛa ŋkɛ. 7Kwa sebe ta ŋkɛ ne, katefə zhɛfa lɛmə nyi bake nyi ŋkɛ kase kadzawa kema ta Mahwətə, mɛa ŋkwa kedzembe cɛ lekwesa kebegeme geva. 8Katesla kwasheghediɗi ŋkɛ te zhɛfa lɛmə nyi bake nyi kezha ɗepete nya kaŋa Mahwətə ba'a nya kaŋa Azazɛl#16.8 Azazɛl: Ma Azazɛl ne, gheŋkɛ ya kasləa kwete 'yi'yɛghwə nya kwamte te ɓerama.. 9Katekele zhɛfa nya kaŋa Mahwətə ŋkɛ kase kadzawa kema ta ŋkɛ ba'a katedzeghe melɛ kekelemte jaɗafa ŋkɛ le. 10Ma zhigə zhɛfa nya kaŋa Azazɛl ne, kateve ŋkɛ mbeli le mpi te kema ta Mahwətə, yitea ɓela geva gəsəkə kelemte jaɗafa kənə, nda teghwene mbeli kadzemte ke Azazɛl kwamte te ɓerama.

11Katedzeghe melɛ Aron le mca kezha jaɗafa ta ŋkɛ ba'a kateɓela gəsəkəa kelemte jaɗafa ŋkɛ kezha ghəa ŋkɛ ba'a kezha mbeli nyi ki ghɛa ŋkɛ. Katesla ghə ŋkɛ te mca kedzeghe melɛ kezha jaɗafa ta ŋkɛ. 12Katepɛre wəsə ketere 'wərdə ŋkɛ le laɗe ta ghwə nyi te reghwetɛ nya mbe ŋkwa nya keveyi geva tekeleke. Katenta 'wərdə kwa hə hə bake demake demake mbe dzeve ba'a katefə wəshia shɛhɛ ŋkɛ pɛtɛ kadzeyi kwetere wəmbəa mayafe. 13Mbagha ne, katebete 'wərdəa shɛ ŋkɛ te laɗe ta ghwə. Tagha gɛ, katenza wəsə keŋzle səndəkwəa jikə geva bətə mbe n'yia 'wərdə. Ma tsagha gɛ ne, katemte Aron we. 14Kateha wəzege ta dzeve ŋkɛ hwa mimia mca shɛ ba'a kateyisə ŋkɛ laka bela kesame ta veci va wəsə keŋzle ta səndəkwə, kwa sebe ta ŋkɛ, kateyisə ŋkɛ mberefaŋe zhigə te kema ta səndəkwə. 15Kwa sebe ta ŋkɛ, katesla ghə ŋkɛ te zhɛfa kedzeghe melɛ kekelemte jaɗafa ta mbeli pɛtɛ ba'a katekele mimia ŋkɛ ŋkɛ kadzeyi kwetere wəmbəa mayafe. Katemene ŋkɛ le mimia shɛ kala nya menete ŋkɛ le ŋa mca: kateyisə mimia shɛ ŋkɛ te wəsə keŋzle səndəkwə ba'a kwa kema ta səndəkwə. 16Kateɓela gəsəkəa yaɓe nza ta ka Israyɛl wale wale ba'a fama ghena ta nci, geze ta ŋkɛ, jaɗafa ta nci pɛtɛ ŋkɛ mbe ŋkwa nya keveyi geva tekeleke. Pa ŋkɛ menete tsagha kezha cɛ lekwesa kebegeme geva, kwa nza ŋkɛ ne, te tepe ta mbeli nyi wale wale mɓete geva nde. 17Wəndə shɛ katenza mbe cɛ lekwesa kebegeme geva vəa ŋkwa nya dzembe ŋkwa nya keveyi geva tekeleke Aron kezha ɓela gəsəkəa yaɓe ŋkwa wɛŋe pa te və nya teshave ŋkɛ we. Kateɓela gəsəkəa kelemte jaɗafa Aron kezha ghəa ŋkɛ, kezha mbeli nyi ki ghɛa ŋkɛ ba'a kezha pɛtɛa ka Israyɛl. 18Kateshave ŋkɛ laka reghwetɛ nya kwa kema ta Mahwətə ba'a kateyaɓe reghwetɛa shɛ ŋkɛ wɛŋe. Katemene mimia yɛ mca le zhɛfa ŋkɛ kezha mene te yayata tereme nya te sleme ta reghwetɛ. 19Kateha wəzege ta dzeve ŋkɛ hwa mimi ba'a kateyisə mimia shɛ ŋkɛ mberefaŋe zhigə te reghwetɛ. Ma tsagha ne, kateyaɓe ŋkɛ wɛŋe va nza wale wale ta ka Israyɛl ba'a kateve ŋkɛ tekeleke.

20Ma vəa ŋkwa nya kiɗimte ɓela gəsəkəa yaɓe ta ŋkwa nya keveyi geva tekeleke, cɛ lekwesa kebegeme geva ba'a reghwetɛ ŋkɛ ne, katekele zhɛfa nya mba teghweme ŋkɛ kase. 21Katebete dzeve ŋkɛ bake nci kwa ghəa zhɛfa shɛ ba'a kateɓela yɛ jaɗafa, yɛ fama ghena ba'a yɛ fete ta pɛtɛa ka Israyɛl ŋkɛ kənə. Kateve hɛ ŋkɛ kwa ghəa zhɛfa shɛ, kwa sebe ta ŋkɛ, kateghwene ŋkɛ kadzete ɓerama, laka wəndə nya kentave geva. 22Katenza jaɗafa ta nci pɛtɛ kwa ghəa zhɛfa shɛ ba'a katefə hɛ ŋkɛ kadzete ŋkwa nya ɗema mbeli te.

Ma vəa ŋkwa nya ghweneghe zhɛfa shɛ Aron kadzemte te ɓerama ne, 23katezhɛne geva ŋkɛ kadzembe cɛ lekwesa kebegeme geva, kateseɗemte yɛ lekwesa pawa nyi seɗete nyi ŋkɛ kezha dzembe ŋkwa nya keveyi geva tekeleke ŋkɛ ba'a katebete hɛ ŋkɛ mbagha. 24Katepɛ ŋkɛ te ŋkwa nya keveyi geva tekeleke, kateseɗe kweci lekwesa ta ŋkɛ ŋkɛ. Kateshave ŋkɛ ba'a katedzeghe melɛ kwa tere tere ŋkɛ kezha ghəa ŋkɛ ba'a kezha mbeli pɛtɛ. Kwa sebe ta ŋkɛ, kateɓela gəsəkəa kelemte jaɗafa ŋkɛ kezha ghəa ŋkɛ ba'a kezha mbeli pɛtɛ. 25Katetere bela nyi nza merege te te wəshi keseɗa nyi dzeghekɛ geva melɛ le hɛ kezha kelemte jaɗafa te wənə ŋkɛ te reghwetɛ.

26Ma wəndə nya kekeleghe zhɛfa nya kadzemte te ɓerama kaŋa Azazɛl ne, katetsewe yɛ lekwesa ta ŋkɛ ŋkɛ ba'a katepɛ ŋkɛ nda tezhɛne geva ŋkɛ kadzembe ghedəkwə. 27Ma yɛ mca le zhɛfa nyi dzeghekɛ melɛ kekelemte jaɗafa mbeli le hɛ, nyi keleghe mimia nci mbeli kadzembe ŋkwa nya keveyi geva tekeleke kezha yaɓe ŋkwa ne, katefə hɛ mbeli shave mbe ghedəkwə ba'a katetere hweta ta nci, slia nci ba'a wəshi nyi kwa hwəa nci mbeli le ghwə. 28Ma wəndə nya kese katere hɛ ne, katetsewe yɛ lekwesa ta ŋkɛ ŋkɛ ba'a katepɛ ŋkɛ nda tezhɛne geva ŋkɛ kadzembe ghedəkwə.

29Wa nya wəsə mahalegə nya kaghala ghala nya kaŋa ŋayɛ: ma te kwa meŋe ta hɛ mbe tere kwa mberefaŋe ne, katemene səwəmayɛ yɛ ba'a kateɗema yɛ kamene slene, gheyɛ ka Israyɛl ba'a ka se se nyi hwa gheyɛ. 30Kwa nza ŋkɛ ne, vecia shɛ ya kaveci nya ɓelate gəsəkəa kelemte jaɗafa mbeli kənəa gheyɛ kezha nza yɛ wɛŋe. Ma tsagha gɛ, wɛŋe tenza yɛ va pɛtɛa jaɗafa ta ŋayɛ kwa kema ta Mahwətə. 31Katenza vecia shɛ kaveci kezhɛne mpi ba'a kavecia səwəmayɛ kaŋa ŋayɛ. Kawəsə mahalegə nya kaghala ghala tenza ŋkɛ.

32Ma wəndə nya keteɓela gəsəkəa kelemte jaɗafa ne, nde dzeghe Shala nya keveyi geva tekeleke laka n'yi ba'a nya keveyi geva kawəndə kwelea ka dzeghe Shala te ŋkwa yitenyɛ. Kateseɗe lekwesa pawa nyi keveyi geva tekeleke ŋkɛ. 33Katemene gəsəkəa yaɓe ŋkwa nya keveyi geva tekeleke, cɛ lekwesa kebegeme geva ba'a reghwetɛ ŋkɛ. Katemene gəsəkəa kelemte jaɗafa ŋkɛ kezha ka dzeghe Shala ba'a kezha pɛtɛa ka Israyɛl.

34Kawəsə mahalegə nya kaghala ghala tenza ŋkɛ kaŋa ŋayɛ. Kwetɛŋe zhigə mbe va ne, katemene geva gəsəkəa shɛ kezha kelemte geva jaɗafa ta pɛtɛa ka Israyɛl te wənə.»

Pɛtɛ Aron menete wəshi nyi gezeke Mahwətə laka Moyize.

Currently Selected:

Ka Lɛvi 16: BEKDC12

Highlight

Copy