Ka Lɛvi 14

Yaɓe ta nde derena wɛŋe

1Ma ke Mahwətə sha Moyize:

2«Wa nya tsetse temene geva gəsəkəa yaɓe ta nde derena wɛŋe: ma vəa ŋkwa keleke nda ŋkɛ mbeli ke nde dzeghe Shala ne, 3pa nde dzeghe Shala shave mbe ghedəkwə kezha neweve ŋkɛ. Ma nda nahe derena ta wəndəa shɛ kekiɗinyɛ ne, 4pa nde dzeghe Shala gezete kezha fəke 'yɛ nyi teghweme nyi wɛŋe bake, sheghwəa lekeleke, shintia təmə nyi kefi fi le yirə kwa gheme ba'a dzeve ta wəfe nya heka mbeli kaizope mbeli kezha wəndə nya teyaɓe mbeli wɛŋe. 5Pa ŋkɛ sleyite ghə yitea kwete hwa 'yɛa shɛhɛ kənəa kwenə yɛməa ɗasle kwa. 6Pa ŋkɛ fəte yɛ kwete 'yɛ nya teghweme le sheghwəa lekeleke, shintia təmə nyi kefi fi le yirə kwa gheme ba'a dzeve ta wəfe nya heka mbeli kaizope. Pa ŋkɛ selameyi hɛ hwa mimia 'yɛ nya sleyite ghə mbeli yite kənəa yɛməa ɗasle. 7Pa ŋkɛ yisəate mimia shɛ mberefaŋe zhigə te wəndə nya keyaɓe geva wɛŋe va derena. Kwa sebe ta ŋkɛ, pa ŋkɛ gezete kawəndə nya wɛŋe wəndəa shɛ ba'a pa pelakɛ 'yɛ nya teghweme kazlə kadzehwa gamba. 8Pa wəndəa shɛ tsewemte yɛ lekwesa ta ŋkɛ, ŋsəmte shinti nyi te geva ta ŋkɛ pɛtɛ ba'a pɛmte geva ta ŋkɛ kezha nza wɛŋe. Kwa sebe ta ŋkɛ, pa zhɛneghe geva kadzembe ghedəkwə, ama mba ŋkɛ kedzembe cɛ lekwesa ta ŋkɛ kashikwə zake. 9Ma te kwa mberefaŋe ta hɛ ne, pa ŋsəmte shintia ghəa ŋkɛ, ghwɛmɛa ŋkɛ, velɛa ŋkɛ ba'a shinti nyi te geva ta ŋkɛ pɛtɛ. Kwa sebe ta ŋkɛ ne, pa tsewemte yɛ lekwesa ta ŋkɛ ba'a pɛmte geva ta ŋkɛ. Ma tsagha gɛ, wɛŋe ŋkɛ.

10Ma te kwa deghese ta hɛ ne, pa wəndəa shɛ kekeseve gamea lɛmə nyi ɗema beze te bake, daɓa təmə nya gare va kwetɛŋe nya ɗema beze te, pa kelete wəsə gəməa hə nya kehwaɗe hwaɗe le n'yi kakiləwə mesli ba'a n'yi gasle mbe litrə. 11Pa nde dzeghe Shala nya keɓela gəsəkəa shɛ veyi yɛ wəndəa shɛ le wəshi gəməa ŋkɛ kwa kema ta Mahwətə, mɛa cɛ lekwesa kebegeme geva. 12Pa nde dzeghe Shala kelete kwa ghate ta game ba'a dzeghekɛ melɛ kedimə ghə le, tsagha le n'yi nya gasle nya mbe litrə. Pa ŋkɛ veyi hɛ kwa kema ta Mahwətə le ɓela gəsəkəa ve nda wəsə. 13Pa sleyite ghə yitea game te ŋkwa nya sla ghə mbeli te wəsə keseɗa kedzeghe melɛ keyaɓe jaɗafa keɗema melɛ kwa tere tere, geze ta ŋkɛ, te kwete ŋkwa mbe ŋkwa nya keveyi geva tekeleke. Kwa nza ŋkɛ, ma melɛ kedimə keɗema melɛ keyaɓe jaɗafa ne, wəsə nya keveyi geva tekeleke ŋkɛ, kaŋa nde dzeghe Shala nza ŋkɛ. 14Pa nde dzeghe Shala meneve mimia wəsə keseɗa shɛ ba'a menate nda te sleme kwa zeme ke wəndəa shɛ, tsagha te gweŋəa dzeve kwa zeme ta ŋkɛ ba'a gweŋəa seɗa kwa zeme ta ŋkɛ. 15Kwa sebe ta ŋkɛ, pa kelete n'yi ba'a gəyi ɓɛhwɛ te dzeve kwa gwela. 16Pa ŋkɛ hahwe kwacɛɗɛ ta dzeve kwa zeme ta ŋkɛ hwa n'yi nya te dzeve kwa gwela ta ŋkɛ. Pa ŋkɛ yisəte mberefaŋe zhigə kwa kema ta Mahwətə le wəzege ta dzeve. 17Kwa sebe ta ŋkɛ, pa meneyi n'yi nya ketene te dzeve ta ŋkɛ te sleme kwa zeme ta wəndəa shɛ, tsagha te gweŋəa dzeve kwa zeme ba'a gweŋəa seɗa kwa zeme, te ŋkwa nya meneyi mimia game ŋkɛ. 18Pa ŋkɛ shekeyi n'yi nya ketene te dzeve ta ŋkɛ kwa ghəa wəndəa shɛ ba'a ɓelate gəsəkəa yaɓe ŋkwa wɛŋe kənə kwa kema ta Mahwətə. 19Pa nde dzeghe Shala dzeghekɛ melɛ keyaɓe jaɗafa ba'a ɓelate gəsəkəa yaɓe ŋkwa wɛŋe kənəa wəndəa shɛ kezha yaɓemte nza ta ŋkɛ wale wale. Kwa sebe ta ŋkɛ, pa sleyite ghə yitea wəsə keseɗa kedzeghe melɛ kwa tere tere. 20Pa ŋkɛ teremte wəsə keseɗa shɛ pɛtɛ te reghwetɛ zlaɓe le wəsə gəməa hə. Kakwa keɗaŋe zhigə gɛ ne, pa ɓelate gəsəkəa yaɓe ŋkwa wɛŋe nya kezhɛre ŋkɛ wɛŋe.

Yaɓe ta nde derena nya kande titikwə wɛŋe

21Ma kenza wəndə kande titikwə nya ɗema wəshi nyi ve ne, pa keleke game kwetɛŋe kezha dzeghe melɛ kedimə ghə ba'a nya keteve nda geva ke Shala le ɓela gəsəkəa ve nda wəsə kezha yaɓemte geva wəndəa shɛ wɛŋe. Pa ŋkɛ keleke wəsə gəməa hə nya kehwaɗe hwaɗe le n'yi kakiləwə mahekene ba'a n'yi gasle mbe litrə zhɛkwa. 22Pa ŋkɛ fəke ghwəɗəŋkwə bake keɗema gheɗepe bake, kala berete ta ŋkɛ. Ma kwete kwetɛŋe ne, kezha melɛ keyaɓe jaɗafa, ma kwete, kezha melɛ kwa tere tere. 23Ma te kwa deghese ta hɛ ne, pa fəke nda wəshia shɛhɛ ke nde dzeghe Shala mɛa ŋkwa kedzembe cɛ lekwesa kebegeme geva, kwa kema ta Mahwətə kezha gəsəkəa yaɓe ŋkwa wɛŋe. 24Pa nde dzeghe Shala kelete yɛ game le n'yi ba'a veyi hɛ kwa kema ta Mahwətə le ɓela gəsəkəa ve nda wəsə. 25Pa ŋkɛ sleyite ghə yitea gamea shɛ, meneve mimia ŋkɛ ba'a menate te sleme kwa zeme ta wəndəa shɛ, tsagha te gweŋəa dzeve kwa zeme ta ŋkɛ ba'a ŋa seɗa kwa zeme ta ŋkɛ. 26Pa ŋkɛ gəyi n'yi te dzeve kwa gwela ta ŋkɛ. 27Pa ŋkɛ hahwe kwacɛɗɛ ta dzeve kwa zeme ta ŋkɛ hwa n'yi nya te dzeve kwa gwela ta ŋkɛ ba'a yisəte mberefaŋe zhigə kwa kema ta Mahwətə le wəzege ta dzeve. 28Kwa sebe ta ŋkɛ, pa ŋkɛ meneyi te sleme kwa zeme ta wəndəa shɛ, tsagha te gweŋəa dzeve kwa zeme ta ŋkɛ ba'a gweŋəa seɗa kwa zeme ta ŋkɛ, te ŋkwa nya menate mimia game ŋkɛ. 29Pa ŋkɛ shekeyi n'yi nya ketene te dzeve ta ŋkɛ kwa ghəa wəndəa shɛ ba'a ɓela gəsəkəa yaɓe ŋkwa wɛŋe kənə kwa kema ta Mahwətə. 30Kwa sebe ta ŋkɛ, pa nde dzeghe Shala kelete kwete hwa ghwəɗəŋkwə keɗema kwete hwa gheɗepe, kala berete ta wəndəa shɛ. 31Pa ŋkɛ dzeghekɛ melɛ keyaɓe jaɗafa le kwete hwa 'yɛa shɛhɛ. Kwa sebe ta ŋkɛ, pa dzeghekɛ melɛ kwa tere tere le kwete, zlaɓe le wəsə gəməa hə. Pa ŋkɛ ɓelate gəsəkəa yaɓe ŋkwa wɛŋe kənəa wəndəa shɛ kwa kema ta Mahwətə.»

32Nyi ya kaghena nyi kegezete geva te ghəa nde derena nya ɗema wəsə ve kala nya kehi kezha gəsəkəa yaɓe ŋkwa wɛŋe.

Dene nyi dzeyi ki yɛ ghɛ

33Ma ke Mahwətə sha yɛ Moyize le Aron:

34«Ma vəa ŋkwa nya tedzembe hɛɗia Kanan nya teve ŋayɛ 'ya kaŋa ŋayɛ yɛ, ma kencake dene 'ya ki ghɛ te hɛɗi mɛnɛfɛa ŋayɛ ne, 35katelə wəndə ke ghɛa shɛ sha nde dzeghe Shala. Ma ke sha tegeze nda: ‹Nahe 'ya kenakɛ kwete mama ta dene ki ghɛa ɗa.› 36Kategeze nde dzeghe Shala kezha fəmte wəshi mbeli shave mbe cɛa shɛ nda tedzembe ŋkɛ le ghəa ŋkɛ kezha neweve denea shɛ. Ma tsagha ne, katenza wəshi nyi mbe cɛa shɛ wale wale we. Kwa sebe ta ŋkɛ ne, katedzembe cɛa shɛ nde dzeghe Shala kezha neweve. 37Pa ŋkɛ neweve denea shɛ le megela: ma kenakɛ ŋkɛ kakwa nɛ nɛ keɗema kakwa gheme ŋkwa nyi dzeme vare cɛa shɛ, ma nda ki yamenate nde te dewe ne, 38kateshave nde dzeghe Shala mɛa mɛ cɛ ba'a kateŋzle cɛa shɛ ŋkɛ kashikwə zake. 39Ma te kwa mberefaŋe ta hɛ ne, katese nde dzeghe Shala kanewe zhɛkwa: ma kemtsehete bezle denea shɛ te dewe ta cɛa shɛ ne, 40kategeze nda ŋkɛ ke mbeli kezha fefelaŋemte pelɛ nyi nza nyi dene te hɛ ba'a kezha betemte hɛ hɛ pelɛke te wəmbəa meleme, te ŋkwa nya wale wale. 41Kategeze nda ŋkɛ ke mbeli kezha hele ŋkwa nyi mbe hwəa cɛa shɛ pɛtɛ ba'a kezha bete hɛɗia shɛ te ŋkwa nya wale wale, pelɛke te wəmbəa meleme. 42Ma kwa sebe ta ŋkɛ, katenta kweci pelɛ mbeli kezha pa te ŋkwa nyi keghate ba'a kateŋsle kwete mbeli mɛreɓɛ kezha hwehwe cɛa shɛ zhɛkwa.

43Ma kezhɛne dene kamenete geva mbe cɛa shɛ, kwa sebe ta nya fefelaŋemte pelɛ nyi nza dene te, nya helemte ŋkwa nya mbe ba'a hwehwekɛ mbeli ne, 44katese nde dzeghe Shala kanewe zhɛkwa: ma nda nahe denea shɛ kemtsehete bezle mbe cɛa shɛ ne, dene nya keɗema kaslə mbe cɛa shɛ ŋkɛ. Kacɛ nya wale wale nza cɛa shɛ. 45Katempə cɛa shɛ mbeli. Ma yɛ pelɛ, yɛ sheghwə ba'a mɛreɓɛ nyi kese mbe ne, katefə hɛ mbeli shave mbe meleme kadzete ŋkwa nya wale wale.

46Ma yayata wəndə nya kedzembe cɛa shɛ vəa ŋkwa nya nza nya nde teŋzle ne, katenza ŋkɛ wale wale pa va tɛhwɛɗi. 47Ma yayata wəndə nya kehɛ mbe cɛa shɛ keɗema kezehwe wəsə kezeme mbe ne, nda ŋkɛ katsewemte yɛ lekwesa ta ŋkɛ.

48Ama vəa ŋkwa nya zhɛneke geva nde dzeghe Shala ba'a nya neweve ŋkɛ, kaɗema denea shɛ kemtsehete bezle mbe cɛa shɛ kwa sebe ta nya hwehwekɛ cɛa shɛ mbeli zhɛkwa ne, pa gezete kaghɛ nya wɛŋe ghɛa shɛ, kwa nza ŋkɛ nahe denea shɛ kekiɗinyɛ.

49Ma kezha ɓela gəsəkəa yaɓe cɛa shɛ wɛŋe ne, pa nde dzeghe Shala fəte yɛ 'yɛ bake, sheghwə lekeleke, shintia təmə nya kefi fi le yirə kwa gheme ba'a dzeve ta wəfe nya heka mbeli kaizope. 50Pa ŋkɛ sleyite ghə yitea hwa 'yɛa shɛhɛ kənəa kwenə nya nza yɛməa ɗasle kwa. 51Pa ŋkɛ fəte sheghwəa lekeleke, dzeve ta wəfe nya heka mbeli kaizope, shintia təmə nya kefi fi le yirə kwa gheme ba'a kwete 'yɛ nya teghweme. Pa ŋkɛ selameyi hɛ hwa mimia 'yɛ nya sleyite ghə ŋkɛ yite ba'a hwa yɛməa ɗasle. Pa ŋkɛ yisəate mimia shɛ mberefaŋe zhigə te cɛa shɛ. 52Tsetse teyaɓemte nza wale wale nya te cɛ ŋkɛ, laka mimia 'yɛ, yɛməa ɗasle, 'yɛ nya teghweme, sheghwəa lekeleke, dzeve ta wəfe nya heka mbeli kaizope ba'a shintia təmə nyi kefi fi le yirə kwa gheme. 53Katepele 'yɛ nya teghweme ŋkɛ kazlənyɛ shave mbe meleme kadzehwa gamba. Kateɓela gəsəkəa yaɓe ŋkwa wɛŋe ŋkɛ te cɛ shɛ. Ma tsagha gɛ, wɛŋe tenza ŋkɛ.»

54Nyi ya kaghena nyi kegezete geva te ghəa mama ta derena, wəshi nyi kebete shinti mbe ghə, 55pə nya te lekwesa, dene nya mbe cɛ, 56zhi nyi keshave kwəzləvə kwəzləvə, lame lame ba'a kweci wəshi kemene geva zlayɛ zlayɛ. 57Ghena shɛhɛ ka pele nda hweŋkwa ke mbeli kave wəndə keɗema wəsə wɛŋe keɗema wale wale.

Nyi ya kaghena nyi kegezete geva te ghəa derena.

Currently Selected:

Ka Lɛvi 14: BEKDC12

Highlight

Copy