2 Makabɛ 9
9
Zereghwe nya wəba kakese Antiyokəs
(1 MA 6.1-17; 2 MA 1.11-17)
1Ma vəa ŋkwa shɛ ne, kwatesawa Antiyokəs pelɛ Pɛrse kaɗema zləvə te. 2Kwa nza ŋkɛ mbe meleme nya heka mbeli kaPɛrsɛpolis se ŋkɛ. Nahe ŋkɛ keveyi ghə le fə wəshi nyi mbe ghɛa Shala ba'a kele meleme. Ama pa mbeli nyi mbe zhɛnete nda ghə ba'a fəte wəshi kempa. Tagha gɛ, mpesle hwɛ yitea Antiyokəs va mbeli nyi mbe, tewətelɛwe ŋkɛ zhɛneke geva shewə va hawe. 3Ma kwa ntsehe ŋkɛ takwa yitea Ɛkbatane ne, pa fate wəsə nya kemenete nda geva ke Nikanor ba'a ke ka sewajɛa Timotɛ. 4Ma kwa bezenyɛ wənəa ŋkɛ kwele kwele ne, pa tarete wa hawe nya pəliave nda ka Pɛrse le keka ŋkɛ te ka Zhəwif. Pa ŋkɛ gezete nda ke nde zleɗe wəmata gədəwəa ŋkɛ kaɗema kaghereŋe hwa'a te ŋkwa nya tezhigə dzeghwa ta nci. Ma mbe kele ghəa ŋkɛ ne, ma ke: «Ma kentsehe 'ya mbe Zhɛrəzalɛm ne, kakwele ta ka Zhəwif tezhɛre ŋkɛ 'ya.»
Ama keɗepe ŋkɛ meha ghwə ta Shala nde wəmbə ŋkɛ we. 5Gezemtema ta ŋkɛ ke ghena ne, pa Jigelafete nya kenewe wəshi pɛtɛ, Shala ta Israyɛl vate zereghwe nya ɗema mbeli kanakɛ ba'a kaslerahwe. Nda wəsə kwa hwəa gədəwə nya ɗema ghwɛ yite nde sa nda yaka hwa heli ke meghe. 6Dayɛ yaka nyi te, kwa nza ŋkɛ, kewəba se ŋkɛ kasa nda yaka nyi dzawe dzawe ba'a nyi shɛma mbeli geze ke kweci mbeli. 7Ama kese ŋkɛ kantamte ghwə yitea kele ghəa ŋkɛ we. Va ŋkele ntsəa ŋkɛ ne, pa ncɛte ghwə ta hwepe wənəa ŋkɛ te ka Zhəwif ba'a gezete kezha mtsehe dzeghwa mbeli. Ama kala metɛ ta ntsə ne, ɓacɛ ŋkɛ teɗenyɛ sawa pelɛ wəmata gədəwəa ŋkɛ nya kehwɛ le berete. Teɗe nya ndiremi yateɗete ŋkɛ, vatse ɓeɓelenji yɛ dzeve le seɗa te.
8Kameŋelea wəndə veyi ghəa ŋkɛ ŋkɛ kaghate, nya kenza kaslekete gaŋkeɓe ta ndərə ba'a kadzeghete ɗaŋeɗa ta ghweme nyi bebiya bebiya te kiləwə. Ama tsetsenya ne, ɓelayɛ ŋkɛ te hɛɗi, te gezle zhɛne mbeli kakele ŋkɛ. Berete ta Shala nde ncɛte geva darahwe rahwe kwa kema ta mbeli pɛtɛ. 9Mba nde ndiremia mehelea shɛ teghweme, ama kwele kwele sa yaka ŋkɛ: kabete slia geva ta ŋkɛ nya nza menciɗi mpɛafe mbe. Nda wənəa ka sewajɛ yakafene nda zəŋwəa daɗə ta ŋkɛ. 10Ma vəashi ne, wərə ŋkɛ kakwaɗakɛ yɛ saseregwa zəzə ŋkɛ, ama tsetsenya ne, wəndə shɛ kaɗe kaha dzeve yite kezha kele ŋkɛ va zəŋwəa ŋkɛ nya ɗema mbeli shɛ nza ve we.
11Tagha ghate Antiyokəs kantamte ghwə ba'a kagweɗakwe yitea kele ghəa ŋkɛ nya kewəbamte wəba ba'a tagha tazenyɛ mehele ta ŋkɛ va ɗa ta Shala, nda mtsehe yamtsehe yaka shɛhɛ keveci keveci. 12Ma kwa shɛma ŋkɛ nza le ghəa ŋkɛ va zəŋwəa geva ta ŋkɛ ne, ma ke: «Nahe ŋkɛ kehi kezha hawe wəndə va Shala, kayipə ghəa ŋkɛ wəndə ŋelɛ nya ketemte le gheŋkɛ we.» 13Ntake nde ndiremia mehelea shɛ kasəkwə Shala, ndagwara kazhɛne ŋkɛ katezhɛ heli yite we. 14Ma ke Antiyokəs sha se kameɗe nda ke Shala: «Hwɛ yase 'ya kahwɛ kadzembe Zhɛrəzalɛm kezha za sebe te meleme nya keveyi geva tekelekea shɛ ba'a kezha zhɛre ŋkɛ kakwele. Ma tsetsenya ne, nahe 'ya kepelakɛ ŋkɛ waɗe. 15Nahe 'ya ketarete kabete nda ka mpə mpə ta ka Zhəwif ba'a ŋa ŋwalea nci ke wəshi keseɗa nyi hwa gamba ba'a ke yɛ zleŋa, kwa ɗema hɛ kehi kalamte hɛ mbeli sha 'ya. Ma tsetsenya gɛ ne, kaɗe 'ya kezha nza hweŋkwa va hɛ yipə yipə le ka Atɛne. 16Nahe 'ya kefəhwe wəshi nyi mbe ghɛa Shala. Ma tsetsenya ne, 'ya katepesa ŋkɛ le wəshi ganji nyi fəke mbeli ba'a 'ya katezhɛne wəshi nyi keveyi geva tekeleke nyi kefəmte geva nyi kwele kwele ma te ŋkwa nci. Ma kaŋa wəshi kedzeghe melɛ ne, 'ya le ghəa ɗa nde teŋki cɛdɛ te hɛ. 17Ɓiyitsa ne, 'ya tezhɛre ɗa kande Zhəwif ba'a katedzeghwa kemeleme kemeleme nya nza mbeli mbe kezha zlape berete ta Shala.»
Antiyokəs Ɛpifane karafe nda palepa ke ka Zhəwif
18Ma kwa ɗema yaka nyi te Antiyokəs kegweɗakwe, kwa nza ŋkɛ meha ghwə ta Shala ya ɗaŋe ɗaŋe kənə kala nya kehi ve, kwa ɗema zəzə kembele mba ve ne, ma ke ŋkɛ rafete nda palepa kempi dzeve ke ka Zhəwif:
19«Kamawe nda lɛŋelɛ ba'a zeɗe nza meghe Antiyokəs, nya kawəndə nya te ghəa ka sewajɛ ke mbelia jama ta ka Zhəwif.
20Ma nda lɛŋe lɛŋe yɛ le ŋwalea ŋayɛ ba'a mbe jive wəshia ŋayɛ mbe kema mbe kema kala nya mawe yɛ ne, katsa nda hana 'ya kwele kwele ke Shala, gheŋkɛ nya vate ghə 'ya te. 21Ma 'ya le ŋa ɗa ne, meɓelahe 'ya ba'a kedene dene 'ya ghalanza. Ama mbe zəzə ŋayɛ 'ya le ɗe laka hawe ba'a ganyɛ nya menete ɗa yɛ.
Ma kwa zhɛneke geva 'ya se mbe Pɛrse ne, hɛape zereghwe nya dzawe te 'ya. Vatse neweve 'ya megela ŋkɛ kezha kele zəzə te nza kwelɛŋe ta pɛtɛa mbelia ɗa. 22Kesla helia ɗa va nza ta ɗa we, ama nahe 'ya keveyi ghə le mbe ta ɗa va zereghwea shɛ. 23Ama nahe 'ya kezəzəte nta nya ntave wəndə nya ketedzete ŋkwa ŋkɛ yiteyɛ ɗa te və nya dzeme ŋkɛ kampa le hɛɗi nya pelɛghə. 24Gheŋkɛ ɗete kezha ɗema mehele ta mbelia ŋkɛ kataze kemenete geva wəsə nya neghema mbeli keɗema kefate geva ghena nyi ndiremi ndiremi. Ma tsagha gɛ, nahe yayata wəndə keɗepe ke wa ke wa ndeke nda nza te ghəa wəshia ŋkɛ meghe. 25Ɓiyitsa ne, nahe 'ya keɗepe neghe yaneghe və ganyɛ ka meghea kɛfia hɛɗi nyi dzeyi yitea hɛɗi meghea ɗa kezha temene ghəa nci laka wəsə nya ketemene ɗa geva. Vatse ntave wəzege ta ɗa Antiyokəs 'ya kezha nza ŋkɛ te ŋkwa ɗa. Nahe 'ya kencɛte ba'a kegezete nda ke wəba ta mbelia ŋayɛ vəa ŋkwa nya dzeme sla ta hɛɗi nyi pelɛghə 'ya. Nahe 'ya kerafete nda palepa nya ve nya 'ya yitea ŋa ŋayɛ.
26Kasəkwə 'ya ba'a ka'yɛwe 'ya va gheyɛ kezha zəzə yɛ te wəshi ganji nyi menete nda 'ya ke hwelefe ta ŋayɛ ba'a ke yayata wəndəa ŋayɛ. Nza mə pɛtɛa ŋayɛ le ganyɛa mehele laka 'ya ba'a wəzege ta ɗa. 27Nahe 'ya keɗepe tserame temene wəshi nyi zəzəte 'ya ŋkɛ, le ganyɛa mehele ba'a zhɛ heli tenza ŋkɛ laka gheyɛ, kateve sleme ŋkɛ megela yitea ghena ta ŋayɛ.»
28Tsetse kiɗimte geva nza ta nde mpə ŋkwa ba'a nde ŋele Shala mbe yaka nyi dzawe dzawe kala nyi sahwe nda ŋkɛ ke kweci mbeli. Mte nya ndiremi yamtete ŋkɛ hwa ghweme te hɛɗia kweci mbeli. 29Pa Filipe nya kamcɛnyɛ nya kakwa sla pela keleghe wəndə kemte mtea ŋkɛ kadzembe Antiyoshe. Ma kwa gezleŋe ghə ŋkɛ va wəzege ta Antiyokəs ne, cape ŋkɛ kadzawa Ɛzhipte kanzanyɛ sha meghe Ptolɛmɛ Filomɛtor.
Currently Selected:
2 Makabɛ 9: BEKDC12
Highlight
Share
Copy
Want to have your highlights saved across all your devices? Sign up or sign in
La Bible en langue Kapsiki avec les livres deutérocanoniques © Alliance Biblique du Cameroun 2012.
2 Makabɛ 9
9
Zereghwe nya wəba kakese Antiyokəs
(1 MA 6.1-17; 2 MA 1.11-17)
1Ma vəa ŋkwa shɛ ne, kwatesawa Antiyokəs pelɛ Pɛrse kaɗema zləvə te. 2Kwa nza ŋkɛ mbe meleme nya heka mbeli kaPɛrsɛpolis se ŋkɛ. Nahe ŋkɛ keveyi ghə le fə wəshi nyi mbe ghɛa Shala ba'a kele meleme. Ama pa mbeli nyi mbe zhɛnete nda ghə ba'a fəte wəshi kempa. Tagha gɛ, mpesle hwɛ yitea Antiyokəs va mbeli nyi mbe, tewətelɛwe ŋkɛ zhɛneke geva shewə va hawe. 3Ma kwa ntsehe ŋkɛ takwa yitea Ɛkbatane ne, pa fate wəsə nya kemenete nda geva ke Nikanor ba'a ke ka sewajɛa Timotɛ. 4Ma kwa bezenyɛ wənəa ŋkɛ kwele kwele ne, pa tarete wa hawe nya pəliave nda ka Pɛrse le keka ŋkɛ te ka Zhəwif. Pa ŋkɛ gezete nda ke nde zleɗe wəmata gədəwəa ŋkɛ kaɗema kaghereŋe hwa'a te ŋkwa nya tezhigə dzeghwa ta nci. Ma mbe kele ghəa ŋkɛ ne, ma ke: «Ma kentsehe 'ya mbe Zhɛrəzalɛm ne, kakwele ta ka Zhəwif tezhɛre ŋkɛ 'ya.»
Ama keɗepe ŋkɛ meha ghwə ta Shala nde wəmbə ŋkɛ we. 5Gezemtema ta ŋkɛ ke ghena ne, pa Jigelafete nya kenewe wəshi pɛtɛ, Shala ta Israyɛl vate zereghwe nya ɗema mbeli kanakɛ ba'a kaslerahwe. Nda wəsə kwa hwəa gədəwə nya ɗema ghwɛ yite nde sa nda yaka hwa heli ke meghe. 6Dayɛ yaka nyi te, kwa nza ŋkɛ, kewəba se ŋkɛ kasa nda yaka nyi dzawe dzawe ba'a nyi shɛma mbeli geze ke kweci mbeli. 7Ama kese ŋkɛ kantamte ghwə yitea kele ghəa ŋkɛ we. Va ŋkele ntsəa ŋkɛ ne, pa ncɛte ghwə ta hwepe wənəa ŋkɛ te ka Zhəwif ba'a gezete kezha mtsehe dzeghwa mbeli. Ama kala metɛ ta ntsə ne, ɓacɛ ŋkɛ teɗenyɛ sawa pelɛ wəmata gədəwəa ŋkɛ nya kehwɛ le berete. Teɗe nya ndiremi yateɗete ŋkɛ, vatse ɓeɓelenji yɛ dzeve le seɗa te.
8Kameŋelea wəndə veyi ghəa ŋkɛ ŋkɛ kaghate, nya kenza kaslekete gaŋkeɓe ta ndərə ba'a kadzeghete ɗaŋeɗa ta ghweme nyi bebiya bebiya te kiləwə. Ama tsetsenya ne, ɓelayɛ ŋkɛ te hɛɗi, te gezle zhɛne mbeli kakele ŋkɛ. Berete ta Shala nde ncɛte geva darahwe rahwe kwa kema ta mbeli pɛtɛ. 9Mba nde ndiremia mehelea shɛ teghweme, ama kwele kwele sa yaka ŋkɛ: kabete slia geva ta ŋkɛ nya nza menciɗi mpɛafe mbe. Nda wənəa ka sewajɛ yakafene nda zəŋwəa daɗə ta ŋkɛ. 10Ma vəashi ne, wərə ŋkɛ kakwaɗakɛ yɛ saseregwa zəzə ŋkɛ, ama tsetsenya ne, wəndə shɛ kaɗe kaha dzeve yite kezha kele ŋkɛ va zəŋwəa ŋkɛ nya ɗema mbeli shɛ nza ve we.
11Tagha ghate Antiyokəs kantamte ghwə ba'a kagweɗakwe yitea kele ghəa ŋkɛ nya kewəbamte wəba ba'a tagha tazenyɛ mehele ta ŋkɛ va ɗa ta Shala, nda mtsehe yamtsehe yaka shɛhɛ keveci keveci. 12Ma kwa shɛma ŋkɛ nza le ghəa ŋkɛ va zəŋwəa geva ta ŋkɛ ne, ma ke: «Nahe ŋkɛ kehi kezha hawe wəndə va Shala, kayipə ghəa ŋkɛ wəndə ŋelɛ nya ketemte le gheŋkɛ we.» 13Ntake nde ndiremia mehelea shɛ kasəkwə Shala, ndagwara kazhɛne ŋkɛ katezhɛ heli yite we. 14Ma ke Antiyokəs sha se kameɗe nda ke Shala: «Hwɛ yase 'ya kahwɛ kadzembe Zhɛrəzalɛm kezha za sebe te meleme nya keveyi geva tekelekea shɛ ba'a kezha zhɛre ŋkɛ kakwele. Ma tsetsenya ne, nahe 'ya kepelakɛ ŋkɛ waɗe. 15Nahe 'ya ketarete kabete nda ka mpə mpə ta ka Zhəwif ba'a ŋa ŋwalea nci ke wəshi keseɗa nyi hwa gamba ba'a ke yɛ zleŋa, kwa ɗema hɛ kehi kalamte hɛ mbeli sha 'ya. Ma tsetsenya gɛ ne, kaɗe 'ya kezha nza hweŋkwa va hɛ yipə yipə le ka Atɛne. 16Nahe 'ya kefəhwe wəshi nyi mbe ghɛa Shala. Ma tsetsenya ne, 'ya katepesa ŋkɛ le wəshi ganji nyi fəke mbeli ba'a 'ya katezhɛne wəshi nyi keveyi geva tekeleke nyi kefəmte geva nyi kwele kwele ma te ŋkwa nci. Ma kaŋa wəshi kedzeghe melɛ ne, 'ya le ghəa ɗa nde teŋki cɛdɛ te hɛ. 17Ɓiyitsa ne, 'ya tezhɛre ɗa kande Zhəwif ba'a katedzeghwa kemeleme kemeleme nya nza mbeli mbe kezha zlape berete ta Shala.»
Antiyokəs Ɛpifane karafe nda palepa ke ka Zhəwif
18Ma kwa ɗema yaka nyi te Antiyokəs kegweɗakwe, kwa nza ŋkɛ meha ghwə ta Shala ya ɗaŋe ɗaŋe kənə kala nya kehi ve, kwa ɗema zəzə kembele mba ve ne, ma ke ŋkɛ rafete nda palepa kempi dzeve ke ka Zhəwif:
19«Kamawe nda lɛŋelɛ ba'a zeɗe nza meghe Antiyokəs, nya kawəndə nya te ghəa ka sewajɛ ke mbelia jama ta ka Zhəwif.
20Ma nda lɛŋe lɛŋe yɛ le ŋwalea ŋayɛ ba'a mbe jive wəshia ŋayɛ mbe kema mbe kema kala nya mawe yɛ ne, katsa nda hana 'ya kwele kwele ke Shala, gheŋkɛ nya vate ghə 'ya te. 21Ma 'ya le ŋa ɗa ne, meɓelahe 'ya ba'a kedene dene 'ya ghalanza. Ama mbe zəzə ŋayɛ 'ya le ɗe laka hawe ba'a ganyɛ nya menete ɗa yɛ.
Ma kwa zhɛneke geva 'ya se mbe Pɛrse ne, hɛape zereghwe nya dzawe te 'ya. Vatse neweve 'ya megela ŋkɛ kezha kele zəzə te nza kwelɛŋe ta pɛtɛa mbelia ɗa. 22Kesla helia ɗa va nza ta ɗa we, ama nahe 'ya keveyi ghə le mbe ta ɗa va zereghwea shɛ. 23Ama nahe 'ya kezəzəte nta nya ntave wəndə nya ketedzete ŋkwa ŋkɛ yiteyɛ ɗa te və nya dzeme ŋkɛ kampa le hɛɗi nya pelɛghə. 24Gheŋkɛ ɗete kezha ɗema mehele ta mbelia ŋkɛ kataze kemenete geva wəsə nya neghema mbeli keɗema kefate geva ghena nyi ndiremi ndiremi. Ma tsagha gɛ, nahe yayata wəndə keɗepe ke wa ke wa ndeke nda nza te ghəa wəshia ŋkɛ meghe. 25Ɓiyitsa ne, nahe 'ya keɗepe neghe yaneghe və ganyɛ ka meghea kɛfia hɛɗi nyi dzeyi yitea hɛɗi meghea ɗa kezha temene ghəa nci laka wəsə nya ketemene ɗa geva. Vatse ntave wəzege ta ɗa Antiyokəs 'ya kezha nza ŋkɛ te ŋkwa ɗa. Nahe 'ya kencɛte ba'a kegezete nda ke wəba ta mbelia ŋayɛ vəa ŋkwa nya dzeme sla ta hɛɗi nyi pelɛghə 'ya. Nahe 'ya kerafete nda palepa nya ve nya 'ya yitea ŋa ŋayɛ.
26Kasəkwə 'ya ba'a ka'yɛwe 'ya va gheyɛ kezha zəzə yɛ te wəshi ganji nyi menete nda 'ya ke hwelefe ta ŋayɛ ba'a ke yayata wəndəa ŋayɛ. Nza mə pɛtɛa ŋayɛ le ganyɛa mehele laka 'ya ba'a wəzege ta ɗa. 27Nahe 'ya keɗepe tserame temene wəshi nyi zəzəte 'ya ŋkɛ, le ganyɛa mehele ba'a zhɛ heli tenza ŋkɛ laka gheyɛ, kateve sleme ŋkɛ megela yitea ghena ta ŋayɛ.»
28Tsetse kiɗimte geva nza ta nde mpə ŋkwa ba'a nde ŋele Shala mbe yaka nyi dzawe dzawe kala nyi sahwe nda ŋkɛ ke kweci mbeli. Mte nya ndiremi yamtete ŋkɛ hwa ghweme te hɛɗia kweci mbeli. 29Pa Filipe nya kamcɛnyɛ nya kakwa sla pela keleghe wəndə kemte mtea ŋkɛ kadzembe Antiyoshe. Ma kwa gezleŋe ghə ŋkɛ va wəzege ta Antiyokəs ne, cape ŋkɛ kadzawa Ɛzhipte kanzanyɛ sha meghe Ptolɛmɛ Filomɛtor.
Currently Selected:
:
Highlight
Share
Copy
Want to have your highlights saved across all your devices? Sign up or sign in
La Bible en langue Kapsiki avec les livres deutérocanoniques © Alliance Biblique du Cameroun 2012.