2 Makabɛ 8
8
Zhɛne ghə ta Zhəwdas Makabɛ
1Pa yɛ Zhəwdas Makabɛ le mbelia ŋkɛ dzeghwamte dzeghwa ke meleme ke meleme kaɗema mbeli keɗepe. Pa hɛ hekakɛ ka menəhɛ nci nyi kaka Zhəwif kezha zele hɛ hɛ. Pa hɛ tsenete zhili 6.000 nyi kenzanji dɛŋe dɛŋe te wəshi keshia ka Zhəwif kadzevare hɛ. 2Ma hɛ ke səkwəte Shala: «Nde kakemane mbelia ŋa nyi sa nda yaka mbeli pɛtɛ ke hɛ, zhɛ heli yitea ghɛa ŋa nya zhɛrete ka ndiremia mehele wale wale, 3zhɛ heli yitea meleme nya bezemte nya mbeli ba'a nya ŋzlamte nya mbeli pa mɛa hɛɗia, fa ŋwələa mimi nya ketsa lewela kadzeme sha gha, 4zəzəte mpə ta ŋwale nyi ɗema nyi fete va hɛ ba'a zaghəma ŋele nyi ŋelekɛ ŋa hɛ le hɛ na ma, neghaghe hwepe wənəa ŋa kənəa hɛ.»
5Nahe Zhəwdas kenza te ghəa wəvəsəa mbeli, kapesle kweci hwelefefi yite we, kwa nza ŋkɛ nahe hwepe wənəa Shala kezhɛrenyɛ kazhɛ heli. 6Ntake Zhəwdas kaha nda mpa vəkə ke meleme nyi jama jama ba'a ke nyi ɓɛhwɛ ɓɛhwɛ, pa ndəmte hɛ. Pa ŋkɛ fəhwe ŋkwa ganji ba'a ŋkamte ka ghema kwele kwele. 7Ma kezha mpa shɛhɛ ne, viɗi yaɗehwe ŋkɛ za ma. Ma dzeyi te yayata ŋkwa ne, zləvəa nde dzemte.
Zhəwdas kahərə Nikanor
(1 MA 3.38–4.27)
8Ma kwa nakɛ Filipe dzemte yadzemte zləvəa wəndəa shɛ ba'a hərə yahərə ŋkwa ŋkɛ kevə kevə ne, pa rafete nda palepa ke Ptolɛmɛ, ŋgwamna ta Siri nya wəba ba'a ŋa Fɛnisi, kezha se kakemane meghe mbe slene ta ŋkɛ. 9Taghanyɛ ne, pa Ptolɛmɛ ntave Nikanor, wəzege ta Patrokle, kwete hwa ka mcɛhɛnyɛa meghe ba'a ghweneghe ŋkɛ te ghəa ka sewajɛ 20.000 ɓɛhwɛ ta ŋkɛ nyi kese mbe pɛtɛa hwelefefi, kezha za sebe ŋkɛ te pɛtɛa hwelefe ta ka Zhəwif. Pa ŋkɛ geze nda ke Gorzhiyas, wəndə nya keɗepemte velɛa mpa kanza kasləwəfə nya yite.
10Ndagwara nahe Nikanor kezəzəte kaŋki dewa ta ka Rome nya hwa meghe Antiyokəs kamze kwa tɛawetɛa kakiləwə 54.000 laka pamte ka Zhəwif nyi keseke mbeli kaka mavashi. 11Pa ŋkɛ ghweneghe nda mɛ kahe kahe ke meleme nyi dzeyi mɛa ndərəa Mɛditɛranɛ kezha se kapa ka Zhəwif nyi kaka mavashi. Pa ŋkɛ meɗeyi nda fə nda mbeli meslimsə te kiləwəa mze kwa tɛawetɛa bakemsə mberefaŋeghəmbe ke hɛ. Kese ŋkɛ kave ghə te ɗa nya teve Nde berete kadzete we. 12Pa Zhəwdas fate kwa hweŋkwa Nikanor kase. Pa ŋkɛ gezete nda ke mbelia ŋkɛ takwa takwa ka sewajɛa ka ghema kase. 13Kweracɛ ka ghazlənəa kɛfi ba'a mbeli nyi kevatema ghə te nza tiɗiɗia Shala hwɛnji ba'a lənji te kweci ŋkwa. 14Pa mbeli nyi ketene pamte pɛtɛa wəshi nyi va hɛ ba'a ntake hɛ kasəkwə Shala kezha mbele mbeli nyi pamte Nikanor, wəndə nya ntɛaŋentɛa ghə nda tegha geva mpa. 15Ma ke hɛ sha Shala: «Ma keɗema mbele n'yɛ na laka zhɛ helia ŋa ne, zəzəte jikə geva nya menete na le ka shihɛ n'yɛ. Zəzəte nahe sləa ŋa nya nza zləvə kwele kwele te kehekate geva te ghen'yɛ.»
16Pa Zhəwdas Makabɛ tsenete mbelia ŋkɛ, kambeli 6.000. Ma ke sha hɛ: «Ghazlənəma yɛ va ka ghema ba'a dakema yɛ va wəvəsəa kweci hwelefefi nyi keha ŋayɛ mpa nyi gəmə ma. Mpa le hwepe ghə gɛ! 17Zəzə mə keveci keveci te wəshi nyi ndiremi ndiremi nyi menete nyi mbelia shɛhɛ mbe ghɛa Shala. Nahe hɛ kepəliave nda hawe ke Zhɛrəzalɛm, zhɛne ne, nahe hɛ kezamte sebe te wəshi keshia ka Zhəwif.» 18Ma ke mtsehete: «Te wəshi kempa ta nci ba'a te hwepe ghə ta nci vate ghə mbelia shɛhɛ. Ama gheɓəmə le ŋa ɓəmə ne, te Shala nde berete vate ghə gheɓəmə. Kala metɛ ta ntsə ne, wərə ŋkɛ kazamte sebe te mbeli nyi kese nyi kaha ɓəmə mpa, ya mbeli nyi te hɛɗi lema pɛtɛ.» 19Pa Zhəwdas ɓelate nda ya nya yakɛ ka shihɛ nci Shala ke hɛ: ma te vəa Sɛnakɛrib ne, nahe Shala kempəmte ka ghema 185.000. 20Zəzəte mə mpa nya kehave nda geva ke ka Galate mbe Babiloni. Ma te vecia shɛ ne, nahe ka Zhəwif 8.000 nyi kemanakɛ ka Masɛdowane 4.000 kehərəte mbeli 120.000. Ɗa nde se te ka Masɛdowane, ama nahe ka Zhəwif nyi 8.000 kezamte sebe te ka ghema ta nci ba'a kefəhwe wəshi kwele kwele laka kemane ta Shala.
21Le ghena shɛhɛ ntsəte nda berete Zhəwdas ke ka sewajɛa ŋkɛ ba'a hite hɛ ŋkɛ kezha yɛ mpə hɛ te wəsə mahalegəa Shala ba'a kezha hɛɗia nci. Pa ŋkɛ neheve ka sewajɛa ŋkɛ kawəvəsə wəfaɗe. 22Ka sewajɛ 1.500 ya mbe yayata wəvəsə. Pa ŋkɛ veveyi yɛ Simon, Zhozɛf le Zhonatan nyi kaka kesaka meghekɛ te ghəa wəvəsəa shɛhɛ. Te ghəa kwete wəvəsə ŋkɛ le ghəa ŋkɛ perə. 23Ɓiyitsa ne, pa gezete nda ke Ɛlazar kezha jaŋgate kwete ŋkwa nya mbe palepa nya keveyi geva tekeleke ŋkɛ. Kwa sebe ta nya gezete ŋkɛ «Laka kemane ta Shala», ke ne, ntəŋə ŋkɛ te kema ta kwa ghate ta wəvəsə kezha ha nda mpa ke Nikanor.
24Ma kwa nza Shala nde berete le hɛ ne, pa hɛ mpəmte ka ghema kwele ma ke 9.000, pa hɛ ɗeɗakɛ wəba ta ka sewajɛa Nikanor le zhi ba'a tsetsaslemte kweci bela ta geva ta nci. Pa hɛ kekate hɛ pɛtɛ. 25Kəliɓə hɛ fəhwe mze kwa tɛawetɛa ta mbeli nyi kese kapa hɛ kaka mavashi. Ma kwa kekaghe mbeli nyi kehwɛ hɛ cakeɗake ne, tewətelɛwe hɛ zhɛnete geva te sebe kwa ɗema və mba va hɛ. 26Va nya nza ŋkɛ ne, kategha geva veci kezhɛne mpi yipə yipə le pəkwə ta veci, vatse ɗema hɛ kekekaghe hɛ cakeɗa mbarave. 27Ma kwa fəhwe wəshi kempa ta ka jaga ba'a kweci wəshia nci hɛ ne, ntake hɛ kamene veci kezhɛne mpi. Pa hɛ tsahekɛ Shala ba'a tsate nda hana kwa ndeke nda veci nya zhɛne ŋkɛ kancɛte nda ganyɛa ŋkɛ ke hɛ. 28Ma kwa sebe ta veci kezhɛne mpi ne, pa hɛ nehemte nda kwete bela ta wəshi nyi fəke hɛ hwa mpa ke mbeli nyi kesa yaka, ke ka wedidi ba'a ke ka mezhɛtiti. Pa hɛ nehehwe bela nya ketene kwelɛ ghəa nci ba'a ŋwalea nci. 29Ma kwa kiɗimte hɛ ne, pa hɛ səkwəte ghə kanya kwetɛŋe, pa hɛ səkwəte Shala nya ganyɛa mehele kezha zhɛne ŋkɛ kave kwelɛŋe fəyitekeghə kwelɛ gheŋkɛ le ka mene slene ta ŋkɛ.
Zhəwdas kahərə Timotɛ
30Ma kwa mpa hɛ le ka sewajɛa Timotɛ ba'a ŋa Bashidɛs ne, pa hɛ mpəmte ka sewajɛa ka jaga kwele ma ke 20.000 ba'a kelehwe ŋkwa nyi berete berete nyi bebiya bebiya. Pa hɛ neheve wəshi nyi fəke hɛ kwele kwele hwa mpa bake mbe yipə yipə, kaŋa nci kwete, kaŋa mbeli nyi kesa yaka kwete, ka mezhɛtiti, ka wedidi, zlaɓe le meha mehɛɗi. 31Pa hɛ tsenete wəshi kempa ta ka jaga le mehele, tereke hɛ beteyi hɛ te ŋkwa nyi kehite geva. Ma nyi ketene wəshi nyi fəke hɛ ne, kəliɓə hɛ te hɛ kadzembe Zhɛrəzalɛm. 32Mbəhə hɛ peslekɛ wəndə nya te ghəa ka sewajɛ nyi kejikəte geva le Timotɛ, nde 'yaghwa mehele nya kesahwe nda yaka kwele kwele ke ka Zhəwif. 33Ma vəa ŋkwa nya mene gəsəkəa hərə ŋkwa hɛ mbe Zhɛrəzalɛm ne, pa hɛ teremte mbeli nyi kendəyite ghwə yitea gelembe nyi mɛa ghɛa Shala nyi kewəfərənji zlaɓe le Kalistɛne mbe cɛ nya ɓɛhwɛ. Tsetse kemave zhɛme ŋkɛ te wəshi nyi wale wale nyi menete ŋkɛ.
Nikanor kahwɛ kadzembe Antiyoshe
34Ma Nikanor, nde ndiremia mehele nya kehake ka zhɛre dzeve slibə kezha pa ka Zhəwif ne, 35nahe zləvə kekelemte geva te gheŋkɛ te zlaɓa ta kemane ta Shala, laka mbeli nyi ɗema ŋkɛ keɓela hɛ kwa ntsə ta ŋkɛ. Seɗeŋwe ŋkɛ seɗemte lekwesa ganyɛa ŋkɛ, tereŋe ŋkɛ tehwɛ kwetɛŋenyɛ jive mbe gamba kala mava nya kembelenyɛ. Hwa'a ŋkɛ mbe Antiyoshe kala wəndə nya nza Shala yite, ndagwara mɛke sebe te ka sewajɛa ŋkɛ. 36Nahe ŋkɛ kemeɗeyi ŋki nda dewa nya hwa meghe ke ka Rome laka pamte ka Zhɛrəzalɛm kaka mavashi. Ama tsetsenya gɛ ne, nahe ŋkɛ keɗepete kaɗema ka Zhəwif kahərəte geva, kwa nza ŋkɛ ne, Shala nya keya hɛ ya shɛ, va nya hawe hɛ va wəshi mahalegə nya ndeke nda ŋkɛ ke hɛ.
Currently Selected:
2 Makabɛ 8: BEKDC12
Highlight
Share
Copy
Want to have your highlights saved across all your devices? Sign up or sign in
La Bible en langue Kapsiki avec les livres deutérocanoniques © Alliance Biblique du Cameroun 2012.