2 Makabɛ 2
2
Zhɛrɛmi kawəfərə wəshi kemene slene mbe ghɛa Shala
1Ma mbe palepa nyi vəashi ne, nahe mbeli kesləyi tsema tsema gezete nda nde mɛ ŋkwa Zhɛrɛmi ke mbeli nyi kefəhwe geva kezha kele ghwə te reghwetɛ, kala nya kegezete nya mbeli. 2Ɓiyitsa ne, nahe nde mɛ ŋkwa kendeke nda palepa ta wəsə mahalegə ke hɛ, ma ke sha hɛ: Zaghəma ghena nyi gezete Shala yɛ ma, ghwetema ghəa ŋayɛ yɛ kenakɛ yɛ shala mze kwa tere tere keɗema nyi le mze kwa tɛawetɛa ba'a wəshi kepesa geva nyi dzeyi te hɛ yɛ ma. 3Pa ŋkɛ gezete nda kweci ghena nyi kala nyighɛ ke hɛ kezha ɗema hɛ kakelemte wəsə mahalegəa Shala same kwa wənəa nci. 4Ma mbe kwete palepa shɛ ne, nahe ŋkɛ kegezete geva tsema tsema fəhwe cɛ lekwesa ba'a səndəkwəa jikə geva nde mɛ ŋkwa kwa shave mbe ghɛa Shala kezha slə le hɛ kwa gezete nda Shala. Kwa sebe ta ŋkɛ, ntəŋə ŋkɛ kadzeme ghweme nya se Moyize kamare hɛɗi nya meɗeyi nda Shala ke mbelia ŋkɛ pelɛ. 5Dzemema ta Zhɛrɛmi ke ghwemea shɛ ne, pa sləyi zlera nya wəba. Pa ŋkɛ beteyi cɛ lekwesa, səndəkwə ba'a reghwetɛ ketere 'wərdə kwa. Kwa sebe ta ŋkɛ, pa ŋzlete ŋkwa kedzawa zlera shɛ. 6Pa kweci mbeli nyi yite ɗe kazhɛne geva dzeyi te sebe kezha ve wəshi kencɛ wəsə kwa hweŋkwa shɛ, ama kezhɛne hɛ kaɗepete ŋkɛ we. 7Ma kwa fate Zhɛrɛmi ne, pa ŋelete hɛ, ma ke sha hɛ: «Kateɗepete ŋkwa nya mbeli pa te və nya tezhɛ heli Shala yitea mbelia ŋkɛ ba'a nya tezhɛne ŋkɛ katsene hɛ we. 8Tagha gɛ, katezhɛne Shala kancɛ wəshia shɛhɛ. Katencɛ zləvəa ŋkɛ Shala le ləmbə kala nya ncɛte ŋkɛ te vəa Moyize ba'a vəa ŋkwa səkwəte ghə Salomon kezha ve geva ghɛa Shala tekeleke le zləvə.»
9Nahe mbeli kegezete perə tsema tsema dzeghekɛ melɛ kekeɗaŋe ba'a keghwene ghɛa Shala Salomon nya kentsehwele ntsehwele. 10Kala nya səkwəte Shala Moyize nda sawa ghwə pelɛ ghweme katere wəsə keseɗa ne, tsagha səkwəte Shala Salomon nda sawa ghwə katere yɛ melɛ kwa tere tere. 11Ma ke Moyize gezete: «Ma nda teremte wəsə keseɗa nya dzeghekɛ melɛ mbeli le kezha jaɗafa ghwə ne, va nya ɗema mbeli kese kazeme ŋkɛ.» 12Kala nya mene mbeli te kweci veci ne, pa Salomon menete gəsəkə kahɛ deghese.
Zhəwdas Makabɛ katsene palepa nyi vəashi
13Nahe wəshia shɛhɛ keɓelate geva mbe palepa shɛhɛ ba'a mbe palepa nya kegeze ghena te Nɛhɛmi. Ma mbe palepa shɛhɛ ne, kajaŋga mbeli tsema tsema menete cɛ kebete palepa Nɛhɛmi. Palepa nyi kegeze ghena te ka meghea kɛfi ba'a te ka mɛ ŋkwa, yɛ palepa ta David ba'a palepa nyi rafete ka meghea kɛfi te ghəa wəshi nyi fə mbeli kase yatsename ŋkɛ mbe. 14Tsagha shɛnyɛ tsenete pɛtɛa palepa nyi ketaze taze va mpa nya have n'yɛ mbeli Zhəwdas. Nahe palepa shɛhɛ kenza mbe dzeve ta n'yɛ. 15Ma keɗe kweci yɛ hwa hɛ ne, ghwene n'yɛ mə mbeli kase kafə ŋayɛ hɛ.
Heka ŋkwa kezha mene gəsəkəa yaɓe ghɛa Shala
16Takwa takwa n'yɛ katemene gəsəkəa yaɓe ghɛa Shala. Ghen'yɛ karafe ŋayɛ palepa kezha mene gəsəkəa shɛ yɛ perə. 17Nahe Shala kembelete pɛtɛa mbelia ŋkɛ. Nahe ŋkɛ kendeke nda hɛɗi, meghe, slene ta ka dzeghe Shala ba'a slene nyi keveyi geva tekeleke mbe ghɛa ŋkɛ ke hɛ pɛtɛ, 18kala nya meɗeyi ŋkɛ mbe wəsə mahalegəa ŋkɛ. Vatse vate ghə n'yɛ te Shala nya takwa takwa kazhɛ heli yitea ghen'yɛ. Katetsene hwelefe ta n'yɛ nya ketazeyi geva te hɛɗi lema ŋkɛ mbe ghɛa ŋkɛ nya keveyi geva tekeleke. Kwa nza ŋkɛ ne, gheŋkɛ nde mbelemte n'yɛ shave mbe ndiremi nyi jama jama ba'a gheŋkɛ nde yaɓemte ghɛa ŋkɛ.
Ghena ta wəndə nya kerafete palepa nya
19Kwele kwele wəshi nyi kemenete geva te vəa yɛ Zhəwdas Makabɛ le ka kesaka meghekɛ. Nahe hɛ keyaɓemte ghɛa Shala nya wəba wɛŋe ba'a kezhɛne kaveyi reghwetɛ tekeleke. 20Nahe hɛ kese kampa le Antiyokəs Ɛpifane ba'a wəzege ta ŋkɛ Epator. 21Nahe berete nyi pelɛ ghweme kekemanakɛ ka katsala kɛfi nyi kehwepete ghə yitea mpa kezha yɛ ta ka Zhəwif. Vatse kelehwe pɛtɛa hɛɗi hɛ ba'a ŋkamte ka sewajɛa ka ghema hɛ seyi te, ya ghenci ɗema kwele kwele. 22Pa hɛ zhɛne kakelehwe ghɛa Shala nya nza zləvə te gheŋkɛ te hɛɗi lema, pa hɛ mbelemte Zhɛrəzalɛm ba'a zhɛneyi wəshi mahalegə nyi takwa takwa kazamte geva te ŋkwa ŋkɛ. Ma pɛtɛa wəshi nyi ne, te zlaɓa ta Shala ba'a te zhɛ helia ŋkɛ menete geva hɛ. 23Pa nde rafe wəshi Zhazon nya kande Sirɛne rafete wəshia shɛhɛ kapalepa mcɛfe. 'Ya katedzare rafe wəshi nyi mbe hɛ kapalepa kwetɛŋe. 24Ma mbe ghena nya keɓelate geva shɛ ne, kwele kwele lamba ba'a wəshi nyi kemenete geva. Vatse nza fa ta ghena nyi mbe dzawe sha mbeli nyi keɗe kajaŋga palepa shɛ. 25Wəsə nya zeɗehwe nda ke hɛ yaɗehwe 'ya karafe nda ke mbeli kezlama yitea jaŋga nya dekwede. Wəsə nya dekwede kave yitea ghə yaɗehwe 'ya va mbeli nyi keɗe kave zəzə te. Wəsə nya kenza kakemanakɛ hɛ yaɗehwe 'ya karafe nda ke mbeli nyi ketejaŋga palepa shɛ.
26Kaŋa ɗa ne, slene nya wəba yandeke ɗa tsene ghena nyi mbe palepa shɛ, kwele kwele take ɗa hwələ ŋkɛ ba'a fɛake ɗa ŋkɛ kehɛ. 27Zeme nda wəshi kezeme behe behe ke mbeli nyi hekake ŋkɛ yazele wəndə nya keta veghe, ama slene nya dekwede ŋkɛ we. Kala ŋa ŋkɛ nya se slene ta ɗa. Ɗeke ɗeke 'ya kezha mene slene yaka shɛ kezha nza nde zeɗehwe nda ke wəba ta mbeli. 28Nahe 'ya kesərəakɛ nda ke nde rafe wəshi kezha zele zeweve ta yayata wəsə nya kemenete geva. Ma 'ya ne, deke rafe wəshi nyi jama jama nyi kemenete geva mbe yandeke nda ghə 'ya. 29Ma kenza mbeli kaŋa cɛ mɛnɛfɛ ne, nde ŋa ŋkwa yanza ŋa ta cɛa shɛ te dzeve ve. Ama wəndə nya nza fi ŋkɛ ba'a pesa ŋkɛ te dzeve ve ne, deke zele wəshi nyi kehi kezha pesa ŋkɛ ŋa ŋkɛ slene. Tsagha slene ta ɗa sha 'ya. 30Ma wəndə nya kezele hweŋkwa ta wəsə nya kemenete geva ne, nda ŋkɛ kafave zeweve ta wəsəa shɛ megela, kaɗepe zhɛne 'yɛwe nyi ketenza te ba'a kandeke nda ghə ke yayata wəsə nya kemenete geva. 31Ma wəndə nya keɗe katsene wəshi nyi kemenete geva shɛhɛ, nya kerafe wəsə kezha tejaŋga mbeli kwele kwele ne, ntamte ghwə ŋkɛ yitea rafe wəshi pɛtɛ. 32'Ya kategha karafe ghena shɛ, kaɗema kambake kwete wəsə vare nya kegezete geva. Kwa nza ŋkɛ ma rafe ghəa ghena biya ma ke ghena le ghəa ŋkɛ ne, dewə zəzə ŋkɛ.
Currently Selected:
2 Makabɛ 2: BEKDC12
Highlight
Share
Copy
Want to have your highlights saved across all your devices? Sign up or sign in
La Bible en langue Kapsiki avec les livres deutérocanoniques © Alliance Biblique du Cameroun 2012.