2 Makabɛ 15
15
Nikanor kaɗema hawe va veci kezhɛne mpi
1Ma kwa fate Nikanor ne, te hɛɗia Samari yɛ Zhəwdas le mbelia ŋkɛ ne, pa tarete kezha ha nda mpa ke hɛ te veci kezhɛne mpi kaɗema kese kazəzə ndiremi nya mbe. 2Ma ke ka Zhəwif nyi ŋkate ŋkɛ kazele ŋkɛ shɛ: «Mpəma hɛ na kala nde 'yaghwa mehele ba'a nde dewə mehele ma, ama hawe va veci nya vate geva zləvə te ba'a nya keveyi geva tekeleke ma laka wəndə nya kenewe ghweme te wəshi pɛtɛ.» 3Ama ma ke nde ndiremia mehele nya kashasha shɛ 'yɛwete: «Nde sleke ŋkwa nya kegezete nda ke mbeli kahawe va veci kezhɛne mpi ya shɛ pelɛ ghweme na?» 4Ma ke ka Zhəwif zhɛnete nda: «E'e, nahe Shala nya teghweme le ghəa ŋkɛ, nya kesleke ghweme kegezete kezha hawe mbeli va veci kezhɛne mpi.» 5Ma ke Nikanor zhɛnete: «'Ya perə ne, nde sleke ŋkwa 'ya te hɛɗi, kageze ŋayɛ 'ya kezha fə wəshi kempa kezha mene slene nya zəzəte meghe.» Ndagwara kekemave hweŋkwa ketserame zəzə kwa ndiremia ŋkɛ ŋkɛ we.
Zhəwdas kantsə nda berete ke mbelia ŋkɛ
6Ma kwa nza kele ghəa hwa Nikanor ne, pa ŋkɛ tarete kapa ŋkwa kawəsə kencɛ hərə ŋkwa ta ŋkɛ le wəshi kempa ta yɛ Zhəwdas le mbelia ŋkɛ. 7Ama pa Zhəwdas Makabɛ vate ghə nya keɗema kazhɛremte geva ba'a veyi zəzə te kemave kemane ta Shala. 8Vatse ntsəte nda berete ŋkɛ ke mbelia ŋkɛ kezha ɗema hɛ kagezleŋe ghə va mpa nya ha nda kweci hwelefefi ke hɛ. Megela ŋkɛ kezha nza mehele ta nci te kemane nyi kese kasawa pelɛ ghweme kezha hɛ vəashi ba'a kezha neghe hərə ŋkwa nya teve nda Nde berete#15.8 Nde berete: Ma Nde berete teke ne, gheŋkɛ Shala. ke hɛ tsetsenya ɓiyitsa. 9Ma kwa ntsəte nda berete ŋkɛ ke hɛ laka ghena nyi mbe wəsə mahalegə ba'a nyi gezete ka mɛ ŋkwa ne, nahe ŋkɛ kendeke nda hwepe ghə ke hɛ kamɛnɛfɛ. 10Ma kwa feɗeghete hwepe ghə ta nci ŋkɛ kala nya ne, pa keɗaŋete ntsə nda berete ke hɛ laka ncɛ nza wale wale ta kweci hwelefefi nyi keɗema nyi kamene wəshi nyi meɗeyi hɛ. 11Tsetse fəave nda wəsə kempa Zhəwdas yayata wəndə hwa hɛ. Kazhɛne ŋkɛ kageze nda ghena te nza gwezlayɛ nya kese va berete ta yɛ gelə keɗema yɛ megha ke hɛ we, ama te berete nya kese mbe ghena nyi keseke mehele ta nci ŋkɛ le.
Kakwa keɗaŋe, pa ɓelamte nda shiwəa ŋkɛ nya ndeke nda farefa ke hɛ. 12Wa nya wəsə nya nakɛ Zhəwdas mbe shiwəa ŋkɛ nya: nahe ŋkɛ kenakɛ Oniyas, wəndə nya kese te ghəa ka dzeghe Shala, wəndə ganyɛ, gwedə ba'a nde ɗe ŋkwa ŋkɛ. Ghena ganji yageze ŋkɛ se kawəzege, nahe ŋkɛ ketekeve dzeghwa tiɗiɗi. Tekafe dzeve ta Oniyas yitea ghweme kasəkwə ghə kezha ka Zhəwif pɛtɛ. 13Ma kwa sebe ta ŋkɛ ne, pa Zhəwdas nakɛ kwete wəndə nya kenca təwə təwə ghə te ba'a nya hawe mbeli ve, nya nza ntsə te va zləvə nya te. 14Ma ke Oniyas gezete ghena: «Ma nde mɛ ŋkwa ta Shala Zhɛrɛmi nya ne, wəndə nya kesəkwə ghə kwele kwele kezha ka menəhɛnyɛ ba'a kezha meleme nya keveyi geva tekeleke ŋkɛ.» 15Kwa sebe ta ŋkɛ, pa Zhɛrɛmi have nda kafayɛ mze kwa tere tere ke Zhəwdas le dzeve kwa zeme. Ma ke gezete ghena vəa ŋkwa nya ve nda ŋkɛ: 16«Kelete kafayɛ nya keveyi geva nya tekeleke, wəsə nya kese va Shala ŋkɛ, kateghazle ka jaga na le.»
Teɗe ba'a mte ta Nikanor
(1 MA 7.39-50)
17Ma kwa gwəfəte nda ghə ghena ganjia Zhəwdas nyi keve nda hwepe ghə ke wəndə ba'a nyi keve nda berete kempa ke ka dɛgwəa hɛɗi kala ka meyidala kɛfi ne, pa ka Zhəwif tarete ɗema slə mbe ghedəkwə kezha mpa le hwepe ghə ba'a kahərə ŋkwa yayata wəndə laka mpa nya le wəti le pɛtɛa berete ta ŋkɛ va nya nza ŋkɛ nahe meleme, zele Shala ba'a ghɛa Shala kenza mbe ndiremi. 18Ma hwa mpa shɛ ne, nza ta ghɛa Shala nya keveyi geva tekeleke nde tsakɛ hɛ za ma ke ŋa yɛ mia nci le ŋwalea nci, ŋa ka menəhɛ nci ba'a mbeli nyi keyake hɛ. 19Ma kaŋa mbeli nyi ketene mbe Zhɛrəzalɛm ne, kwetɛ kwetɛŋe tazenji mehele ta nci kwa zəzəte mpa nya ketemene geva hɛ kwamte.
20Pɛtɛa mbeli kaneghe tsema tsema tekiɗi mpa nya takwa takwa kase. Nahe ka sewajɛa ka ghema ketsenete geva ba'a kepate geva yitea mpa. Nahe yɛ cɛwea lɛmə kenderete geva te ŋkwa ganji, tsagha yɛ gədəwəa lɛmə dzate vare yɛ bela. 21Nda mare yamare wəvəsəa ka sewajɛ nyi kwele kwele le mama ta wəshi kempa nci ba'a cɛwea lɛməa nci nyi ghyana ghyana Zhəwdas Makabɛ. Tagha gɛ, kafe ŋkɛ sha dzeve yitea ghweme kezha səkwə Shala nya kenza kamenete wəshi meŋele, va nya ɗepe ŋkɛ kaɗema hərə ŋkwa kase laka wəshi kempa, ama laka ɗe ta Shala nya keve nda hərə ŋkwa ke mbeli nyi hi ŋkɛ va hɛ. 22Ma ke Zhəwdas sha se kasəkwə ghə: «Shala yawe, ma vəa ŋkwa nya se Ɛzɛkiyas kameghe nya mbe Zhəwdɛ ne, nahe na keghweneke nde ghwene ta ŋa, nahe ŋkɛ kempəmte zhili 185.000 hwa ka sewajɛa Sɛnakɛrib. 23Təhwə təhwə ŋa 'ya Mahwətə tehwə ghweme, ghweneke n'yɛ nde ghwene ta ŋa nya ganyɛ ɓeshi kezha nza ghazlənə ba'a medada hwa ka jaga ta n'yɛ. 24Sate te ŋkwa le berete ta ŋa kezha ɗa mbeli nyi kese nyi kaŋele ŋa ba'a nyi kese kezha nda mpa ke mbelia ŋa nyi keveyi geva tekeleke.» Tsetse keɗaŋemte səkwə ghə ta ŋkɛ Zhəwdas.
25Ma kwa hende geva ka sewajɛa Nikanor kase le vɛ veke ba'a le geza ne, 26lewəte yɛ Zhəwdas le mbelia ŋkɛ mbe ka ghema ta nci le səkwə Shala kezha kemane hɛ. 27Ma kwa mpa hɛ le berete ta nci ba'a le səkwə Shala kwa wənəa nci ne, pa hɛ mpəmte mbeli 35.000 ɓɛhwɛ ta ŋkɛ ba'a ntake hɛ kazlama te berete ta Shala nya kencɛte geva shɛ.
28Ma kwa kiɗi mpa ne, tewətelɛwe ka Zhəwif same kwa ghwa mpa le zlama kwa ntsate wəndə kemte mtea Nikanor hɛ ɓelayɛ te hɛɗi le pɛtɛa wəshi kempa ta ŋkɛ. 29Ntake hɛ katsa gaghwe ba'a kagha geza, ntake hɛ katsa nda hana ke Shala Mahwətə le ghena ta ka shihɛ nci.
30Pa Zhəwdas nya kande ghate kampa nda mpa le pɛtɛa berete ta ŋkɛ ke hwelefe ta ŋkɛ, nya keɗehwe ka menəhɛnyɛ se kawəzege gezete nda ke mbeli kasla ghəa Nikanor ba'a katsasle dzeve kwa zeme ta ŋkɛ kwelɛ bazla kezha fə hɛ kadzembe Zhɛrəzalɛm. 31Cape ŋkɛ kadzembe le ghəa ŋkɛ, pa hekake ka menəhɛnyɛ ba'a ghereŋeyi ka dzeghe Shala kwa kema ta reghwetɛ. Kwa sebe ta ŋkɛ, ghwenakwe ŋkɛ sha ŋkwa kalə kaheka mbeli nyi mbe ŋkwa nya berete. 32Pa ŋkɛ ncɛte nda ghəa Nikanor nya ndiremia mehele ba'a dzeve ta nde mpə ŋkwa shɛ nya kese kacɛɗɛ ghɛa Shala nde berete nya keveyi geva tekeleke le kele ghə ke hɛ. 33Pa ŋkɛ gezete nda ke mbeli kasla ghɛnia Nikanor, nde ndiremia mehele kezha ncɛncɛhwe nda ŋkɛ ke yɛ weli ba'a kaŋalawe dzeve ta ŋkɛ te zewe kwa kema ta ghɛa Shala kazhɛme nya mbe slene gezhia ŋkɛ. 34Tagha gɛ, mbeli pɛtɛ kakafe dzeve yitea ghweme kezha tsa nda hana ke Shala nya nza zləvə te, ma ke hɛ: «Tsa nda ɓəmə hana ke wəndə nya keyakɛ ŋkwa ŋkɛ nya keveyi geva tekeleke va nza wale wale.» 35Pa Zhəwdas seɗeyi ghəa Nikanor vare dewe ta ŋkwa berete kawəsə kencɛ kemane nya ndeke nda Shala ke mbelia ŋkɛ darahwe.
36Pa pɛtɛa mbeli nyi ketsenete geva nteyi vecia shɛ kaveci nya keɗema kazaghəyite geva. Nda mbeli kamene gəsəkəa ŋkɛ keva keva mbe nda teshave mbeli mbe cɛ yitea vecia Mardoshɛ, geze ta ŋkɛ, te hɛ kwa meŋe mahekeneghəmbe mbe tere kwa meŋe bakeghəmbe nya heka mbeli kaAdar le ghena Aram.
Zəzə ta wəndə nya kerafete palepa nya
37Tsetse wəshi nyi kemenete nda geva ke Nikanor. Se mɛa vəa shɛ ne, mbe dzeve ta ka Zhəwif meleme ta Zhɛrəzalɛm. Vatse gɛ ne, 'ya kateghereŋe ghena ta ɗa teke. 38Ma nda ganyɛke ba'a megela ghena nyi kerafete geva ne, nahe 'ya keyipəyi wəsə nya mawe 'ya kwa. Ma kenza ŋkɛ wəshi nyi keɗema kehi ba'a nyi ɗema zləvə te ya mbe ne, nahe 'ya kemenete wəsə nya nza 'ya gare menete. 39Kala nya nza sa ta eli eli keɗema yɛmə ŋelɛ ndiremike vəa ŋkwa nya nza mbazli kwa gweɗə gweɗə kezeɗenyɛ ba'a kɛaze kɛaze ne, tsagha ɗepe rafe ghena nyi kenza kakeseke mehele ta mbeli nyi kejaŋga palepa. Teke teghereŋe 'ya gɛ.
Currently Selected:
2 Makabɛ 15: BEKDC12
Highlight
Share
Copy
Want to have your highlights saved across all your devices? Sign up or sign in
La Bible en langue Kapsiki avec les livres deutérocanoniques © Alliance Biblique du Cameroun 2012.
2 Makabɛ 15
15
Nikanor kaɗema hawe va veci kezhɛne mpi
1Ma kwa fate Nikanor ne, te hɛɗia Samari yɛ Zhəwdas le mbelia ŋkɛ ne, pa tarete kezha ha nda mpa ke hɛ te veci kezhɛne mpi kaɗema kese kazəzə ndiremi nya mbe. 2Ma ke ka Zhəwif nyi ŋkate ŋkɛ kazele ŋkɛ shɛ: «Mpəma hɛ na kala nde 'yaghwa mehele ba'a nde dewə mehele ma, ama hawe va veci nya vate geva zləvə te ba'a nya keveyi geva tekeleke ma laka wəndə nya kenewe ghweme te wəshi pɛtɛ.» 3Ama ma ke nde ndiremia mehele nya kashasha shɛ 'yɛwete: «Nde sleke ŋkwa nya kegezete nda ke mbeli kahawe va veci kezhɛne mpi ya shɛ pelɛ ghweme na?» 4Ma ke ka Zhəwif zhɛnete nda: «E'e, nahe Shala nya teghweme le ghəa ŋkɛ, nya kesleke ghweme kegezete kezha hawe mbeli va veci kezhɛne mpi.» 5Ma ke Nikanor zhɛnete: «'Ya perə ne, nde sleke ŋkwa 'ya te hɛɗi, kageze ŋayɛ 'ya kezha fə wəshi kempa kezha mene slene nya zəzəte meghe.» Ndagwara kekemave hweŋkwa ketserame zəzə kwa ndiremia ŋkɛ ŋkɛ we.
Zhəwdas kantsə nda berete ke mbelia ŋkɛ
6Ma kwa nza kele ghəa hwa Nikanor ne, pa ŋkɛ tarete kapa ŋkwa kawəsə kencɛ hərə ŋkwa ta ŋkɛ le wəshi kempa ta yɛ Zhəwdas le mbelia ŋkɛ. 7Ama pa Zhəwdas Makabɛ vate ghə nya keɗema kazhɛremte geva ba'a veyi zəzə te kemave kemane ta Shala. 8Vatse ntsəte nda berete ŋkɛ ke mbelia ŋkɛ kezha ɗema hɛ kagezleŋe ghə va mpa nya ha nda kweci hwelefefi ke hɛ. Megela ŋkɛ kezha nza mehele ta nci te kemane nyi kese kasawa pelɛ ghweme kezha hɛ vəashi ba'a kezha neghe hərə ŋkwa nya teve nda Nde berete#15.8 Nde berete: Ma Nde berete teke ne, gheŋkɛ Shala. ke hɛ tsetsenya ɓiyitsa. 9Ma kwa ntsəte nda berete ŋkɛ ke hɛ laka ghena nyi mbe wəsə mahalegə ba'a nyi gezete ka mɛ ŋkwa ne, nahe ŋkɛ kendeke nda hwepe ghə ke hɛ kamɛnɛfɛ. 10Ma kwa feɗeghete hwepe ghə ta nci ŋkɛ kala nya ne, pa keɗaŋete ntsə nda berete ke hɛ laka ncɛ nza wale wale ta kweci hwelefefi nyi keɗema nyi kamene wəshi nyi meɗeyi hɛ. 11Tsetse fəave nda wəsə kempa Zhəwdas yayata wəndə hwa hɛ. Kazhɛne ŋkɛ kageze nda ghena te nza gwezlayɛ nya kese va berete ta yɛ gelə keɗema yɛ megha ke hɛ we, ama te berete nya kese mbe ghena nyi keseke mehele ta nci ŋkɛ le.
Kakwa keɗaŋe, pa ɓelamte nda shiwəa ŋkɛ nya ndeke nda farefa ke hɛ. 12Wa nya wəsə nya nakɛ Zhəwdas mbe shiwəa ŋkɛ nya: nahe ŋkɛ kenakɛ Oniyas, wəndə nya kese te ghəa ka dzeghe Shala, wəndə ganyɛ, gwedə ba'a nde ɗe ŋkwa ŋkɛ. Ghena ganji yageze ŋkɛ se kawəzege, nahe ŋkɛ ketekeve dzeghwa tiɗiɗi. Tekafe dzeve ta Oniyas yitea ghweme kasəkwə ghə kezha ka Zhəwif pɛtɛ. 13Ma kwa sebe ta ŋkɛ ne, pa Zhəwdas nakɛ kwete wəndə nya kenca təwə təwə ghə te ba'a nya hawe mbeli ve, nya nza ntsə te va zləvə nya te. 14Ma ke Oniyas gezete ghena: «Ma nde mɛ ŋkwa ta Shala Zhɛrɛmi nya ne, wəndə nya kesəkwə ghə kwele kwele kezha ka menəhɛnyɛ ba'a kezha meleme nya keveyi geva tekeleke ŋkɛ.» 15Kwa sebe ta ŋkɛ, pa Zhɛrɛmi have nda kafayɛ mze kwa tere tere ke Zhəwdas le dzeve kwa zeme. Ma ke gezete ghena vəa ŋkwa nya ve nda ŋkɛ: 16«Kelete kafayɛ nya keveyi geva nya tekeleke, wəsə nya kese va Shala ŋkɛ, kateghazle ka jaga na le.»
Teɗe ba'a mte ta Nikanor
(1 MA 7.39-50)
17Ma kwa gwəfəte nda ghə ghena ganjia Zhəwdas nyi keve nda hwepe ghə ke wəndə ba'a nyi keve nda berete kempa ke ka dɛgwəa hɛɗi kala ka meyidala kɛfi ne, pa ka Zhəwif tarete ɗema slə mbe ghedəkwə kezha mpa le hwepe ghə ba'a kahərə ŋkwa yayata wəndə laka mpa nya le wəti le pɛtɛa berete ta ŋkɛ va nya nza ŋkɛ nahe meleme, zele Shala ba'a ghɛa Shala kenza mbe ndiremi. 18Ma hwa mpa shɛ ne, nza ta ghɛa Shala nya keveyi geva tekeleke nde tsakɛ hɛ za ma ke ŋa yɛ mia nci le ŋwalea nci, ŋa ka menəhɛ nci ba'a mbeli nyi keyake hɛ. 19Ma kaŋa mbeli nyi ketene mbe Zhɛrəzalɛm ne, kwetɛ kwetɛŋe tazenji mehele ta nci kwa zəzəte mpa nya ketemene geva hɛ kwamte.
20Pɛtɛa mbeli kaneghe tsema tsema tekiɗi mpa nya takwa takwa kase. Nahe ka sewajɛa ka ghema ketsenete geva ba'a kepate geva yitea mpa. Nahe yɛ cɛwea lɛmə kenderete geva te ŋkwa ganji, tsagha yɛ gədəwəa lɛmə dzate vare yɛ bela. 21Nda mare yamare wəvəsəa ka sewajɛ nyi kwele kwele le mama ta wəshi kempa nci ba'a cɛwea lɛməa nci nyi ghyana ghyana Zhəwdas Makabɛ. Tagha gɛ, kafe ŋkɛ sha dzeve yitea ghweme kezha səkwə Shala nya kenza kamenete wəshi meŋele, va nya ɗepe ŋkɛ kaɗema hərə ŋkwa kase laka wəshi kempa, ama laka ɗe ta Shala nya keve nda hərə ŋkwa ke mbeli nyi hi ŋkɛ va hɛ. 22Ma ke Zhəwdas sha se kasəkwə ghə: «Shala yawe, ma vəa ŋkwa nya se Ɛzɛkiyas kameghe nya mbe Zhəwdɛ ne, nahe na keghweneke nde ghwene ta ŋa, nahe ŋkɛ kempəmte zhili 185.000 hwa ka sewajɛa Sɛnakɛrib. 23Təhwə təhwə ŋa 'ya Mahwətə tehwə ghweme, ghweneke n'yɛ nde ghwene ta ŋa nya ganyɛ ɓeshi kezha nza ghazlənə ba'a medada hwa ka jaga ta n'yɛ. 24Sate te ŋkwa le berete ta ŋa kezha ɗa mbeli nyi kese nyi kaŋele ŋa ba'a nyi kese kezha nda mpa ke mbelia ŋa nyi keveyi geva tekeleke.» Tsetse keɗaŋemte səkwə ghə ta ŋkɛ Zhəwdas.
25Ma kwa hende geva ka sewajɛa Nikanor kase le vɛ veke ba'a le geza ne, 26lewəte yɛ Zhəwdas le mbelia ŋkɛ mbe ka ghema ta nci le səkwə Shala kezha kemane hɛ. 27Ma kwa mpa hɛ le berete ta nci ba'a le səkwə Shala kwa wənəa nci ne, pa hɛ mpəmte mbeli 35.000 ɓɛhwɛ ta ŋkɛ ba'a ntake hɛ kazlama te berete ta Shala nya kencɛte geva shɛ.
28Ma kwa kiɗi mpa ne, tewətelɛwe ka Zhəwif same kwa ghwa mpa le zlama kwa ntsate wəndə kemte mtea Nikanor hɛ ɓelayɛ te hɛɗi le pɛtɛa wəshi kempa ta ŋkɛ. 29Ntake hɛ katsa gaghwe ba'a kagha geza, ntake hɛ katsa nda hana ke Shala Mahwətə le ghena ta ka shihɛ nci.
30Pa Zhəwdas nya kande ghate kampa nda mpa le pɛtɛa berete ta ŋkɛ ke hwelefe ta ŋkɛ, nya keɗehwe ka menəhɛnyɛ se kawəzege gezete nda ke mbeli kasla ghəa Nikanor ba'a katsasle dzeve kwa zeme ta ŋkɛ kwelɛ bazla kezha fə hɛ kadzembe Zhɛrəzalɛm. 31Cape ŋkɛ kadzembe le ghəa ŋkɛ, pa hekake ka menəhɛnyɛ ba'a ghereŋeyi ka dzeghe Shala kwa kema ta reghwetɛ. Kwa sebe ta ŋkɛ, ghwenakwe ŋkɛ sha ŋkwa kalə kaheka mbeli nyi mbe ŋkwa nya berete. 32Pa ŋkɛ ncɛte nda ghəa Nikanor nya ndiremia mehele ba'a dzeve ta nde mpə ŋkwa shɛ nya kese kacɛɗɛ ghɛa Shala nde berete nya keveyi geva tekeleke le kele ghə ke hɛ. 33Pa ŋkɛ gezete nda ke mbeli kasla ghɛnia Nikanor, nde ndiremia mehele kezha ncɛncɛhwe nda ŋkɛ ke yɛ weli ba'a kaŋalawe dzeve ta ŋkɛ te zewe kwa kema ta ghɛa Shala kazhɛme nya mbe slene gezhia ŋkɛ. 34Tagha gɛ, mbeli pɛtɛ kakafe dzeve yitea ghweme kezha tsa nda hana ke Shala nya nza zləvə te, ma ke hɛ: «Tsa nda ɓəmə hana ke wəndə nya keyakɛ ŋkwa ŋkɛ nya keveyi geva tekeleke va nza wale wale.» 35Pa Zhəwdas seɗeyi ghəa Nikanor vare dewe ta ŋkwa berete kawəsə kencɛ kemane nya ndeke nda Shala ke mbelia ŋkɛ darahwe.
36Pa pɛtɛa mbeli nyi ketsenete geva nteyi vecia shɛ kaveci nya keɗema kazaghəyite geva. Nda mbeli kamene gəsəkəa ŋkɛ keva keva mbe nda teshave mbeli mbe cɛ yitea vecia Mardoshɛ, geze ta ŋkɛ, te hɛ kwa meŋe mahekeneghəmbe mbe tere kwa meŋe bakeghəmbe nya heka mbeli kaAdar le ghena Aram.
Zəzə ta wəndə nya kerafete palepa nya
37Tsetse wəshi nyi kemenete nda geva ke Nikanor. Se mɛa vəa shɛ ne, mbe dzeve ta ka Zhəwif meleme ta Zhɛrəzalɛm. Vatse gɛ ne, 'ya kateghereŋe ghena ta ɗa teke. 38Ma nda ganyɛke ba'a megela ghena nyi kerafete geva ne, nahe 'ya keyipəyi wəsə nya mawe 'ya kwa. Ma kenza ŋkɛ wəshi nyi keɗema kehi ba'a nyi ɗema zləvə te ya mbe ne, nahe 'ya kemenete wəsə nya nza 'ya gare menete. 39Kala nya nza sa ta eli eli keɗema yɛmə ŋelɛ ndiremike vəa ŋkwa nya nza mbazli kwa gweɗə gweɗə kezeɗenyɛ ba'a kɛaze kɛaze ne, tsagha ɗepe rafe ghena nyi kenza kakeseke mehele ta mbeli nyi kejaŋga palepa. Teke teghereŋe 'ya gɛ.
Currently Selected:
:
Highlight
Share
Copy
Want to have your highlights saved across all your devices? Sign up or sign in
La Bible en langue Kapsiki avec les livres deutérocanoniques © Alliance Biblique du Cameroun 2012.