2 Makabɛ 11
11
Zhəwdas kahərə Lisiyas
1Temə vireɗi kwa sebe ta ŋkɛ ne, pa Lisiyas nya kamenənyɛa meghe, nya kawəndə nya kekelete ŋkɛ, wəndə nya te ghəa wəshia meghe, vate ghə tsape te wəshi nyi kemenete geva, 2pa tsenete ka sewajɛ nyi le seɗa gare 80.000 ba'a pɛtɛa gədəwəa lɛməa ŋkɛ, ntəŋə ŋkɛ kalə kampa le ka Zhəwif. Zəzə kezhɛre Zhɛrəzalɛm kameleme ta ka Grɛk ya ve. 3Nahe ŋkɛ keɗehwe kezha ŋki jaɓeregwale yayata wəndə nya kedzembe ghɛa Shala kala nya mene mbeli le yɛ ghɛa yɛ shala ta kweci hwelefefi ba'a pa pa ɗe ŋkɛ kapa dzete ŋkwa wəndə kwelea ka dzeghe Shala mbeli keva keva. 4Kese ŋkɛ kaɓela berete ta Shala we, ama ka sewajɛa ŋkɛ nyi le seɗa kwele kwele, ka zleɗe gədəwəa lɛməa ŋkɛ nyi tipə tipə ba'a cɛwea lɛməa kempa ta ŋkɛ nyi deghesemsə yavate ghə ŋkɛ te hɛ. 5Shilimə ŋkɛ mbe Zhəwdɛ, hwa'a ŋkɛ mbe Bɛt-Səwr, ŋkwa nya berete nya kenza kakiləmɛtre bakemsə degheseghəmbe yitea Zhɛrəzalɛm laka bela kwa zeme. Kape ŋkɛ have nda mpa.
6Ma kwa fate yɛ Makabɛ le mbelia ŋkɛ nahe Lisiyas kehave nda mpa ke ŋkwa nyi berete berete te hɛɗia ŋkɛ ne, pa hɛ səkwəte Shala le ŋələvə ba'a le nehwene ghwərəmə təmə kezha ghweneke nde ghwene ta ŋkɛ nya ganyɛ ŋkɛ kezha mbele Israyɛl. 7Kwa sebe ta ŋkɛ, kəliɓə Zhəwdas te wəshi kempa kande ghate, pa ntsəte nda berete ke kweci mbeli kezha zamte ghə hɛ yitea ghəa nci kezha kemane ka menəhɛ nci. Cape hɛ kwa hweŋkwa le hwepe ghə kanya kwetɛŋe.
8Kenaka hɛ kanza cakeɗake yitea Zhɛrəzalɛm nda ncake geva nde zleɗe gədəwə nya mbe lekwesa kwa tɛawetɛa te kema ta nci, nya nza wəshi kempa nyi le mze kwa tere tere yitea dzeve ve we. 9Tagha gɛ, ntake hɛ katsa nda hana kanya kwetɛŋe ke Shala Kwamaɗəwə. Pa ŋkɛ ndeke nda hwepe ghə kempempahwe mbeli, wəshi keseɗa nyi ghyana ghyana ma ba'a yɛ zli lɛ ke hɛ. 10Ntəŋə hɛ kewəvəsə kewəvəsə yitea mpa le nde kemane nya kesawa pelɛ ghweme, Shala nde zhɛakɛ heli yitea hɛ. 11Kwa sebe ta ŋkɛ, lahwe hɛ mbe ka jaga kala yɛ nivɛrə. Pa hɛ mpəmte ka sewajɛ nyi le seɗa 11.000, ka zleɗe gədəwəa lɛmə 1.600 ba'a ŋkate ka sewajɛ nyi ketene kahwɛ. 12Kwele ma nyi ɗakɛ zhi hwa mbeli nyi kehwɛnji ba'a nyi kebetakɛ wəshi kempa ta nci. Le hwɛ le hawe le hawe mbelete mpia ŋkɛ Lisiyas le ghəa ŋkɛ.
Lisiyas kave kwelɛŋe kwelɛ ka Zhəwif le Antiyokəs
(1 MA 6.57-61)
13Ma kwa ɗema Lisiyas kande dewə zəzə ne, ntake ŋkɛ kazəzə te hərə nya hərəte ŋkɛ nya mbeli. Ma ghena nya fave ŋkɛ mbe ne, kahərəte ka Zhəwif mbeli va nya nza Shala nde berete le hɛ we. Pa ŋkɛ ghweneghe nda ka ghwene ke hɛ 14kezha mene nza kwelɛŋe ŋkɛ le hɛ wəshi nyi kehi. Pa ŋkɛ meɗeyi nda ke hɛ kezha zhɛre meghe kamcɛnyɛa hɛ. 15Pa Makabɛ yɛhwe pɛtɛa ghena nyi gezete Lisiyas kwa ɗehwe wəsə nya kehi ŋkɛ kezha mbeli. Pa meghe le ŋa ŋkɛ yɛte pɛtɛa wəshi nyi 'yɛwete ka Zhəwif laka palepa nya rafete nda Zhəwdas ke Lisiyas.
Lisiyas karafe nda palepa ke ka Zhəwif
16Wa nya palepa nya rafete nda Lisiyas ke ka Zhəwif nya:
«Kanjiŋwe pɛtɛa ka Zhəwif Lisiyas.
17Nahe yɛ Zhaŋe le Absalom, nyi kaka ghwene ta ŋayɛ kendeke ɗa palepa ta ŋayɛ nya yitea ŋa ɗa nya ba'a ke 'yɛwete zhɛne va 'ya te ghəa wəshi nyi zəzəte yɛ. 18Nahe 'ya kegezete nda ghena nyi kehi kaŋa ŋkɛ ke meghe, nahe ŋkɛ keyɛte nyi kenza kamenete geva. 19Ma kenza yɛ ganyɛke laka dzeghwa ta hɛɗi ne, katentsə geva 'ya kezha ganyɛa nza ta hwelefe ta ŋayɛ mbe kema. 20Ma kaŋa ghena nyi ɓɛhwɛ ɓɛhwɛ ne, nahe 'ya kendeke nda hweŋkwa ke mbeli nyi ghweneke yɛ ba'a ke mbelia ɗa kezha yipə hɛ hɛ le gheyɛ.
21Pa Shala nza le gheyɛ. Mbe va gwəmsə ba'a wəfaɗemsə degheseghəmbe, mbe hɛ kwa bakemsə wəfaɗeghəmbe te terea Diyoskore.»
Meghe karafe nda palepa ke Lisiyas ba'a ke ka Zhəwif
22Wa nya palepa nya rafete nda meghe ke Lisiyas nya: «Kanjiŋwe wəza meghekɛ Lisiyas meghe Antiyokəs.
23Ghala kwa slənyɛ yiteyɛ ɗa kalə sha kweci shala ne, kaɗe 'ya kezha ve nda ghə mbeli nyi te hɛɗi meghea ɗa ke slene ta nci ba'a kezha nza gwezlayɛ. 24Nahe 'ya kefate kaɗema ka Zhəwif kaɗe kamene slene le wəshi keshia ka Grɛk kala nya ɗe yiteyɛ ɗa. Nahe hɛ keɗehwe nza tekele ba'a ke'yɛwete hweŋkwa kezha hawe va wəshi mahalegəa nci. 25Ma kwa ɗema 'ya kataze nda mehele mbeli ke hwelefea shɛ ne, 'ya kageze kezha zhɛnave nda ghɛa Shala ta nci mbeli ke hɛ ba'a kezha sərəakɛ hɛ mbeli kanza kala nya ɗe wəshi keshia nci. 26Ghweneghe nda wəndə ke hɛ kezha geze nda ke hɛ nahe 'ya keɗehwe nza ta nci kwelɛŋe. Ma ketefate zəzə ta ɗa hɛ ne, kategezleŋe ghə hɛ we, katemene slene ta nci hɛ mbe nza gwezlayɛ.»
27Wa nya palepa nya rafete nda meghe ke ka Zhəwif nya: «Kanjiŋwe mbelia jama ta ka Zhəwif ba'a kweci ka Zhəwif meghe Antiyokəs.
28Ma zəzə 'ya ne, kwelɛŋe yɛ. Ma 'ya le ŋa ɗa ne, lɛŋe lɛŋe 'ya. 29Nahe Mɛnɛlas kegezete ɗa mawe yamawe zhɛne geva yɛ kase sha meleme ta ŋayɛ kezha ve nda ghə ke slene ta ŋayɛ. 30Vatse gɛ ne, wəndə shɛ kateghakɛ mbeli nyi kezhɛneghe geva nyi kalə sha meleme ta nci nda temene hɛ mahekenemsə mbe terea Gezantike we. 31Wərə yɛ kamene kala ghena nyi kegezete geva laka wəshi kezemea ŋayɛ ba'a kamene slene le wəshi mahalegəa ŋayɛ kala nya vəashi. 32Nahe 'ya keghweneghe ŋayɛ Mɛnɛlas kezha gweɗakwe mehele ta ŋayɛ ɓiyitsa.
33Pa Shala nza le gheyɛ. Mbe va kwa gwəmsə ba'a wəfaɗemsə degheseghəmbe, mbe hɛ meŋe mcɛfeghəmbe te terea Gezantike rafete geva ŋkɛ.»
Ka Rome karafe nda palepa ke ka Zhəwif
34Wa nya palepa nya rafeghe nda ka Rome ke ka Zhəwif laka ŋa nci bela nya: «Kanjiŋwe ka Zhəwif Kintəs Mɛmiyəs ba'a Titəs Maniyəs, mbeli nyi ghwenakɛ ka Rome.
35Ma wəshi nyi ndeke ŋayɛ hweŋkwa Lisiyas, menənyɛa meghe yitea hɛ ne, nahe ghen'yɛ kepelave ŋayɛ hweŋkwa yitea hɛ perə. 36Ama kaŋa ghena nyi zəzəte nyi ŋkɛ kageze nda ke meghe ne, ghweneke n'yɛ mə wəndə kahe kahe kwa sebe ta nya newemte hɛ yɛ megela, kezha ɓela nda hɛ n'yɛ ke meghe yitea nza hɛ ganyɛke laka ŋa ŋayɛ bela, kwa nza ŋkɛ ghen'yɛ katedzeme Antiyoshe. 37Ghweneke n'yɛ mə mbeli kahe kahe yitea ɗepete ghena nyi zəzə yɛ ghen'yɛ perə.
38Pa Shala nza le gheyɛ. Mbe va kwa gwəmsə ba'a wəfaɗemsə degheseghəmbe, mbe hɛ meŋe mcɛfeghəmbe te terea Gezantike rafete geva ŋkɛ.»
Currently Selected:
2 Makabɛ 11: BEKDC12
Highlight
Share
Copy
Want to have your highlights saved across all your devices? Sign up or sign in
La Bible en langue Kapsiki avec les livres deutérocanoniques © Alliance Biblique du Cameroun 2012.