1 Makabɛ 16
16
Ŋwalea Simon kaŋka Kendɛbɛ
1Ntəŋə Zhaŋe same kwa Gɛzɛr kezha geze nda wəsə nya mene Kendɛbɛ ke yitenyɛ Simon. 2Pa Simon hekake ŋwale tezhilia ŋkɛ nyi jama jama bake, yɛ Zhəwdas le Zhaŋe, ma ke sha hɛ: «Nahe ka kesaka meyɛ ɗa ba'a 'ya, tsagha pɛtɛa mbeli nyi ki ghɛa yiteyɛ ɗa kempahwe mpa le ka ghema ta Israyɛl, se kaŋwale ghen'yɛ pa ɓeshi. Kwele kwele zhigə mbelete Israyɛl ghen'yɛ. 3Tsetsenya ne, nahe 'ya kenza kameha za. Ama gheyɛ te zlaɓa ta Shala ne, berete ya mbe gheyɛ. Kelete mə ŋkwa ɗa ba'a ŋa wəza meyɛ ŋayɛ. Kwiɗi mə kadzemte mpa kezha hɛɗia ɓəmə, pa Shala kemane ŋayɛ.»
4Pa Zhaŋe tsehave ka sewajɛ nyi le seɗa 20.000 ba'a ka zleɗe gədəwəa lɛmə. Cape hɛ kalə kampa le Kendɛbɛ. Pa hɛ hɛnji mbe Modine. 5Masheke masheke te hendɛ ta ŋkwa ne, pa hɛ dzawanji te ŋwela. Tagha senji ka sewajɛ nyi le seɗa ba'a ka zleɗe gədəwəa lɛmə kwele kwele sha hɛ. Kwete hələ ya kwelɛ hɛ. 6Pa yɛ Zhaŋe le ka sewajɛa ŋkɛ ghereŋenji kwa kema ta nci. Newe ke Zhaŋe ne, kazhɛ nda ghazlənə ke ka sewajɛa ŋkɛ kejive te hələ. Tagha gɛ, pa jivenyɛ kande ghate. Ma kwa nakɛ mbelia ŋkɛ ne, pa hɛ jivenji te hələa shɛ kwa sebe ta ŋkɛ. 7Pa Zhaŋe neheve ka sewajɛa ŋkɛ ba'a beteyi ka zleɗe gədəwəa lɛməa ŋkɛ te tepe ta ka sewajɛ nyi le seɗa, kwa nza ŋkɛ nahe ka sewajɛa nde ghema kenza kwele kwele. 8Pa ŋkɛ vɛte vəaŋə kezha gha mpa, pa hɛ hərəte yɛ Kendɛbɛ le ka sewajɛa ŋkɛ. Kwele kwele ka ghema nyi ɗakɛ zhi kemte, pa mbeli nyi ketene hwɛnji kadzembe ŋkwa nya berete ta Kɛdron. 9Nahe zhi keɗakɛ Zhəwdas kwa mpa, ama pa Zhaŋe, wəza meghekɛ kekate mbeli nyi kehwɛ hwa'a mbe Kɛdron, nya zhɛne Kendɛbɛ kaŋate. 10Pa kweci mbeli wəfərənji mbe ŋkwa keya ŋkwa nyi hwa gamba ta Asdod nyi ndəmte Zhaŋe. Mbeli 2.000 ka mpə yitea nde ghema. Kwa sebe ta ŋkɛ, tewətelɛwe Zhaŋe zhɛneke geva lɛŋe lɛŋe kadzembe Zhəwdɛ.
Pesle ta Simon. Wəzege ta ŋkɛ Zhaŋe kadzete ŋkwa ŋkɛ
11Pa Ptolɛmɛ, wəzege ta Abəwbos veyi geva kaŋgwamna ta ŋwela ta Zhɛriko. Mze kwa tere tere ba'a mze kwa tɛawetɛa ya kwele kwele ve, 12kwa nza ŋkɛ kamekwea Simon, wəndə kwelea ka dzeghe Shala ŋkɛ. 13Pa ŋkɛ zhɛrenyɛ kande kele ghə ba'a ɗehwe kanza kande sleke hɛɗi. Pa ŋkɛ zəzəte kampə yɛ Simon le ŋwalea ŋkɛ le ntsehwele. 14Ma vəa ŋkwa shɛ ne, kadzeghwa Simon dzeyi mbe meleme nyi te hɛɗi, kwa nza ŋkɛ wəshi nyi ɗe melemea shɛhɛ yazele ŋkɛ kaɗepe. Pa ŋkɛ dzawa Zhɛriko, zlaɓe le ŋwale tezhilia ŋkɛ Matatiyas ba'a Zhəwdas, mbe tere kwa meŋe kwetɛŋeghəmbe keɗema terea Shebat, mbe va gwəmsə ba'a mberefaŋemsə mberefaŋeghəmbe. 15Pa wəzege ta Abəwbos kemaneve hɛ mbe ŋkwa nya berete nya ɓɛhwɛ, nya heka mbeli kaDok, nya ŋate ŋkɛ. Ma kwa wəfərə zəzə ta ŋkɛ ŋkɛ ne, pa takɛ nda wəshi kezeme kwele kwele ke hɛ. Ama pa wəfərəakɛ mbeli mbe ŋkwa shɛ. 16Ma vəa ŋkwa nya nza yɛ Simon le ŋwalea ŋkɛ keghwəyi ghwəyi ne, pepelɛhetɛme yɛ Ptolɛmɛ le mbelia ŋkɛ sate te ŋkwa, kəliɓə hɛ te wəshi kempa ta nci, ŋkelikə hɛ kənəa Simon mbe cɛ kezeme wəshi kezeme, mbəhə hɛ peslekɛ ŋkɛ, tsagha ŋwale tezhilia ŋkɛ nyi bake ba'a kweci ka mene slene ta ŋkɛ. 17Tsagha gɛ, pa Ptolɛmɛ menete wəsə nya ndiremi ba'a ŋkikɛ wəsə nya ganyɛ le wəsə nya ndiremi.
18Ma kwa sebe ta ŋkɛ ne, pa Ptolɛmɛ rafete nda wəsə nya menete ŋkɛ ke meghe Antiyokəs. Pa ŋkɛ 'yɛwakɛ kezha mtsehe nda ka sewajɛ ŋkɛ, yitea ve nda yɛ meleme ba'a hɛɗi ŋkɛ. 19Pa ŋkɛ ghweneghe kweci mbeli kadzawa Gɛzɛr kezha pesle Zhaŋe. Pa ŋkɛ rafete nda yɛ palepa ke mbeli nyi te ghəa ka sewajɛ kezha heka hɛ kase kanza yite. Pa ŋkɛ meɗeyi nda mze kwa tere tere, mze kwa tɛawetɛa ba'a wəshi gəmə ke hɛ. 20Pa Ptolɛmɛ ghweneghe kweci mbeli kadzawa Zhɛrəzalɛm kezha kele meleme ba'a ghweme ta ghɛa Shala. 21Ama pa kwete wəndə hwɛ kadzawa Gɛzɛr mpelɛa ke hɛ kezha geze nda mpə ta yɛ yitenyɛ le ŋwalea meghekɛ ke Zhaŋe. Ma ke mtsehete: «Nahe ŋkɛ keghweneke mbeli kasawa kezha pesle ŋa, gha le ŋa ŋa perə.» 22Kwetɛ kwetɛŋe ghena shɛ tazemte mehele ta Zhaŋe. Ma kwa fate ŋkɛ kaɗe mbeli kapesle ŋkɛ ne, pa keseve mbeli nyi keghweneke geva kezha pesle ŋkɛ ba'a mpəmte hɛ.
23Ma slene ta Zhaŋe nyi ketene, mpa nyi mpahwe ŋkɛ, wəshi nyi jama jama nyi menete ŋkɛ, zli nyi ŋate ŋkɛ ba'a kweci slene ta ŋkɛ ne, 24pɛtɛ hɛ kerafete geva mbe palepa. Ma mbe palepa shɛ ne, nahe mbeli kerafete pɛtɛa wəshi nyi menete ŋkɛ kawəndə kwelea ka dzeghe Shala, se te və nya dzete ŋkwa yitenyɛ ŋkɛ.
Currently Selected:
1 Makabɛ 16: BEKDC12
Highlight
Share
Copy
Want to have your highlights saved across all your devices? Sign up or sign in
La Bible en langue Kapsiki avec les livres deutérocanoniques © Alliance Biblique du Cameroun 2012.