1 Ka Korɛnte 16
16
Tsehe ta wəshi kezha Jikə ta ka Kriste
1Te ghena ta tsehe nda wəshi ke mbelia Shala nyi mbe Zhɛrəzalɛm ne, menete mə kala nya gezete nda 'ya ke Jikə ta ka Kriste nya mbe Galate. 2Kedemase kedemase ne, ve cɛdɛ yayata wəndəa ŋayɛ kala berete ta ŋkɛ te ŋa ŋkɛ ŋkwa ki ghɛ, yitea ɗema kaneghe se ta ɗa kezha tsene wəshi. 3Ma vəa ŋkwa nya tentsehe 'ya ne, kateghwene mbeli nyi tsehave yɛ 'ya kadzeme Zhɛrəzalɛm le palepa kezha keleghe wəshi nyi tsenete yɛ. 4Ma kenakɛ 'ya nahe ŋkɛ kehite geva kadzeme 'ya ne, katedzeme 'ya le hɛ.
Wəshi nyi temene Pol
5Katelə 'ya sha gheyɛ dzeme laka Masɛdowane, kwa nza ŋkɛ katejive 'ya mbe. 6Ya kwete katetemə 'ya hwa gheyɛ, ya kwete tagha tenza 'ya nda kiɗi feghwe. Gheyɛ ka tekemane ɗa kajive mbe kema te ŋkwa nya telə 'ya tsagha. 7Kwa nza ŋkɛ deke newe yaɗe 'ya kanewe ŋayɛ vəa ŋkwa nya dzeghwa 'ya we, ama keɗe Shala ne, katetemə 'ya hwa gheyɛ.
8Ama tsetsenya ne, nahe 'ya kezəzəte kantishɛ mbe Ɛfɛze hwa'a mɛa Pantekote. 9Kwa nza ŋkɛ nahe hweŋkwa keghwenemte ɗa geva kamene slene nya wəba teke, ya kwela nza ka ghema ta ɗa kwele kwele.
10Kese Timotɛ sha gheyɛ ne, kemaneve mə ŋkɛ le zlama, kwa nza ŋkɛ nde mene slene ta Nde sleke ŋkwa ŋkɛ kala 'ya. 11Mba mbeli keyiɗə ŋkɛ. Ama kemanakɛ mə ŋkɛ le wəshi mbe dzeghwa ta ŋkɛ nda se ŋkɛ sha 'ya, kwa nza ŋkɛ neghe yaneghe ghen'yɛ le ka kesaka ma nyi teke.
12Ma wəza meyɛ ɓəmə Apolos ne, mbe mtsehe nda berete 'ya kwele kwele kezha lə ŋkɛ sha gheyɛ le kweci ka kesaka ma, kezəzəte ŋkɛ kaba we. Katelə ŋkɛ kesləyi və ŋkɛ.
Ghena kwa keɗaŋe ba'a njiŋwe ŋkwa
13Nza mə ɗeke ɗeke, nza mə le berete mbe yɛ, hwepe mə ghə, nza mə le berete. 14Mene mə yayata wəsə le ɗe.
15Mba kwete ghena va 'ya kageze ŋayɛ ka kesaka ma, nahe yɛ keɗepe yɛ Stɛfanas le mbelia ŋkɛ ka ghate kazele ghena ta Yɛsə mbe Grɛse. Kwele kwele kemanakɛ mbelia Shala hɛ mbe. 16Fa nda mə ghena ke mbeli nyi kala nyi ba'a mbeli nyi kemene slene tsape tsape le hɛ.
17Fare fare wənəa ɗa yitea se ta Stɛfanas, Fortənatəs ba'a Akaykəs, nahe hɛ kedzete zhia ŋayɛ kwa ɗema yɛ teke. 18Nahe hɛ kegweɗakwete ɗa wənəa ɗa kala nya gweɗakwete ŋayɛ ŋa ŋayɛ hɛ perə. Hawe mə va mbeli nyi kala hɛ.
19Kanjiŋwe ŋayɛ Jikə ta ka Kriste nyi mbe Azi, kanjiŋwe ŋayɛ yɛ Akilas le Prisile ba'a ka Kriste nyi ketsene geva ki ghɛa nci. 20Pɛtɛa ka kesaka ma nyi teke kanjiŋwe ŋayɛ.
Njiŋwakɛ mə ghəa ŋayɛ le zlama kala ka mama.
21Le dzeve ta ɗa rafete ghena nyi 'ya, 'ya Pol nya kenjiŋwe ŋayɛ.
22Ma keɗema Nde sleke ŋkwa wəndə ne, nza wəndəa shɛ kande bezla bezla.
Maranata, geze ta ŋkɛ, nde, Nde sleke ŋkwa.
23Nza zlaɓa ta Nde sleke ŋkwa Yɛsə le gheyɛ.
24Kaɗe ŋayɛ 'ya pɛtɛa mbe Yɛsə Kriste.
Currently Selected:
1 Ka Korɛnte 16: BEKDC12
Highlight
Share
Copy
Want to have your highlights saved across all your devices? Sign up or sign in
La Bible en langue Kapsiki avec les livres deutérocanoniques © Alliance Biblique du Cameroun 2012.
