Rom 15
15
1Gida be tam du wasigi lol binihimwasigi garagusi tas lol ron̄oe be tas bului kera be ram mandamanda mai nora binihimwasigi, take tasav binihi te huri gida siboda. 2Tav lin̄ gida gaitutuvwai be tav bului ira tuada huria be rav tavuha, be rav tu wasigi lol binihimwasigi garagusi. 3Kraes nu hav rahu tehe be men vinihi huria sibona. Kunia be ravrava sabuga mwa bevea be: “Ira avoan hahantai be atatu ram bohainia vai alumwa, kea mwa mai n̄oto aluku.” 4Ginau duluai be nu ravana tuai nu ravae be vi vagahi gida. Ravrava sabuga mwa lol gida tam lin̄ maḡemu i mwa lai avoan dura lalai gida huri be vi lol gida tav doronhohov. 5Lin̄ maḡemu i avoan dura mwa mai n̄ano nin God. I nav tataro be God vi tataro bului kimiu be giv dame mai ira tuamwa la hala be Kraes Jisas mwa doronia. 6I kimiu duluai giv bulu ute gaituvwa, i giv lai sarisari lalai God taman Ratahigi Jisas Kraes.
Roroi Tavuha lalai atatu be ram hav vora te Vara ata Israel
7Kraes nu dara maigo i giḡo mwa du be gov dara mai tuamwa, be vi lai sarisari lalai God. 8Nam bevea lalainigo be Kraes nu vora atatun rovoga non ira Jius huri be nu lolia be, tatauleo non God lalai ira sibira vi mwasigi. 9Nu lolia mulei kungeki bwatun be kera be ram hav vora te ira Jius rav lai dum sarisari lalai God huri sine hagavi be nu laia lalainira. Nu ravana lol ravrava sabuga be,
“Nav uloi roroainigo maira Lolobon̄i;
Nav lol iboi roroai ihamwa.”
10Ravrava Sabuga mwa bevea mulei be,
“Giv ron̄ mwandavuha, kimiu ira Lolobon̄i mai kimiu sinombu non God!”
11Mulei ravrava Sabuga mwa bevea be:
“Kimiu duluai be ira Lolobon̄i,
giv uloi roron God.
Kimiu sinombu duluai, giv lol iboi roroainia.”
12I Aesaia mwa bevea be,
“Ratahigi lavoa gara vwate vi mai nin varan Jese.
Kea vi mai i vi tomuai ira Lolobon̄i,
i nora doronhohov vi mai bwatuna kea.”
13Nam dataro lalai God be mwa hogoi doronhohov be vi hogon bamasiri kimiu gin ron̄ mwandavuha i tamwata lol taro be giv binihimwasigi garagusi aluna. I nomiu doronhohov vi maumauri gin muramura non Vui Sabuga.
Pol mwa Avo huri Halan non Rovoga
14Ira tuaku, nam iloe be kimiu gin masiri gin tavuha. Nam iloe be kimiu gim do mai mataisao duluai be gim doronia i be kimiu giv vagahi dum kimiu gingin kimiu. 15Take nan ravae lalai kimiu huri ginau duluai, nan hav tahuli te vwate huri ginau rituai be nam doron kimiu be giv iloe. Nam lol ginau geki bwatun be God nu lai lalaiau hogoi tavuha 16huri be nav vora atatun rovoga non Kraes Jisas lalai nira Lolobon̄i. Nam lol rovoga non God be nam bagahi non Roroi Tavuha, be kera be ira Lolobon̄i rav vora ira hogoi be God vi dara aluna hogoi be nu lolian Sabuga nin Vui Sabuga.
17I nam ravwega maragai gin havanau be nan lolia lalai God alolon Kraes Jisas. 18Nasav mom avo tehe huri ginau vwate take nav avo huri havanau be Kraes nu lolia siviau lol taro be nan tomuai ira Lolobon̄i kun hanigi haḡe rav tabe God. Kera ran tabe God bwatuna havanau be nan vevea i nan lolia, 19bwatuna, muramuran ira ginau dan̄an̄a i ginau lalavoa be ran gitae, i huribe muramura non Vui Sabuga. Nan toretore la avoan Sabuga nin Jerusalem la hala mwa dalis vanua Ilirikum, i nan nogoi doren noḡu rovoga. 20Nan doron maragai be nav toretore la avoan sabuga lol ute be atatu ram hav ron̄ te ihan Kraes, bwatun be nan hav doron te didi lol mulei rovoga non atatu be ran tau bwativuna huba. 21Take nu ravana lol ravrava sabuga be:
“Kera be nu hav veveana tehe lalainira huria, rav gitae,
i kera be ran hav ron̄oe tehe rav iloe.”
Pol mwa lol Vatuvwai be vi Van Rom
22Geki haḡea huri hano nam hav mai te vai vusi vai abemiu. 23Kadogaha nan nogoi noḡu rovoga teti. Vataha taulu ivusi huba nan doron be nav mai abemiu, 24Nan doronhohov be nav mai abemiu la halaku be nav vano vai Spen. Ataguna be nan ron̄ mwandavuha mai kimiu, Nan doron be giv buluiau mai halaku. 25Kadogaha namen vano vai Jerusalem ba bului sinombu non God. 26Ira binihimwasigi ata Masedonia i ata la n̄olin vanua Kris ram ron̄ mwandavuha be rav lai nora mwane ba bului atat non God be ram hiruga Jerusalem. 27Kera ram ron̄ mwandavuha be rav lolira geki, i mwasigi ran laia lalainira. Geki atatu be ira Lolobon̄i nu harae lalainira na vatavuha Sabuga non ira Jius, i kera ras lai nora vatavuha be nora abena lol ureure ba bului ira Jius. 28Ataguna be nan iloe, huri ira Jius ran lai mwane be nu laiana hurira, nav lin̄ia huri ute Spen, nav togo ba barahi sera kimiu. 29Nam iloe be lol taro be nav mai abemiu nav lai vatavuha non Kraes duluai.
30Ira tuaku, nam navohi kimiu duluai be giv buluiau ba tav tataro lalai God huri noḡu rovoga. Giv lol ginau geki huri be nonda Ratahigi Jisas Kraes i mai binihi marahi be Vui Sabuga mwa laia lalai gida. 31Giv tataro be nav rahu nin kera be ram hav binihi te mwasigi Judia i mai buluiana geki be nav laia vai Jerusalem rav ron̄ mwandavuha ginia na sinombu non God. 32I be God vi doroniau huria, nav mai abemiu mai samwarana, i mai buluiana, kimiu maiau taron nonda mambuana abena. 33God be mwa lai tamwata na togo abemiu duluai. Amen.
Currently Selected:
Rom 15: HNB
Highlight
Copy
Compare
Share
Want to have your highlights saved across all your devices? Sign up or sign in
Bible Society of the South Pacific
