Maak 16
16
Yeeshu Jinda Hei
(Methiu 28.1-8; Luuk 24.1-12; Yuhanna 20.1-10)
1Jab sabat ke din beet gais, tab Meri Magdalini aur Jeims ke amma Meri aur Shalomi mahke waala cheej khareedin, ki jisse ulog Yeeshu ke boḍi pe lagaay saki. 2Etwaar, jon hapta ke pahila din raha, ekdam sabere, suuraj nikre se pahile, ulog kabar pe chala gain. 3-4Rasta pe aawe ke ṭaaim ulog baat karat rahin, “Ham log ke waaste duaari pe se patthar kon haṭaai?” (U bahut baṛa patthar raha)
Lekin jab ulog uppar dekhin to patthar haṭa raha! 5Ulog kabar ke bhittar gain, huañ ulog ek jawaan admi ke ujjar kapṛa pahine, raaiṭ taraf beiṭha dekhin, aur ulog hairaan rahe gain.
6“Hairaan nai ho!” u admi ulog se bolis, “Ham janta hei ki tum Yeeshu Naasri, jiske kros pe chaṛhaawa gais raha, uske khojta hei! U jinda hoy gay hei, hiañ nai hei, dekho i wahi jagha hei, jahañ pe uske rakkhe rahin. 7Lekin tum log jaao, uske chela log se aur Peeṭa se bataay deo, ‘Ulog se pahile Galeel chala jaai. Tum log uske wahiñ dekhega, jeise u tum log se bataais raha.” ’
8Aur ulog kabar se nikar ke bhaag gain, kaahe ke ulog bahut ghabraay gain raha. Ulog ḍar ke maare koi se kuchh nai bolin.
Aakhri Susamaachaar
(Methiu 28.9,10; Luuk 20.11-18)
9Hapta ke pahila roj, ekdam sabere Yeeshu ke jinda hoy pe, sab se pahile Meri Magdalini, jisman se u saat dushṭaatma ke nikaaris raha, uske dekhaay dees. 10U jaay ke aapan saathi log ke jon dukh meñ ḍuuba rahin, aur rowat rahin, i niuz dees. 11Jab ulog sunin ki Yeeshu jinda hoy gais hei aur Meri Magdalini uske dekhis hei, to ulog ke biswaas nai bhais.
Yeeshu Dui Chela Ke Saamne Aais.
(Luuk 24.13-35)
12Iske baad Yeeshu dusra ruup meñ aapan dui chela log ke dekhaai dees, jon gaaoñ jaat rahin. 13I log bhi i baat aur sab se bataain lekin koi biswaas nai karin.
Gyaara Chela Ke Saamne
(Methiu 28.16-20; Luuk 24.36-49; Yuhanna 20.19-23; Prerito ke Kaam 1.6-8)
14Aakhri meñ Yeeshu u gyaara chela log ke saamne aais, jab ulog khaana khaat rahin. Yeeshu ulog ke jon uspe biswaas nai karin raha, uspe gussa bhais, kaahe ke ulog uske jinda hoy pe dekhin raha, lekin biswaas nai karin. 15Yeeshu ulog se bolis, “Tum dunia meñ sab bagal jaao aur sab jaat ke log ke i susamaachaar sunaao. 16Jon biswaas kari aur baptisma lei, wahi bache saki, lekin jon biswaas nai kari, u dosi maana jaai. 17Aur biswaas kare waalan ke saain rahi ki ulog hamaar naam se dushṭaatma ke nikaari. Ulog nawa nawa bhaasha boli. 18Ulog saañp ke uṭhaay lei ya jahar pee jaai to bhi ulog ke kuchh nai hoi, aur agar rogi pe haath rakkhi to rogi achchha hoy jaai.”
Yeeshu Uppar Uṭhaay Lia Jaay Hei
(Luuk 24.50-53; Prerito ke Kaam 1.9-11)
19Ulog se baat kare ke baad, Prabhu Yeeshu ke swarag meñ uṭhaay lewa gay, aur Parmeshwar ke raaiṭ saaiḍ meñ beiṭha hei. 20Aur uske chela log jaay ke sab jagha parchaar karat rahin, aur Prabhu madat karat raha, aur jon chamatkaar ilog karat rahin, usse uske vachan ke majbuut karte gain.
Currently Selected:
Maak 16: FRHNT
Highlight
Copy
Compare
Share
Want to have your highlights saved across all your devices? Sign up or sign in
Fiji Romanised Hindi © Bible Society of South Pacific, 2016.
