Zẹkaraya 2
2
Ịmiin dị egbolomaam oḍigh dị rạtooghiom ḍịdoony
1Esi ịnon ịmiin mị ụmiin oye dị ạpham oḍigh dị rọtooghiom ḍịdoony 2kụ mị apuru mọ, “Nạ rạki ẹghen?”
Kụ ọdi ạphagharanaan mọ, “Mị rạki ọtooghi aJeruselem ọmiin ạḍidoony phọ rꞌẹreghe phọ ọdi.”
3Pọ kụ amem dị mị ạmiin ọokpaany phọ ọpo rạkaaphan ghan bọ rꞌạmi dị aru amite, kụ ọnon ọokpaany aru ạteeny nyọdi. 4Kụ ọḅel phọ ạḅeni ọphori phọ mọ, “Kiil ạghi ạteeny onyugheel ọony phọ ọpo ạpham bọ oḍigh phọ ọpo rạtooghiom ghan bọ ạḅeni mọ aḍita awe rꞌịnam dị kẹtol Jeruselem kẹbugh ni ẹpughan ọḅiir iikpe oghoonyom. 5Ọmoogh-we phọ maguanaan mọ ọno rꞌaloor kụ kaḍighi iikpe ạnian dị kekitonom ẹḅile ekori ẹmha phọ ḅịle kẹn mọ ọno katugh sịphe rꞌoomo eegu phọ ọno.”
Ọmagh weye phọ ọrol bọ iiruen ạramha mọ origheleghu
6,7Ọmoogh-we phọ ạḅeni ni weye phọ ọdi mọ, “Mị kụ ụuwalalami bọ ni inyina. Kụ ọlo nyịidipho nyina edi bọ dọl iiruen phọ ẹpe Bạbilonia, isumughu erigheel Jeruselem. 8Oye lọ ịgur inyina pọ mạgur ịyaar ạmi dị ẹman mạar iboom.”
Kụ iḍighi kụ Ọmoogh-we Oomo Ịikpo phọ urom ịmi ọghi ọteeny areelhe phọ ịpe mewum bọ ẹsighiogh rạraar awe phọ ọdi ọḅeni dom mọ aḍien: 9“Ọmoogh-we phọ rꞌaloor kụ kiruphiom inyina ẹgham, kụ awe dị oḍighi ghan rẹbene anyina kụ kobum ọsighiogh rạraar anyina.”
Mem dị ịphen memite, tọrotoro oye kalegheri ni mọ Ọmoogh-we Oomo Ịikpo phọ kụ urom ni ịmi.
10Ọmoogh-we phọ ạḅem mọ, “Weye aJeruselem, ịmoor sụor iboh! Mị ratu orughan rꞌanyina.”
11Mem mọ ạmuphe phọ awe ịbadi areelhe kotu ni esi Ọmoogh-we phọ kụ oḍighi weye ọdi. Ọdi katugh ni sịphe igbo phọ anyina, ḅịle kẹn nyina kelegheri ni mọ ọdi kụ urom ni ịmi oru ọteeny anyina. 12AJuda kạḅile kẹn ni aḍighi ẹmha phọ Ọmoogh-we phọ ạsaḅar bọ sịen ade iigbia phọ ọdi, kụ aJeruselem kaḍighi ni ẹmha phọ ọdi ạkar bọ ạphomoghian.
13Tọrotoro oye aḅoorian ghisigh Ọmoogh-we phọ, loor esi dị ọdi katu sịphe ạdol iigbia phọ ọdi atugh.
Currently Selected:
Zẹkaraya 2: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
