Bụo aRom 7
7
Ịsighe pinien elegheriom
1Bụo asiya, mị ameeraam ni mọ nyina elegheri ni ekuphom owol (mị ạkaaph ghan rạḅeni we dị olegheri ni ịminighan ịlo iilogh phọ) mọ amem dị oye phọ odi rapooghu bịn kụ ẹdi ịtooghi iilogh phọ rekpobiom ghan nyọdi. 2Esi ọmaam, amem mọ olhom mọ odi bọ rapooghu kụ ẹdi iilogh apinien rẹkoroghi ghan ạnir phọ. Olhom mọ romugh bịn mọokpo ạnir phọ iḍigh iilogh phọ ẹghoroghi bọ nyọdi. 3Loor ịphen phọ, ạnir phọ ạghi arughan ọnon olephiri ọony, mem dị olhom mọ ọdi odi ni, kokol nyọdi mọ oliom ẹmha. Olhom mọ ọdi amugh kụ ọdi ạghi ạal ịnon ilhom, ologh oliom ẹmha nyọdi ósiph mun. 4Bụo asiya ạmi, igina phọ nẹneen kụ idianaan inyina. Ịdipho ọḅaram aani bọ igbaany ạroozo phọ anyina rꞌaKraist oghiigh sịphe oreeny phọ kụ ịdi aḍuugh phọ nyina emugh bọ mịikpo inyina iḍigh Ologh phọ aMozis. Nyina mẹmoogh eepoogh ạal ọnon olhom, nyọpo oḅeton bọ sịphe aḍuugh phọ, ọbo yira oḍighi bạay ọngo Ẹnaan. 5Mem mọ yira ọrolom bọ ruzu-ạnyu phọ bịn, ịkaraph ạruuphua iphulupul phọ Ologh phọ rạlogh ghan bọ ịiphaghamiom mọ, kụ iḍighi ghan oḍighi loor ayira, ọbo yira oḍighi bạay ọngo ḍuugh. 6Kụ ọlo nyịidipho mụukpo iyira iḍigh Ologh phọ, ịdi eḍighi bọ yira momugh ọotoghonaan ịpe ịpham bọ iyira. Oḍighi phọ yira roḍighi ghan bọ kọngo Ẹnaan rạ́daph mun igbaany ịlo iilogh dị ọgeeghi, rạdaph ghụn imoom areten Uwaloor phọ.
Ologh ḅịle rꞌịkaraph
7 #
Ẹḍua 20.17; Dut 5.21 Yira kọkaaph bọ eeghe nụun? Kọḅem mọ Ologh phọ aMozis pọ ịkaraph ḍụghum? Kị́dipho. Ologh phọ kụ aḍighi kụ mị alegheri aani ịyaar dị ịkaraph eru. Esi ọmaam, mị múlegheri aani ịyaar dị ọseph-ọsighenom aru, mọ iilogh phọ mị́ḅem bọ mọ, “Kạ́seph ịyaar ọnon oye ạsighenom.” 8Ịkaraph phọ ịtuan ologh phọ ọphon kụ ẹmoogh bọ eepoogh ọmaraghi ọdo kịrokiro ephogh-aḍien phọ ẹlogh ologhi phọ ạmi. Esi lọ úloghoma mọ iilogh edi ghan ni, róloghoma ghan ịkaraph. 9Mị rꞌaloor ạmi ụrol ghan ni ḍịo ạmi bịn dị iilogh úloghoma, kụ okpegheron ologh phọ oḍeenaan ạmi phọ, bịn ịkaraph phọ emiigh ọḅa eye, 10kụ mị aloghoma mọ aḍuugh ạmi mẹteeny. Kụ ologh phọ oḍuom bọ ologhi mọ kạngo ghuḍum mọ, ạḅile ghụn ạsighe ḍuugh kụ uruom ịmi. 11#Emi 3.13Ịkaraph ịtuan ologh phọ kụ ẹmoogh bọ eepoogh ookeleghi ạmi. Ịkaraph ịtuan ologh phọ kụ ighiigh bọ ịmi eseere.
12Esi okpere, Ologh phọ aseleman ni, ḅịle tọrobo ọkal aseleman kẹn ni aakuan ạnighe. 13Kụ ẹkigh mụdi ịpe ẹnighe bọ kụ ịkom bọ ḍuugh phọ ạmi eseere ḍụghum? Kị́dipho. Ịkaraph kụ ịkom bọ. Ịkaraph ịsighe ịpe ẹnighe bọ kụ ẹkomom bọ ḍuugh phọ iruom ịmi, ọbo eganana ọmiin ọman ịyaar dị ịkaraph eru. Esi ịkala iilogh phọ, ịkaraph dị ịlo ọmaam ílho mẹeweleghian loor.
Oye ạmoogh bọ ịyal ọdo ạroozo
14Yira olegheri ni mọ Ologh phọ ịlo Uwaloor, kụ mịna oopho ịḅaal rꞌiphulupul dị ọsighe ịdipho ẹbene aalha ịkaraph. 15#Gal 5.17Mị úlegheri ẹmhu ịlo mị raḍighi, ịdi eḍighi bọ mị ráḍighi ghan ịpe ịḅeeraan bọ ịmi oḍighi phọ. Mị raḍighi ghan ghụn ịpe ikia bọ ịmi. 16Mị aḍighi ịpe mị ụ́wa bọ oḍighi phọ, ẹkasian ghụn ni bịn ẹgbaanyan mọ mị ameeraam ni mọ Ologh phọ ạnighe ni. 17Ịduon phọ, mị kụ rạ́kar ghan bọ kaḍighi ịphen phọ, ịkaraph phọ ghụn erugh bọ loor phọ ạmi kụ reḍighi ghan bọ ịphen phọ. 18Mị alegheri ni mọ igey loor ạmi ítugh, mị ụḅem ghụn mọ sịen igbaany ạroozo phọ ạmi. Ọbo rịphu ghan ni ịmi oḍighi ghan igey, kụ mị rátue ghan bọ kaḍighi. 19Mị ráḍighi ghan igey phọ mị rạwa ghan bọ oḍighi phọ. Mị raḍighi ghan ghụn ịkaraph phọ mị rạ́wa ghan bọ oḍighi phọ. 20Mọ mị aḍighi ịpe mị ụ́wa bọ oḍighi phọ, pọ mị kụ ráḍighi ghan bọ, ịkaraph phọ erugh bọ loor phọ ạmi ghụn kụ reḍighi ghan bọ.
21Mị mạwa ạmiin ịlo ologh phọ ọphon phọ mọ mem lọ mị rạwa oḍighi igey, ịkaraph ghụn kụ retu ghan kegbororian. 22Iilogh phọ Ẹnaan ẹḅeeraan ni ịitughian phọ ạmi. 23Kụ mị ạḅile rạmiin ghan ọnon ologh dị ragir sịphe aloor phọ ạmi, ologh dị ạmooghom ịikpalaghian rꞌọpo ạḅeeraan bọ ologhi phọ ạmi. Ụphaḍi ni ịmi bịn aseenaan ologh ịkaraph phọ regir bọ loor phọ ạmi. 24Pọ eeghe ạagia dị mị aḍigh! Ạnhian kụ kụphel bọ ịmi amitiom sịen aloor phọ ạḍien phọ mirorori bọ ịmi rẹkiom ḍuugh? 25Ạḍiseph edianaan ni Ẹnaan, ịdipho ọdi mạtuan bọ Jịzos Kraist Ọmoogh-we phọ ayira kụ mụphel bọ ịmi.
Ḍịen phọ kụ ạdol phọ mị odi bọ: ụwile ịmi rꞌịitughian phọ ạmi bịn, mị kạsighe ni ologhi phọ ạmi aakoom iilogh phọ Ẹnaan, kụ ọlo iphulupul phọ ạmi ekumu ghan rẹngo ologh ịkaraph phọ.
Currently Selected:
Bụo aRom 7: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
