Ạsuor 92

Ạḍuor oboomiom Ẹnaan

1Ọpo eeghe ịdi ẹnighe ọngo ghan ạḍiseph nyịna, Ọmoogh-we,

ọmoor sụor ọngo eghuan nyịna, Ọkaraghi Egbogh Ẹnaan,

2ogbeelom ẹphomoghian phọ ạna ḍịroor ạḍiroor

rꞌébi ghan oguan phọ ạna dulhe adulhe

3rꞌephegh ạraraar iitia dị ọkpamaghiom iḍigh

rꞌịma ẹḍogh loor ọne.

4Iboom iiḍighi phọ ạna, Ọmoogh-we, ịngo ịmi ọḅaal ologhi;

loor esi ịdi nạ aḍighi, mị rạmoor sụor iboh.

5Pọ eeghe ạḍibugh dị iiḍighi phọ ạna ẹbugh, Ọmoogh-we;

ịitughian phọ ạna ẹkel li iboom.

6Phọn ịyaar dị uwo elologhi kálegheri;

oghiil oye kạ́naghanan.

7Ghạlamo ịdipho ịkaraph awe kotue bọ ni opoph ịdipho ọmirimiir,

bụphe oḍighi bọ ịkaraph oḍum,

kotue ni oogulemi bịdi bịn kꞌagee-pọ,

8loor esi dị nạ, Ọmoogh-we, kụ ogbogh kꞌagee-pọ.

9Yoor olegheri ni mọ ạbumulogh-ḍien ạna komugh ni,

ḅịle kobinighiom ni oomo ạbuo ẹkaraph eḍighinom ịyaar.

10Nạ mụngo ịmi ịikpo aḍilephiri ạnam eḍum;

nạ mụsephom ịmi ọḅaal ologhi.

11Mị mạmiin ni bụmulogh-ḍien phọ ạmi momeel bọ

ạḅile ạnaghan emoghi awe ạsipioghom.

12Awe aruukuan koḍum ịdipho areelhe ạmunum;

bịdi kopoph mụdi ọsaga ẹpe Lẹbanon.

13Bịdi ọkigh ireeny dị ọzuph sịphe otu Ọmoogh-we phọ,

dị eḍum agey sịphe Otu Ịiḅereghi Ẹnaan phọ ayira,

14dị kemuum ni iimuma mem dị mọkpo

kụ oomo amem ẹminamina kụ ẹmoogh ịnyaam.

15Ịphen phọ eḍeenaan mọ Ọmoogh-we phọ oye aruukuan,

mọ ạsipioghom ílho loor ọpo uukpereghi bọ ịmi.

Currently Selected:

Ạsuor 92: ẠḌI

Highlight

Copy

Want to have your highlights saved across all your devices? Sign up or sign in

Abuan Language Development and Literacy Society

Ayama-Abua, Rivers State, Nigeria

Published by

NBTT

Nigeria Bible Translation Trust

No. 7 Old Airport Road

P.O. Box 790, Jos Plateau State, Nigeria

ISBN: 978-978-966-354-5

In cooperation with

MIDI BIBLE

Ch. de Praz-Roussy 4b, 1032 Romanel-sur-Lausanne, Switzerland

The New Testament in Abuan was originally published

in 1978 by The Bible Society of Nigeria with © UBS

Learn More About Ạḍinya Iigbia