Ạsuor 91

Ẹnaan Aḍibuo ayoor

1Tọrobo ọlo ạghi kꞌỌmoogh-we phọ oḍigh uba,

tọrobo ọlo ạrolan rꞌeekpereghian Ọkaraghi Egbogh Ẹnaan phọ,

2katue ni ạḅeni nyọdi mọ,

“Nạ kụ ọsuaram ạmi rꞌaḍibuo ạmi.

Nạ kụ Ẹnaan ạmi, esi ạna kụ ẹdi mị ạkpasi emooph ạmi.”

3Ọdi kạmaar ri ạpham nyịna esi oomo ịkaraph ạraraar lọ ạaghian

rꞌesi oomo ịkaraph ạreezegh aḍuugh-aḍuugh.

4Ọdi kaakpereghiom nyịna raphaaph ọdi;

nạ kạmaar ri ạtol sịphe ẹphamam mọ ọdi;

amabi-ólho phọ ọdi kaakpereghi ni nyịna ạḅile ạphel nyịna.

5Nạ kákiilaan ịyaar aḍiigu ḍughul

mꞌekperenom ozuom ootaany,

6mꞌẹkaraph ẹzegh dị ẹḅukian pạ ufiri phọ,

mꞌịkaraph dị ẹze ghan ootaany.

7Oniin ọonir awe komeel li omugh ọogaany ạna,

ḍioph ọonir okoom nyịna,

kụ ịyaar nyịna kéḍighi.

8Nạ kapogh kụ ạmiin

ịdi kọliom we ẹkaraph eḍighinom ịyaar.

9Nạ maḍighi Ọmoogh-we phọ ọsuaram ạna,

Ọkaraghi Egbogh Ẹnaan phọ aḍibuo ạna.

10Kụ iḍighi kụ ịyaar dị ị́nighe nyịna kẹ́gur,

ịyaar ẹgham kétuman kꞌạna.

11 # Mat 4.6; Luk 4.10 Ẹnaan keseere rụukpaany phọ ọdi ephogh ghan nyịna

ọphel ạna tọrobo ekpisi lọ nạ ạghi.

12 # Mat 4.6; Luk 4.11 Bịdi kokori okoph nyịna

ọbo nạ kạnmighima ghan bọ owol loor aḍighiigh.

13 # Luk 10.19 Nạ kạazeghi ạnam-dịka rꞌạrakaraph ạraraar,

ạnam-dịka dị rẹlayaghuan rꞌạrakaraph ạraraar dị rẹze ghan we.

14Ẹnaan ẹḅem mọ, “Mị kạpel li bụphe ụphomoghian bọ ịmi

ạḅile aakpereghi bụphe mọlhogh bọ elegh mọ mị kụ Ọmoogh-we phọ.

15Mem lọ bịdi ụmagh ịmi, mị kạnaghanan ni bịdi;

mem lọ bịdi odi esi ịiḅaghami, mị kạtolan ni rꞌạbidi.

Mị kạtagharan ni bịdi ạḅile akueni bịdi.

16Mị kanmoom bịdi kụudoony aghuḍum;

mị kạpel li bịdi.”

Currently Selected:

Ạsuor 91: ẠḌI

Highlight

Copy

Want to have your highlights saved across all your devices? Sign up or sign in

Abuan Language Development and Literacy Society

Ayama-Abua, Rivers State, Nigeria

Published by

NBTT

Nigeria Bible Translation Trust

No. 7 Old Airport Road

P.O. Box 790, Jos Plateau State, Nigeria

ISBN: 978-978-966-354-5

In cooperation with

MIDI BIBLE

Ch. de Praz-Roussy 4b, 1032 Romanel-sur-Lausanne, Switzerland

The New Testament in Abuan was originally published

in 1978 by The Bible Society of Nigeria with © UBS

Learn More About Ạḍinya Iigbia