Ạsuor 86
86
Ịiḅereghi ọloghonaan ạḍighaagh
1Ụnaghanan ịmi, Ọmoogh-we, kụ ụphagharanaan ịmi,
loor esi dị ọloghonaan ạḍighaagh ịmi úlho kụ mị madugh.
2Ụphel ịmi ạsighe esi aḍuugh, loor esi dị mị ameeraam ni nyịna;
ụphel ịmi, loor esi dị mị otelhedom ạna kụ mị ạkpasi emooph ạmi esi ạna.
3Nạ kụ Ẹnaan ạmi. Ụnma ịmi ighirigiir;
mị ạaḅereghi nyịna oomo aḍio.
4Ḅạalami ologhi otelhedom mọ ạna, Ọmoogh-we,
loor esi dị ịiḅereghi phọ ạmi ẹki ni ạnyu ẹteeny nyịna.
5Nạ ạnighe ni esi ayoor kụ ạsar ghan ịkaraph rạbilenaan;
ẹphomoghian phọ ạna rémuneen ghan bọ emuzanaan bụlo rọoḅereghi ghan nyịna.
6Nạghan, Ọmoogh-we, ịiḅereghi phọ ạmi;
nạghanan emoghi ọloghonaan ạḍighaagh phọ ạmi.
7Mị ạmagh nyịna mem ịiḅaghami
loor esi dị nạ rạnaghan ghan ni ịiḅereghi ạmi.
8Ẹnaan lọ ẹrol ịdipho ạna ílho, Ọmoogh-we;
rꞌoniin kőḍighi ghan ịpe nạ maḍighi bọ.
9 #
Ogon 15.4
Oomo areelhe phọ ịpe nạ mạlhem bọ
kotu okpuḍughian risigh ạna;
bịdi koboom igbogh phọ ạna.
10Nạ ọkar ogbogh kụ raḍighi yogh ghan rạraar ịiḍaany;
nạ bịn kụ Ẹnaan.
11Ụtughemi ịmi, Ọmoogh-we, ịlo nạ rạwa mọ mị uḍighi,
bịn mị kạnaghanan ni agey;
ụtughemi ịmi okumu ạna agey.
12Mị kaaseenyom nyịna rꞌoomo ologhi ạmi, Ọmoogh-we Ẹnaan ạmi.
Mị kagbeelom ghan ni igbogh phọ ạna kꞌagee-pọ.
13Ẹphomoghian phọ ạna rémuneen ghan bọ esi ạmi ẹbugh ni iboom.
Nạ mụphel ịmi ạsighe loor aḍuugh rꞌoḍi phọ.
14Awe ophoophe aloor rotu esi ạmi, Ẹnaan;
aḍita awe asighiton rọwa oghiigh ạmi,
awe dị ụ́maghami nyịna ịyaar.
15Kụ ọlo nạ, Ọmoogh-we, nạ kụ Ẹnaan ọnma ighirigiir rꞌẹphomoghian,
oomo amem rạkparam ghan, oomo amem rạmoogh ghan igbiririph, ọ́moogh mabi.
16Kiton usoman ịmi ạḅile ụnma ịmi ighirigiir,
ụkparami ịmi ạḅile ụphel ịmi,
loor esi dị mị rakumu nyịna ịdipho onhiin ạmi akumu bọ.
17Gananami ẹnighe phọ ạna uḍeenaan ịmi, Ọmoogh-we;
umugholoor kasiph ni bụphe ụlogh bọ ịmi ḍien
mem dị bịdi ọmiin mọ nạ mụngo ịmi ịidereghi rꞌạpeleeny!
Currently Selected:
Ạsuor 86: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
