Ạsuor 85
85
Ịiḅereghi ịma ạdol eelhe
1Ọmoogh-we, nạ mạnma ni ighirigiir de phọ ạna;
nạ mạḅile ạngo Ịzirel ẹelha.
2Nạ mawula ịkaraph awe phọ ạna
kụ ạsar ạbilenaan sịpioghom mọ ạbidi
3Nạ ụwile ọghagham ạbidi ologhi
ạḅile ạphamaghan ọghologhol ọghagh-ologhi phọ ạna.
4Uḅulemi iyoor, Ẹnaan ọpelia ayoor,
ạḅile ạwile ọmoogh aḍikia esi ayoor.
5Nạ kụghagham iyoor ologhi kꞌagee-pọ ḍụghum?
Ophin ologhi ạna kámuneen mun ḍụghum?
6Ḅịle ụusa iyoor,
bịn yoor, awe phọ ạna, koboom ni nyịna.
7Uḍeenaan iyoor ẹphomoghian phọ ạna rémuneen ghan bọ, Ọmoogh-we,
kụ ụngo iyoor pẹleeny phọ ạna.
8Mị rạnaghan ni ịpe Ọmoogh-we Ẹnaan phọ rạḅem bọ;
ọdi uguanaan iyoor awe phọ ọdi, ẹepho,
eḍighi mạar lọ yoor úḅula mun reten élegheri-ịyaar phọ ayoor.
9Ọkar agey ọdi ạnya ni ọphel ạbuphe ọlogh bọ nyọdi eghuan,
ḅịle ạpeleeny phọ ọdi kạtol li sịen ade phọ ayoor.
10Ẹphomoghian rꞌomeeraam kụ ẹḅophan;
aruukuan rꞌẹepho keezuanaan ni.
11Ọḅogh aloor ọngo phọ oye kạḍua sịen ade asi kꞌạke;
kụ aruukuan phọ Ẹnaan ẹḍua kꞌạke esoor sịen ade phọ.
12Ọmoogh-we phọ kạḅile ụngo iyoor ẹelha,
kụ ade phọ emitiom igey ibugha.
13Aruukuan keḍia risigh Ọmoogh-we phọ
kụ eseleminaan eten nyọdi.
Currently Selected:
Ạsuor 85: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
