Ạsuor 79

Ịiḅereghi ọtagharan eelhe

1 # 2 Ạbud 25.8-10; 2 Krọ 36.17-19; Jer 52.12-14 Ẹnaan, ạbumulogh-ḍien dị nyịna úmeeraam moḍigh de phọ ạna.

Bịdi mọopu Otu Iigbia phọ ạna

ọḅile opiemi Jeruselem.

2Bịdi ụwile ḍizu awe phọ ạna mọ ạredelhe ạa,

iphorobo iḍim abutelhedom mọ ạna mọ ilhom ịnam kụ ạa.

3Bịdi uuduḍi ịḅaal awe phọ ạna mụdi ạmuum;

ịḅaal kụ ekil mụdi ạmuum oomo ẹmha phọ aJeruselem,

kụ oye ọ́rol oḍiighi ạbuphe omugh bọ.

4Areelhe phọ ekoom bọ ụsinoghom iyoor ịghor;

bịdi ụmilogh iyoor kụ ụnmoghoghoom iyoor.

5Ọmoogh-we, nạ kụghagham iyoor ologhi kꞌagee-pọ ḍụghum?

Ophin ologhi ạna kaamor mụdi ạnian, ạkiom ghisigh ḍụghum?

6Kiton ophin ologhi ạna aphoghomiom reelhe phọ ịpe nyịna róoseeny ghan bọ,

aphoghomiom we phọ ạbuphe nyịna rọ́oḅereghi ghan bọ,

7ịdi eḍighi bọ bịdi mọze we phọ ạna,

bịdi mọphue eelhe phọ ạna.

8Kụ́lhiom iyoor loor ịkaraph ạburude ạburude phọ ayoor.

Ụnma iyoor ighirigiir;

yoor ụ́moogh mun oḍuom-ologhi.

9Ụphel iyoor, Ẹnaan, ạḅile ụtagharan iyoor ạsighe;

ụnma iyoor ighirigiir

loor esi eghuan phọ ạna.

10Uḍighi ika kụ areelhe phọ upuru bọ iyoor mọ,

“Ẹnaan phọ anyina edi ẹghen?”

Eḍighi ni ịdi yoor kọmiin mọ nạ ạliom ni reelhe phọ

esi ozuughi ịḅaal abutelhedom mọ ạna!

11Nạghanan ịkuph awe ikoli phọ,

kụ esi igbogh ịikpo phọ ạna seere ẹereegh bụphe mosophonaan bọ ọoruen aḍuugh.

12Ọmoogh-we, ḅulemian ịpheri phọ areelhe phọ oḍual amem

esi ịpe bịdi ọsinoghom bọ nyịna ịghor phọ.

13Ọbo yoor, awe phọ ạna,

iyool-ịga aḍita phọ ạna, ọseph nyịna kꞌagee-pọ

ọḅile ooseeny nyịna oomo amem kꞌagee-pọ.

Currently Selected:

Ạsuor 79: ẠḌI

Highlight

Copy

Want to have your highlights saved across all your devices? Sign up or sign in

Abuan Language Development and Literacy Society

Ayama-Abua, Rivers State, Nigeria

Published by

NBTT

Nigeria Bible Translation Trust

No. 7 Old Airport Road

P.O. Box 790, Jos Plateau State, Nigeria

ISBN: 978-978-966-354-5

In cooperation with

MIDI BIBLE

Ch. de Praz-Roussy 4b, 1032 Romanel-sur-Lausanne, Switzerland

The New Testament in Abuan was originally published

in 1978 by The Bible Society of Nigeria with © UBS

Learn More About Ạḍinya Iigbia