Ạsuor 74
74
Ịiḅereghi ọtagharan eelhe
1Uḍighi ika kụ nạ ụḅitonaan bọ iyoor awe phọ ạna ịduon, Ẹnaan?
Nạ kạkagham ologhi weye phọ ạna kꞌagee-pọ ḍụghum?
2Tụutughian bụphe nạ ạsaḅar bọ aseerian kꞌaḍiodiidi phọ,
bụphe nạ amitiom bọ dọl ạrebene oḍighi awe phọ ạna.
Tụutughian Eegum mọ ạZayon, esi phọ nạ mạrol ghan bọ ni mem.
3Kịa ạmiin ịdi ạbumulogh-ḍien phọ ayira
moogulemi Otu Ịiḅereghi phọ ạna ophiemi oomo ạraraar.
4Ạbumulogh-ḍien phọ ạna mọlo ḍịolho ọkpar opu ologhi Otu Ịiḅereghi phọ ạna;
bịdi mogimi sịlagba ạbidi sịphe.
5Bịdi ụghigh we oḍighi ireeny
dị roogboom ghan ireeny sikubu ạbidi.
6Rꞌasikubu rꞌigbogh ịkanam ạbidi,
bịdi mọgurogh obunughi oomo ạraraar dị ọkaam ireeny,
7oogulemi Otu Ịiḅereghi phọ ạna kụ ọsu nịan.
Bịdi mọopu esi phọ rooseeny ghan bọ nyịna.
8Bịdi ụwa ni bịn oogulemi ayoor;
bịdi mọsuughi nịan oomo ariisi iigbia sịphe ade phọ.
9Oomo ạraraar elegh ạdol iigbia phọ ayoor mọsighiogh,
ariil Ẹnaan phọ úsugha mun,
kụ oye ólhegheri ọdo amem dị ịphen phọ kẹtol bọ.
10Kꞌạpur amem, Ẹnaan, kụ ẹdi ạbumulogh-ḍien phọ ayoor kọtol ghan ọmilogh ạna?
Bịdi kọopu ghan ni ḍien phọ ạna bịn kꞌagee-pọ ḍụghum?
11Eeghe kụ nạ ómeera mun bọ ọloghonaan ayoor ḍịghaagh phọ?
Eeghe kụ nạ ạgbagha bọ rạghaagh phọ ạna ọman?
12Kụ ạri nạ maḍighi ọdaam mọ ayoor kꞌemiighom, Ẹnaan;
nạ mụphel li iyoor ịbadi amem.
13 #
Ẹḍua 14.21
Ịnyaam ạna kụ ịdi nạ ạsighe bọ kụ adiom bọ mụum ọphiiny phọ aatughuḍi
kụ ạgurogh rụmhu asinonom mọ ẹrol bọ ọphiiny phọ ạze.
14 #
Job 41.1; Ạsuo 104.26; Azay 27.1 Nạ ạgurogh rụmhu anonom mọ oghol bọ mọ ạLeviatan
kụ ạngo iphulupul phọ ọdi mọ ịnam ẹdala phọ ạany.
15Nạ aḍighi ịdi ạruunu adir rꞌebaraph ạmuum ekilogh;
nạ aḍighi ịdi igbogh ạriphiiny emoopha yogh.
16Nạ kụ ụlhem bọ ootaany rꞌaḍughul phọ;
nạ kụ usereghi bọ erumuḍio phọ rꞌụnwanyu phọ sịdol phọ ạbidi.
17Nạ kụ ụlhoghoḍi bọ rụuku ade phọ;
nạ kụ umitiom bọ ghozogh rꞌunu.
18Kịom ologhi, Ọmoogh-we, mọ ạbumulogh-ḍien phọ ạna rọmilogh ghan ni nyịna,
mọ bịdi úlegheri Ẹnaan kụ momutonaan nyịna.
19Kạ́ḅitonaan we phọ ạna ẹlhoghonaan ụmoogh bọ ạngo bụmulogh-ḍien phọ ạbidi;
kábula we phọ ạna rọgbiphoghom bọ.
20Tụutughian ịyo phọ nạ aghiran bọ rꞌayoor.
Ọwa-asighiton odi ni tọrobo ẹkul ade phọ lọ ufiri odi.
21Kámeera mọ umugholoor asiph bụphe rọgbiphoghom bọ;
ḍighi ịdi arukulom mọ rꞌawe ẹkparam mọ kooseeny ghan nyịna.
22Zạamian ghan ni loor, Ẹnaan, kụ ạghaaph ịpe ạna.
Legheri mọ awe dị Ẹnaan úlegheri rọmilogh ghan nyịna oomo aḍio.
23Úbula ghan ḍịaḅa oomo amem mọ ạbumulogh-ḍien phọ ạna,
úbula ghan ḍịaḅa ạbumulogh-ḍien phọ ạna mem résoph bọ.
Currently Selected:
Ạsuor 74: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
