Ạsuor 73
73
Omuneniom ịraar ạḍinya
(Ạsuor 73—89)
Ịiruen phọ Ẹnaan
1Ẹnaan ẹkar ẹnighenaan we phọ Ịzirel,
bụphe iloghi phọ ạbidi ẹserere bọ.
2Kụ ọlo esugha ẹnum bịn ọbo mị ologhi múḍuom mun;
omeeraam ạmi ạwa ni ọḍuaghu
3loor esi dị mị ugbeghe ni we ophoophe aloor
mem dị mị ạmiin bọ mọ ạraraar ẹnighenaan ghụn we ạsipioghom mọ.
4Bịdi rọ́miinom ghan eephina,
bịdi ọmoogh ịnyaam omoonogh.
5Bịdi rọ́miinom ghan ịdipho ạbunon awe;
bịdi ụ́moogh ghan ịiḅaghami phọ ạbunon awe ọmoogh ghan bọ.
6Kụ iḍighi kụ bịdi ologhoma ophoophe aloor ịdipho ikoli orum,
ọkpologhian sighiton ịdipho ogudaguda ạsuoma.
7Ekpom ạbidi rẹḅaar ghan ịkaraph,
ḅịle iloghi ạbidi edimom ghan ogbiighi ịkaraph ịitughian.
8Bịdi rọmilogh ghan bụnon awe kụ kọghaaphogh ịkaraph;
bịdi opoophe loor kụ ọmoogh igbiighi ọgbiphoghom ạbunon.
9Bịdi rọkaaph ghan ịkaraph Ẹnaan phọ edi bọ kꞌạke phọ,
ọḅile opoophe loor kụ rọtooghi ghan kọngo weye ịsien ade phọ,
10Kụ ghạlamo awe phọ kꞌẸnaan ni bịn mokiton ropogh bịdi
ọḅile omeeraam rꞌạḍiḅeeraan tọrobo ịlo bịdi ọghaaph.
11Bịdi ọḅem mọ, “Ẹnaan kélegheri;
Ọkaraghi Ogbogh phọ kạ́wa ámitiom.”
12Ịdipho kụ ẹdi awe ạsipioghom mọ ọrol,
bịdi ọmoogh ẹeḍiom kụ ẹelha phọ ạbidi rẹbugh ghan bịn.
13Ịlo oopho ni bịn ḍụghum,
kụ mị aseere bọ dị mị ịkaraph úḍighi?
14Ẹnaan, nạ maḍighi ịdi mị rạmiinom ghan oomo aḍio phọ;
ḍịroor ạḍiroor nạ ụlhiom ịmi.
15Mụghumo mị ụḅemogh ghan ọdo ạraraar phọ ịphen,
mị múḅoghan mụdi mị oniin oye ạna ni.
16Mị akururu olegheri ẹmhu ịiḅaghami phọ,
kụ ẹkpar ẹpughan esi ạmi
17tụtu mị ạghi aḍigh Otu Ịiḅereghi phọ ạna,
kụ mị agbi olegheri ịdi kemitenaan bụo ạsipioghom mọ ruukuna phọ.
18Nạ kaseere bịdi riisi ẹghorom
kụ aḍighi ịdi bịdi komeel oguul ọman.
19Kopiemi bịdi egina amem;
kụ ekureriom ạbidi eḍigh ḍiigu.
20Bịdi ọkighogh mạlha dị ḍịroor bịn mowula;
bịdi koḍigh ighu, dị nạ mạnya, Ọmoogh-we.
21Mem dị ịitughian ạmi rekiḍim
ẹḅile ẹeḅaghami ekpom ạmi,
22Mị unakara ịdipho ẹnam;
mị nyịna ụ́naghanan.
23Ghạlamo ịduon phọ ni bịn mị ụrol ghan oomo amem atuman nyịna,
kụ nạ ạpham ghan ḍịghaagh ạmi.
24Nạ ụuḅakiom ni ịmi ịtooghi phọ ạna
kụ ruukuna phọ nạ kụsighenom ni ịmi rꞌeghuan.
25Eeghe ẹnon ịyaar kụ ẹdi mị ạmoogh kꞌạke epel nyịna?
Mị mạmoogh bọ nyịna, mị kạḅile rạwa ghan eeghe sịen ade phọ?
26Ologhi ạmi rꞌaloor ạmi ketue ni edugh,
kụ ọlo Ẹnaan kụ ịnyaam ạmi;
ọdi bịn kụ ẹdi mị ạwa.
27Bụphe oghel bọ nyịna kọkar ri kụ ope;
nạ kapiemi ni bụphe nyịna úmeelom bọ.
28Kụ ẹlo ạmi, eḍighi ni ịiḍaany otuman Ẹnaan,
ọmoogh eekpereghian esi Ọmoogh-we phọ ạda bọ aḅirini phọ,
kụ rogbeelom ni oomo ịpe ọdi maḍighi bọ.
Currently Selected:
Ạsuor 73: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
