Ạsuor 103
103
Ẹphomoghian phọ Ẹnaan
1Boom Ọmoogh-we phọ, nạ uwaloor phọ ạmi!
Oomo ịpe mị odimom bọ, iboom ḍien iigbia phọ ọdi.
2Boom Ọmoogh-we phọ, nạ uwaloor phọ ạmi!
Kábula oomo iiḅi phọ ọdi maḍighi bọ nyịna.
3Ọdi ạsar ghan rạbilenaan ịkaraph ạmi,
ạḅile aakonom oomo ạreezegh ạmi.
4Ọdi ómeera mị aḍigh ọmar iḍim,
ạḅile ụsephom ịmi ẹphomoghian rꞌạghusan.
5Ọdi amuzeḍiom ghuḍum ạmi igey ạraraar,
ọbo mị ạrol ugheel kụ amoon mụdi uga.
6Ọmoogh-we phọ raagbo ghan ịiruen kạphel bụphe awe rọgbiphoghom bọ
kụ ạngo bịdi ịlo ẹkpianaan.
7Ọdi agananami ni igbiighi phọ ọdi aḍeenaan Mozis
ạḅile aḍighi ịdi awe Ịzirel ọmiin ogbogh oḍighi phọ ọdi.
8 #
Jems 5.11
Ọmoogh-we phọ ạmoogh ghụsan rꞌẹphomoghian;
ịyaar rẹ́nuun ghan kephin ologhi ọdi kụ ẹphomoghian ọdi rémunughan.
9Ọdi rạ́ḅaaghiom ghan oomo amem;
ọdi rápin ghan ologhi bịn kꞌagee-pọ.
10Ọdi rụ́kpiom ghan iyira ịpe ịkaraph phọ yira ọkpianaan bọ,
ḅịle rụ́kpiom ghan iyira ịpe ịkaraph ayira ẹman bọ.
11Ịdipho okuaḍio phọ ạkelan bọ de phọ —
ịdipho kụ ẹdi ẹphomoghian phọ ọdi ẹbugh esi ạbuphe oghueni bọ nyọdi.
12Ịdipho emitenom erumuḍio phọ ẹkelan bọ emeelom mọ —
ịdipho kụ ẹdi ọdi rạsighe ghan ịkaraph ayira kạkele.
13Ịdipho ọde ạnma bọ ighirigiir nmụny ọdi —
ịdipho kụ ẹdi Ọmoogh-we phọ ạnma ighirigiir bụphe oghueni bọ nyọdi.
14Ọdi alegheri ni ịyaar dị ụlhemom bọ iyira,
ọdi ạatughian ni mọ ụlhemom iyira ophugh.
15Ẹlo-ẹlo ayira, aghuḍum ayira ạkigh rọogho.
Yira ropoph ghan koḍum mụdi ạfalaway eḍum;
16kụ ookuugh aphula, bịn manyororo —
oye ọ́miin mun.
17Esi ạbuphe oghueni bọ Ọmoogh-we phọ, ẹphomoghian phọ ọdi kẹtolan kꞌagee-pọ,
ḅịle egeny ẹphamam mọ ọdi kẹtol bịn oghiil atum oghiil
18esi ạbuphe ooko bọ ịyo phọ ọdi,
ọḅile bọ oḍighi ịtooghi phọ ọdi.
19Ọmoogh-we phọ maseere ạgada ọdaam mọ ọdi ẹpe kꞌạke;
ọdi kụ ọdaam dị rapogh oomo ạraraar.
20Iboom Ọmoogh-we phọ, nyina abugbogh ạruukpaany kꞌạke phọ,
dị rọnaghanan ghan ịtooghi phọ ọdi,
dị roler ghan rụru ịlo ọdi ạghaaph.
21Iboom Ọmoogh-we phọ, oomo anyina abutelhedom dị ọmoogh ịikpo ẹpe okuaḍio,
dị roḍighi ghan ịlo ọdi ạḅem.
22Iboom Ọmoogh-we phọ, oomo ịpe ọdi ạlhem bọ,
oomo ịpe edi bọ oomo ariisi dị ọdi rạda.
Boom Ọmoogh-we phọ, nạ uwaloor phọ ạmi!
Currently Selected:
Ạsuor 103: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
