Bụo aFilipai 2
2
AKraist ạwile igbogh phọ ọdi asooromi loor
1Eḍighi ịyaar dị aghuḍum mọ anyina esi aKraist rịngo ghan ni ịnyaam kụ ẹphomoghian phọ ọdi rịidereghi ghan ni inyina, nyina ẹmoogh ni mụḅoph rꞌUwaloor Iigbia phọ, kụ ẹḅile ni ẹnma ghan ighirigiir ẹmoogh igbiririph ogbo phọ anyina. 2Eḍighi ni ịduon phọ, pọ mị rịkpaariom ni inyina mọ iḍighi ịdi ologhi ạmi kạḅaal wororoph kụ yira kọmoogh ghan iniin ịitughian, oniin ạphomoghian nyoniin, ẹḅophoghan eḍighi nyoniin oye sịphe aruwaloor phọ rꞌiloghi phọ anyina! 3Kẹ́sighe ghan ịkaraph iipikian rꞌobaga kụ eḍighinom ịyaar lọ nyina reḍighi. Oniin asooromi ghan loor ạngo nyoniin oomo amem ạsighenom ghan mọ ọphori phọ kụ aḍighi ogey apu nyọdi! 4Oniin ạwa ghan ịlo kẹngo sụo nyọori phọ, kị́lo ọdi bịn! 5Ịmoogh ologhi phọ ọpo ạJizos Kraist ạmoogh bọ.
6Areeghe phọ Ẹnaan imunughan ni loor ọdi,
kụ ọdi ọ́otughian mọ, ịdipho ọno aalenyan bọ Ẹnaan, mọ ọno kạsighe ẹekpara ekpeḍien kụ ạtolom.
7Ọdi ạsighe ghụn ni rꞌophooph ologhi
kụ ạwileghi yogh oomo igbogh phọ ọdi,
kụ asoor dọl ẹbene
aateneghian amite ịdipho oopho oye.
8Ọdi asooromi ni loor
ameeraam omugh aḍuugh egbo sịphe oreeny phọ.
9Ẹmhu ịduon phọ, kụ Ẹnaan iphoophe bọ nyọdi kꞌẹpe ạnyu,
kụ ẹngo bọ nyọdi ḍien phọ epu bọ oomo ịnon asiḍien phọ,
10 #
Azay 45.23
ọbo esi oghueni aḍien phọ ạJizos
oomo ịlo edi kꞌạke, rꞌịsien ade phọ, rꞌịlo ghuḍum ị́moogh mun,
ekpuḍian nyọdi,
11kụ aḍita phọ ọkaaph omitiom mọ ạJizos Kraist kụ Ọmoogh-we phọ ni,
okueniom Ẹnaan Ọde phọ.
Ịmu ịdipho ạḍiḅaal sịen aḅirini phọ
12Loor ịphen phọ, iiḅi asiya ạmi, ịnaghanan ghan ni ịdipho nyina ịnaghanan ghan bọ ịmi mem mọ yira ọrolan bọ. Ẹkar ghụn eḍighi ephigh ọnaghanan ghan nyịidipho mị mịgbatanaan bọ inyina. Ịkparami ni ḍịghaagh ẹḅara oghiilaan eḍighi ịlo ạpeleeny phọ anyina kamunughan. 13Ilegheri mọ ịikpo phọ Ẹnaan reḍighi ni oḍighi loor anyina, ọbo nyina ẹnaghanan eḍighi ịpe ẹḅeeraan bọ nyọdi.
14Oomo ạraraar lọ nyina reḍighi, kégum ghan, ḅịle kẹn kẹ́egbaghanaan ghan, 15#Dut 32.5ọbo nyina eḍighi nmụny phọ Ẹnaan dị ookuan oseleman yogh. Ịtol dọl dị ịyaar inyina kị́biph sịphe ogbo ọkulakula aḅirini ịkaraph awe phọ. Ịmu sịphe ogbo phọ ạbidi ịdipho ạḍiḅaal sịen aḅirini phọ, 16ẹpham ekpophonom ọghaaph aghuḍum mọ. Nyina ẹrol ịduon phọ, pọ ḍio phọ aKraist katu bọ ẹegu-ọman ạmi kẹbugh ni, mọ eghiil aghuḍum mọ ạmi rꞌarukumuan phọ ạmi ípe oopho.
17Iini komoor ịḅaal aghuḍum mọ ạmi ịdipho amiim, ịlo omuneniom ịyaar aghuḍum mọ ọsighe bọ omeeraam mọ anyina kụ oḍighinom rọngo Ẹnaan. Eḍighi ịdipho, pọ ologhi ạmi ạḅaal li kụ mị ịḅophoghan ni inyina esi iboh phọ ạmi. 18Nyina phọ kẹn ịḅaalami ologhi ịḅophoghan ịmi esi iboh phọ anyina.
ATimoti rꞌẸpafroditos
19Eḍighi ni ogbi ạJizos Ọmoogh-we phọ, pọ mị aḍuom ni ologhi mọ mị katue ni atom Timoti ọnuun oru ọmiin anyina, ọbo ologhi ạmi aphooph mem dị mị alegheri ịlo nyina edi. 20Mị ụ́moogh ọnon oye ọmaaniom ọdi esi oseere anyina ologhi. 21Ọdi bịn kụ ạmoogh iniin ịitughian rꞌạmi ḅịle rꞌọkar oseere ologhi esi anyina. Oomo phọ ạbueri phọ mọwile ịpe ạJizos Kraist rọwa ghan ịlo ạbidi bịn. 22Kụ nyina elegheri ni ịdi aTimoti ạman. Ọdi rꞌạmi odianaan ịdipho ọde rꞌọony kụ rokumuan ghan ịlo ooḅi ọghaaph phọ. 23Mị rolegheri ịlo ạraraar kịrolonaan ịmi bịn mị ạnuun ni ratom nyọdi oru ọmiin anyina, 24kụ mị aḍuom ni ologhi mọ Ọmoogh-we phọ ameera ni mọ mị rꞌaloor ạmi káabinyemiom oru ọmiin anyina.
25Mị magbiighi amuneni mọ ẹkpianaan ni orom dị Ẹpafroditos katu, ọnyo asiya phọ ayira, ọpo rꞌạmi rokumuan bọ keenan ịlo ooḅi ọghaaph phọ, ọpo nyina ẹlhogh bọ kụ aru bọ ụghianaan ghan ịmi dom mọ. 26Ọdi ạkar ri rạwa ọmiin oomo phọ anyina, ḅịle rẹeḅaghami ni nyọdi iboom rꞌịduon nyina ẹnaghan bọ mọ aloor ọdi ị́nighe phọ. 27Ọkar agey ni, eephina phọ ịkpaariom ni nyọdi iboom dị ạwa ni omugh, kụ Ẹnaan ịnma ni nyọdi ighirigiir. Ighirigiir phọ ọ́nma nyọdi bịn, ịḅaram aani ni ịmi, ọbo mị kameelom ghan bọ ọto dị apelom ọto. 28Loor ịphen phọ, rẹkologhol li esi ạmi mọ ọdi aagborion aru, ọbo nyina ẹḅile ẹmiin nyọdi kụ ẹmoogh ọḅaal ologhi, mị phọ kẹn ologhi ạmi ạḅile asoor aani. 29Ọtuan ịphen phọ, ịsighenom ni nyọdi rꞌọḅaal ologhi ịdipho ọnyo asiya rꞌỌmoogh-we phọ, ẹlhogh ghan eghuan ọdo awe phọ ạbuen, 30ịdi eḍighi bọ esugha ẹnum ọbo ọdi mạtuan oḍighi phọ aKraist amugh, ọ́lhogh ẹekaany ghuḍum ọdi, ẹrol dị ọdi uḍighinaan ghan ịmi oomo phọ ịpe nyina rꞌaloor mítue bọ iḍighinaan ịmi.
Currently Selected:
Bụo aFilipai 2: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
