Nehemaya 5
5
Ọmiine arukulom mọ.
1Esi ekulha amem kụ ọoloogh awe aJu, nmạriir rꞌalephiri, omiigh ọghaaph ghan ịdi opol awe aJu phọ rọmiine bịdi. 2Buniin ụḅem mọ, “Yoor ọmoogh ni rughunotu dị ẹbugh, kụ yoor rọwa ni ịbiakpa ọphamanam aghuḍum mọ ayoor.”
3Ạbueri phọ ụḅem mọ, “Yoor ọpaghan iizo ayoor rꞌaroghoony avain rꞌaruutu ayoor ịlo ọmoogh ịbiakpa dị ẹmanam dị ọkoony iyoor kúghiigh.”
4Kụ ạbunon ọḅem mọ, “Yoor ạale ni ikpoki kụ ọkpiom osogh ọdaam mọ ịlo iizo rꞌaroghoony avain ayoor. 5Yoor abuniin awe ni rꞌạbueri phọ awe aJu phọ. Ạnmuny ayoor ụ́nighe aani ịdipho ạbuphe ạbidi? Kụ yoor motene nmụny ayoor rẹbene. Opol ạnmanyaan ayoor, maal ịdipho ạrebene. Ịyaar oḍighinom ayoor ílho mun loor esi dị iizo phọ rꞌaroghoony avain ayoor mạanyi iyoor.”
6Mem dị mị ạnaghan bọ rạghaaph phọ ạbidi, iphin ni ologhi ạmi 7#Ẹḍua 22.25; Lịv 25.35-37; Dut 23.19, 20kụ mị amiigh ọwaaghi. Mị ạpharanaan buḍiemiom mọ awe phọ rꞌạbuo ịtooghi phọ kụ ạḅeni bịdi mọ, “Nyina rẹmiine bumor anyina!”
Kụ mị ạmagh ookpomoghan oomo awe phọ ịlo ophogh ịiḅaghami phọ 8kụ mị ạḅem mọ, “Esi ịdipho yira orue bọ ni, yira rọḅile ghan ni kogho bumor awe aJu ayira lọ oola siloor ạbidi rạghaagh aruuruen. Kụ nyịidipho nyina rẹkpaariom ghan bumor anyina dị oru aani ni we aJu mọ aalha inyina siloor ạbidi!” Abuḍiemiom mọ uḅoroghian ni bịn ụ́moogh ịyaar ọghaaph.
9Pọ kụ amem dị mị ạḅem mọ, “Ịphen phọ nyina reḍighi bọ ị́nighe. Nyina ẹkpe ọnaghanan Ẹnaan kụ oḍighi ghan ịpe eḍighi bọ riliom. Ịduon phọ, pọ nyina kẹ́ngo ẹpomoghian phọ ayira, ruuruen phọ, ọgel ọmilogh ayira. 10Mị ụngo ni ọgel we phọ mọ ạale ịbiakpa rꞌikpoki ḍịghaagh ạmi, ḅịle rꞌạbuphe odi bọ rꞌạmi rꞌạbuphe ruḍighinaan ghan bọ ịmi iiḍighi. Nyịidipho ọwile yogh rạghaaph ọkpe ịimugh phọ oḅulemi. 11Ịgororoph oomo ịimugh lọ bịdi olhe — mꞌikpoki mꞌịbiakpa mꞌamiim mꞌạmunum ọliv. Iḅulemi ẹngooghi bịdi iizo ạbidi rꞌaroghoony avain rꞌaroghoony ọliv, rꞌaruutu phọ mem mem mọ!”
12Abuḍiemiom mọ ụphagharanaan mọ, “Yoor koḍighi ni ịduon nạ ạḅem bọ. Yoor kọngo ni ruphua phọ oḅulemi dị ọmugh kógun.”
Mị ụmagh ni riil ạrikia phọ, kụ mị ạḅeni buḍiemiom mọ mọ oghunyian risigh ạbidi mọ bụno koḍighi ni ịpe moguanaan bọ. 13Mị ụsighe ni okuughaam esin ạmi kụ mị agun risigh ạbidi. Kụ mị ạḅem mọ, “Ịphen kụ ịdi Ẹnaan kegun tọrobo ọnyo anyina lọ úḍighi ịpe ọdi aguanaan bọ. Ẹnaan kạsighe ni ruutu rꞌoomo aruphua lọ nạ ạmoogh kụ ạwile nyịna ịdipho oopho.”
Tọrobo oye lọ ạrol aani ameeraam mọ, “Ẹrol li ịdipho!” kụ oboom Ọmoogh-we phọ. Kụ abuḍiemiom mọ uḍighi ni ịpe bịdi oguanaan bọ.
Ịma ẹzo aNehemaya
14Sịphe oomo aḍioph rꞌịyal ạsia phọ mị ạda bọ Juda, emiigh kꞌạlha phọ emuneniom bọ ịyaldi phọ Atazakzis aḍighi bọ ọdaam mọ kụ ẹghi ẹteeny ịraardi rꞌịyal ạsia, abumor ạmi rꞌạmi úle ghan eḍien phọ ẹpe ẹkpe bọ lọ ọdaam eelhe kale. 15Tọrobo ọdaam eelhe dị mạrolom ghan ạgada kụ mị agbi bọ oru, ạleti ghan ni we dool, kụ ụkpe ghan nyọdi inyadi ipoḍi asilva ḍio ịlo eḍien rꞌamiim. Ghạlamo abutelhedom ạbidi bịn ụmiine ghan ni we phọ. Kụ mị ụgbatanaan ni eḍighinom ịyaar, ịdi eḍighi bọ mị ụngo Ẹnaan rughuenian. 16Mị ụlogh oomo ịnyaam ạmi ọlogh iikpe phọ, kụ mị ụ́sighe ruphua. Tọrobo oye lọ uḍighinaan ghan ịmi oḍighi ạdaphan aani ọḅile ọlogh iikpe phọ bịn. 17Mị ụngo ghan eḍien oomo amem oniin okuron rꞌooghdi awe aJu rꞌabuḍiemiom ạbidi, ụ́loghom oomo awe dị ọḍua ịnon areelhe dị etuman kụ oru ghan. 18Tọrobo aḍio mị ụze ghan nạm rꞌodiiny igeny iyool-ịga rꞌọoloogh ạsikenegh, kụ tọrobo aḍioph aḍughul-otu, mị ụngo ghan mumoom amiim. Kụ mị ulegheri ni ọdo ẹemor adool dị awe phọ rọmoogh kụ mị úpuru ghan bọ ikpoki ọdaam eelhe phọ ịdipho ẹkpianaan bọ.
19Mị rạaḅereghi ni nyịna Ẹnaan, ụutughianaan ịmi ịma loor ẹmhu oomo ạraraar phọ mị maḍighinaan bọ we phọ ạbuen.
Currently Selected:
Nehemaya 5: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS
